E Apòstelnan Tabata Buska Prominensia Atrobe

Hesus i su disipelnan a pasa via Perea i tabata bayendo den direkshon zùit pa Herúsalèm. Den bisindario di Yériko, nan a krusa Riu Yordan. Tabatin mas hende ku tabata biahando huntu ku nan pa bai selebrá e Pasku Hudiu di aña 33 di promé siglo.

Hesus a kana bai dilanti, pasobra e tabata ke yega na tempu pa Pasku Hudiu. Pero su disipelnan tabatin miedu. Un poko tempu promé, ora ku Lázaro a muri i ku Hesus tabata ke bandoná Perea pa bai Hudea, Tomas a urgi e otro disipelnan: “Laga nos tambe bai, pa nos por muri huntu kuné.” (Huan 11:16, 47-53) Pues ta di komprondé ku e disipelnan tabatin miedu di bai Herúsalèm pasobra nan lo a kore riesgo di pèrdè nan bida.

P’esei, pa nan por tabata prepará pa loke lo a spera nan, Hesus a hala e apòstelnan un banda i a bisa nan: “Nos ta subi bai Herúsalèm, i e Yu di hende lo ser entregá na e saserdotenan prinsipal i e eskribanan. Nan lo konden’é na morto, entreg’é na hende di e nashonnan pa nan hasi bofon di dje i sut’é i klab’é na staka; anto riba e di tres dia lo e ser lantá for di morto.”—Mateo 20:18, 19.

Esei tabata e di tres biaha ku Hesus a papia ku su disipelnan tokante su morto i resurekshon. (Mateo 16:21; 17:22, 23) Pero e biaha akí, el a bisa nan ku lo el a ser ehekutá na staka. No opstante, nan no a komprondé kiko e tabata ke men. Podisé nan tabata kere ku Kristu lo a restorá e reino di Israel aki riba tera i ku, huntu kuné, nan lo por a disfrutá di onor i gloria den un reino riba tera.

Awor, mama di Santiago i Huan, kende aparentemente tabata Salomé, tambe tabata entre e personanan ku tabata biaha huntu ku Hesus i su disipelnan. Hesus a yega di yama e dos apòstelnan akí “Yunan di Dònder;” sin duda, esaki tabata debí ku nan tabatin un karakter fuerte. (Marko 3:17; Lukas 9:54) Nan tabatin un tempu kaba ta anhelá un posishon prominente den e Reino di Kristu. I nan mama tabata sa esei. P’esei, el a bai serka Hesus, bùig su dilanti i pidié un fabor. Hesus a puntr’é: “Kiko bo ke?” El a bisa: “Duna òrdu pa e dos yu hòmbernan di mi akí por sinta huntu ku bo den bo Reino, ún na bo man drechi i ún na bo man robes.”—Mateo 20:20, 21.

Pero ta Santiago i Huan a mand’é pidi Hesus e fabor ei. Hesus, kende a kaba di splika ki bèrgwensa i humiashon e tabata a punto di pasa den, a bisa nan: “Boso no sa kiko boso ta pidi. Boso por bebe di e kopa ku mi ta bai bebe?” Nan a kontestá: “Sí, nos por.” (Mateo 20:22) Aparentemente, nan no tabata komprondé kiko realmente esei lo a nifiká pa nan.

Hesus a bisa nan: “En bèrdat boso lo bebe di mi kopa, ma no ta keda na ami pa disidí ken ta sinta na mi man drechi ni na mi man robes; mas bien, e lugánan akí ta pertenesé na esnan pa ken mi Tata a prepará nan.”—Mateo 20:23.

Ora e otro apòstelnan a haña sa loke Santiago i Huan a pidi, nan no a keda niun tiki kontentu. Podisé Santiago i Huan a papia tokante e asuntu akí kaba ku nan durante e diskushon ku nan tabatin tokante ken tabata esun di mas grandi. (Lukas 9:46-48) Sea kual sea e kaso, e petishon di e dos rumannan akí a indiká ku e 12 apòstelnan no tabata komportá nan mes komo esun di mas chikitu manera Hesus a konsehá nan. Ketu bai, nan tabata buska prominensia.

E ora ei, Hesus a disidí di trata e asuntu pa evitá ku e apòstelnan lo a keda rabiá ku otro. El a yama e 12 apòstelnan huntu i bondadosamente el a konsehá nan: “Boso sa ku esnan ku ta ser konsiderá komo gobernante di e nashonnan ta dominá nan pueblo, i hende prominente ta ehersé outoridat riba nan. No ta asina meimei di boso; ma ken ku ke bira grandi meimei di boso mester ta boso sirbidó, i ken ku ke ta promé meimei di boso mester ta esklabo di tur.”—Marko 10:42-44.

Siguientemente, Hesus a indiká bon kla ken su ehèmpel nan mester a sigui. El a bisa: “E Yu di hende no a bini pa ser sirbí, sino pa sirbi i pa duna su alma komo reskate a kambio di hopi hende.” (Mateo 20:28) Sí, ta su ehèmpel nan mester a sigui. Hesus tabatin mas o ménos tres aña ta sirbi hende. I e tabata asta dispuesto pa entregá su bida pa humanidat! E disipelnan di Kristu mester tabatin e mesun aktitut ku e tabatin: Nan mester tabata dispuesto pa sirbi otro hende en bes di laga hende sirbi nan i nan mester a komportá nan mes manera esun di mas chikitu en bes di buska prominensia.