“Mantené Boso Mes den Expectativa di Mi”
“‘P’esei, mantené boso mes den expectativa di mi,’ ta e expresion di Jehova.”—SOFONÍAS 3:8.
1. Ki spiertamentu profeta Sofonías a duna, i di ki interes esaki ta pa hende cu ta biba awe?
“E GRAN dia di Jehova ta cerca.” Tabata profeta Sofonías cu a expresá e gritu di spiertamentu aki meimei di siglo siete P.E.C. (Sofonías 1:14) Dentro di 40 pa 50 aña, e profecia a ser cumplí ora e dia di ehecutá Jehova su huicionan a yega riba Jerusalem i riba e nacionnan cu a desafiá Jehova su soberania dor di a maltratá su pueblo. Pakico esaki ta di interes pa hende cu ta biba na fin di siglo 20? Nos ta bibando den e tempu ora Jehova su “gran dia” final ta acercando rápidamente. Mescos cu den tempu di Sofonías, Jehova su “rabia ardiente” ta cla pa cende contra e ekivalente moderno di Jerusalem—cristiandad—i tur e nacionnan cu ta maltratá Jehova su pueblo i cu ta desafiá su soberania universal.—Sofonías 1:4; 2:4, 8, 12, 13; 3:8; 2 Pedro 3:12, 13.
Sofonías—Un Testigo Yen di Curashi
2, 3. (a) Kico nos sa di Sofonías, i kico ta indicá cu e tabata un testigo di Jehova yen di curashi? (b) Ki echonan ta permití nos establecé e tempu i lugá di Sofonías su profetisamentu?
2 Nos sa masha poco di profeta Sofonías, kende su nomber (na hebreo, Tsephan-yah’) ta nificá “Jehova A Sconde (Atesorá).” Sin embargo, na contraste cu otro profetanan, Sofonías a duna su genealogia te n’e di cuater generacion, bayendo atras te na “Ezekías.” (Sofonías 1:1; compará cu Isaías 1:1; Jeremías 1:1; Ezekiel 1:3.) Debí cu esaki ta asina extraordinario, mayoria comentarista ta identificá su bisa-bisa-welo como e fiel Rey Ezekías. Si e tabata, e ora ei Sofonías tabata di desendencia real, i esaki lo a duna su condenacion severo dje prinsnan di Huda asta mas peso i lo a demostrá cu e tabata un testigo i profeta di Jehova yen di curashi. Su conocimentu a fondo dje topografia di Jerusalem i di loke tabata tumando lugá den e corte real, ta indicá cu posiblemente el a proclamá Jehova su huicionan den e capital mes.—Mira Sofonías 1:8-11, notanan.
3 Ta notabel cu aunke Sofonías a proclamá huicionan divino contra e “prinsnan” civil di Huda (noblenan, of hefenan di tribu) i “e yunan dje rey,” e nunca a mencioná e rey mes den su observacionnan crítico.a (Sofonías 1:8; 3:3) Esaki ta indicá cu e hóben Rey Hosías ya caba a mustra un inclinacion na adoracion puru, aunke, en bista dje situacion cu Sofonías a censurá, obviamente ainda e no a cuminsá su reformanan religioso. Tur esaki ta indicá cu Sofonías a profetisá den Huda durante e promé añanan di Hosías, kende a reina for di 659 te 629 P.E.C. E profetisamentu enérgico di Sofonías indudablemente a haci e hóben Hosías mas conciente dje idolatria, violencia i corupcion cu a prevalecé den Huda n’e tempu ei i a animá su campaña mas despues contra idolatria.—2 Crónicanan 34:1-3.
Motibunan pa Jehova Su Rabia Ardiente
4. Den ki palabranan Jehova a expresá su rabia contra Huda i Jerusalem?
4 Jehova tabatin bon motibu pa sinti rabia contra e lidernan i habitantenan di Huda i su stad capital Jerusalem. Mediante su profeta Sofonías, el a declará: “Lo mi extendé mi man contra Huda i contra tur e habitantenan di Jerusalem, i lo mi corta for di e lugá aki e restantenan dje Baal, e nomber dje sacerdotenan dje diosnan stranhero huntu cu e sacerdotenan, i esnan cu ta buig abou riba e daknan ne ehército di cielu, i esnan cu ta buig abou, haciendo huramentu firme na Jehova i haciendo huramentu firme na Malcam.”—Sofonías 1:4, 5.
