Bo ta haci e boluntad di Dios?

DEN nan ministerio di cas pa cas, dos Testigo di Jehova a contra cu un pastor di iglesia anglicano. El a parce di ser un hende agradable, cu barba, rond di 60 aña di edad, bistí den flanel cu e nomber di su religion skirbí riba dje na color briyante. Cu un solo rosea, el a bisa: “Mi kier pa miembro di nos religion ser tanto celoso como boso den e plamamento dje Palabra, pero mi tin cu pidi boso no bishitá mi cas mas.”

Sí, tin hopi hende cu ta admira e trabao di Testigo di Jehova i ta encomendánan pa nan celo i entusiasmo. Pero, nan no tin e mínimo di interés den loke Testigo di Jehova ta haci, ni nan no kier considera nan mes participacion den e trabao. Sin embargo, tal aparente contradiccion den e situacion no ta nada nobo. Jesús a ripara esei den su dia i a enfatizá e punto vigorosamente usando un comparacion provocando pensamento.

“Kico boso ta pensa? Un homber tabatin dos yiu. Yegando cerca e promé, e dí, ‘Yiu, bai traha awe den e cunucu di wijndruif.’ Contestando, el a bisa, ‘Mi ta hacié, señor,’ pero no a bai. Acercando e segundo, el a bisa mescos. Contestando, el a bisa, ‘Mi no ta bai.’ Despues el a sinti duele i a bai. Cua di nan dos a haci e boluntad di nan tata?”​—⁠Mateo 21:​28-31.

E contesta tabata claro. Mescos cu e multitud cu a scucha Jesús, nos ta contestá, “E último.” Pero, mas ayá di loke a keda bisto, door di usa e comparacion, Jesús a hala na nos atencion di cu e hacimento di loke e tata kier ta loke ta conta. Aunque e segundo yiu a bisa cu e no kier bai, el a bai toch i tabata encomendá. E hacimento dje clase correcto di trabao ta di igual importancia. E segundo yiu a bai trahando den e cunucu di druif dje tata; e no a bai i traha den su mes cunucu di druif.

Kico tur esei ta indica pa nos? Kico Dios kier pa adorador djawe haci? Kico nos por siña for dje bida di Jesús cu por yúdanos haci e boluntad di su Tata? Esei ta pregunta importante, i nos hayamento dje contesta correcto por nifica nos bienestar eterno, siendo cu “ken cu ta haci e boluntad di Dios lo permanece pa semper.”​—⁠1 Juan 2:17; Efesio 5:⁠17.

Kico ta e “boluntad di Dios”?

E palabra “boluntad” ta ser mencioná mas cu 80 bez den e Gran Concordancia de la Traducción del Nuevo Mundo de las Santas Escrituras. Mas o menos 60 bez (of rond di 75 porciento) e ta referi ne boluntad di Dios. Tin expresion tal como “boluntad di Dios,” i “boluntad di mi tata” mas cu 20 bez. Segun esei nos por mira cu e boluntad divino mester ta di importancia primario pa nos. E hacimento dje boluntad di Dios mester ta e interés principal di nos bida.

Na papiamento e palabra “boluntad” kier men ‘deseo, kier, determinacion, algo deseá, specialmente e decision of determinacion di hende cu tin autoridad of poder.’ Pues, anto, Jehova Dios, e Autoridad Supremo, tin un boluntad, un deseo of determinacion. Kico esei tá? E Scritura ta bísanos cu en parti “[Dios] su boluntad tá pa tur sorto di hende ser salbá i yega na un conocimento exacto dje berdad.” (1 Timoteo 2:⁠4) Jesucristo i hende cristian di promé a traha cu tur nan alma pa hiba tal conocimento exacto pa otro hende.​—⁠Mateo 9:35; Echo 5:42; Filipense 2:​19, 22.

Ken ta haci e boluntad di Dios awe? Den e casi dos mil miyón hende cu ta pretende di ser sigidor di Jesucristo, cuanto ta manera e yiu menor den e comparacion di Jesús, cu a sali i a haci e boluntad di su tata? No ta difícil pa haya e contesta. Berdadero sigidor dje pasonan di Jesucristo ta haci e trabao cu Jesús a menciona: “Den tur nacion e bon nobo tin cu ser predicá promé.” (Marco 13:10) Testigo di Jehova, na cantidad di mas cu cuater miyón i mei mundialmente, ta predica activamente e bon nobo dje Reino di Dios i ta siña otronan, siñalando ne Reino como e único speranza pa paz i siguridad pa humanidad. Bo ta tene plena parti den e hacimento dje boluntad di Dios? Bo ta predica e bon nobo di Reino manera Jesús a haci?​—⁠Echo 10:42; Hebreo 10:⁠7.

Haya gozo den e hacimento dje boluntad di Dios

Aunque tin gozo den e siñamento di loke ta e boluntad dje Tata, tin mas gozamento den e siñamento di otronan e boluntad di Dios. Jesús a haya gozo den e siñamento dje pueblo tocante su Tata. Esei tabata manera cuminda pe. (Juan 4:34) Nos també por disfruta di berdadero felicidad si nos ta haci loke Jesús a haci, esta, predica i siña loke el a siña, loke el a recibi for di su Tata. (Mateo 28:​19, 20) Manera Jesús a priminti, “si boso sa e cosnan aki, boso ta feliz si boso ta hácinan.”​—⁠Juan 13:⁠17.

