Por Fin—Husticia pa Tur Hende

“Nos lo haci esfuerso pa scucha den maneranan nobo . . . na e bosnan heridá, e bosnan anshá, e bosnan desesperá pa ser tendé. . . . Loke ta resta ta pa duna bida na loke ta den ley: pa haci sigur por fin cu mescos cu tur hende ta nace cu e mésun dignidad dilanti Dios, tur hende ta nace cu e mésun dignidad dilanti hende.”—Discurso di inauguracion di presidente mericano, Richard Milhous Nixon, dia 20 di januari 1969.

ORA reynan, presidentenan i promé ministernan ta tuma nan cargo, nan ta incliná na papia di husticia. Richard Nixon, ex-presidente di Merca, no tabata un excepcion. Pero su palabranan elocuente ta perde nan briyo ora mira nan den e lus obhetivo di historia. Aunke el a primintí di ‘duna bida na ley,’ mas despues Nixon a ser hañá culpabel di a kibra ley i tabata forsá pa renunciá su cargo. Tres década despues, ‘bosnan heridá, anshá i desesperá’ ta sigui sclama pa ser tendé.

Manera numeroso lider cu bon intencion a descubrí, no ta un tarea fácil pa tende bosnan asina i trata cu nan pena. ‘Husticia pa tur’ a resultá di ta un meta difícil pa alcansá. No obstante, hopi siglo pasá, un persona a haci un promesa cu ta merecé nos atencion—un promesa único relacioná cu husticia.

Pa medio di su profeta Isaías, Dios a sigurá Su pueblo cu lo el a manda un “sirbidó” pa nan cu e mes lo a scoge. “Mi a pone mi spiritu den dje,” Jehova a bisa nan. “Husticia pa e nacionnan ta loke lo e producí.” (Isaías 42:1-3) Ningun gobernante humano lo tribi haci un declaracion radical asina, unu cu lo a nificá husticia duradero pa tur nacion. Nos por confia e promesa aki? Un logro extraordinario asina por ser realisá un dia?

Un Promesa cu Nos Por Confia

Un promesa no ta mas confiabel cu esun cu ta hacié. Den e caso aki, no ta ningun ménos cu Dios Todopoderoso mes cu ta declará cu su “sirbidó” lo establecé husticia rond mundu. Distinto di políticonan, Jehova no ta haci promesa aríbariba. ‘Ta imposibel p’e gaña,’ Bijbel ta sigurá nos. (Hebreonan 6:18) “Loke Mi a disidí lo keda kumplí,” Dios ta declará enfáticamente.—Isaías 14:24, Sosiedat Antiano di Beibel.

E registro di Dios su “sirbidó” scogí, Jesucristo, tambe ta reforsá nos confiansa den e promesa ei. Esun cu lo establecé husticia mester stima husticia i biba di un manera hustu. Jesus a laga un registro intachabel atras como un homber cu “a stima husticia, i a odia maldad.” (Hebreonan 1:9) Loke el a bisa, e manera cu el a biba, i asta e manera cu el a muri, tur a proba cu e tabata un homber berdaderamente hustu. Ora Jesus a muri, un oficial di ehército romano, kende aparentemente tabata testigo di tantu Jesus su huicio como su ehecucion, a sintié conmoví pa bisa: “Berdaderamente e homber aki tabata hustu.”—Lucas 23:47.

Ademas di hiba un bida hustu e mes, Jesus a resistí e inhusticia cu tabata asina prevalente den su tempu. El a haci esei, no dor di purba tumba of lanta contra gobiernu, sino dor di siña berdadero husticia na tur hende cu kier a scucha. Su Sermon Riba Ceru ta un splicacion maestral dje manera cu hende mester practicá berdadero husticia i rectitud.—Mateo, capítulo 5-7.

Jesus a practicá loke el a predicá. E no a despreciá leprosonan desafortuná, e ‘intocabelnan’ dje sociedad hudiu. Mas bien, el a papia cu nan, a mishi cu nan i asta a cura nan. (Marco 1:40-42) Tur hende cu el a topa, incluso esnan pober i oprimí, tabata importante p’e. (Mateo 9:36) “Bini cerca mi, boso tur cu ta afaná i cargá, i lo mi refrescá boso,” el a bisa nan.—Mateo 11:28.

Riba tur cos, Jesus a nenga di permití e inhusticia rond di dje corumpié of amargu’é. Nunca el a paga malu cu malu. (1 Pedro 2:22, 23) Asta ora e tabatin dolor agonisante, el a haci oracion na su Tata celestial na fabor di e mésun soldánan cu a clab’é na staca. El a roga: “Tata, pordoná nan, pasobra nan no sa kico nan ta haciendo.” (Lucas 23:34) Jesus sigur a “clarificá na e nacionnan loke ta husticia.” (Mateo 12:18) Ki prueba mas grandi nos tin dje deseo di Dios pa establecé un mundu hustu cu e ehempel bibu di su mes Yu?

