E Siman cu a Cambia Mundo

“Bendito ta esun cu ta bini den e nomber di Jehova!”—MATEO 21:9.

 1. Suceso di Augustus di 1991 a afecta cua dos grupo distinto?

“TRES DIA ANGUSTIOSO CU A SAGUDI MUNDO.” Den Augustus di 1991, título manera esei a enfatizá e echo cu e mundo por ta trastorná den poco dia so. Realmente, e último parti di Augustus tabata sumamente memorable no solamente pa mundo sino també pa un grupo di locual Jesús a bisa: “Nan no ta parti di mundo.” E grupo ta ser yamá awe Testigo di Jehova.—Juan 17:14.

 2, 3. (a) Di ki manera libertad tabata enfatizá den Zagreb apesar dje peliger di gera? (b) Ki recompensa fe fuerte a recibi den Odesa?

² E promé asamblea internacional di testigo di Jehova planeá pa Yugoslavia tabata fihá pa dia 16 te 18 di Augustus. Segun loke a sosode, esei també tabata e promé asamblea grandi pe pueblo di Jehova den un nacion na drempel di un gera civil. E testigonan local, hunto cu esnan boluntario di país beciña, a traha duro pa dos luna renobando completamente e stadion di futbol HAŠK Građanski den Zagreb. E stadion a keda limpi limpi, i un lugar ideal pe Asamblea “Stimador di Libertad Piadosa.” Miles di delegado internacional a planeá pa asisti, incluyendo 600 di América. Mientras cu e sombra di gera civil a menazá, rumor a plama: “Americano lo no bini.” Pero, nan sí a bini, hunto cu delegado di hopi otro país. Nan a spera un asistencia di 10.000 pero 14.684 tabata den e stadion ne dia final! Tur a recibi bendicion ricu pasobra nan no a ‘bandona e reunimento di nan mes hunto.’—Hebreo 10:25.

³ Durante e tres dia despues dje asamblea den Zagreb, un golpi di estado den Union Soviética a fracasa. Ne tempo ei, stimador di libertad piadosa tabata haci preparacion final pa nan asamblea den Odesa, Ucrania. Nan por a celebra e asamblea? Cu fe fuerte e rumanan a haci e último trabao den un renobacion completo dje stadion, i delegado a sigi bini. Como si fuera un milagro, e golpi di estado a termina. Nan a celebra un asamblea excelente dia 24 i 25 di Augustus i 12.115 hende a asisti i 1.943—16 porciento dje asistencia máximo—a bautiza! Tal testigo nobo, hunto cu esnan cu a mantene nan integridad pa hopi tempo, a alegrá cu nan a bini ne asamblea cu plena confianza den Jehova Dios.—Proverbio 3:5, 6.

 4. Testigo di Jehova den Oosteuropa a sigi cua modelo cu Jesús a pone?

⁴ Tal testigonan fiel tabata sigi e ehempel cu nos Ehemplar, Jesucristo, a pone. E nunca a keda sin asisti na fiesta cu Jehova a mándanan warda, ni sikiera ora hudío tabata busqué pa mata. Ora el a subi na Jerusalem pa su último pascu hudío, hudío tabata para rond den e tempel, puntrando: “Kico boso ta opina? Cu e ni sikiera ta bini pe fiesta?” (Juan 11:56) Pero, e sí a bini! Esei a prepara e circunstancia pa un siman cu a culmina den un cambio pe historia di humanidad. Láganos repasa awor algun punto sobresaliente dje siman—dia 8 te dia 14 di Nisán dje calendario hudío.

8 di Nisán

 5. Kico Jesús tabata sa caba mientras cu el a biahá pa Betania riba dia 8 di Nisán di aña 33 EC?

⁵ Riba e dia ei Jesús i su disípelnan a yega na Betania. Jesús a pasa seis anochi ei den e cas di su amigo stimá, Lázaro, cu e recientemente a lanta for di morto. Betania tabata cerca Jerusalem. Jesús a bisa su disípelnan den privá caba: “Mira! Nos ta subi na Jerusalem, i e Yiu di hende lo ser entregá na sacerdote principal i na scriba, i nan lo condené na morto, i lo entregué na hende dje nacionan pa nan tene mofa di dje i zuté i clabé ne staca, i dia tres lo e ser lantá.” (Mateo 20:18, 19) Jesús tabata sa mashá bon cu awor e tabatin cu enfrenta prueba mashá doloroso. Pero, mientras cu e tempo dje prueba supremo a yega, e no a para den su esfuerzo pa sirbi amorosamente su rumanan. Láganos semper manifesta “e actitud mental . . . cu també tabata den Cristo Jesús.”—Filipense 2:1-5; 1 Juan 3:16.

