Yehova Ta Odia Traishon

‘Nos no mester trata nos ruman ku traishon.’—MALAKÍAS 2:10.

 1. Kiko Dios ta rekerí di nos si nos kier risibí bida eterno?

BO KIER biba pa semper? Si bo ta kere den e speransa bíbliko ei, kasi sigur lo bo kontestá: “Klaru ku sí.” Pero si bo kier pa Dios faboresé bo ku bida eterno den su mundu nobo, bo tin ku kumpli ku su rekisitonan. (Eklesiástes 12:13; Huan 17:3) Ta di mas pa spera esei di hende imperfekto? Nò, pasobra Yehova ta kurashá nos ku e siguiente ekspreshon: “Mi tin delisia den lealtat mas ku den sakrifisio, i den e konosementu di Dios, mas ku den ofrendanan kimá.” (Oséas 6:6) P’esei, maske komo hende nos ta faya, tòg nos por kumpli ku Dios su rekisitonan.

 2. Kon hopi israelita a trata Yehova ku traishon?

² Pero no ta tur hende kier hasi Yehova su boluntat. Oséas ta revelá na nos ku hopi israelita mes no tabata kier hasié. Komo nashon nan a bai di akuerdo pa drenta den un pakto, un kombenio, pa obedesé e leinan di Dios. (Éksodo 24:1-8) Pero apénas un poko tempu a pasa ku nan a kuminsá “violá e pakto” dor di kibra e leinan dje pakto. (Oséas 6:7, NW) P’esei Yehova a bisa ku e israelitanan ei tabata “trata ku traishon” kontra dje. (Oséas 6:7) I entre e tempu ei i awor, hopi hende a hasi meskos. Pero Yehova ta odia traishon, sea ta kontra dje mes, òf kontra esnan ku ta stim’é i sirbié.

 3. Kiko nos ta bai analisá den e estudio aki?

³ Oséas no tabata e úniko profeta ku a hala atenshon na e manera ku Dios ta mira traishon. Nos mester desaroyá e mesun punto di bista ku Dios tin si nos kier tin speransa di disfrutá di un bida felis. Den e artíkulo anterior nos a kuminsá analisá gran parti di Malakías su mensahe profétiko, kuminsando ku e promé kapítulo di su buki den Beibel. Awor, laga nos pasa pa e di dos kapítulo dje buki pa nos mira kon e ta duna mas atenshon n’e manera ku Dios ta mira traishon. Maske Malakías tabata papiando di e situashon ku a reina den e pueblo di Dios un par di dékada despues ku nan a bolbe for di nan koutiverio na Babilonia, e di dos kapítulo ei ta hopi signifikativo pa nos awe tambe.

Saserdotenan Reprochabel

 4. Kiko Yehova a spièrta e saserdotenan?

⁴ Kapítulo 2 ta kuminsá ku un reprendementu di Yehova kontra e saserdotenan hudiu ku a hala for di su kaminda hustu. Si nan no a tuma su konseho na pechu i koregí nan manera, ta sigur ku nan lo a sufri konsekuensia grave. Wak kiko e promé dos versíkulonan ta bisa: “‘O saserdotenan, e mandamentu aki ta pa boso. Si boso no skucha, i si boso no disidí den boso kurason pa onra mi nòmber,’ e SEÑOR di ehérsitonan ta bisa, ‘e ora ei lo mi manda un maldishon riba boso, i lo mi maldishoná boso bendishonnan.’” Si e saserdotenan a siña e pueblo Dios su leinan, anto kumpli ku nan, Dios lo a bendishoná nan. Pero awor, debí ku nan a ignorá su boluntat, en bes di bendishon, maldishon tabata na kaminda. Asta e bendishonnan ku e saserdotenan a ekspresá lo a resultá di ta maldishon.

5, 6. (a) Pakiko e saserdotenan tabata mas reprochabel ainda? (b) Kon Yehova a ekspresá su despresio p’e saserdotenan?

