“No Laga Bo Mannan Cai”

“No laga bo mannan cai. Jehova bo Dios ta meimei di bo. Como Unu poderoso, lo e salba.”—SOFONÍAS 3:16, 17.

 1. Kico un escolástico bíblico a declará relacioná cu e profecia di Sofonías?

E PROFECIA di Sofonías a extendé mas ayá di su promé cumplimentu den siglo siete i seis P.E.C. Den su comentario riba Sofonías, profesor C.F. Keil a skirbi: “E profecia di Sofonías . . . no solamente ta cuminsá cu e anuncio di un huicio universal riba henter mundu, for di cua ta surgi e huicio cu lo bini riba Huda debí na su picánan, i riba e mundu dje nacionnan debí na su hostilidad contra e pueblo di Jehova; sino e ta trata ampliamente cu e dia grandi i teribel di Jehova.”

 2. Ki similaridad tin entre e condicionnan den tempu di Sofonías i e situacion den cristiandad awe?

² Awe, Jehova su decision hudicial ta pa recogé e nacionnan pa destruccion riba un escala muchu mas amplio cu den tempu di Sofonías. (Sofonías 3:8) E nacionnan cu ta pretendé di ta cristian ta particularmente reprensibel den bista di Dios. Mescos cu Jerusalem a paga un prijs caru pa su infieldad na Jehova, asina cristiandad mester duna cuenta na Dios pa su camindanan di libertinahe. E huicionan divino pronunciá contra Huda i Jerusalem den tempu di Sofonías ta aplicá cu asta mas forsa n’e iglesianan i sectanan di cristiandad. Tambe nan a contaminá adoracion puru dor di nan doctrinanan cu ta desonrá Dios, di cua hopi ta di orígen pagano. Nan a sacrificá miyones di nan yunan saludabel riba e altar moderno di guera. Ademas, e habitantenan di Jerusalem antitípico ta mescla e asina yamá cristianismo cu astrologia, prácticanan spiritista i inmoralidad sexual degradante, característicanan di adoracion di Baal.—Sofonías 1:4, 5.

 3. Kico nos por bisa di hopi lider di mundu i gobiernu político awe, i kico Sofonías a profetisá?

³ Hopi dje lidernan político di cristiandad ta stima prominencia den iglesia. Pero mescos cu e “prinsnan” di Huda, un cantidad di nan ta abusá dje pueblo manera “leonnan cu ta gruña” i “lobonan” hambrá. (Sofonías 3:1-3) E compinchinan político di eseinan “ta yena e cas di nan doñonan cu violencia i engaño.” (Sofonías 1:9) Soborno i corupcion ta plamá tur caminda. Pa loke ta gobiernunan político den i pafó di cristiandad, un cantidad aumentante di nan ta ‘desplegá un aire di arogancia’ contra e pueblo di Jehova di ehércitonan, su Testigonan, tratando nan como un. “secta” despreciá. (Sofonías 2:8; Echonan 24:5, 14) Relacioná cu tur e lidernan político ei i nan siguidornan, Sofonías a profetisá: “Ni nan plata ni nan oro lo por libra nan den dia di furia di Jehova; sino cu mediante candela di su celo henter e tera lo ser devorá, pasobra lo e haci un exterminacion, en berdad unu teribel, di tur e habitantenan dje tera.”—Sofonías 1:18.

“Scondí den e Dia di Rabia di Jehova”

 4. Kico ta mustra cu lo tin sobrebibiente dje gran dia di Jehova, pero kico nan mester haci?

⁴ No ta tur e habitantenan di Huda a ser exterminá den siglo siete P.E.C. Di igual manera, lo tin sobrebibientenan di Jehova su gran dia. Na hende asina Jehova a declará pa medio di su profeta Sofonías: “Promé cu e statuto duna lus na algu, promé cu e dia a pasa net manera bagas, promé cu bini riba boso e rabia ardiente di Jehova, promé cu bini riba boso e dia di rabia di Jehova, busca Jehova, boso tur, e mansunan dje tera, boso cu a practicá Su mes decision hudicial. Busca husticia, busca suavedad. Probablemente boso lo ser scondí den e dia di rabia di Jehova.”—Sofonías 2:2, 3.