9 di Nisán

 6. Durante anochi di 9 di Nisán, kico María a haci, i kico Jesús a bisa Hudas?

⁶ Despues di drentamento di solo, ora dia 9 di Nisán a cuminza, Jesús a disfruta di cuminda den e cas di Simón, cu tabata un leproso na antes. Tabatei cu María, ruman di Lázaro, a basha azeta perfumá costoso riba e cabez i pia di Jesús i humildemente a seca su pia cu su cabei. Ora Hudas a keha, Jesús a bisa: “Lagué, pe celebra e ocasion den bista dje dia di mi entierro.” Ora sacerdote principal a tende cu hopi hudío tabata bai pa Betania i pone fe den Jesús, nan a conspira pa maté i Lázaro.—Juan 12:1-7.

 7. Riba maínta di 9 di Nisán, con e nomber di Jehova tabata onrá, i Jesús a profetiza di kico?

⁷ Madrugá, Jesús a sali pa Jerusalem. Un multitud a sali pa contra cuné, wayando rama di palmita i gritando: “Salba, nos ta rogábo! Bendito ta esun cu ta bini den e nomber di Jehova, asta e rey di Israel!” Anto Jesús a cumpli cu e profecía di Zacarías 9:9, drentando den e stad montá riba burricu. Ora el a yega cerca Jerusalem, el a yora riba dje, profetizando cu romano lo cerqué cu staca cu punta skerpi i destruyé completamente—un profecía cu tabata cumplí notablemente 37 aña despues. (Esei també ta indica algo malu pa cristiandad, cu ta sigi e modelo di apostasía di Jerusalem di antigua.) Gobernante hudío no tabata kier Jesús como nan rey. Nan a grita cu rabia: “Mira! Tur e mundo ta bai tras di dje.”—Juan 12:13, 19.

10 di Nisán

 8. Dia 10 di Nisán, con Jesús a mustra respet profundo pe cas di oracion di Jehova, i kico a sosode despues?

⁸ Jesús a bishita e tempel atrobé. Pe segunda bez el a tira afó comerciante codicioso i trocador di placa. Negoshi—“e amor pa placa”—no mag prevalece den e cas di oracion di Jehova! (1 Timoteo 6:9, 10) Pronto Jesús tabatin cu muri. Pa ilustra esei, el a papia tocante plantamento di simía. E simía original ta muri, pero e ta nace pa produci un mata cu ta duna un abundancia di grano. Di igual manera, e morto di Jesús ta resulta den bida eterna pe multitud di hende cu ta eherce fe den dje. E idea di su binidero morto a preocupa Jesús i den oracion el a pidi pe nomber di su Tata ser glorificá asina. Contestando, e boz di Dios manera donder a bini di cielo pa tur hende presente tende: “Mi a glorifiqué i també lo bolbe glorifiqué.”—Juan 12:27, 28.

11 di Nisán—Un dia di Actividad

 9. (a) Den maínta di 11 di Nisán, con Jesús a usa ilustracion pa condena hudío apóstata? (b) Segun e comparacion di Jesús, ken a perde un oportunidad grandi?

⁹ Jesús i su disípelnan a sali for di Betania atrobé pa henter un dia di actividad. Jesús a usa tres comparacion pa mustra pakico e religion hudío apóstata tabata condená. El a maldiciona un mata di figu sin fruta, i awor su estado secu a simboliza su condenacion dje nacion hudío sin fe i sin fruta. Drentando den e tempel, el a duna detaye di un cultivador indigno dje cunucu di wijndruif di un doño cu finalmente asta a mata e yiu i heredero dje doño—simbolizando cu hudío a bira infiel den loke Jehova a confiá na nan, algo cu a culmina ora nan a mata Jesús. El a duna detaye di un fiesta di casamento cu un rey a prepara, esta, Jehova Dios, pero hende invitá (hudío) egoístamente tabatin excuus flau pa no asisti. P’sei, invitacion tabata duná na hende djafó—hende gentil—algun di locual a acepta. Pero, un homber a bini sin e bistí di fiesta di casamento i tabata sacá afó. El a representa cristian falso di cristiandad. Hopi hudío dje tempo di Jesús tabata invitá, “pero un poco escogí” pa ser hunto cu e 144.000 hende seyá cu ta hereda e Reino celestial.—Mateo 22:14; Revelacion 7:4.

10-12. (a) Pakico Jesús a censura e clero hudío, i con el a denuncia severamente tal hipócrita? (b) Con e huicio tabata ehecutá finalmente riba e religion apóstata di hudío?

