Sobrebibiendo ‘e Dia di Jehova’

“E dia di Jehova ta grandi i masha inspirador di temor, i ken lo por wanta bou di dje?”—JOEL 2:11.

 1. Pakico ‘Jehova su dia inspirador di temor’ mester ta un ocasion di goso?

“INSPIRADOR DI TEMOR”! Asina Joël, profeta di Dios, ta describí e gran “dia di Jehova.” Sin embargo, nos cu ta stima Jehova i cu a yega na dje mediante dedicacion riba e base dje sacrificio di rescate di Jesus no tin nodi krimp di miedu segun cu e dia di Jehova ta acercá. Lo ta un dia spantoso en berdad, pero a la bes un dia di gran salbacion, e dia di liberacion for di un sistema di cosnan malbado cu a plaga humanidad pa miles di aña. Cu mira riba e dia ei, Joël ta insta e pueblo di Dios pa “gosa i alegrá; pasobra realmente Jehova lo haci un cos grandi,” i e ta agregá e garantia: “Tin cu sosodé cu tur cu inbocá e nomber di Jehova lo scapa a salbo.” Anto den e areglo dje Reino di Dios, “lo resultá di tin esnan cu a scapa, manera Jehova a bisa, i entre e sobrebibientenan, cu Jehova ta yama.”—Joël 2:11, 21, 22, 32.

 2. Den e cumplimentu dje propósitonan di Dios, kico ta tuma lugá (a) den “e dia di Señor” (b) riba “e dia di Jehova”?

² Nos no mester confundí Jehova su dia inspirador di temor cu “e dia di Señor” di Revelacion 1:10. E último dia aki ta incluí e cumplimentu dje 16 visionnan describí den Revelacion capítulo 1 pa 22. E ta incluí e tempu dje cumplimentu di tur e sucesonan cu Jesus a predicí como contesta riba e pregunta di su disipelnan: “Na ki tempu e cosnan aki lo ta, i kico lo ta e señal di bo presencia i dje conclusion dje sistema di cosnan?” Jesus su presencia celestial a ser caracterisá riba tera pa ‘guera, hamber, odio, pest i maldad’ spantoso. Segun cu e angustianan aki a aumentá, Jesus a percurá consuelo pa hende temeroso di Dios dor di manda su disipelnan di tempu moderno pa predicá “e bon nobo aki dje reino . . . den tur e tera habitá como testimonio pa tur nacion.” Despues, como un culminacion dje dia di Señor, “e fin” dje sistema di cosnan actual, Jehova su dia inspirador di temor, lo dal aden. (Mateo 24:3-14; Lucas 21:11) Esei lo ta Jehova su dia pa ehecutá huicio lihé riba e mundu corupto di Satanas. “Shelu i tera siguramente lo sagudí; pero Jehova lo ta un refugio pa su pueblo.”—Joël 3:16.

Jehova Ta Actua den e Dianan di Noe

 3. Con condicionnan awe ta paralelo na esnan dje tempu di Noe?

³ E condicionnan di mundu awe ta paralelo cu esnan den “e dianan di Noe” mas cu 4.000 aña pasá. (Lucas 17:26, 27) Na Génesis 6:5, nos ta lesa: “Jehova a mira cu e maldad di hende tabata abundante riba tera i tur inclinacion dje pensamentunan di su curason tabata solamente malu tur ora.” Ki parecido na e mundu djawe! Maldad, golosidad i falta di amor ta abundá tur caminda. Tin biaha nos por pensa cu humanidad a alcansá e nivel mas baho di corupcion. Pero e profecia di apostel Pablo relacioná cu “e último dianan” ta sigui cumpli ketu bai: “Hende malbado i impostornan lo bai di malu pa pió, engañando i siendo engañá.”—2 Timoteo 3:1, 13.