5, 6. (a) Kico tabata e situacion religioso den Huda den e tempu di Sofonías? (b) Kico tabata e condicion di Huda su lidernan civil i esnan subordiná na nan?
5 Huda tabata manchá cu e ritonan di fertilidad degradante di adoracion di Baal, astrologia demoniaco, i e adoracion di e dios pagano Malcam. Si Malcam ta e mésun dios falsu Molek, manera algun hende ta indicá, e ora ei Huda su adoracion falsu a incluí e sacrificio abominabel di mucha. Tal custumbernan religioso tabata repugnante den bista di Jehova. (1 Reynan 11:5, 7; 14:23, 24; 2 Reynan 17:16, 17) Nan a provocá su furia mas tantu ainda ya cu e idólatranan ainda tabata hura den nomber di Jehova. Lo e no a tolerá tal sushedad religioso mas i lo el a eliminá e sacerdotenan pagano huntu cu esnan apóstata.
6 Ademas, Huda su lidernan civil tabata corupto. Su prinsnan tabata manera ‘leonnan feros cu ta gruña,’ i su huesnan tabata comparabel cu “lobonan” hambrá. (Sofonías 3:3) Esnan subordiná na nan a ser acusá di ta “yena e cas di nan doñonan cu violencia i engaño.” (Sofonías 1:9) Materialismo tabata tur plamá. Hopi tabata saca probecho di situacion pa acumulá rikesa.—Sofonías 1:13.
Dudanan Tocante Dia di Jehova
7. Cuantu tempu promé cu “e gran dia di Jehova” Sofonías a profetisá, i den ki condicion spiritual hopi hudiu tabata?
7 Manera nos a mira caba, e situacion religioso desastroso cu a prevalecé den tempu di Sofonías ta indicá cu el a cumpli cu su trabou como testigo i profeta promé cu Rey Hosías a cuminsá su campaña contra idolatria, rond di aña 648 P.E.C. (2 Crónicanan 34:4, 5) Probablemente, anto, Sofonías a profetisá por lo ménos 40 aña promé cu “e gran dia di Jehova” a bini riba e reino di Huda. Den e espacio di tempu meimei, hopi hudiu a cuminsá haña duda i a ‘hala atras’ for di sirbi Jehova, birando indiferente. Sofonías ta papia di esnan cu “no a busca Jehova i cu no a puntra p’e.” (Sofonías 1:6) Evidentemente, individuonan den Huda tabata indiferente, no preocupando nan mes tocante Dios.
8, 9. (a) Pakico Jehova lo a inspeccioná “hombernan cu ta sinta sin move riba nan kachi-kachi”? (b) Den ki maneranan Jehova lo a duna atencion n’e habitantenan di Huda i nan lidernan civil i religioso?
8 Jehova a haci su propósito conocí pa inspeccioná esnan cu ta pretendé di ta su pueblo. Entre esnan cu a profesá di ta su adoradornan, lo el a busca esnan cu den nan curason tabata carga duda en cuanto su abilidad of intencion pa intervení den asuntunan humano. El a declará: “Mester sosodé n’e tempu ei cu lo mi scudriñá Jerusalem cuidadosamente cu lanterna, i lo mi duna atencion n’e hombernan cu ta sinta sin move riba nan kachi-kachi i cu ta bisa den nan curason, ‘Jehova Io no hasi bon, i lo e no haci malu.’”(Sofonías 1:12) E expresion “hombernan cu ta sinta sin move riba nan kachi-kachi” (un referencia na trahamentu di biña) ta referí na esnan cu a establecé nan mes, manera kachi-kachi den bom di un tinashi, i cu no kier ser molestiá dor di ningun proclamacion di un inminente intervencion divino den e asuntunan di humanidad.
