Gososo den e Dios di Nos Salbacion

“Lo mi hubilá den Jehova mes; lo mi ta gososo den e Dios di mi salbacion.”—HABACUC 3:18.

 1. Relacioná cu kico Daniel a haña un vision promé cu e caida di Babilonia na 539 P.E.C.?

MAS cu un década promé cu e caida di Babilonia na 539 P.E.C., e profeta di edad, Daniel, a mira un vision emocionante. El a profetisá di sucesonan mundial cu ta hiba directamente n’e guera culminante entre e enemigunan di Jehova i su Rey nombrá, Jesucristo. Con Daniel a reaccioná? E di: “Mi a sinti mi agotá i . . . tur turdí debí na e cos cu mi a mira.”—Daniel 8:27.

 2. Ki conflicto Daniel a mira den vision, i dor cu e ta asina cerca, con bo ta sinti?

² Ke tal di nos? Nos ta biba hopi mas leu den e coriente di tempu! Con nos ta reaccioná ora nos realisá cu e conflicto cu Daniel a mira den vision, esta, Dios su guera di Armagedon, ta masha cerca? Con nos ta reaccioná ora nos dicerní cu e maldad revelá den Habacuc su profecia ta asina plamá, cu destruccion dje enemigunan di Dios ta inevitabel? Probablemente nos ta sinti mescos cu Habacuc mes, manera el a describí den e di tres capítulo di su buki profético.

Habacuc Ta Resa Pidi p’e Misericordia di Dios

 3. Na nomber di ken Habacuc a haci oracion, i ki efecto su palabranan por tin riba nos?

³ Habacuc capítulo 3 ta un oracion. Segun versículo 1, e ta expresá den un cantica di lamento, un cantica di tristesa. E profeta ta ofrecé su oracion como si fuera tabata pa e mes. Pero en realidad, Habacuc ta papia na nomber di Dios su nacion scogí. Awe, su oracion tin un gran nificacion p’e pueblo di Dios, cu ta ocupá den e trabou di predicacion di Reino. Ora nos lesa Habacuc capítulo 3 cu esaki na mente, su palabranan ta yena nos cu un mal presentimentu, pero tambe cu goso. Habacuc su oracion, of cantica di lamento, ta duna nos motibu fuerte pa ta gososo den Jehova, e Dios di nos salbacion.

 4. Pakico Habacuc a haña miedu, i nos por ta sigur cu Dios lo usa su poder den ki manera?

⁴ Manera nos a ripará caba den e dos artículonan anterior, e condicionnan den e tera di Huda tabata masha malu den tempu di Habacuc. Pero Dios lo no a permití e situacion aki sigui. Jehova lo a tuma accion mescos cu el a haci den pasado. Nada straño anto cu e profeta a sclama: “O Jehova, mi a tende e informe tocante bo. Mi a haña miedu, o Jehova, di bo actividad”! Kico e tabata kier men? ‘E informe tocante Jehova’ tabata e historia skirbí di Dios su echonan poderoso, manera na laman Corá, den e desierto i na Jérico. Habacuc tabata bon conocí cu e echonan aki, i nan a dun’é miedu, pasobra e tabata sa cu Jehova lo a bolbe usa su gran poder contra su enemigunan. Ora nos mira e maldad di hende awe, nos tambe sa cu Jehova lo actua manera el a haci den tempu antiguo. Esei ta duna nos miedu dje futuro? Di mes! Tog, nos ta pidi den oracion mescos cu Habacuc a pidi: “Meimei dje añanan, o trec’é na bida! Meimei dje añanan dun’é di conocé. Durante e agitacion, corda mustra misericordia.” (Habacuc 3:2) Na Dios su debido tempu, “meimei dje añanan,” mare e trece su poder milagroso den accion. I na e tempu ei, mare e corda mustra misericordia na esnan cu ta stim’é!

Jehova Ta Marchando!