 5. Den e tempu di fin aki, ken tabata e proménan cu a haci caso dje spiertamentu di Sofonías, i con Jehova a usa nan?

⁵ Den e tempu di fin dje mundu aki, e proménan cu a haci caso dje invitacion profético tabata e resto di israelita spiritual, cristiannan ungí. (Romanonan 2:28, 29; 9:6; Galationan 6:16) Despues di a busca husticia i suavedad i despues di a mustra respet pa Jehova su decisionnan hudicial, nan a ser librá for di Babilonia e Grandi, e imperio mundial di religion falsu, i restorá na fabor divino na 1919. Desde e tempu ei, i particularmente desde 1922, e resto fiel aki ta proclamando sin miedu e huicionan di Jehova contra e iglesianan i sectanan di cristiandad i contra e nacionnan político.

 6. (a) Kico Sofonías a profetisá tocante e resto fiel? (b) Con e profecia aki a ser cumplí?

⁶ Dje resto fiel aki, Sofonías a profetisá: “Ami siguramente lo laga permanecé meimei di bo un pueblo humilde i di condicion abatí, i nan realmente lo tuma refugio den e nomber di Jehova. Respecto e restantenan di Israel, nan lo no haci inhusticia, ni papia mentira, ni lo no ser hañá un lenga mañoso den nan boca; pasobra nan mes lo alimentá i realmente lo drumi curpa di stret, i lo no tin ningun hende cu lo haci nan tembla.” (Sofonías 3:12, 13) E cristiannan ungí aki semper a tene e nomber di Jehova na haltu, pero nan a haci esei specialmente desde 1931, ora nan a adoptá e nomber Testigonan di Jehova. (Isaías 43:10-12) Dor di resaltá e cuestion dje soberania di Jehova, nan a onra e nomber divino, i esaki a resultá di ta un refugio pa nan. (Proverbionan 18:10) Jehova a alimentá nan spiritualmente na abundancia, i nan ta biba sin temor den un paradijs spiritual.—Sofonías 3:16, 17.

“Un Nomber i un Alabansa Entre Tur e Pueblonan”

7, 8. (a) Cua profecia mas a ser cumplí riba e resto di Israel spiritual? (b) Kico miyones di hende a bin reconocé, i kico abo mes ta pensa tocante esaki?

⁷ E resto su apego profundo n’e nomber di Jehova i n’e principionan hustu di su Palabra no a ser pasá por haltu. Hende sincero a bin mira e diferencia entre e conducta dje resto i e corupcion i hipocresia dje lidernan político i religioso dje mundu aki. Jehova a bendicioná “e resto di Israel” spiritual. El a onra nan cu e privilegio di carga su nomber, i el a causa pa nan tin un reputacion excelente entre e pueblonan dje tera. Esaki ta manera Sofonías a profetisá: “‘N’e tempu ei lo mi haci boso drenta, asta den e tempu cu lo mi trece boso huntu. Pasobra lo mi haci boso ser un nomber i un alabansa entre tur e pueblonan dje tera, ora mi reuní bek boso cautivonan dilanti boso wowonan,’ Jehova a bisa.”—Sofonías 3:20.

⁸ Desde 1935, literalmente miyones di hende a bin reconocé cu Jehova su bendicion ta riba e resto. Nan ta sigui gustosamente e hudiunan of israelitanan spiritual aki, bisando: “Nos lo bai cu boso, pasobra nos a tende cu Dios ta cu boso.” (Zacarías 8:23) E “otro carnénan” aki ta mira e resto ungí como “e esclabo fiel i discreto,” nombrá dor di Cristo “riba tur su pertenencianan” terenal. Cu gratitud nan ta tuma parti dje alimento spiritual prepará dor dje clase di esclabo “n’e tempu apropiado.”—Juan 10:16; Mateo 24:45-47.

 9. Ki “idioma” miyones di hende a siña papia, i den ki gran trabou e otro carnénan cu ta sirbiendo “scouder cu scouder” huntu cu e resto ungí ta enbolbí?

⁹ Huntu cu e resto, e miyones di otro carnénan aki ta siñando pa biba i papia na armonia cu e “idioma puru.”a Jehova a profetisa mediante Zacarías: “E ora ei lo mi duna pueblonan e cambio pa un idioma puru, pa nan tur por inbocá e nomber di Jehova, pa nan por sirbié scouder cu scouder.”(Sofonías 3:9) Si, e otro carnénan ta sirbi Jehova unidamente “scouder cu scouder” cu e miembronan ungí dje “trupa chikitu” den e trabou urgente di predica “e bon nobo aki dje reino . . . como testimonio pa tur nacion.”—Lucas 12:32; Mateo 24:14.