9 Jehova lo a duna atencion n’e habitantenan di Huda i Jerusalem i na nan sacerdotenan cu a mescla su adoracion cu paganismo. Si nan a sinti nan sigur, manera den scuridad di anochi dentro dje murayanan di Jerusalem, lo el a busca nan manera cu lanternanan briyante cu lo a penetrá dor dje scuridad spiritual den cua nan a busca refugio. Lo el a sagudí nan for di nan indiferencia religioso, promé dor di mensahenan impresionante di huicio, despues dor di ehecutá e huicionan ei.
“E Gran Dia dia di Jehova Ta Cerca”
10. Con Sofonías a describí “e gran dia di Jehova”?
10 Jehova a inspirá Sofonías pa proclamá: “E gran dia di Jehova ta cerca. E ta cerca, i tin un puramentu mashá di dje. E zonido dje dia di Jehova ta amargo.” (Sofonías 1:14) Dianan amargo en berdad tabata dilanti tur hende—sacerdote, prins i e pueblo—cu a nenga di haci caso dje spiertamentu i bolbe bek na adoracion puru. Describiendo e dia ei di ehecutá huicio, e profecia ta continuá: “E dia ei ta un dia di furia, un dia di afliccion i di angustia, un dia di tempestad i di desolacion, un dia di scuridad i di tiniebla, un dia di nubia i di tiniebla pisá, un dia di cachu i di señal di alarma, contra e stadnan fortificá i contra e torennan haltu di skina.”—Sofonías 1:15,16.
11, 12. (a) Ki mensahe di huicio a ser pronunciá contra Jerusalem? (b) Prosperidad material lo a salba e hudiunan?
11 Dentro di poco década, e ehércitonan di Babilonia lo a invadí Huda. Jerusalem lo no a scapa. Su áreanan residencial i di negoshi lo a ser desolá. “‘Mester sosodé riba e dia ei,’ ta e expresion di Jehova, ‘e zonido di un gritamentu for dje Porta di Piscá, i un yoramentu for di e segundo districto, i un gran krakmentu for dje cerunan. Boso yora, habitantenan di Maktes [un área di Jerusalem], pasobra tur e personanan cu ta comerciante a ser silenciá; tur esnan cu ta pisa plata a ser cortá.’”—Sofonías 1:10, 11, nota.
12 Nengando pa kere cu e dia di Jehova tabata cerca, hopi hudiu tabata profundamente enbolbí den empresanan comercial lucrativo. Pero mediante su fiel profeta Sofonías, Jehova a predicí cu nan rikesa lo ta “pa botin i nan casnan pa un cunucu desolá.” Nan lo no a bebe e biña cu nan a producí, i “ni nan plata ni nan oro lo por [a] libra nan den e dia di furia di Jehova.”—Sofonías 1:13, 18.
Otro Nacionnan Husgá
13. Ki mensahe di huicio Sofonías a pronunciá contra Moab, Amon i Asiria?
13 Pa medio di su profeta Sofonías, Jehova a expresá tambe su rabia contra e nacionnan cu a maltratá su pueblo. El a declará: “‘Mi a tende e reproche di Moab i e palabranan insultante dje yunan di Amon, cu cua nan a reprochá mi pueblo i a sigui desplegá un aire di arogancia contra nan teritorio. P’esei, mes sigur cu mi ta na bida,’ ta e expresion di Jehova di ehércitonan, e Dios di Israel, ‘Moab mes lo bira mescos cu Sódoma, i e yunan di Amon mescos cu Gomora, un lugá yen di sumpiña, i un mina di salu, i un cunucu desolá, asta pa tempu indefiní . . . I lo e extendé su man den direccion di nort, i lo e destruí Asiria. I lo e haci Nínive un cunucu desolá, un region secu mescos cu e desierto.’”—Sofonías 2:8,9,13.
14. Ki evidencia tin cu e nacionnan stranhero ‘a desplegá un aire di arogancia’ contra e israelitanan i nan Dios, Jehova?