 5. Con ‘Dios a bini for di Teman,’ i kico esaki ta indicá relacioná cu Armagedon?

⁵ Kico lo sosodé ora Jehova tende nos oracion pa misericordia? Nos ta haña e contesta na Habacuc 3:3 i 4. Promé, e profeta ta bisa: “Dios mes a bini for di Teman, sí, un Santu for di ceru Paran.” Den tempu di Moises, Teman i Paran tabata situá riba e ruta cu Israel a pasa dor di desierto rumbo pa Canan. Miéntras cu e nacion grandi di Israel tabata haci e biahe difícil, a parce cu ta Jehova mes tabata marchando i nada no por a stop e. Djis promé cu Moises a muri, el a bisa: “Jehova—for di Sínai el a bini, i radiante el a sali for di Seir riba nan. El a briya for dje region montañoso di Paran, i huntu cuné tabatin miriadanan [di angel] santu.” (Deuteronomio 33:2) Ora Jehova actua contra su enemigunan na Armagedon, lo tin un despliegue similar di su poder iresistibel.

 6. Ademas dje gloria di Dios, kico cristiannan cu dicernimentu ta mira?

⁶ Habacuc ta declará tambe: “[Jehova] su dignidad a cubri shelu; i e tera a yena cu su alabansa. Pa loke ta su briyo, e tabata mescos cu lus.” Ki un espectáculo magnífico! Ta cierto cu hende no por mira Jehova Dios i keda na bida. (Exodo 33:20) Tog, pa loke ta Dios su fiel sirbidónan, e wowo di nan curason ta blendu ora nan contemplá su magnificencia. (Efesionan 1:18) I cristiannan cu tin dicernimentu ta mira algu mas cu e gloria di Jehova. Habacuc 3:4 ta concluí: “E tabatin dos rayo ta sali for di su man, i eiden su forsa tabata scondí.” Sí, nos ta mira cu Jehova ta cla pa actua, usando su man drechi di fortalesa i poder.

 7. Kico Dios su marcha triunfal ta nificá pa esnan cu ta rebelá contra dje?

⁷ Dios su marcha triunfal ta nificá desaster pa esnan cu rebelá contra dje. Habacuc 3:5 ta bisa: “Pest a sigui bai dilanti dje, i keintura ardiente tabata sali na su pia.” Na aña 1473 P.E.C., ora e israelitanan tabata cerca dje frontera dje Tera Primintí, hopi di nan a rebelá, i a cometé inmoralidad i idolatria. Como resultado, mas cu 20.000 a muri di un pest cu Dios a manda. (Númeronan 25:1-9) Den e futuro cercano, ora Jehova marcha bai na “e guera dje gran dia di Dios e Todopoderoso,” esnan cu a rebelá contra dje tambe lo sufri pa nan picá. Tin di nan cu kisas lo asta muri di pest literal.—Revelacion 16:14, 16.

 8. Segun Habacuc 3:6, kico tin den futuro pa Dios su enemigunan?

⁸ Tende awor e profeta su descripcion gráfico di Jehova di ehércitonan den accion. Na Habacuc 3:6, nos ta lesa: “[Jehova Dios] el a para ketu, p’e sagudí e tera. El a wak, anto a haci e nacionnan bula. I e cerunan eterno el a kibra na werki; e ceritunan di tempu indefiní a buig abou. E andánan di hopi tempu atras ta di dje.” Promé, Jehova ta “para ketu,” manera un general cu ta inspeccioná e campo di bataya. Su enemigunan ta tembla di miedu. Nan ta mira ta ken ta nan oponente; nan ta di shok, i ta bula bai bin di agitá cu nan ta. Jesus a profetisá dje tempu ora “tur e tribunan di tera lo bati nan mes den lamentacion.” (Mateo 24:30) Nan lo realisá, demasiado lat, cu niun hende no por para contra Jehova. Organisacionnan humano lo kibra na werki, asta esnan cu ta parce mes permanente cu “e cerunan eterno” i cu “e ceritunan di tempu indefiní.” Lo ta manera Dios su “andánan di hopi tempu atras,” mescos cu el a yega di actua den tempu antiguo.