¹⁰ Clero hudío hipócrita a busca oportunidad pa detene Jesús, pero el a contestá varios pregunta engañoso i a bruha e clero dilanti di pueblo. Ai, ki rebelde hudío religioso tabata! Jesús a castigánan redondamente! Nan tabata kier prominencia, bistí distinto, puesto halto, tal como “Rabí” i “Pader,” mescos cu hopi clero djawe. Jesús a declara e regla: “Ken cu ta halza su mes lo ser humiyá, i ken cu ta humiya su mes lo ser halzá.”—Mateo 23:12.

¹¹ Jesús a denuncia severamente tal lider religioso. El a sclama siete bez: “Ai di boso!” yamando nan guía ciegu i hipócrita. I cada bez el a duna un motibo claro pe condenacion. Nan tabata cera e camina pe Reino di cielo. Ora nan a conberti hende, nan a bira dos bez mas merecedor di Gehena cu nan maestro, probablemente nan tabata riba e camina pa destruccion debí na algun picá grosero of fanatismo di antes. Jesús a declara, “Hende bobo i ciegu!”, pasobra fariseo tabata mas interesá den e oro dje tempel en bez di mantenecion dje adoracion puro ei. Nan a pasa por halto di husticia, misericordia, i fieldad pero a paga diez porciento dje yerbabuena, eneldo i comino deseabel, pero no a haci caso di asunto importante dje Ley. Labamento ceremonial nunca por kita contaminacion di curazón—solamente curazón hací limpi via fe den e sacrificio binidero di Jesús por haci esei. Nan hipocresía i maldad di curazón a desmenti cualkier aparencia limpi.—Mateo 23:13-29.

¹² Sí, ai en berdad di fariseo, berdaderamente “yiu di esnan cu a asesina e profetanan” di antigua! Nan tabata colebra, yiu di cascabel, condená na Gehena, pasobra nan a mata no solamente Jesús sino també esnan cu el a manda. E huicio tabata ehecutá “riba e generacion ei.” Na cumplimento dje huicio, Jerusalem tabata destruí totalmente 37 aña despues.—Mateo 23:­30-36.

13. Comentario di Jesús tocante contribucion den e tempel ta ser reflehá den cua situacion djawe?

¹³ Promé cu el a bandona e tempel, Jesús a duna encomendacion na un biuda den necesidad cu a tira den e caha dos cen chikito—“tur e medio di biba cu e tabatin.” Ki contraste en berdad cu hende haragán ricu, cu tabata tira den e caha solamente un muestra di contribucion! Mescos cu e biuda den necesidad, Testigo di Jehova djawe ta dedica cu bon gana nan tempo, energía, i recurso pa apoya i expande e trabao mundial dje Reino. Cuanto diferencia tin entre nan i evangelista inmoral di TV cu ta defrauda nan miembro i ta establece negoshi grandi pa riqueza personal!—Lucas 20:45—21:4.

Ora 11 di Nisán a Yega Cerca su Fin

14. Jesús a manifesta cua duele, i con el a contesta otro pregunta di su disípelnan?

¹⁴ Jesús a yora riba Jerusalem i su pueblo i a declara: “Boso di ningun manera lo mirámi djawor padilanti te cu boso bisa, ‘Bendito ta esun cu ta bini den e nomber di Jehova!’” (Mateo 23:37-39) Despues, ora nan tabata sintá riba e Ceru di Olijfi, disípel íntimo di Jesús a haci pregunta tocante esei, i contestando, Jesús a duna detaye dje siñal cu ta indica cu e ta ­presente cu poder dje Reino i cu e conclusion dje mal sistema di Satanás a yega.—Mateo 24:1–25:46; Marco 13:1-37; Lucas 21:5-36.

15. Cua siñal Jesús a duna tocante su presencia pa huzga, i desde ki tempo e tin cumplimento?

¹⁵ Mencionando cu e huicio di Jehova lo ser ehecutá pronto riba e tempel, Jesús a indica cu esei ta simbólico di suceso catastrófico di futuro den e conclusion di henter e sistema di cosnan. E cuminzamento di gera na un escala sin igual a indica su presencia, i també hamber, temblor i pest, hunto cu falta di amor i di rectitud. Ki cierto esei tá den e mundo aki durante siglo 20 desde 1914!

16, 17. Jesús a duna detaye tocante cua suceso mundial, i con hende cristian mester reacciona ne profecía?

