Dunamentu Ku Ta Agradá Dios

HESUS i su disipelnan tabata disfrutá di un kuminda delisioso na Betania huntu ku vários amigu yegá manera Maria, Marta i Lázaro kende resientemente a ser resusitá. Ora Maria a kohe un liber di zeta karu i a hunta Hesus su pianan kuné, Hudas Iskariote a rabia i a protestá. El a bisa: “Pakiko e perfume aki no a wòrdu bendí pa tres shen denario [ekivalente na mas o ménos un aña di salario] i duná na hende pober?” Mesora e otronan tambe a kuminsá keha e mesun kos. Juan 12:​1-6; Marko 14:​3-5.

Sin embargo, Hesus a kontestá: “Lag’é. . . . Pasobra e pobernan boso tin semper serka boso, i ki ora ku boso kier boso por hasi bon na nan; ma ami boso no tin semper.” (Marko 14:​6-9) Lidernan religioso hudiu a siña hende ku donashon karitativo no solamente ta un obra ekselente, sino tambe ku e por asta kompensá piká. Di otro banda, Hesus a mustra bon kla ku e dunamentu ku ta agradá Dios no ta limitá na donashonnan karitativo na hende pober.

Un konsiderashon breve di e manera ku e kongregashon di promé a hasi donashon lo resaltá algun manera práktiko ku nos por mustra nos interes i asina agradá Dios ku e donashonnan ku nos ta hasi. E konsiderashon aki lo indiká tambe kon nos por duna na un manera spesífiko ku ta trese mayor benefisio.

“Duna Limosna”

Na vários okashon Hesus a animá su disipelnan pa “duna limosna.” (Lukas 12:33) Sin embargo, Hesus a spièrta nan pa no hasi kos pa hende mira ku e intenshon pa buska gloria pa e dunadó i no pa Dios. El a bisa: “Ora bo ta hasi bo obranan di karidat, no laga toka tròmpèt bo dilanti, manera e hipókritanan ta hasi den snoa i riba kaya pa nan risibí onor serka hende.” (Mateo 6:​1-4) Dor di apliká e spièrtamentu aki, e promé kristiannan a evitá di desplegá e spiritu di santidat ku e lidernan religioso den nan tempu tabatin, i nan a preferá di yuda hende den nesesidat dor di sirbi nan òf dor di duna regalo personalmente.

Por ehèmpel, na Lukas 8:​1-3 nos ta lesa ku Maria Magdalena, Juana i Susana i otronan a usa “loke nan mes tabatin” pa den un manera modesto nan sirbi Hesus i su apòstelnan. Ounke e hòmbernan aki no tabata pober, nan a bandoná nan fuentenan di entrada pa konsentrá únikamente riba nan sirbishi. (Mateo 4:​18-22; Lukas 5:​27, 28) Den un sentido, dor di yuda e hòmbernan aki kumpli ku e tarea ku Dios a asigná nan, e muhénan aki a trese gloria na Dios. I Dios a mustra ku el a apresiá esaki dor di konserbá den Beibel un registro di nan generosidat miserikòrdioso di moda ku tur futuro generashon lo por a lesa di nan.​—Proverbionan 19:17; Hebreonan 6:10.

Dorkas tabata un otro señora bondadoso ku “tabata abundá den echonan di karidat i bon obra.” E tabata kose paña pa biudanan pober na Jope, su pueblo ku tabata situá kant’i laman. Nos no sa si ta e mes a paga pa e tela i otro aksesorionan pa kose òf ta djis el a kose pa nan sin kobra pa su trabou. No opstante, su bon trabou a hasié masha kerí serka esnan ku el a yuda i tambe serka Dios kende miserikòrdiosamente a rekompensá e bondat ku el a mustra.​—Echonan 9:​36-41.

