• Keda Uní ku Otro den Kongregashon
    Bo Por Disfrutá di Bida pa Semper!—Kurso di Beibel Interaktivo

    • Keda Uní ku Otro den Kongregashon

      Ora nos ta huntu ku nos rumannan, nos ta sinti meskos ku Rei David, kende a bisa: “Esta bon, esta dushi ta ora ruman ta biba huntu den union!” (Salmo 133:1) E union ku nos tin no ta bini di su mes. Nos kada un mester hasi esfuerso pa yuda e kongregashon keda uní.

      1. Kiko ta algu remarkabel ku e pueblo di Dios tin?

      Si bo bishitá un kongregashon na un otro pais, kisas lo bo no komprondé e idioma pero lo bo sinti bo na kas entre bo rumannan. Kon bini? Pasobra tur kaminda nos ta studia Beibel usando e mesun publikashonnan. Anto nos ta hasi esfuerso pa mustra amor na otro. Sin importá unda nos ta biba, nos tur ta adorá Yehova den union.—Sofonías 3:9, nota.

      2. Kiko bo por hasi pa kontribuí na e union den kongregashon?

      Nos mester “stima otro intensamente di kurason.” (1 Pedro 1:22) Kon bo por sigui e konseho akí? No enfoká riba e imperfekshonnan di bo rumannan. Mas bien, wak nan bon kualidatnan. Ademas, no pasa tempu solamente ku e rumannan ku tin e mesun interesnan ku bo. Purba di konosé e rumannan ku ta diferente for di bo tambe. Nos mester hasi esfuerso tambe pa kita tur sintimentu i pensamentu ku nos por tin pa loke ta prehuisio.—Lesa 1 Pedro 2:17.a

      3. Kiko bo mester hasi ora bo tin un desakuerdo ku un ruman?

      Ta bèrdat ku nos ta uní; pero debí ku nos ta imperfekto, tin biaha nos por desapuntá otro òf asta laga otro sinti malu. P’esei, e Palabra di Dios ta bisa nos: “Sigui . . . pordoná otro.” Anto e ta agregá: “Meskos ku Yehova a pordoná boso libremente, boso tambe mester hasi meskos.” (Lesa Kolosensenan 3:13.) Aunke nos ta hasi Yehova tristu hopi biaha, tòg e ta pordoná nos. P’esei, e ke pa nos tambe pordoná nos rumannan. Si bo ripará ku bo a hasi òf papia algu ku a laga un persona sintié malu, tuma inisiativa pa drecha asuntu.—Lesa Mateo 5:23, 24.b

      KIKO MAS NOS POR SIÑA?

      Wak kiko bo por hasi pa mantené pas i union den kongregashon.

      Kolekshon di plachi: Un ruman hòmber ta hasi pas ku un otro ruman hòmber. 1. E otro ruman hòmber ta papia malu kuné. 2. E ruman hòmber ta pensa riba loke e otro ruman hòmber a bis’é. 3. E ruman hòmber ta pensa riba kiko Beibel ta bisa ku mester hasi ora hende ofendé bo. 4. E ruman hòmber ta invitá e otro ruman hòmber pa bebe kòfi i ta hasi pas kuné.

      Kiko abo lo hasi pa sera pas ku un ruman?

      4. Vense prehuisio

      Nos ke mustra amor na tur nos rumannan. Pero kisas nos ta haña difísil pa aseptá un ruman ku ta parse diferente for di nos. Kiko por yuda nos den un kaso asina? Lesa Echonan 10:34, 35. Despues, analisá e siguiente preguntanan:

      • Yehova ta aseptá tur sorto di persona ku ke ta su Testigu. Kon bo por imitá Yehova den e manera ku bo ta pensa tokante hende ku ta diferente for di bo?

      • Ki tipo di prehuisio ta komun kaminda bo ta biba? Dikon bo mester evitá di trata hende ku prehuisio?