14 Moab i Amon tabata Israel su enemigunan tradicional. (Compará cu Huesnan 3:12-14.) E Piedra Moabita, den e Museo di Louvre na Paris, ta carga un inscripcion conteniendo un declaracion bromador di Rey moabita Mesa. E ta conta orguyosamente con el a capturá vários stad israelita cu yudansa di su dios Kemos. (2 Reynan 1:1) Jeremías, contemporáneo di Sofonías, a papia dje manera cu e amonitanan a ocupá e teritorio israelita di Gad den nomber di nan dios Malcam. (Jeremías 49:1) Pa loke ta Asiria, Rey Salmaneser V a rondoná i capturá Samaria mas of ménos un siglo promé cu e tempu di Sofonías. (2 Reynan 17:1-6) Un poco mas despues, Rey Senákerib a atacá Huda, a capturá hopi di su stadnan fortificá, i asta a menasá Jerusalem. (Isaías 36:1, 2) E bocero dje rey asirio en berdad a desplegá un aire di arogancia contra Jehova ora el a exigí pa Jerusalem entregá su mes.—Isaías 36:4-20.
15. Con Jehova lo a humiyá e diosnan dje nacionnan cu a desplegá un aire di arogancia contra su pueblo?
15 Salmo 83 ta mencioná un cantidad di nacion, incluyendo Moab, Amon i Asiria, cu a desplegá un aire di arogancia contra Israel, i cu a declará na moda di gaba: “Ban i laga nos likidá nan for di ser un nacion, p’e nomber di Israel no ser recordá mas.” (Salmo 83:4) Profeta Sofonías cu curashi a anunciá cu tur e nacionnan halsá aki i nan diosnan lo a ser humiyá dor di Jehova di ehérsitonan. “Esaki ta loke nan lo haña na lugá di nan orguyo, pasobra nan a reprochá i sigui desplegá un aire di arogancia contra e pueblo di Jehova di ehércitonan. Jehova lo ta inspirador di temor contra nan; pasobra e siguramente lo haci tur e diosnan dje tera caba na nada, i e hendenan lo buig su dilanti, cada un for di su lugá, tur e islanan dje nacionnan.”—Sofonías 2:10, 11.
“Mantené Boso Mes den Expectativa”
16. (a) Pa ken e binimentu dje dia di Jehova tabata un fuente di goso i pakico? (b) Ki yamada emocionante a bai p’e resto fiel aki?
16 Miéntras cu indiferencia spiritual, skepticismo, idolatria, corupcion i materialismo a prevalecé entre e lidernan i hopi dje habitantenan di Huda i Jerusalem, aparentemente algun hudiu fiel a scucha na Sofonías su profecianan spiertador. Nan a bira tristu dor dje custumbernan abominabel dje prinsnan, huesnan i sacerdotenan di Huda. Sofonías su pronunciacionnan tabata un fuente di consuelo pa e lealnan aki. En bes di ser un causa di angustia, e binimentu dje dia di Jehova tabata un fuente di goso pa nan, pasobra esei lo a trece un paro na custumbernan detestabel asina. E resto fiel aki a haci caso di Jehova su yamada emocionante: “‘P’esei, mantené boso mes den expectativa di mi,’ ta e expresion di Jehova, ‘te dia mi lanta p’e botin, pasobra mi decision hudicial ta pa reuní nacionnan, pa mi trece reinonan huntu, pa mi por basha riba nan mi denunciacion, tur mi rabia ardiente.’”—Sofonías 3:8.
17. Na ki tempu i con Sofonías su mensahenan di huicio a cuminsá haña cumplimentu riba e nacionnan?
17 Esnan cu a haci caso dje spiertamentu ei no a ser cogé di sorpresa. Hopi a biba pa mira e cumplimentu di Sofonías su profecia. Na 632 P.E.C., Nínive a ser capturá i destruí dor di un coalicion di babilonionan, medonan i tribunan for di nort, probablemente e escitanan. Historiador Will Durant ta relatá: “Un ehército di babilonionan bou di Nabopolasar a djoin un ehército di medonan bou di Ciaxares i un tribu di escitanan for di Caucasus, i cu un facilidad asombroso i rapides a capturá e baluartenan di nort. . . . Cu un solo golpi Asiria a disparcé for di historia.” Esaki tabata exactamente loke Sofonías a profetisá.—Sofonías 2:13-15.