Motivashon Korekto Ta Vital

Kiko a motivá e personanan aki pa duna? No tabata djis un sintimentu di kompashon impulsá dor di un yamada emoshonal pa yudansa. Nan a sinti ku nan tin un responsabilidat pa hasi tur loke nan por tur dia pa yuda hende ku ta pasa den pobresa, atversidat, malesa i otro difikultatnan. (Proverbionan 3:​27, 28; Santiago 2:​15, 16) Esaki ta e klase di donashon ku ta agradá Dios. E ta ser motivá prinsipalmente dor di un amor profundo pa Dios, i un deseo pa imitá su personalidat miserikòrdioso i generoso.​—Mateo 5:​44, 45; Santiago 1:17.

Apòstel Juan a enfatisá e aspekto vital aki di duna ora el a puntra: “Ken ku tin e biennan di mundu, i ta mira su ruman den nesesidat i ta sera su kurason p’e, ta kon e amor di Dios ta permanesé den dje?” (1 Juan 3:17) E kontesta ta opvio. Amor di Dios ta motivá hende pa ta generoso. Dios ta apresiá i ta rekompensá esnan ku, meskos kuné, ta desplegá un spiritu generoso. (Proverbionan 22:9; 2 Korintionan 9:​6-11) Nos ta mira e klase di generosidat ei awe? Wak kiko a pasa resientemente den un kongregashon di Testigunan di Yehova.

Mester a drecha kas di un ruman muhé kristian di edat urgentemente. E tabata biba su so i e no tabatin ningun famia pa yud’é. Atraves di añanan, semper el a ofresé su kas pa tene reunionnan kristian, i hopi bes el a invitá rumannan pa bin kome serka dje. (Echonan 16:​14, 15, 40) Mirando su situashon penoso, e rumannan di e kongregashon a disidí di koperá pa yud’é. Algun a kontribuí ku plaka i otronan ku nan labor. Den algun wikènt, boluntarionan a pone un dak nobo, renobá e baño kompletamente, pleister i fèrf henter e promé piso i pone kashi di kushina nobo. E echo ku nan a duna no solamente a yena e nesesidat di e señora sino tambe a hala e miembronan di kongregashon mas serka otro i a impreshoná e bisiñanan ya ku e rumannan a duna un bon ehèmpel di kon kristiannan berdadero ta duna.

Tin masha hopi manera ku nos por yuda otronan personalmente. Nos por dediká tempu na un mucha hòmber òf un mucha muhé ku no tin un tata den kas? Nos por hasi kompra òf kose paña pa un biuda di edat ku nos konosé? Nos por kushiná òf yuda paga gastu di un persona ku no tin muchu rekurso? Nos no tin nodi ta riku pa yuda otronan. Apòstel Pablo a skirbi: “Si e boluntat t’ei, e ta aseptabel segun loke un hende tin, no segun loke e no tin.” (2 Korintionan 8:12) Pero ta e klase di dunamentu personal ei, esta, di duna direktamente so Dios ta bendishoná? Nò.

Kiko di Yudansa Organisá?

Tin biaha esfuersonan personal no ta sufisiente. De echo, Hesus i su apòstelnan tabatin un fondo pa yuda hende pober, i nan tabata aseptá kontribushon di hendenan bondadoso ku nan a topa den nan trabou. (Juan 12:6; 13:29) Asina tambe, kongregashonnan di promé siglo a tene kolekta ora tabatin nesesidat i a organisá yudansa na un eskala mas grandi.​—Echonan 2:​44, 45; 6:​1-3; 1 Timoteo 5:​9, 10.

Un okashon asina a presentá na aña 55 di nos era. E kongregashonnan na Hudea a kai den pobresa, kisas dor di e gran skarsedat di kuminda ku tabata reina. (Echonan 11:​27-30) Apòstel Pablo, kende semper tabata interesá den hende pober, a pidi yudansa for di kongregashonnan mas aleu, asta te na Masedonia. Personalmente el a organisá e kolekta i a usa hòmbernan aprobá pa hiba esaki. (1 Korintionan 16:​1-4; Galationan 2:10) Ni e ni otro rumannan enbolbí no a risibí pago pa nan trabou.​—2 Korintionan 8:​20, 21.