¹⁶ Esei lo culmina den un “tribulacion grandi tal como no a sosode desde e principio di mundo te awor, no, ni lo no sosode atrobé.” Siendo cu esei lo ser tanto destructivo como e diluvio dje dia di Noé, Jesús a duna advertencia contra ocupacion den negoshi di mundo. “Sigi vigila, anto, pasobra boso no sa riba ki dia boso Señor ta bini.” Ki feliz nos por keda cu e Doño a nombra un “esclabo fiel i prudente” ungí pa duna e spiertamento i percura un abundancia di alimento spiritual pe dia aki di su presencia!—Mateo 24:21, 42, 45-47.

¹⁷ Den siglo 20 aki, nos a mira “riba tera afliccion dje nacionan, sin sa e salida . . . mientras cu hende ta desmaya di miedu i di anticipacion di loke ta bini riba e tera habitá.” Pero, Jesús a bísanos: “Ora tal cosnan ta cuminza sosode, stret boso curpa i hiza boso cabez, pasobra boso liberacion ta yega cerca.” I el a dúnanos e advertencia: “Presta atencion na boso mes pa boso curazón nunca bira cargá debí na comemento di mas ni na bebemento di mas i ansha di bida, i di ripiente e dia ei ta riba boso instantáneamente manera laz.” Solamente door di keda lantá nos por para aprobá dilanti Jesús, “e Yiu di hende,” na su presencia.—Lucas 21:25-28, ­34-36.

18. Nos por recibi cua animacion for dje comparacion di Jesús dje diez birgen i dje talentonan?

¹⁸ Pa conclui su pronosticacion magistral di suceso actual, Jesús a conta tres comparacion. Promé, den e comparacion dje diez birgen, el a enfatizá di nobo e necesidad di “sigi vigila.” Anto, den e comparacion di esclabo i talento, el a mustra con diligencia ta ser recompensá cu un invitacion pa ‘drenta den e gozo dje Doño.’ Hende cristian ungí, locual ta simbolizá den e tres comparacion, i també e otro carnénan por recibi hopi animacion for di tal detaye bibo.—Mateo 25:1-30.

19, 20. Cua relacion agradabel actual ta ser mencioná den e comparacion di Jesús di carné i cabrito?

¹⁹ E tercer comparacion ta menciona e presencia di Jesús cu poder di Reino despues cu e ta yega pa sinta riba su glorioso trono celestial. Esei ta un tempo pa huzga e nacionan i separa hende di mundo den dos grupo, un grupo consistiendo di hende manso semehante di carné i e otro grupo ta hende obstiná semehante di ­cabrito. E carnénan ta haci esfuerzo extra pa mustra cu nan ta apoya rumanan dje Rey—e resto di esnan ungí riba tera den e tempo aki di fin di mundo. E carnénan ta recibi bida como un recompensa, pero e cabritonan sin aprecio ta bai den destruccion eterno.—Mateo 25:31-46.

²⁰ Ki un maraviyoso relacion nos ta mira entre e otro carnénan i e rumanan dje Rey den e conclusion dje sistema di cosnan aki! Aunque e resto ungí a haci e mayor parti dje trabao na principio dje presencia dje Rey, e miyones di otro carnénan celoso ta compone awor 99,8 porciento di sirbidor di Dios riba tera. (Juan 10:16) I nan també ta demonstra cu nan ta dispuesto pa wanta ‘hamber, sed, desnudez, enfermedad, i prisón’ como compañé dje resto ungí, wardador di integridad.a

12 di Nisán

21. Kico a acelera riba dia 12 di Nisán, i di ki manera?

²¹ E complot pa mata Jesús a acelera. Hudas a bishita sacerdote principal den e tempel, i a conbini pa traiciona Jesús pa 30 pida di plata. Asta esei tabata profetizá.—Zacarías 11:12.

13 di Nisán

22. Cua preparacion tabata hací riba dia 13 di Nisán?

²² Jesús, cu a keda den Betania, probablemente pa haci oracion i meditacion, a manda disípel di dje na Jerusalem pa localiza un cierto “Fulano.” Den e cas dje homber, den un sala grandi ariba, nan a prepara e pascu hudío. (Mateo 26:17-19) Ora solo a drenta dia 13 di Nisán, Jesús a uni cu nan ei pe celebracion di mas memorable den tur historia. Kico tabatin cu sosode dia 14 di Nisán? E sigiente artículo lo conta.

[Nota]

Cua Resumen bo ta Duna?

◻ Cua hospitalidad i bonbiní algun hende a extende na Jesús durante dia 8 te 10 di Nisán?

◻ Con Jesús a desenmascara clero hipócrita riba dia 11 di Nisán?

◻ Cua profecía grandi Jesús a duna, i con e ta ser cumplí awe?

◻ Con suceso a yega un culminacion riba dia 12 i 13 di Nisán?

[Plachi na página 12]

Jesús a encomenda e biuda pober cu a contribui dos cen chikito—tur loke e tabatin