 4. Den tempunan antiguo, ki efecto adoracion falsu tabatin?

⁴ Religion por a trece alivio pa humanidad den tempu di Noe? Al contrario, religion apóstata manera esnan cu a existí e tempu ei lo mester a contribuí grandemente n’e condicionnan ruinoso. Nos promé mayornan a sucumbí n’e siñansa falsu di “e colebra original, esun yamá Diabel i Satanas.” Den e di dos generacion cu a bini for di Adam, “hende a cuminsá inbocá e nomber di Jehova,” aparentemente den forma di blasfemia. (Revelacion 12:9; Génesis 3:3-6; 4:26) Mas despues, angelnan rebelde, cu a stop di duna Dios debocion exclusivo, a materialisá den curpa humano pa asina tene relacion sexual ilegal cu e yu muhernan bunita di hende. E muhernan aki a duna lus na gigantenan híbrido, yamá néfilim, cu a oprimí i intimidá humanidad. Bou dje influencia demoniaco aki, ‘tur carni a ruiná nan caminda riba tera.’—Génesis 6:1-12.

 5. Relacioná cu sucesonan den tempu di Noe, ki spiertamentu urgente Jesus ta duna nos?

⁵ Tabatin un famia sí cu a mantené integridad na Jehova. P’esei, Dios “a warda Noe, un predicadó di husticia, a salbo cu shete otro ora el a trece un diluvio riba un mundu di hende malbado.” (2 Pedro 2:5) E Diluvio ei a prefigurá Jehova su dia inspirador di temor, cu ta marca e fin dje sistema di cosnan aki i di cua Jesus a profetisá: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata. Pasobra mescos cu e dianan di Noe tabata, asina e presencia dje Yu di hende lo ta. Pasobra manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.” (Mateo 24:36-39) Awe, nos ta den un situacion similar, p’esei Jesus ta spierta nos pa ‘presta atencion na nos mes, i pa keda lantá, na tur tempu haciendo súplica pa nos por logra scapa di tur e cosnan aki cu ta destiná pa sosodé.’—Lucas 21:34-36.

Jehova Su Castigu Hudicial Riba Sódoma i Gomora

 6, 7. (a) Kico e sucesonan den tempu di Lot ta prefigurá? (b) Ki spiertamentu cla esaki ta percurá pa nos?

⁶ Mas o ménos shen aña despues dje Diluvio, ora Noe su desendientenan a multiplicá riba tera, fiel Abraham i su subrino Lot tabata testigo ocular di un otro dia inspirador di temor di Jehova. Lot i su famia tabata biba den e stad di Sódoma. E stad aki, i tambe e stad bisiña Gomora, tabata saturá cu inmoralidad sexual repugnante. Materialismo tambe tabata un interes primario, i finalmente a afectá asta Lot su esposa. Jehova a bisa Abraham: “E gritu di keho tocante Sódoma i Gomora siguramente ta fuerte, i nan picá siguramente ta masha grave.” (Génesis 18:20) Abraham a roga Jehova pa spar e stadnan ei pa causa di esnan hustu den nan, pero Jehova a declará cu e no por a haña ni dies hende hustu einan. Dios a manda angelnan yuda Lot i su dos yu muhernan hui bai n’e stad di Zoar den cercania.

⁷ Kico a sosodé despues? Comparando nos “último dianan” cu esnan di Lot, Lucas 17:28-30 ta informá: “Di igual manera, mescos cu a sosodé den e dianan di Lot: nan tabata come, nan tabata bebe, nan tabata cumpra, nan tabata bende, nan tabata planta, nan tabata edificá. Pero e dia cu Lot a sali for di Sódoma a yobe candela i swafel for di shelu i a destruí nan tur. Lo ta mescos riba e dia ei ora e Yu di hende lo ser revelá.” E resultado desastroso pa Sódoma i Gomora riba e dia spantoso ei di Jehova ta transmití un spiertamentu cla na nos den e tempu aki di Jesus su presencia. E generacion moderno di humanidad tambe a “cometé fornicacion den exceso i a bai tras di carni pa uso innatural.” (Hudas 7) Ademas, e actitud sexual inmoral di nos tempu tabata responsabel pa hopi dje ‘pestnan’ cu Jesus a profetisá p’e tempu aki.—Lucas 21:11.