Awe tambe Testigunan di Yehova ta kla pa yuda ora un desaster surgi. Por ehèmpel, durante zomer di aña 2001, tormentanan a kousa inundashonnan serio na Houston, Texas, Merka. Na tur, 723 kas di Testigunan a risibí daño, i hopi di nan a keda den bastante mal kondishon. Mesora a forma un komité di ousilio di desaster ku a konsistí di ansianonan kristian kualifiká pa duna yudansa personal i pa repartí e fondonan di alivio pa yuda Testigunan lokal pa trata ku e situashon i drecha nan kasnan. Rumannan boluntario for di kongregashonnan den bisindario a hasi tur e trabou. Un Testigu a apresiá e yudansa ku el a risibí asina tantu ku ora el a risibí pago di seguro pa kubri e gastunan di reparashon na su kas, mesora el a duna e sèn na e fondo di alivio pa por yuda otro hende den nesesidat.

Sin embargo ora ta trata di institushonnan karitativo nos mester ta kouteloso ora nos ta evaluá e hopi yamadanan ku nan ta hasi riba nos. Algun institushon karitativo tin gastunan di atministrashon òf gastunan pa organisá fund-raising ku ta masha haltu. Dor di esei masha tiki di e plaka kolektá ta bai p’e destinashon pa kua e ta intenshoná. Proverbionan 14:15 ta bisa: “E hende simpel [“sin eksperensia,” NW] ta kere tur kos, ma e hòmber prudente ta wak bon unda e ta bai.” Pues ta masha sabí pa analisá e faktornan kuidadosamente.

Dunamentu Ku Ta Trese Mas Benefisio

Tin un klase di dunamentu ku ta asta mas importante ku obra di karidat. Hesus a referí na esaki ora un hóben gobernante a puntr’é kiko e tin ku hasi pa haña bida eterno. Hesus a bis’é: “Bai i bende bo propiedatnan i duna na hende pober, i lo bo tin tesoro den shelu; i bin, sigui mi.” (Mateo 19:​16-22) Tuma nota ku Hesus no a djis bis’é ‘duna na hende pober i lo bo haña bida eterno.’ Mas bien el a agregá: “Bin, sigui mi.” Ku otro palabra, ounke obranan di karidat ta digno di elogio i benefisioso, ser un disipel di Kristu ta enserá mas ku esei.

Hesus su interes prinsipal tabata pa yuda otro hende spiritualmente. Djis promé ku su morto el a bisa Pilato: “Pa esaki mi a nase i pa esaki mi a bin den mundu, pa duna testimonio di e bèrdat.” (Juan 18:37) Maske el a hiba delantera den yuda hende pober, kura hende malu, i alimentá esnan ku hamber, na promé lugá Hesus a train su disipelnan pa nan por prediká. (Mateo 10:​7, 8) De echo den su último instrukshonnan na nan tabatin tambe e mandamentu: “P’esei, bai i hasi tur e nashonnan disipel di mi.”​—Mateo 28:​19, 20.

Klaro ku e trabou di prediká no ta e solushon pa tur problema na mundu. Sin embargo, dor di kompartí e bon nobo di Reino di Dios ku tur sorto di hende nos ta glorifiká Dios pasobra e trabou di prediká ta kumpli ku Dios su propósito i ta habri kaminda pa benefisionan eterno pa esnan ku aseptá e mensahe divino. (Juan 17:3; 1 Timoteo 2:​3, 4) Pakiko no skucha loke Testigunan di Yehova tin di bisa e siguiente bes ku nan yama na bo porta? Nan ta bin ku un regalo spiritual. I nan sa ku esaki ta e mihó kos ku nan por duna bo.

[Plachi na página 6]

Tin hopi manera ku nos por mustra ku nos ta interesá den hende

[Plachi na página 7]

Nos predikashon di e bon nobo ta agradá Dios i ta habri kaminda pa benefisionan eterno