18. (a) Con huicio divino a ser ehecutá riba Jerusalem, i pakico? (b) Con e profecia di Sofonías relacioná cu Moab i Amon a ser cumplí?
18 Hopi hudiu cu a mantené nan mes den expectativa di Jehova a biba tambe pa mira con su huicionan a ser ehecutá riba Huda i Jerusalem. En cuanto Jerusalem, Sofonías a profetisá: “Ai di esun cu ta rebelando i contamindando su mes, e stad opresivo! E no a scucha na un bos; e no a aceptá disiplina. Den Jehova e no a confia. Na su Dios e no a hala cerca.” (Sofonías 3:1, 2) Debí na su infieldad, Jerusalem a ser rondoná dos biaha dor dje babilonionan i finalmente capturá i destruí na aña 607 P.E.C. (2 Crónicanan 36:5, 6, 11-21) Pa loke ta Moab i Amon, segun e historiador hudiu Josefo, den e di cincu aña despues dje caida di Jerusalem, e babilonionan a lucha den guera contra nan i a derotá nan. Despues di esei nan a stop di existí, manera a ser profetisá.
19, 20. (a) Con Jehova a recompensá esnan cu a mantené nan mes den expectativa di dje? (b) Pakico e sucesonan aki ta interesá nos, i kico lo ser considerá den e siguiente artículo?
19 E cumplimentu di esakinan i otro detayenan di Sofonías su profecia tabata un experencia fortalecedor di fe p’e hudiunan i no-hudiunan cu a mantené nan mes den expectativa di Jehova. Entre esnan cu a sobrebibí e destruccion cu a bini riba Huda i Jerusalem tabata Jeremías, e etiopio Ebedmelek, i e cas di Jehónadab, e recabita. (Jeremías 35:18, 19; 39:11, 12, 16-18) E fiel hudiunan den exilio i nan desendientenan, cu a sigui spera riba Jehova, a bira parti dje resto felis cu a ser librá for di Babilonia na 537 P.E.C. i cua bolbe bek na Huda pa reestablecé adoracion puru.—Esdras 2:1; Sofonías 3:14, 15, 20.
20 Kico tur esaki ta nificá pa nos tempu? Den hopi manera e situacion den tempu di Sofonías ta corespondé cu e cosnan detestabel cu ta sosodiendo awe den cristiandad. Ademas, e vários actitudnan dje hudiunan den e tempunan ei ta parecido n’e actitudnan cu nos por haña awe, tin biaha asta entre e pueblo di Jehova. Esakinan ta cosnan cu lo ser tratá den e siguiente artículo.
[Nota]
a Ta parce cu e expresion “yunan dje rey” ta referí na tur e prinsnan real, siendo cu Hosías su mes yunan tabata masha yong n’e tempu ei.
Den Forma di Repaso
◻ Con e situacion religioso den Huda tabata den tempu di Sofonías?
◻ Ki condicionnan a prevalecé entre e lidernan civil, i kico tabata e actitud di hopi dje hendenan?
◻ Den ki manera e nacionnan a desplegá un aire di arogancia contra Jehova su pueblo?
◻ Ki spiertamentu Sofonías a duna Huda i e otro nacionnan?
◻ Con esnan cu a mantené nan mes den expectativa di Jehova a ser recompensá?
[Plachi na página 9]
E Piedra Moabita ta confirmá cu Rey Mesa di Moab a papia palabranan insultante contra Israel di antigwedad
[Rekonosementu]
Piedra Moabita: Musée du Louvre, Paris
[PLachi na página 10]
Como apoyo p’e profecia di Sofonías, e tabla ‘cuneiforme’ (spijkerschrift) aki dje Crónica Babilónico ta registrá e destruccion di Nínive dor di un coalicion di ehércitonan
[Rekonosementu]
Tabla cuneiforme: Cortesia di The British Museum