Por Vence Inhusticia

Den e mundu djawe tambe nos tin prueba bibu cu por vence inhusticia. Como personanan individual, i tambe como organisacion, Testigonan di Jehova ta haci esfuerso pa dominá prehuicio, parcialidad, racismo i violencia. Considerá e siguiente ehempel.

Pedroa tabata haña cu accion subversivo tabata e único manera pa trece husticia na Pais Vasco, e region di Spaña caminda e tabata biba. Pa logra esaki el a bira miembro di un organisacion terorista cu a dun’é entrenamentu paramilitar na Francia. Asina cu el a completá su entrenamentu, nan a mand’é forma un unidad terorista i bula un kazerne di polis. Su tim tabata preparando e explosivonan caba, ora polis a arest’é. El a pasa 18 luna den prizon, pero asta tras di trali el a sigui cu su actividad político, participando den welga di hamber i cortando su pols na un ocasion.

Pedro a pensa cu e tabata luchando pa husticia. Anto despues el a bin conocé Jehova i su propósitonan. Miéntras Pedro tabata den prizon, su esposa a cuminsá studia Bijbel cu Testigonan di Jehova, i ora el a sali liber, su esposa a invit’é pa bai un di nan reunionnan. El a gusta e ocasion asina tantu cu el a pidi pa un studio di Bijbel, un studio cu a hib’é na haci cambionan grandi den su manera di mira cosnan i su moda di biba. Finalmente, na 1989, tantu Pedro como su casá a bautisá.

“Mi ta gradicí Jehova cu nunca realmente mi a mata un hende durante mi añanan como terorista,” Pedro ta bisa. “Awor mi ta usa Dios su spada di spiritu, Bijbel, pa duna hende un mensahe di berdadero pas i husticia—e bon nobo dje Reino di Dios.” No hopi tempu pasá, Pedro, kende awor ta sirbi como un anciano di Testigonan di Jehova, a bishitá e mésun kazerne di polis cu e tabatin intencion di destruí. Pero e biaha aki el a bai cu e propósito di predicá un mensahe di pas n’e famianan cu ta biba ei.

Testigonan di Jehova ta haci e cambionan aki pasobra nan ta anhelá un mundu hustu. (2 Pedro 3:13) Aunke nan tin pleno confiansa den e promesa di Dios di efectuá esaki, nan ta realisá cu nan tin un obligacion tambe pa biba na armonia cu husticia. Bijbel no ta laga duda cu Dios ta spera pa nos cumpli cu nos parti.

Sembrando Simianan di Husticia

Ta cierto cu ora nos haña nos mes confrontá cu inhusticia, nos por sinti nos incliná na sclama: “Unda e Dios di husticia ta?” Esei tabata e sclamacion dje hudiunan di Malakías su tempu. (Malakías 2:17) Dios a tuma nan keho na serio? Al contrario, esei a pone Dios sinti su mes ‘fadá’ pasobra, entre otro cosnan, nan mes tabata trata di un manera traicionero cu nan esposanan cu a bira bieu, divorciando di nan riba e pretextonan di mas insignificante. Jehova a expresá su preocupacion tocante ‘e esposanan di nan hubentud, cu ken nan a trata di un manera traicionero, aunke nan tabata nan socio i e esposanan di nan pacto.’—Malakías 2:14.

Nos tin motibu válido pa keha tocante inhusticia si nos mes ta actua inhustamente? Di otro banda, si nos trata di imitá Jesus dor di eliminá prehuicio i racismo for di nos curason, dor di ta imparcial i amoroso cu tur hende, i dor di no paga malu cu malu, nos ta mustra cu di berdad nos ta stima husticia.

Si nos kier cosechá husticia, Bijbel ta urgi nos pa ‘sembra simia den husticia.’ (Oséas 10:12) Sin importá con chikitu e por parce, tur victoria personal riba inhusticia ta importante. Manera Martin Luther King, Jr., a skirbi den su Carta for di Prizon di Birmingham: “Inhusticia cualkier caminda ta un menasa pa husticia tur caminda.” Ta esnan cu ta “busca husticia” Dios ta scoge pa heredá su hustu mundu nobo cu lo bini pronto.—Sofonías 2:3.

Nos no por edificá nos speransa pa husticia riba e fundeshi instabil di promesanan humano, pero sí nos por confia e palabra di nos Creador amoroso. P’e motibu ei, Jesus a bisa su siguidónan pa sigui pidi p’e Reino di Dios bini. (Mateo 6:9, 10) Jesus, e Rey nombrá dje Reino ei, lo “libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba.”—Salmo 72:12, 13.

Ta mas cu claro cu inhusticia no ta permanente. E gobernacion di Cristo riba henter e tera lo vence inhusticia pa semper, manera Dios ta sigurá nos mediante su profeta Jeremías: “E tempu ta bini ora lo mi cumpli cu e promesa cu mi a haci . . . N’e tempu ei lo mi scoge como rey un desendiente hustu di David. E rey ei lo haci loke ta recto i hustu den henter e tera.”—Jeremías 33:14, 15, Today’s English Version.

[Nota]