“E Dia di Jehova Lo Bini”

10. Kico e resto ungí semper tabata convencí di dje, i kico, como clase, nan lo biba pa mira?

¹⁰ E resto ungí constantemente a tene na mente e declaracion inspirá di apostel Pedro: “Jehova no ta lento en cuanto su promesa, manera algun hende ta considerá lentitud, pero e tin pacenshi cu boso pasobra e no ta deseá pa ningun hende ser destruí sino ta deseá pa tur alcansá repentimentu. Sin embargo, e dia di Jehova lo bini manera un ladron.”(2 Pedro 3:9, 10) Miembronan dje clase di esclabo fiel nunca tabatin duda tocante e binimentu dje dia di Jehova den nos tempu. E gran dia ei lo cuminsá cu e ehecucion di Dios su huicionan contra cristiandad, Jerusalem antitípico, i e restante di Babilonia e Grandi.—Sofonías 1:2-4; Revelacion 17:1, 5; 19:1, 2

11, 12. (a) Ki otro parti dje profecia di Sofonías a ser cumplí riba e resto? (b) Con e resto ungí a haci caso dje yamada pa “No laga bo mannan cai”?

¹¹ E resto fiel ta alegrá di por a ser librá na 1919 for di cautiverio spiritual na Babilonia e Grandi, e imperio mundial di religion falsu. Nan a experenciá e cumplimentu dje profecia di Sofonías: “Grita gososamente, 0 yu muher di Síon! Dal un gritu di alegria, O Israel! Alegrá i hubilá di henter curason, O yu muher di Jerusalem! Jehova a kita e huicionan riba bo. El a apartá bo enemigu. E rey di lsrael, Jehova, ta meimei di bo. Lo bo no teme calamidad mas. Riba e dia ei lo ser bisá na Jerusalem: ‘No tene miedu, O Síon. No laga bo mannan cai. Jehova bo Dios ta meimei di bo. Como Unu poderoso, lo e salba.’”—Sofonías 3:14-17.

¹² Cu e conviccion i prueba abundante cu Jehova ta meimei di nan, e resto ungí a sigui padilanti sin miedu den cumplimentu cu nan comision divino. Nan a predicá e bon nobo dje Reino i a haci Jehova su huicionan conocí contra cristiandad, e resto di Babilonia e Grandi, i henter Satanas su sistema di cosnan malbado. Apesar di tur e dificultadnan, den transcurso dje décadanan desde 1919, nan a obedecé e mandamentu divino: “No tene miedu, O Síon. No laga bo mannan cai.” Sin floha nan mannan, nan a plama miles di miyones di tratado, revista, buki i foyeto anunciando e Reino di Jehova. Nan tabata un ehempel inspirador di fe p’e otro carnénan, kendenan desde 1935, a uni na nan banda.

“No Laga Bo Mannan Cai”

13, 14, (a) Pakico algun hudiu a hala atras for di sirbi Jehova, i con esaki a keda manifestá? (b) Kico lo ta imprudente pa nos haci, i den ki trabou nos no mester laga nos mannan cai?

¹³ Miéntras cu nos ta ‘mantené nos mes den expectativa’ dje gran dia di Jehova, con nos por saca yudansa práctico for dje profecia di Sofonías? Di promé, nos mester tene cuidou pa no bira manera e hudiunan den tempu di Sofonías cu a hala atras for di sigui Jehova debí cu nan tabatin duda tocante e cercania dje dia di Jehova. E hudiunan ei no necesariamente a expresá nan dudanan abiertamente, pero nan curso di accion a revelá cu nan realmente no a kere cu e gran dia di Jehova tabata cerca. Nan a concentrá riba acumulá rikesa en bes di mantené nan mes den expectativa di Jehova.—Sofonías 1:12, 13; 3:8.

¹⁴ Awor no ta tempu pa permití duda saca rais den nos curason. Lo ta masha imprudente pa posponé den nos mente of curason e binida dje dia di Jehova. (2 Pedro 3:1-4, 10) Nos mester evitá di hala atras for di sigui Jehova of di ‘laga nos mannan cai’ den su sirbishi. Esaki ta incluí pa no ‘traha cu un man cu a floha’ den e predicacion di “e bon nobo.”—Proverbionan 10:4; Marco 13:10.

Luchando cu Indiferencia

15. Kico por haci nos man floha den sirbishi di Jehova, i con e profecia di Sofonías a predicí e problema aki?

¹⁵ Di dos, nos mester ta alerto contra e efectonan debilitador di indiferencia. Den hopi pais occidental, falta di interes den cosnan spiritual por bira un causa pa desanimacion cerca algun predicador dje bon nobo. Un indiferencia asina a existí den tempu di Sofonías. Jehova a declará mediante su profeta: “Lo mi duna atencion n’e hombernan cu ta . . . bisa den nan curason, ‘Jehova lo no haci bon, i lo e no haci malu.’” (Sofonías 1:12) Skirbiendo riba e pasashi aki den Cambridge Bible for Schools and Colleges, A. B. Davidson a declará cu esei ta referí na hende cu a “decaí profundamente den un indiferencia insensibel of asta den incredulidad relacioná cu cualkier interferencia di un poder superior den e asuntunan di humanidad.”