⁵ Dikon spesialmente e saserdotenan tabata reprochabel? Versíkulo 7 ta duna un indikashon bon kla: “E lepnan di un saserdote mester preservá konosementu, i hende mester buska instrukshon for di su boka; pasobra e ta e mensahero di e SEÑOR di ehérsitonan.” Mas di mil aña promé, e leinan ku Dios a duna Israel pa medio di Moises a bisa ku e saserdotenan tabatin deber di “siña e yunan di Israel tur e statutonan ku SEÑOR a bisa nan.” (Levítiko 10:11) Lamentablemente, mas despues e eskritor di 2 Krónikanan 15:3 a informá ku “pa hopi dia Israel tabata sin e Dios berdadero, i sin un saserdote pa siña nan i sin Lei.”

⁶ Den tempu di Malakías, den siglo 5 promé ku Era Komun, e saserdotenan tabata aktua meskos. Nan no tabata siña e pueblo e Lei di Dios. P’esei e saserdotenan a meresé pa Dios tene nan responsabel. Wak e palabranan fuerte aki ku Yehova ta dirigí na nan. Malakías 2:3 ta deklará: “Lo mi hunta boso kara ku mèst, e mèst di boso fiestanan.” Esei sí ta un zundrá! Nan tabatin ku hiba mèst di bestia sakrifiká pafó dje kampamentu anto kim’é. (Levítiko 16:27) Pero Yehova ta bisa nan ku en bes di esei, e lo hunta e mèst ei den nan kara. Esei ta mustra bon kla ku e tabata despresiando tantu e sakrifisionan komo esnan ku tabata ofresé nan.

 7. Dikon Yehova tabata rabiá ku e maestronan di Lei?

⁷ Hopi siglo promé ku tempu di Malakías, Yehova a asigná e levitanan pa perkurá p’e tabernakel, i despues p’e tèmpel i e sirbishi sagrado. Nan tabata maestro den e nashon di Israel. Si nan a kumpli ku nan enkargo, esei lo a nifiká bida i pas pa nan i pa e nashon. (Numbernan 3:5-8) Pero e levitanan a pèrdè e temor di Dios ku nan tabatin na kuminsamentu. P’esei Yehova a bisa nan: “Boso a desviá for di e kaminda; boso a hasi hopi hende trompeká pa medio di boso siñansa den e lei; boso a korumpí e aliansa di Levi . . . boso no ta sigui mi kamindanan.” (Malakías 2:8, 9) Dor ku e saserdotenan a keda sin siña e pueblo e bèrdat, i dor ku nan a pone un mal ehèmpel, nan a desviá hopi israelita. P’esei Yehova tabatin bon motibu pa ta rabiá ku nan.

Kumpli ku Dios Su Normanan

 8. Ta di mas pa spera pa hende kumpli ku Dios su normanan? Splika.

⁸ Laga nos no pensa ku Dios mester a tene konsiderashon ku e saserdotenan ei. No pensa ku Dios mester a pordoná nan dor ku nan tabata hende imperfekto, i ku p’esei e no por a spera pa nan kumpli ku su normanan. Echo ta ku hende por kumpli ku Dios su mandamentunan, pasobra Yehova no ta spera nada di nos ku nos no por hasi. Probablemente tabatin saserdote den e tempu ei ku sí a kumpli ku Dios su normanan, i nos sa sigur ku mas despues tabatin unu ku tambe a hasié: Hesus, e gran “sumosaserdote.” (Hebreonan 3:1) Por a bisa ku tur frankesa di dje: “Tabatin instrukshon bèrdadero den su boka, i inhustisia no a wòrdu hañá riba su lepnan; el a kana ku mi den pas i rektitut, i el a hasi hopi bolbe for di inikidat.”—Malakías 2:6.