Israel Ta Cosechá e “Bientu di Tempestad”

 8. Te na ki grado Israel a warda e pacto cu Jehova a cera cu nan?

⁸ Na su debido tempu, Jehova a scoge Israel pa ta su “propiedad special entre tur otro pueblo, . . . un reino di sacerdote i un nacion santu.” Pero esaki a dependé di un condicion: nan mester a ‘obedecé su bos estrictamente i warda su pacto.’ (Exodo 19:5, 6) Nan a onra e privilegio magnífico aki? Leu di esei! Ta cierto cu individuonan fiel dje nacion ei a sirbié lealmente—Moises, Samuel, David, Jehósafat, Ezekías, Hosías, i tambe profeta i profetisanan deboto. Pero den su totalidad e nacion tabata infiel. Cu tempu, e reino a parti na dos—Israel i Huda. Por lo general, ámbos nacion a cai den e trampa di adoracion pagano i otro custumbernan di paisnan bisiña cu a desonrá Dios.—Ezekiel 23:49.

 9. Ki huicio Jehova a pronunciá contra e reino rebelde dje dies tribunan?

⁹ Con Jehova a husga asuntunan? Manera semper, el a zona alarma, na armonia cu e principio cu Amos a declará: “E Señor Soberano Jehova lo no haci ni un solo cos a ménos cu el a revelá su asuntu confidencial na su sirbidónan e profetanan.” Amos mes a proclamá calamidad p’e reino di nort di Israel: “Kico, anto, e dia di Jehova lo nificá pa boso? Esei lo ta scuridad, i no lus.” (Amos 3:7; 5:18) Ademas, Amos su compañero profeta Oséas a declará: “Ta bientu ta loke nan ta sigui sembra, i un bientu di tempestad ta loke nan lo cosechá.” (Oséas 8:7) Na 740 P.E.C., Jehova a usa e ehército asirio pa destruí e reino di nort di Israel una bes pa semper.

Jehova Ta Pidi Cuenta di Huda Apóstata

10, 11. (a) Pakico Jehova no a consentí pa pordoná Huda? (b) Ki cosnan detestabel a corumpí e nacion?

¹⁰ Tambe Jehova a manda su profetanan n’e reino di Huda den zuid. Tog, reynan di Huda manera Manases i su sucesor, Amon, a sigui haci loke tabata malu den Su bista, dor di a drama ‘sanger inocente na cantidad hopi grandi i sirbi ídolonan di mest i buig dilanti nan.’ Maske Amon su yu Hosías a haci loke tabata corecto den bista Jehova, e reynan cu a bini despues, i tambe e pueblo, atrobe a haña nan enbolbí den maldad, di manera cu “Jehova no a consentí pa concedé pordon.”—2 Reynan 21:16-21; 24:3, 4.

¹¹ Jehova a declará mediante su profeta Jeremías: “Un situacion spantoso, asta un cos horibel, a ser ocasioná den e pais: E profetanan mes realmente ta profetisá den falsedad; i en cuanto e sacerdotenan, nan ta sigui dominá conforme cu nan podernan. I mi propio pueblo a gusta p’e ta asina; i kico boso lo haci na final di dje?” E nacion di Huda a bira culpabel di sanger te n’e extremo, i su pueblo a ser corumpí cu hortamentu, matamentu, adulterio, huramentu falsu, siguimentu di otro diosnan, i otro cosnan detestabel. E tempel di Dios a bira un “cueba di ladron.”—Jeremías 2:34; 5:30, 31; 7:8-12.