 9, 10. Di kico Habacuc 3:7-11 ta recordá nos?

⁹ Jehova su “rabia a bira ardiente” contra su enemigunan. Pero ki arma Jehova lo usa den su guera grandi? Scucha miéntras cu e profeta ta describí nan, bisando: “Den su desnudes bo boog ta sali afó. E huramentu firme di e tribunan ta e cos bisá. Anto bo a parti e tera cu riunan. Ceru a mira bo; nan tabata den dolornan fuerte. Un tormenta di awa cu bos i weerlicht a pasa. E profundidad di awa a saca su zonido. El a hisa su mannan na laira. Solo—luna—a para ketu, den nan habitacion elevá. Bo propio flechanan a sigui bai mescos cu lus. E weerlicht di bo lansa a sirbi como briyo.”—Habacuc 3:7-11.

¹⁰ Den e dianan di Hosué, Jehova a pone solo cu luna para ketu dunando asina un demostracion asombroso di poder. (Hosué 10:12-14) Habacuc su profecia ta corda nos cu Jehova lo usa e mésun poder aki na Armagedon. Na aña 1513 P.E.C., Jehova a demostrá su dominio riba e profundidad di awa di tera ora el a usa laman Corá pa destruí e ehército di fárao. Cuarenta aña despues, e echo cu e awa di riu Jordan tabata haltu no a stroba Israel su marcha triunfal den e Tera Primintí. (Hosué 3:15-17) Den e dianan di e profetisa Débora, awaceru torencial a lastra e garoshinan di guera di Israel su enemigu, Sísara, bai cuné. (Huesnan 5:21) Na Armagedon, Jehova lo tin e mésun forsanan aki di naturalesa na su disposicion, esta, inundacion, awaceru torencial i profundidad di awa. Bos i weerlicht tambe ta den su man, manera un lansa of un baliña yen di flecha.

11. Kico lo sosodé ora Jehova los su gran poder?

¹¹ Berdaderamente, lo ta algu inspirador di temor ora Jehova los e forsa completo di su gran poder. E palabranan di Habacuc ta duna e idea cu anochi lo cambia den di dia i di dia lo ta mas cla cu ora tin pleno solo. Sea cu e descripcion profético aki di Armagedon ta literal of simbólico, un cos ta sigur: Jehova lo prevalecé, i lo e no permití ni un solo enemigu scapa.

Pa Dios Su Pueblo Salbacion Ta Sigur!

12. Kico Dios lo haci cu su enemigunan, pero ken lo ser salbá?

¹² E profeta ta sigui describí con Jehova ta destruí Su enemigunan. Na Habacuc 3:12, nos ta lesa: “Cu denunciacion bo a marcha atrabes dje tera. Den rabia bo a bati e nacionnan.” Tog, Jehova lo no destruí pa loco. Tin hende cu lo scapa. “Bo a sali pa e salbacion di bo pueblo, pa salba bo ungí,” Habacuc 3:13 ta bisa. Sí, Jehova lo salba su fiel sirbidónan ungí. Destruccion di Babilonia e Grandi, e imperio mundial di religion falsu, lo ta completo e ora ei. Sin embargo, awe e nacionnan ta purba caba cu adoracion puru. Djis aki, e forsanan di Gog di Magog lo atacá e sirbidónan di Jehova. (Ezekiel 38:1–39:13; Revelacion 17:1-5, 16-18) E atake satánico ei lo tin éxito? No! Pasobra e ora ei Jehova, rabiá, lo bati su enemigunan, i trapa nan bou di su pia mescos cu grano riba un plenchi di bati cosecha. Pero lo e salba esnan cu ta ador’é cu spiritu i cu berdad.—Juan 4:24.