      Lesa 2 Korintionan 6:11-13. Despues, analisá e siguiente pregunta:

      • Kon bo por haña mas i mas amor pa tur bo rumannan?

      5. Sea kla pa pordoná i hasi pas

      Yehova ta kla pa pordoná nos aunke e mes nunka tin mester pa nos pordon’é. Lesa Salmo 86:5. Despues, analisá e siguiente preguntanan:

      • Kiko e teksto akí ta siña bo tokante e manera ku Yehova ta pordoná?

      • Bo ta gradisidu pa e echo ku Yehova ta pordoná nos? Dikon?

      • Den ki situashon por ta difísil pa nos keda na pas ku nos rumannan?

      Kon nos por imitá Yehova i asina keda uní ku nos rumannan? Lesa Proverbionan 19:11. Despues, analisá e siguiente pregunta:

      • Ora un hende iritá bo òf ofendé bo, kiko bo por hasi pa mehorá e situashon?

      Tin biaha, ta nos ta ofendé otro hende. Kiko nos tin ku hasi ora esei pasa? Pasa e VIDIO. Despues, analisá e siguiente pregunta:

      VIDIO: Yehova Ta Bendishoná Hende Ku Ta Hasi Pas (6:01)

      • Kon e ruman muhé den e vidio a hasi pas?

      6. Enfoká riba e bon kualidatnan di bo rumannan

      Ora nos siña konosé nos rumannan mihó, nos lo haña sa nan puntonan fuerte i nan puntonan ménos fuerte. Kon nos por enfoká riba nan puntonan fuerte? Pasa e VIDIO. Despues, analisá e siguiente pregunta:

      VIDIO: Bira Mas Bunita! (5:10)

      • Kiko por yuda bo mira e bon kualidatnan di bo rumannan?

      Yehova ta enfoká riba nos bon kualidatnan. Lesa 2 Krónikanan 16:9a. Despues, analisá e siguiente pregunta:

      • Ora bo kòrda ku Yehova ta enfoká riba bo bon kualidatnan, kon esei ta laga bo sinti?

      Un renchi di djamanta.

      Asta un djamanta bunita tin defekto; pero tòg e ta keda algu balioso. Di mes manera, aunke tur nos rumannan ta imperfekto, nan ta presioso pa Yehova

      LOKE HENDE SA BISA: “Mi por pordoná sí, pero mi no por lubidá.”

      • Dikon nos mester ta semper kla pa pordoná otro?

      RESÚMEN

      Ora bo ta pordoná i mustra amor na tur bo rumannan, bo por yuda mantené union den kongregashon.

      Repaso

      • Kiko bo mester hasi pa vense prehuisio?

      • Kiko bo mester hasi si bo tin un desakuerdo ku un ruman den kongregashon?

      • Bo ke imitá e manera ku Yehova ta pordoná otro hende? Dikon?

      Meta

      MAS INFORMASHON INTERESANTE

      Den un ilustrashon, Hesus a mustra ku nos no mester husga otro hende. Wak kon e ilustrashon ei por yuda nos.

      Saka e Balki (7:01)

      Nos mester pidi despensa si nos ta sinti ku nos no a hasi nada malu?

      “Pidi Despensa—E Klave pa Hasi Pas” (E Toren di Vigilansia di 1 di novèmber 2002)

      Wak kon dos hòmber ku a lanta den un pais kaminda tin odio rasial a siña stima otro.

      Johny i Gideon: Ántes Enemigu, Awor Ruman (6:42)

      Wak kon bo por resolvé desakuerdo ku bo tin ku otro hende promé ku esei afektá pas di e kongregashon.

      “Resolvé Desakuerdo ku Amor” (E Toren di Vigilansia di mei 2016)

      a Wak Nota 6 pa mira kon amor pa nos rumannan ta motivá nos pa tuma medida pa evitá ku nos ta pega otro ku malesa kontagioso.

      b Wak Nota 7 pa sa kon pa resolvé asuntu di negoshi i asuntu legal.