12. Con Jehova a pasa na castigá Jerusalem apóstata?

¹² Jehova a declará: “Tin un calamidad cu mi ta bai trece for di nort [Caldea], sí, un gran derumbe.” (Jeremías 4:6) Asina a sosodé cu el a trece e Potencia Mundial di Babilonia, e tempu ei “e martin di smid di henter e tera,” pa golpia Jerusalem apóstata i su tempel. (Jeremías 50:23) Na 607 P.E.C., despues di un sitiamentu severo, e stad a cai den man di e ehército poderoso di Nabucodonosor. “I e rey di Babilonia a pasa na mata e yunan di [Rey] Sedekías na Ribla dilanti su wowonan, i tur e noblenan di Huda e rey di Babilonia a mata. I el a ciega e wowonan di Sedekías, despues di cua el a mar’é cu cadena di koper pa hib’é Babilonia. I e cas dje rey i e casnan dje pueblo, e caldeonan a kima cu candela, i nan a basha e murayanan di Jerusalem abou. I e resto dje pueblo cu a keda den e stad, i e desertornan cu a pasa p’e, i e resto dje pueblo cu a keda, Nebuzaradan, e hefe di wardaespalda a hiba den exilio na Babilonia.”—Jeremías 39:6-9.

13. Ken a ser salbá den e dia di Jehova di 607 P.E.C., i pakico?

¹³ Un dia inspirador di temor en berdad! Sin embargo, entre esnan cu a ser librá for dje huicio ardiente ei, tabatin algun persona cu a obedecé Jehova. Entre nan tabatin e recabitanan no-israelita, cu na contraste cu e hudiunan a desplegá un spiritu humilde i obediente. E eunuco fiel Ebed-melec, cu a rescatá Jeremías for di morto den un renbak yen di lodo, i Jeremías su escriba leal, Baruc, tambe a ser salbá. (Jeremías 35:18, 19; 38:7-13; 39:15-18; 45:1-5) Tabata na hende asina cu Jehova a declará: “Ami mes conocé bon e pensamentunan cu mi ta pensando pa cu boso, . . . pensamentunan di pas, i no di calamidad, pa duna boso un futuro i un speransa.” E promesa ei tabatin un cumplimentu miniatura na 539 P.E.C. ora hudiunan temeroso di Dios a ser librá dor dje conkistadó di Babilonia, Rey Ciro, i a regresá pa reconstruí e stad i tempel di Jerusalem. Esnan cu awe ta bandoná religion babilónico i cu ta ser restorá na Jehova su adoracion puru tambe por anhelá na un futuro glorioso di pas eterno den Jehova su Paradijs restorá.—Jeremías 29:11; Salmo 37:34; Revelacion 18:2, 4.

E “Tribulacion Grandi” dje Promé Siglo

14. Pakico Jehova a rechasá Israel permanentemente?

¹⁴ Laga nos pasa awor p’e promé siglo E.C. P’e tempu ei e hudiunan restorá a bolbe cai den apostasia. Jehova a manda su Yu unigénito na tera pa ta Esun Ungí, of Mesías, di dje. Durante e añanan 29 pa 33 E.C., Jesus a predicá rond e tera di Israel, bisando: “Boso repentí, pasobra e reino di shelu a yega cerca.” (Mateo 4:17) Ademas, el a reuní i entrená disipelnan pa participá cuné den proclamá e bon nobo dje Reino. Con e gobernantenan dje hudiunan a reaccioná? Nan a difamá Jesus i finalmente a cometé e crímen horendo di lagu’e muri un morto agonisante na un staca di tormento. Jehova a rechasá e hudiunan como su pueblo. E biaha aki e rechaso dje nacion ei tabata permanente.

15. Kico hudiunan repentí tabatin privilegio di cumpli cuné?

¹⁵ Riba e dia di Pentecoste 33 E.C., e Jesus resucitá a drama spiritu santu, i esaki a duna su disipelnan poder pa papia den lenga n’e hudiu i prosélitonan cu a core bini huntu. Dirigiendo su mes n’e multitud, apostel Pedro a declará: “E Jesus aki Dios a resucitá, di cua echo nos tur ta testigo. . . . P’esei laga henter e cas di Israel sa cu tur siguridad cu Dios a hacié Señor i tambe Cristo, e Jesus aki cu boso a claba na staca.” Con e hudiunan sincero a reaccioná? “Nan a ser heridá profundamente den nan curason,” a repentí di nan picánan i a ser bautisá. (Echonan 2:32-41) E predicacion di Reino a acelerá, i den 30 aña el a extendé na “tur creacion cu ta bou di shelu.”—Colosensenan 1:23.