13. Con Habacuc 3:13 lo cumpli?

¹³ E destruccion cabal dje malbado ta ser profetisá den e palabranan aki: “ [Jehova] bo a kibra e cabes dje cas dje malbado na pida-pida. A saca e fundeshi na cla, sí, te na garganta.” (Habacuc 3:13) E “cas” aki ta e sistema malbado cu a desaroyá bou di influencia di Satanas e Diabel. Lo destros’é. Lo aplastá e “cabes,” esta e lidernan anti-Dios. Lo destruí henter e structura, te na su fundeshi. Lo e no existí mas. Esta un alivio maraviyoso esei lo ta!

14-16. Segun Habacuc 3:14 i 15, kico lo sosodé cu Jehova su pueblo i nan enemigunan?

¹⁴ Na Armagedon, Jehova lo causa confusion entre esnan cu ta purba destruí su “ungí.” Segun Habacuc 3:14 i 15, e profeta ta papia cu Dios i ta bisa: “Cu su propio baranan bo a bora cabes di su guereronan ora nan a basha bini pa plama mi. Nan alegria exaltá tabata manera di esnan cu ta empeñá pa devorá esun afligí den un lugá di sconde. Bo a pasa cu bo cabainan dor di laman, dor dje monton di awanan inmenso.”

¹⁵ Ora Habacuc ta bisa cu “guereronan . . . a basha bini pa plama mi,” e profeta ta papia pa Jehova su sirbidónan ungí. Mescos cu atracadó cu ta warda den emboscada, e nacionnan lo bula sali riba Jehova su adoradónan pa destruí nan. E enemigunan aki di Dios i di su pueblo lo tin “alegria exaltá,” sigur di nan éxito. Cristiannan fiel lo parce di ta débil, manera un persona “afligí.” Pero ora e forsanan anti-Dios lansa nan atake, Jehova lo pone nan hisa nan arma contra nan mes. Nan lo usa nan armanan, esta nan “baranan,” contra nan propio guereronan.

¹⁶ Pero tin mas cos na horizonte. Jehova lo usa forsanan spiritual sobrehumano pa completá e destruccion di su enemigunan. Cu e “cabainan” di su ehército celestial bou di mando di Jesucristo, lo e avansá i pasa victoriosamente dor di “laman” i “e monton di awanan inmenso,” esta, e masanan intrankil di humanidad enemigu. (Revelacion 19:11-21) Anto lo eliminá e malbadonan for di tera. Ki un despliegue potente di poder i husticia divino!

Jehova Su Dia Ta Biniendo!

17. (a) Pakico nos por tin confiansa cu Habacuc su palabranan lo cumpli? (b) Den ki manera nos por ta manera Habacuc miéntras nos ta warda Jehova su gran dia?

¹⁷ Nos por tin sigur cu djis akí e palabranan di Habacuc lo cumpli. Nan lo no tarda. Con abo ta reaccioná riba e loke bo sa aki cu ta bai pasa? Corda, Habacuc a skirbi bou di inspiracion divino. Jehova lo actua, i lo bai tin confusion i desordu riba tera ora esei sosodé. Nada straño anto cu e profeta a skirbi: “Mi a tende, i mi barica a cuminsá agitá; riba e zonido mi lipnan a tembla; putrimentu a cuminsá drenta den mi wesunan; i den mi situacion mi tabata agitá, pa mi spera ketu asina p’e dia di angustia, pa ora e bini contra e pueblo, pa e asaltá nan.” (Habacuc 3:16) Habacuc tabata masha agitá, i esei ta di comprendé. Pero su fe a tambaleá? Di ningun manera! E tabata dispuesto pa warda ketu asina riba e gran dia di Jehova. (2 Pedro 3:11, 12) Esei no ta nos actitud tambe? Sigur cu sí! Nos tin pleno fe cu Habacuc su profecia lo cumpli. Pero, tanten cu esei no sosodé, nos ta warda cu pacenshi.