 9. Ken den nos tempu ta hiba bèrdatnan bíbliko fielmente pa otro hende?

⁹ E rumannan ungí di Kristu, esnan ku tin speransa di bai biba den shelu, tambe tin mas di un siglo ta sirbi komo “un saserdosio santu, pa ofresé sakrifisionan spiritual ku ta aseptabel pa Dios.” (1 Pedro 2:5) Nan ta hiba delantera den hiba bèrdatnan bíbliko pa otro hende. Segun ku bo a siña e bèrdatnan ei, bo no a mira di eksperensia propio ku e lei dje bèrdat a resultá di ta den nan boka? Nan a yuda hopi hende bandoná siñansa religioso falsu, i komo resultado, awor tin miónes di hende rònt mundu ku a siña bèrdatnan di Beibel i tin e speransa di biba pa semper. Na nan turno, e hendenan aki tin e privilegio di siña e lei dje bèrdat na miónes di otro hende.—Huan 10:16; Revelashon 7:9.

Motibu pa Tene Kuidou

10. Pakiko nos tin motibu pa tene kuidou?

¹⁰ Pero nos tin motibu pa tene kuidou. Nos lo por keda sin kapta e lèsnan ku nos por saka for di Malakías 2:1-9. Kada un di nos ta paga tinu pa no tin inhustisia riba nos lep? Por ehèmpel, miembronan di nos famia por konfia di bèrdat den loke nos ta bisa? Nos rumannan spiritual den kongregashon tambe por konfia nos? Por ta fásil pa nos desaroyá e kustumber di paga tinu kon nos ta bisa un kos, pa pone hende kere un kos pa otro, maske téknikamente hende no por bisa ku ta gaña nos a gaña. Òf kisas nos lo por eksaherá òf skonde sierto detaye den asuntu di negoshi. Si nos hasié, Yehova lo no mira nos? I si nos tin kustumber di aktua asina, lo e aseptá sakrifisio di alabansa for di nos lep?

11. Ken spesialmente mester paga tinu?

¹¹ Malakías 2:7 mester sirbi komo un spièrtamentu pa rumannan ku tin e privilegio di siña e Palabra di Dios den kongregashon awe. E ta bisa ku nan lep “mester preservá konosementu, i hende mester buska instrukshon” for di nan boka. E maestronan ei tin un responsabilidat pisá, pasobra Santiago 3:1 ta mustra ku nan “lo wòrdu huzgá ku mas severidat.” Nan mester siña ku vigor i entusiasmo sí, pero loke nan siña mester ta firmemente basá riba e Palabra skirbí di Dios, i instrukshonnan ku nos ta risibí via Yehova su organisashon. Di tal manera nan lo ta “adekuadamente kapasitá pa siña otronan.” Nan ta ser konsehá asin’akí: “Hasi bo sumo posibel pa presentá bo mes aprobá na Dios, un trahadó sin nada di tene bèrgwensa di dje, manehando e palabra dje bèrdat korektamente.”—2 Timoteo 2:2, 15, NW.

12. Rumannan ku ta instruí mester tene kuidou pa nan no hasi kiko?

¹² Si nos no tene kuidou, nos lo por ser tentá pa hinka nos idea i opinionnan personal den loke nos ta siña otronan. Esei por ta peligroso, spesialmente pa un hende ku tin e tendensia di konfia den su propio konklushonnan, asta si nan ta bai kontra loke Yehova su organisashon ta siña. Pero manera Malakías kapítulo 2 ta mustra, ansianonan di kongregashon tin ku pega na konosementu ku ta bini di Dios, i no na nan propio ideanan, pasobra sino e karnénan lo por trompeká. Hesus a bisa: “Ken ku hasi un di e chikitunan aki, ku ta kere den mi, trompeká, ta mihó p’e ku un piedra di mulina pisá wòrdu kologá na su garganta, i ku e wòrdu hogá den profundidat di laman.”—Mateo 18:6.

Kasa ku un Hende Ku No Ta Kreyente

13, 14. Kua ta un dje práktikanan traishonero ku Malakías ta hala atenshon na dje?

