Hesus A Saka Demoño for di un Mucha Hòmber

Ora Hesus, Pedro, Santiago i Huan a baha for di e seru, nan a topa un multitut di hende. Ta parse ku tabatin un problema. Vários eskriba a rondoná e otro disipelnan i tabata diskutí ku nan. Ora e hendenan a mira Hesus ta bini, nan a keda sorprendí i a kore bai kumind’é. Hesus a puntra e hendenan: “Ta kiko boso ta diskutí ku nan?”—Marko 9:16.

Un hòmber den e multitut a kai na rudia dilanti di Hesus i a kuminsá splik’é: “Maestro, mi a trese mi yu serka bo, pasobra e tin un spiritu ku ta hasié muda, i na unda ku e spiritu gar’é, e ta tir’é na suela, i e mucha ta skuma na boka, morde riba djente i pèrdè forsa. Mi a pidi bo disipelnan pa saka e spiritu, ma nan no tabata por.”—Marko 9:17, 18.

Aparentemente, e eskribanan tabata kritikando e disipelnan di Hesus pasobra nan no por a saka e demoño for di e mucha. Podisé, nan tabata hasi chèrchi di e disipelnan. P’esei, Hesus no a kontestá e tata mesora, kende tabata masha preokupá i tristu. Mas bien, el a dirigí su mes na e multitut, bisando: “O generashon sin fe i pèrvèrso, pa kuantu tempu mas mi tin ku keda serka boso? Pa kuantu tempu mi tin ku soportá boso?” Bon mirá, e palabranan fuerte akí di Hesus tabata dirigí na e eskribanan, kendenan, den Hesus su ousensia, tabata buska su disipelnan problema. Despues, Hesus a bisa e tata di e mucha kende tabata tur preokupá: “Trese bo yu akinan pa mi.”—Mateo 17:17.

Ora e mucha tabata biniendo serka Hesus, e demoño a tir’é na suela i pon’é kai steipi. E mucha hòmber a keda lora abou i skuma na boka. Hesus a puntra e tata: “Kuantu tempu e tin e kos akí kaba?” E tata a kontest’é: “For di chikitu, i ta kada biaha e spiritu ta tir’é den kandela i tambe den awa pa mat’é.” Anto e tata a roga Hesus: “Si bo por hasi algu, tene duele di nos i yuda nos.”—Marko 9:21, 22.

E tata tabata desesperá pasobra ni e disipelnan di Hesus no por a yuda nan. Hesus a konsol’é i bis’é: “Kon bo ke men ‘si bo por’? Pa un hende ku tin fe, tur kos ta posibel.” Mesora e tata di e mucha a grita: “Mi tin fe! Yuda mi kaminda mi falta fe!”—Marko 9:23, 24.

Hesus a ripará ku mas i mas hende tabata kore bini serka dje, i den bista di tur e hendenan akí el a skual e demoño, bisando: “Spiritu ku ta hasi hende muda i surdu, mi ta ordená bo pa sali for di e mucha i no drenta den dje mas.” Ora e spiritu a sali, e spiritu a pone e mucha dal un gritu i haña un steipi pisá; e mucha a keda manera morto. E hendenan ku tabata pará einan a bisa: “El a muri!” (Marko 9:25, 26) Hesus a kohe e mucha na su man i lant’é. I e mucha tabata kurá. (Mateo 17:18) E hendenan a keda asombrá.

Mas promé sí, ora Hesus a manda su disipelnan bai prediká, nan tabatin poder pa saka demoño. P’esei, ora nan tabata nan so ku Hesus na un kas, nan a puntr’é: “Pakiko nos no por a sak’é?” Hesus a splika nan ku nan tabata falta fe. El a bisa nan: “Ta ku orashon so por saka e sorto akí; ku nada otro.” (Marko 9:28, 29) Sí, pa nan por a saka e demoño poderoso akí, nan mester tabatin un fe fuerte i nan mester a hasi orashon pidi Yehova su yudansa poderoso.

Na final Hesus a bisa nan: “Di bèrdat mi ta bisa boso: Si boso fe ta djis e tamaño di un pipita di mòster, boso lo bisa e seru akí: ‘Kita for di aki, bai aya,’ i lo e kita, i nada lo no ta imposibel pa boso.” (Mateo 17:20) Sí, fe tin poder!

Den bida, nos por haña nos ku opstákulo- i difikultatnan ku por stroba nos di progresá den nos sirbishi na Yehova. Esakinan por parse difísil pa vense, mes difísil ku ta pa move un seru literal. Pero si nos tin fe, nos por vense nan.