Hesus A Duna Mas Konseho Importante

Hesus a kaba di ilustrá ki aktitut su disipelnan mester tin. El a mustra ku nan mester ta manera mucha, esta, personanan humilde ku no ta wòri ku nivel sosial. El a bisa ku su disipelnan mester risibí ‘mucha den su nòmber’ pasobra di e manera ei nan lo a ‘risibí e tambe.’—Mateo 18:5.

E apòstelnan lo a sinti ku Hesus a korigí nan pasobra poko promé nan tabata diskutí ku otro enkuanto ken tabata esun di mas importante entre nan. Pero apòstel Huan a kuminsá papia di algu otro ku a kaba di sosodé. El a bisa Hesus: “Maestro, nos a mira un hòmber ta saka demoño hasiendo uso di bo nòmber, i nos a purba di stòp e, pasobra e no ta sigui bo huntu ku nos.”—Lukas 9:49.

Akaso Huan tabata pensa ku ta e apòstelnan so tabatin e outoridat pa saka demoño òf pa kura hende? Si ta e apòstelnan so tabatin e outoridat ei, kon bini e hòmber hudiu ei por a saka demoño anto? Segun Huan, e hòmber ei no tabatin mag di efektuá obra poderoso pasobra e no tabata sigui Hesus huntu ku nan.

Pero pa Huan su sorpresa, Hesus a bisa: “No purba di stòp e, pasobra no tin ningun hende ku lo hasi obra poderoso den mi nòmber i ku djis despues lo por bira papia malu di mi, pasobra esun ku no ta kontra nos ta na nos banda. Pasobra ken ku duna boso un kòpi di awa bebe pa motibu ku boso ta pertenesé na Kristu, di bèrdat mi ta bisa boso, lo e no keda sin haña su rekompensa.”—Marko 9:39-41.

E hòmber no mester a kana ku Kristu pa duna prueba ku e tabata na Kristu su banda. E tempu ei, e kongregashon kristian no a ser formá ainda. Pues, e echo ku e hòmber no tabata kana huntu ku Hesus no a nifiká ku e tabata kontra Hesus ni ku e tabata promové adorashon falsu. Opviamente, e hòmber tabatin fe den Hesus. I loke Hesus a bisa ta indiká ku e hòmber ei lo a haña su rekompensa.

Di otro banda, e situashon lo a bira serio si e hòmber lo a trompeká, òf kai for di fe, pa motibu di loke e apòstelnan a bisa i hasi. Hesus a bisa: “Ken ku pone un di e chikitunan akí ku ta kere den mi trompeká, lo tabata mihó p’e si nan a kologá un piedra di mulina na su garganta i bent’é den laman.” (Marko 9:42) Hesus a mustra ku si algu di sumo balor, manera bo man, pia òf wowo, ta pone bo trompeká, bo mester kap e òf sak’é benta afó. Sí, ta mihó bo drenta e Reino di Dios sin nan ku bo keda ku nan i ser tirá den Gehena (Vaye di Hinom). Muy probablemente, e apòstelnan tabata konosé e vaye ei, òf lugá di kima sushi, ku tabata situá pafó di Herúsalèm. Pues, nan mester a komprondé ku Hesus tabata referí na destrukshon eterno.

Despues, Hesus a duna e siguiente spièrtamentu: “Wak pa boso no despresiá un di e chikitunan akí, pasobra mi ta bisa boso ku nan angelnan den shelu semper ta mira kara di mi Tata.” Awor, kon importante “e chikitunan akí” ta pa su Tata? Pa splika esei, Hesus a konta nan un ilustrashon tokante un hòmber ku a pèrdè un karné. E hòmber akí tabatin 100 karné. Pero el a laga su 99 karnénan pa bai buska e karné ku a pèrdè. Ora el a haña e karné, el a alegrá mas pa motibu di esun ei ku pa motibu di e 99 karnénan ku no a pèrdè. Na final Hesus a bisa nan: “Asina tambe mi Tata ku ta den shelu no ta deseá pa ni ún di e chikitunan akí bai pèrdí.”—Mateo 18:10, 14.

Hesus, kisas pensando riba e diskushon ku su disipelnan tabatin tokante kua di nan lo tabata esun di mas grandi, a urgi su disipelnan: “Boso mester tin salu den boso mes, i keda na pas ku otro.” (Marko 9:50) Salu ta duna kuminda bon smak. Ora un persona su palabranan ta ku grasia, na moda di papia sasoná ku salu, ta mas fásil pa un hende hasi kaso di loke e ta bisa. Asina, nan por mantené pas, loke pleitu no por logra.—Kolosensenan 4:6.

Tin ora, por surgi problema serio. I Hesus a mustra kon nos mester trata ku esakinan. El a bisa: “Si bo ruman kometé un piká kontra bo, bai i mustr’é riba su fout, abo kuné so. Si e skucha bo, bo a gana bo ruman bèk.” Awor, kiko si e no skucha? Hesus a bisa: “Bai ku un òf dos hende mas pa asina pa medio di boka di dos òf tres testigu, tur asuntu por keda konfirmá.” Si esei no yuda resolvé e asuntu, e ora ei mester papia ku “e kongregashon,” esta, ansianonan kendenan por yuda resolvé e asuntu. Awor kiko si ainda e persona no skucha? Hesus a bisa: “Lag’é ta pa bo meskos ku un hende di e nashonnan i meskos ku un kobradó di belasting,” ku kendenan e hudiunan no tabatin trato.—Mateo 18:15-17.

Ansianonan semper mester pega na e Palabra di Dios. P’esei, si nan yega na e konklushon ku un persona a kometé un mal echo i e mester di disiplina, loke nan disidí “lo ta mará kaba den shelu.” Pero si nan ta haña ku e persona ta inosente, nan desishon “lo ta di lòs kaba den shelu.” E konsehonan akí lo a resultá di gran benefisio pa e kongregashon kristian ku lo a ser establesí despues. Relashoná ku kasonan serio asina, Hesus a bisa: “Kaminda dos òf tres ta reuní den mi nòmber, einan mi ta meimei di nan.”—Mateo 18:18-20.