¹³ Di versíkulo 10 padilanti, Malakías kapítulo 2 ta hala atenshon na traishon na un manera mas direkto ainda. Malakías ta konsentrá riba dos proseder ku tin di haber ku otro, i bes tras bes e ta deskribí nan usando e palabra “traishon.” Di promé, wak kon Malakías ta introdusí su konseho ku e siguiente preguntanan: “Nos tur no tin un tata? No ta un Dios a krea nos? Pakiko kada un di nos ta trata su ruman ku traishon i ta profaná e aliansa di nos tatanan?” Despues versíkulo 11 ta bisa ku e manera traishonero ku Israel ta aktua ta un profanashon dje santidat di Yehova. Ta kiko nan tabata hasi ku ta asina serio? E versíkulo ei ta menta un dje práktikanan robes ei: Nan a “kasa ku yu muhé di un dios straño.”

¹⁴ Ku otro palabra, maske e israelitanan tabata forma parti di un nashon dediká na Yehova, algun di nan a kasa ku hende ku no tabata ador’é. E konteksto ta yuda nos mira dikon e kos aki tabata asina serio. Versíkulo 10 ta bisa ku nan tur tabatin e mesun tata. Aki e no ta papia di Yakòb (ku despues a ser yamá Israel) ni di Abraham, i ni sikiera di Adam. Malakías 1:6 ta mustra ku ta Yehova tabata e “un tata” ei. E nashon di Israel tabatin un relashon kuné dor dje pakto ku el a sera ku nan antepasadonan. Un dje leinan dje pakto ei a bisa: “No emparentá ku nan; no duna bo yu muhé na nan yu hòmber, ni tuma nan yu muhé pa bo yu hòmber.”—Deuteronomio 7:3.

15. (a) Kon algun hende lo por purba hustifiká e echo ku nan ta kasa ku un persona ku no ta kreyente? (b) Kon Yehova ta ekspresá su mes tokante kasamentu?

¹⁵ Algun hende djawe lo por rasoná asin’akí: ‘E hende ku mi gusta ta hopi agradabel. Ku tempu, kasi sigur e lo bin aseptá adorashon berdadero.’ E tipo di rasonamentu ei ta konfirmá e spièrtamentu inspirá aki: “E kurason ta mas engañoso ku tur kos i ta totalmente korupto.” (Yeremías 17:9) Na Malakías 2:12 Dios ta ekspresá kiko e ta pensa tokante kasamentu ku hende ku no ta kreyente: ‘Pa loke ta e hòmber ku ta hasi esaki, SEÑOR lo kòrt’é kita afó.’ P’esei Beibel ta insistí pa kristiannan kasa solamente “den Señor.” (1 Korintionan 7:39) Bou dje areglo kristian un kreyente no ta ser ‘kòrtá kita afó’ si e kasa ku un hende ku no ta kreyente. Sin embargo, si e persona ku e kasa kuné no bira kreyente, kiko lo pasa kuné ora djis akí Dios trese un fin n’e mundu aki?—Salmo 37:37, 38.

Maltrato di Kasá

16, 17. Kon algun israelita a aktua ku traishon?

¹⁶ Despues Malakías ta sigui papia riba un otro forma di traishon: maltrato di kasá, prinsipalmente dor di divorsiá sin base. Versíkulo 14 di kapítulo 2 ta bisa: “SEÑOR tabata testigu entre abo i e esposa di bo hubentut, kontra kende bo a trata ku traishon, maske ku e ta bo kompañera i bo esposa pa medio di aliansa.” Dor ku esposonan hudiu a aktua na un manera traidor ku nan kasá, nan a pone Yehova su altar ‘tapa ku lágrima.’ (Malakías 2:13) E hòmbernan ei tabata divorsiá sin base legítimo, i tabata bai laga nan kasá di hubentut, probablemente pa kasa ku un hende muhé mas hóben òf ku un pagano. Anto e saserdotenan korupto tabata permití esei sosodé tambe! Pero Malakías 2:16 ta deklará: “‘Mi ta odia divorsio,’ SEÑOR, e Dios di Israel, ta bisa.” Despues Hesus a mustra ku inmoralidat ta e úniko base pa divorsio ku ta hasi e partner inosente liber pa bolbe kasa.—Mateo 19:9.