16. Con Jehova a maniobrá sucesonan pa asina ehecutá huicio contra Israel natural?

¹⁶ E tempu a yega awor pa Jehova ehecutá huicio riba su pueblo rechasá, Israel natural. Hopi miles di persona, for di nacionnan na tur parti dje mundu conocí n’e tempu ei, a basha bini n’e congregacion cristian i a ser ungí como e ‘Israel spiritual di Dios.’ (Galationan 6:16) Sin embargo, e pueblo hudiu dje tempu ei, a degenerá den un curso di odio i violencia entre sectanan. Contrario na loke Pablo a skirbi tocante ‘keda sumiso na autoridadnan superior,’ nan a rebelá abiertamente contra e imperio romano cu tabata goberná riba nan. (Romanonan 13:1) Aparentemente Jehova a maniobrá e sucesonan cu a sigui. Den e aña 66 E.C., legionnan romano bou di direccion di General Gallo a avansá pa sitia Jerusalem. E romanonan cu tabata atacando a penetrá asina leu den e stad te cu nan a debilitá e murayanan dje tempel. Segun e registro histórico di Josefo, e stad i e pueblo berdaderamente a experenciá tribulacion.a Pero di ripiente e soldatnan romano a cuminsá hui. Esaki a permití Jesus su disipelnan “hui p’e cerunan,” manera el a spierta nan den su profecia registrá na Mateo 24:15, 16.

17, 18. (a) Pa medio di ki tribulacion Jehova a ehecutá huicio contra e pueblo hudiu? (b) Cua carni a “scapa a salbo,” i esaki ta un sombra di kico?

¹⁷ Sin embargo, e ehecucion completo di Jehova su huicio como culminacion dje tribulacion mester a bini ainda. Na 70 E.C., e legionnan romano, awor bou di direccion di General Tito, a bolbe atacá. E biaha aki e bataya tabata decisivo! E hudiunan, cu tabata bringa asta entre nan mes, no tabata por cu e romanonan. Nan a haci e stad i su tempel pareu cu suela. Mas cu un miyon hudiu debilitá i hambrá a sufri i a muri, i rond di 600.000 cadaver a ser tirá pafó dje portanan dje stad. Despues cu e stad a cai, 97.000 hudiu a ser hibá den cautiverio, di cua hopi a muri despues den espectáculonan di gladiadónan. Di berdad, e único carni cu a ser salbá durante e añanan dje tribulacion ei tabata esun dje cristiannan obediente cu a hui p’e cerunan na otro banda di Riu Jordan.—Mateo 24:21, 22; Lucas 21:20-22.

¹⁸ Asina, Jesus su gran profecia relacioná cu “e conclusion dje sistema di cosnan” a haña su promé cumplimentu, culminando den Jehova su dia pa ehecutá huicio contra e nacion hudiu rebelde na 66-70 E.C. (Mateo 24:3-22) Sin embargo, esei tabata solamente un sombra di “e binimentu dje dia di Jehova, grandi i inspirador di temor,” e tribulacion final cu pronto lo enbolbé henter e mundu. (Joël 2:31) Con lo bo por “scapa a salbo”? E siguiente artículo lo conta nos.

[Nota]

Preguntanan di Repaso

◻ Den ki manera “e dia di Señor” ta relacioná cu “e dia di Jehova”?

◻ Repasando e tempu di Noe, ki spiertamentu nos mester tuma na pechu?

◻ Con Sódoma i Gomora ta percurá un les poderoso?

◻ Ken a ser salbá durante e “tribulacion grandi” dje promé siglo?

[Plachinan na página 15]

Jehova a percurá escape p’e famianan di Noe i Lot, i tambe na 607 P.E.C. i 70 E.C.