Hala Serka Dios

Un Wardadó Ku Ta Interesá den Bo

Mateo 18:12-14

‘DIOS ta interesá den mi?’ Si bo a yega di hasi bo mes e pregunta ei, bo no ta e úniko. Hopi di nos ta konfrontá difikultat. P’esei, de bes en kuando, nos por puntra nos mes si e Kreadó di e universo inmenso aki ta interesá den loke ta pasa ku nos. Loke nos ke sa ta: Yehova Dios ta interesá den nos komo hende individual? Ora e tabata na tera, Hesus, kende konosé Yehova mihó, a duna un ilustrashon ku ta revelá e kontesta alentador riba e pregunta ei.

Komparando e interes ku Yehova tin den hende ku e kuido ku un wardadó ta duna su karnénan, Hesus a bisa: “Si un hende tin shen karné, i ún di nan a pèrdè, e no ta laga e nobent’i nuebenan riba e serunan i bai buska esun ku a pèrdè? I si sosodé ku e hañ’é, di bèrdat mi ta bisa boso, e ta regosihá mas pa motibu di esun ei, ku pa motibu di e nobent’i nuebenan ku no a pèrdè. Asina anto, no ta e boluntat di boso Tata ku ta den shelu pa ún di e chikitunan aki peresé.” (Mateo 18:12-14) Laga nos wak kon Hesus a usa e ilustrashon aki pa mustra e kuido tierno ku Yehova ta duna kada un di Su adoradónan.

E wardadó di karné a sintié responsabel pa kada un di su karnénan. Si un karné a dual bai leu for di e tou, lo e tabata sa kua di nan falta. E tabata konosé kada karné na e nòmber ku el a dun’é. (Juan 10:3) E wardadó di karné ku ta preokupá pa su karnénan lo a sigui buska su karné pèrdí te ora ku e karné ei tabata bèk den e tou. Pero no ta asina ku e tabata pone e otro 99 karnénan ku a keda atras den peliger debí ku e ta bai buska esun pèrdí. Hopi biaha, wardadónan di karné tabata keda huntu i a permití nan tounan di karné meskla ku otro.a P’esei, e wardadó di karné ku a bai buska un karné pèrdí por a laga su otro karnénan temporalmente serka e otro wardadónan di karné. Ora el a haña e karné ku a pèrdè, ileso òf sin ku el a sufri daño, e wardadó di karné tabatin motibu pa alegrá. E tabata pone e karné, ku tabata tur spantá, riba su skouder i hib’é bek na e siguridat i protekshon di e tou.—Lukas 15:5, 6.

Ora Hesus a splika e ilustrashon aki, el a bisa ku Dios no ke pa ni “ún di e chikitunan aki peresé.” Mas promé, Hesus a bisa su disipelnan pa tene kuidou pa nan no pone ni “ún di e chikitunan aki, ku ta kere den [dje]” trompeká. (Mateo 18:6) Kiko anto, e ilustrashon di Hesus ta siña nos tokante Yehova? E ta siña nos ku Yehova ta un Wardadó ku ta intensamente interesá den kada un di su karnénan, inkluso e “chikitunan”—esnan ku por parse insignifikante segun e punto di bista di mundu. Sí, den bista di Dios, kada un di su adoradónan ta un persona úniko i di gran balor.

Si bo ke sa sigur ku bo ta di gran balor den bista di Dios, dikon no buska pa siña mas tokante e Gran Wardadó, Yehova Dios, i pa sa kon bo por hala mas serka dje? Ora bo hasi esei, bo por haña e mesun konfiansa ku apòstel Pedro, kende personalmente a tende Hesus relatá e ilustrashon di e karné pèrdí. P’esei, Pedro a skirbi despues: ‘Tira tur boso preokupashon riba Dios, pasobra e ta perkurá pa boso.’—1 Pedro 5:7.

[Nota]