Abo Semper Ke Ta Promé?

BO KONOSÉ un hende ku semper ke ta esun promé?— Ora hende asina tin ku para den rei, tin biaha nan ta pusha otro hende pa nan para te dilanti. Bo a yega di mira un kos asina sosodé?— E Gran Maestro a yega di mira asta hende grandi purba haña e promé lugá, esta, e lugá mas importante, i e no a gusta esei. Laga nos ban wak kiko a pasa.

Beibel ta bisa ku nan a invitá Hesus na un komementu grandi na kas di un fariseo. E fariseo tabata un lider religioso importante. Despues ku Hesus a yega, el a kuminsá mira kon algun di e otro invitadonan tabata drenta anto skohe e mihó lugánan na mesa. P’esei, el a konta e invitadonan un kuenta. Bo ke tend’é?—

Hesus a bisa: ‘Ora un hende invitá bo na un fiesta di kasamentu, no skohe e lugá mas mihó òf mas importante.’ Bo sa dikon Hesus a bisa asina?— El a splika ku kisas tin un otro invitado ku ta mas importante ku bo. E ora ei, manera bo por mira riba e plachi, esun ku a pone e fiesta ta drenta i bisa: ‘Duna e hòmber aki bo lugá, i abo bai sinta aya banda.’ Kon e invitado lo sintié e ora ei?— Lo e sinti bèrgwensa, pasobra tur e otro invitadonan ta mira kon e ta lanta bai na un lugá ménos importante.

Asina Hesus a splika ku no ta bon pa nos ke haña e mihó lugá. P’esei el a bisa: ‘Ora nan invitá bo na un fiesta di kasamentu, bai sinta na e lugá di mas abou, esun di ménos importante. E ora ei, kisas esun ku a invitá bo ta drenta i bisa: “Amigu, subi bai mas ariba.” E ora ei lo bo haña onor dilanti tur otro invitado ora bo bai na un mihó lugá.’—Lukas 14:1, 7-11.

Bo a komprondé kiko Hesus kier a siña nos ku e kuenta?— Ban wak un ehèmpel pa mira si bo a komprondé. Imaginá bo ku bo ta subi un bùs yen di hende. Kiko bo mester hasi? Kore bai buska lugá pa sinta anto laga un hende mas grandi keda para?— Hesus lo keda kontentu si bo hasi asina?—

Tin hende ta bisa ku Hesus no ta wòri kiko nos hasi. Pero abo ta kere e kos ei?— Ora Hesus tabata na e komementu na kas di e fariseo, el a wak kon e hendenan tabata skohe nan lugá di sinta. Bo no ta kere ku e tin mes tantu interes den loke nos ta hasi awendia?— Awor Hesus ta den shelu, i e por wak bon-bon kiko nos ta hasi.

Ora un hende ke ta esun promé, e kos ei por trese problema. Hopi bes ta bin pleitamentu, i hende ta rabia ku otro. Tin bes e kos ei ta pasa ora ku mucha ta subi bùs pa bai keiru huntu. Asina porta di bùs dal habri, e muchanan ta hasi lihé pa nan ta promé. Nan ke e mihó lugánan di sinta, esnan na bentana. E ora ei, kiko tin chèns di pasa?— Sí, tin chèns ku nan ta rabia ku otro.

Ora hende ke ta promé, e kos ei por trese hopi problema. Asta e apòstelnan di Hesus a haña problema ku otro pa e motibu ei. Manera nos a siña den Kapítulo 6 di e buki aki, nan a pleita ku otro tokante kua di nan ta esun mas importante. Kiko Hesus a hasi e ora ei?— Sí, el a mustra nan ku esei no ta bon. Pero despues nan a bolbe pleita. Ban wak kon e pleitu ei a kuminsá.

E apòstelnan i un par di otro disipel tabata kana bai e stat di Yerusalèm ku Hesus pa di último bes. Hesus a papia ku nan vários bes tokante su Reino, i p’esei Santiago ku Juan tabata pensando riba e tempu ku nan lo reina kuné komo rei. Nan a asta papia di e asuntu ku nan mama Salomé. (Mateo 27:56; Marko 15:40) P’esei, ora nan tabata riba kaminda pa Yerusalèm, Salomé a bini serka Hesus, hinka rudia su dilanti, i pidié un fabor.

Hesus a puntr’é: “Kiko bo ta deseá?” El a kontestá ku e tin gana pa ora Hesus ta den su Reino e laga su yunan sinta nèt banda di dje: un na su man drechi i e otro na su man robes. Wèl, kon bo ta kere ku e otro dies apòstelnan a sinti nan ora nan a haña sa kiko Santiago ku Juan a pidi?—

Sí, nan a rabia hopi ku Santiago ku Juan. P’esei Hesus a duna tur su apòstelnan un bon konseho. Hesus a bisa nan ku e hendenan ku ta manda den paisnan di mundu gusta sinti ku nan ta poderoso i importante. Nan ke tin puesto importante pa tur hende hasi loke nan bisa. Pero Hesus a bisa su siguidónan ku nan sí no mester ta asina. El a bisa ku mester ta nèt kontrali: ‘Ken ku ke bira esun promé den boso mester ta boso esklabo.’ Imaginá bo!—Mateo 20:20-28.

Bo sa kiko un esklabo ta hasi?— E ta sirbi otro hende sin spera pa otro hende sirbié. E ta tuma e lugá ménos importante, no esun mihó. E ta komportá su mes manera esun ku ta ménos importante, no esun mas importante. I kòrda: Hesus a bisa ku si un hende ke bira esun di promé, e mester komportá su mes manera un esklabo di e otronan.

Awor, kiko bo ta kere ku e kos ei ta nifiká pa nos?— Un esklabo lo pleita ku su shon tokante kua di nan dos ta bai haña e mihó lugá pa sinta? Òf, bo ta kere ku lo e pleita kuné tokante kua di nan ta bai kome promé? Kiko bo ta kere?— Hesus a splika ku semper un esklabo ta laga su shon bai promé ku e mes.—Lukas 17:7-10.

P’esei, na lugá di purba ta esun promé, kiko nos mester hasi?— Sí, nos mester ta manera esklabo di otro hende. I esei kier men ku nos mester laga otronan bai promé ku nos. E ta nifiká ku nos mester pensa ku otro hende ta mas importante ku nos. Bo por pensa un par di manera pa laga otro hende bai promé ku bo, esta, pensa riba nan promé ku riba bo mes?— Si bo ke, bo por bai bèk na página 40 ku 41, i wak atrobe kua ta algun kos ku bo por hasi pa mustra ku bo ta laga otro hende bai promé ku bo, dor di sirbi nan.

Manera bo por ta kòrda, e Gran Maestro a laga otro hende bai promé kuné dor di sirbi nan. Riba e último anochi ku el a pasa ku su apòstelnan, el a asta sak abou i laba nan pia. Si nos tambe laga otro hende bai promé ku nos dor di sirbi nan, e Gran Maestro lo keda kontentu, i su Tata Yehova Dios tambe.