Pa ilustra: Un mama cu recientemente a bolbe drenta den e ministerio di pionero di tempo completo a bisa: “Ta tanto excitante pa mira e cara di un studiante di Bijbel luza ora varios berdad bíblico ta toca e curazón! Ta tanto gozo pa mi pa mira un cierto studiante skirbi cu man tur texto promé cu e estudio i skirbi nota durante e estudio pe por contestá cualkier pregunta di repaso despues.” Un otro studiante bíblico di dje tabatin algun contacto cu e berdad rond di 13 aña di edad. Awor cu e ta casá i ta preocupá tocante algun problema personal, e tabatin anhelo pa haya Testigo di Jehova. Ki feliz el a keda ora e ruman pionero a hayé! E señora hoven a keda mashá contentu pa cuminza su estudio bíblico di nobo.

Mantene e gozo di hacimento dje boluntad di Dios

Rey David di Israel di antigua tabata un hende cu a purba di haci e boluntad di Dios pa tur su bida. Apesar dje cantidad di dificultad i presion poní riba dje, e tabata inspirá pa bisa: “Mi a gusta haci bo boluntad, O mi Dios, i bo ley ta den mi padén.” (Salmo 40:⁠8) E hacimento dje boluntad di Jehova tabata den e alma mes di David, den su berdadero ser. Esei tabata e secreto di su gozo semper bibo di sirbi Jehova. E hacimento dje boluntad di Dios no tabata un carga pisá pa David. Mas bien, esei tabata un gozo, algo cu a bini di su curazón. Durante tur su bida, David a lucha pa haci su posibel pa sirbi su Dios, Jehova, aunque tabatin bez cu el a peca i no a alcanza.

Tin bez cu nos gozo por mengua. Nos por fatiga of desanima. Kizás nos pasado ta molestiános, nos concenshi ta remorde riba un malecho cu nos a comete leu atrás. Hopi bez, nos por vence tal sintimento cu un estudio mas completo dje Palabra di Dios. Nos por determiná di skirbi e ley di Dios “padén,” manera David a haci. Si nos ta purba di haci e boluntad di Dios cu tur nos alma, esta, lo mihor posibel, lo e recompensános di acuerdo pasobra e ta fiel.​—⁠Efesio 6:6; Hebreo 6: 10-12; 1 Pedro 4:⁠19.

Interesantemente, den Hebreo 10:​5-7, apóstol Pablo a cita e palabra di David den Salmo 40:​6-8 i a aplicánan na Jesucristo. Haciendo esei, Pablo a mustra ki íntimo Jesús tá cu su Tata. E palabra hebreo pa “boluntad” realmente kier men ‘gozo, deseo, fabor, of placer.’ Anto Salmo 40:8 ta bisa tocante Cristo: “Mi a gusta, O mi Dios, di cumpli cu bo placer.”a Jesús a deseá di haci loke a agrada su Tata. Jesús a bai mas ayá di loke Dios a pidi di dje. El a haci loke tabata íntimo cu e curazón di su Tata, i a gusta haci esei.

Tur e bida di Jesús tabata orientá rond di siñamento di otro hende loke ta e boluntad di Dios i loke nan tin cu haci pa gana e bendicion di Dios. Jesús tabata un predicador i siñador di tempo completo i a haya mashá gozo den e hacimento di tal trabao. P’sei, ta di comprende cu mientras mas nos ta haci e trabao di Jehova Dios, mas gozo nos lo recibi. Abo també por sirbi di tempo completo den e trabao di predica di manera cu bo gozo por abunda també?

Un otro yudanza pa mantene bo gozo den e hacimento dje boluntad di Dios ta di mantene bo bista claramente enfocá riba e futuro. Jesús a haci esei. “Pe gozo cu tabata poní dilanti dje el a wanta e staca di tormento, despreciando e bergüenza.” P’é, e gozo tabata di resulta fiel na Dios te ne fin, anto gana e recompensa di gobernacion real ne man drechi di su Tata.​—⁠Hebreo 12:⁠2.

Imaginábo e futuro gozo cu lo bini pa esnan cu ta sigi haci e boluntad di Dios. Nan lo mira e destruccion di esnan cu ta insisti di haci nan mes boluntad egoísta aunque esei ta causa sufrimento pa esnan cu ta haci esfuerzo pa haci e boluntad di Dios. (2 Tesalonicense 1:​7, 8) Corda e gozo di stimánan resusitá di gana e oportunidad di siña e boluntad di Dios i hacié. Of considera e próposito di Dios di restora e tera na un Paradijs. I finalmente, imaginábo e libertad cu lo resulta dje destruccion completo di Satanás, e opositor dje boluntad di Jehova Dios.

Sí, e hacimento dje boluntad di Dios awe por trece hopi gozo awor i felicidad sin fin den e futuro. Apesar dje reaccion cu nos ta recibi den e trabao di predicá, láganos imita ehempel di Jesús di goza di haci e boluntad di su Tata.

[Footnotes]