16. Den ki condicion mental hopi miembro dje iglesianan di cristiandad ta, pero ki animacion Jehova ta duna nos?

¹⁶ Indiferencia ta e actitud prevalente awe den hopi parti dje tera, particularmente den e nacionnan mas próspero. Asta miembronan dje iglesianan di cristiandad simplemente no ta kere cu Jehova Dios lo intervení den asuntunan humano den nos tempu. Nan ta rechasá nos esfuersonan pa alcansá nan cu e bon nobo dje Reino sea cu un sonrisa sképtico of cu un contesta breve “Mi no ta interesá!” Bou dje condicionnan aki, perseverancia den e trabou di duna testimonio por ta un berdadero desafio. E ta pone nos awante na prueba. Pero pa medio dje profecia di Sofonías, Jehova ta fortalecé su pueblo fiel, bisando: “No laga bo mannan cai. Jehova bo Dios ta meimei di bo. Como Unu poderoso, lo e salba. Lo e hubilá riba bo cu alegria. Lo e bira silencioso den su amor. Lo e ta gososo tocante bo cu gritunan felis.”—Sofonías 3:16, 17.

17. Ki ehempel excelente esnan mas nobo entre e otro carnénan mester sigui, i con?

¹⁷ Ta un echo den e historia moderno di Jehova su pueblo cu e resto, i tambe esnan di mas edad entre e otro carnénan, a realisá un tremendo trabou di recogementu den e último dianan aki. Tur e cristiannan fiel aki a mustra awante den transcurso dje décadanan. Nan no a permití indiferencia di parti dje mayoria den cristiandad desanimá nan. Pues laga esnan mas nobo entre e otro carnénan no permití nan mes ser desanimá dor dje indiferencia pa cu cosnan spiritual cu ta asina prevalente awe den hopi pais. Laga nan no permití nan “mannan cai,” of floha. Laga nan usa tur oportunidad pa presentá E Toren di Vigilancia, Spierta! i otro publicacionnan excelente specialmente diseñá pa yuda hende semehante di carné siña e berdad tocante e dia di Jehova i e bendicionnan cu lo bini.

Sigui Padilanti En Espera dje Gran Dia!

18, 19. (a) Ki animacion pa wanta nos ta haña na Mateo 24:13 i Isaías 35:3, 4? (b) Con nos lo ser bendicioná si nos ta sigui padilanti unidamente den Jehova su sirbishi?

¹⁸ Jesus a declaré: “Esun cu a wanta te n’e fin ta esun cu lo ser salbá.” (Mateo 24:13) Pues, nada di “mannan débil” of “rudianan tambaleante” segun cu nos ta spera e gran dia di Jehova! (Isaías 35:3, 4) E profecia di Sofonías ta declará na un manera animador tocante Jehova: “Como Unu poderoso, lo e salba.” (Sofonías 3:17) Sí, Jehova lo salba e “multitud grandi” atrabes dje etapa final di “e tribulacion grandi,” ora e manda su Yu pa kibra na werki e nacionnan político cu ta sigui “desplegá un aire di arogancia” contra su pueblo,—Revelacion 7:9, 14; Sofonías 2:10, 11; Salmo 2:7-9.

¹⁹ Segun cu e gran dia di Jehova ta yega cerca, laga nos sigui padilanti celosamente, sirbiend’e “scouder cu scouder”! (Sofonías 3:9) Haciendo esei, nos mes i un cantidad incontabel di otronan lo ta den un posicion pa ser “scondí den e dia di rabia di Jehova” i ser testigo dje santificacion di su nomber santu.

[Nota]

Como Repaso

◻ Den ki sentido e situacion religioso den cristiandad ta corespondé cu esun di Sofonías su tempu?

◻ Con hopi lider político awe ta parecido n’e “prinsnan” seglar dje tempu di Sofonías?

◻ Ki promesanan den Sofonías a ser cumplí riba e resto?

◻ Kico miyones di hende a yega na reconocé?

◻ Pakico nos no mester laga nos mannan cai den Jehova su sirbishi?

[Plachi na página 15]

Mescos cu Sofonías, e resto fiel di cristiannan ungí ta proclamando sin miedu e huicionan di Jehova

[Plachi na página 18]

E “otro carnénan” no a laga indiferencia di hende desanimá nan