18. Aunke Habacuc a verwagt dificultad, con su actitud tabata?

¹⁸ Semper guera ta causa dificultad, asta pa esnan cu al final ta sali victorioso. Cuminda lo por bira scars. Hende lo por perde propiedad. Nivel di bida lo por baha. Si esei pasa cu nos, con nos lo reaccioná? Habacuc tabatin un actitud ehemplar, pasobra el a bisa: “Maske e palu di figu mes no florea, i no tin fruta n’e ramanan di druif; maske e obra di e olijfi realmente resultá un fracaso, i e terasanan mes realmente no producí alimento; maske corta e tou di bestia chikí for di e curá, i no tin baca den e curánan di tranké; sin embargo, pa loke ta ami, lo mi hubilá den Jehova mes; lo mi ta gososo den e Dios di mi salbacion.” (Habacuc 3:17, 18) Habacuc tabata realístico; el a verwagt dificultad, kisas hamber. Tog, nunca e no a perde su goso den Jehova, for di ken su salbacion a bini.

19. Ki dificultad hopi cristian ta pasa aden, pero kico nos por ta sigur di dje si nos pone Jehova na promé lugá den nos bida?

¹⁹ Awe, asta promé cu e guera di Jehova contra e malbadonan, un cantidad grandi di hende ta sufri masha hopi. Jesus a pronosticá cu guera, hamber, temblor i pest lo ta parti di ‘e señal di su presencia’ den poder como rey. (Mateo 24:3-14; Lucas 21:10, 11) Hopi di nos compañeronan di fe ta biba den paisnan caminda cumplimentu di Jesus su palabra ta causa afliccion penoso, i como resultado, nan ta sufri di hopi dificultad. Otro cristiannan kisas lo ser afectá di manera similar den futuro. Pa hopi mas di nos, tin hopi chens cu ‘e palu di figu lo no florea’ promé cu e fin bini. Sin embargo, nos sa pakico e cosnan aki ta tuma lugá, i esei ta duna nos forsa. Ademas, nos tin sosten. Jesus a primintí: “Sigui busca, anto, promé e reino i [Dios] Su husticia, i tur e otro cosnan aki lo ser agregá na boso.” (Mateo 6:33) Esei no ta un garantia pa un bida cómodo. Pero sí e ta sigurá nos cu si nos pone Jehova na promé lugá den nos bida, lo e cuida nos.—Salmo 37:25.

20. Apesar di dificultad temporal, kico nos mester ta determiná pa haci?

²⁰ Sea cual sea e dificultadnan temporal cu nos tin cu enfrentá, nos lo no perde fe den Jehova su poder di salba. Hopi di nos rumannan na Africa, Oost Europa i otro lugánan ta enfrentá dificultadnan extremo, pero nan ta sigui ‘hubilá den Jehova.’ Mescos cu nan, laga nos nunca stop di haci esei. Corda cu e Soberano Señor Jehova ta nos Fuente di “energia vital.” (Habacuc 3:19) Lo e no laga nos nunca na caya. Armagedon ta bini sigur, i despues di dje e mundu nobo primintí di Dios ta bini sigur. (2 Pedro 3:13) Anto, “tera lo ta yená cu conocimentu dje gloria di Jehova, sí, mescos cu e awanan ta cubri laman.” (Habacuc 2:14) Tanten cu e tempu maraviyoso ei no yega, laga nos sigui e bon ehempel di Habacuc. Laga nos semper ‘hubilá den Jehova i ser gososo den e Dios di nos salbacion.’

Bo Ta Corda?

• Ki efecto e oracion di Habacuc por tin riba nos?

• Pakico Jehova ta bai marcha?

• Kico Habacuc su profecia ta bisa tocante salbacion?

• Cu ki actitud nos mester warda riba e gran dia di Jehova?

[Plachi na página 23]

Bo sa ki forsa Dios lo usa contra e malbadonan na Armagedon?