¹⁷ Reflekshoná riba e palabranan di Malakías i mira kon nan ta apelá na bo kurason i bo sintimentunan básiko di bondat. E ta papia di “bo kompañera i bo esposa pa medio di aliansa.” Kada un dje hòmbernan ei a kasa ku un muhé ku tabata un israelita, un kompañera di adorashon, skoh’é pa bira un esposa stimá, un kompañera pa bida largu. Ounke kasi sigur e kasamentu a tuma lugá tempu ku e hòmber i e muhé tabata hóben ainda, e pakto ku nan a sera ku otro, e kontrato matrimonial, no a bira inválido dor ku hopi tempu a pasa, ni dor ku nan a bira bieu.

18. Kon loke Malakías a konsehá tokante traishon ta válido awe?

¹⁸ E konseho tokante e asuntunan ei tin mes tantu valides awe. Ta tristu ku algun kristian ta ignorá e guia di Dios tokante kasa solamente den Señor. I ta lamentabel tambe ku algun di nan no ta sigui hasi esfuerso pa nan matrimonio keda fuerte. En bes di esei nan ta bini ku èksküs i ta aktua na un manera ku Dios ta odia. Nan ta divorsiá sin base bíbliko pa kasa ku otro hende. Nan a “kansa” Yehova ku e manera ku nan ta aktua. Den tempu di Malakías, esnan ku a ignorá e konseho di Dios tabatin asta e tribilidat di pensa ku ta Yehova su punto di bista no tabatin base. Den un sentido nan tabata bisa: “Unda e Dios di hustisia ta?” Esta trosí nan forma di pensa ta! Laga nos no kai den e trampa ei nunka.—Malakías 2:17.

19. Kon esposo i esposanan kristian por risibí e spiritu di Dios?

¹⁹ Den un nota positivo, Malakías ta mustra ku no ta tur e esposonan tabata trata nan kasá ku traishon. Nan tabatin ‘un restante di e spiritu di Dios den nan.’ (Versíkulo 15) Ta bon ku awe e organisashon di Dios ta yen di hòmber asina ku ta ‘duna onor na nan kasá.’ (1 Pedro 3:7) Nan no ta abusá di nan kasá den sentido físiko ni ku palabra, nan no ta insistí di hasi práktikanan seksual degradante, ni nan no ta desonrá nan kasá dor di flert ku otro hende muhé òf dor di wak pornografia. Ademas, Yehova su organisashon ta bendishoná ku un gran kantidat di esposa kristian fiel ku ta leal na Dios i na su leinan. Tur e hòmber i muhénan ei sa kiko Dios ta odia, i nan ta pensa i aktua di akuerdo ku loke nan sa. Sigui ta manera nan, ‘obedesiendo Dios komo gobernante’ i sigui risibí e bendishon di su spiritu santu.—Echonan 5:29, NW.

20. Ki momento ta yegando serka pa henter humanidat?

²⁰ Pronto Yehova ta bai trese huisio riba henter e mundu aki. Kada hende lo tin ku duna kuenta na dje pa su kreensianan i su echonan. “Kada un di nos lo duna kuenta di su mes na Dios.” (Romanonan 14:12) Pues, un pregunta intrigante ku ta lanta ta: Ken lo sobrebibí e dia di Yehova? E di tres i último artíkulo dje seri aki lo trata e tema ei.

Bo Por Splika?

• Pakiko básikamente Yehova a reprendé e saserdotenan di Israel?

• Dikon e normanan di Dios no ta muchu elevá pa hende por kumpli kuné?

• Pakiko nos mester tene kuidou

ora nos ta instruí hende awe?

• Kua dos práktikanan spesialmente Yehova ta kondená?

[Plachi na página 15]

Den tempu di Malakías, e saserdotenan a ser reprendé dor ku nan no a sigui Yehova su kamindanan

[Plachi na página 16]

Nos mester tene kuidou pa loke nos siña hende ta Yehova su kamindanan, no nos propio ideanan

[Plachi na página 18]

Yehova a kondená e israelitanan ku a divorsiá di nan kasá pa kualke kos chikitu anto kasa ku hende muhé pagano

[Plachi na página 18]

Kristiannan djawe ta onra nan pakto matrimonial