Tene Cuidou cu Ser Hustu Den Bo Mes Bista!

DEN e promé siglo, e fariseonan a disfrutá dje bon reputacion di ser adoradornan hustu di Dios. Nan tabata studiantenan sincero dje Scritura i a haci oracion frecuentemente. Algun hende a mira nan como hende cariñoso i razonabel. E historiador hudiu Josefo a skirbi: “E fariseonan tin cariño pa otro i ta cultivá relacionnan armonioso cu e comunidad.” Nada straño cu probablemente nan tabata e individuonan di mas respetá den e Sociedad hudiu n’e tempu ei!

Sin embargo, awe e palabra “farisaico” i términonan relacioná cuné ta di menosprecio, sinónimo cu hipócritamente deboto, hustu den bo mes bista, marcá pa un aire di piedad superior, exageradamente piadoso, i cu ta bisa cu boca sin mustra cu echo. Pakico e fariseonan a perde nan bon nomber?

Tabata pasobra, diferente for di mayoria hudiu, Jesucristo no a ser engañá dor dje aparencia exterior dje fariseonan. El a compará nan cu “grafnan blanchá, cu di pafó en berdad ta parce bunita pero di paden ta yen di wesu di hende morto i di tur sorto di sushedad.”—Mateo 23:27.

Ta cierto cu nan tabata haci oracionnan largu, pará na lugánan público, pero esaki tabata djis pa otro hende mira, manera Jesus a bisa. Nan adoracion tabata un mero pretencion. Nan tabata gusta e lugánan prominente na cenanan i e stulnan padilanti den e snoanan. Aunke tur hudiu tabata obligá pa bisti fraña na nan paña, e fariseonan a purba impresioná hende bistiendo fraña excesivamente largu. Nan tabata orguyoso pa ‘show’ nan cahitanan di texto hací mas grandi cu nan a bisti como amuleto. (Mateo 6:5; 23:5-8) Nan hipocresia, nan golosidad i nan arogancia finalmente a hiba na nan desgracia.

Jesus a expresá Dios su rechaso dje fariseonan: “Hipócritanan, aptamente Isaías a profetisá tocante boso, ora el a bisa, ‘E pueblo aki ta onrá mi cu nan lip, pero nan curason ta hopi alehá for di mi. Ta en bano cu nan ta sigui adorá mi, pasobra nan ta siña mandamentu di hende como doctrina.’ ” (Mateo 15:7-9) Nan husticia en realidad tabata husticia den nan mes bista. Tabata di comprendé cu Jesus a spierta su disipelnan: “Tene cuidou cu e zuurdeeg dje fariseonan.” (Lucas 12:1) Awe, nos tambe mester “tene cuidou” pa no ser hustu den nos mes bista of bira hipócritanan religioso.

Haciendo esei, nos mester reconocé cu un persona no ta bira hustu den su mes bista di anochi pa mainta. Mas bien, e tendencia aki ta gatia drenta progresivamente durante un periodo di tempu. Asta sin cu e sa un individuo por haña e característicanan indeseabel dje fariseonan.

Un Actitud Superior

Cua ta algun dje característicanan cu nos mester “tene cuidou” cuné? Individuonan cu ta considerá nan mes hustu generalmente ta “papia, i para i mira como si fuera nan nunca a haci algu malu,” e Encyclopædia of Religion and Ethics ta splica. Hende cu ta sinti nan mes hustu tambe gusta gaba nan mes of promové nan mes, cua tabata un problema grandi cu e fariseonan tabatin.

Jesus a describí e actitud farisaico aki cu un ilustracion: “Dos homber a subi n’e tempel pa haci oracion, un tabata un fariseo i e otro un cobrador di belasting. E fariseo a para i a cuminsá resa e cosnan aki den su mes, ‘O Dios, mi ta gradicí bo cu mi no ta manera e sobrá hombernan, rancadornan di placa, inhustunan, adúlteronan, ni sikiera manera e cobrador di belasting aki. Mi ta yuna dos bes pa siman, mi ta duna e décimo di tur loke mi ta gana.’ ” Na contraste e cobrador di belasting humildemente a admití su faltanan i a resultá di ta mas hustu cu e fariseo cu a gaba su mes. Jesus a dirigí e ilustracion aki na esnan “cu a confia den nan mes cu nan tabata hustu i cu a considerá sobrá hende como nada.”—Lucas 18:9-14.

Como hende imperfecto tin biaha nos por sinti cu nos ta mihó cu otronan debí na nos abilidadnan natural of bentahanan. Pero cristiannan mester deshací lihé di pensamentunan asina. Bo por tin hopi aña di experencia den bida cristian. Bo por ta un maestro capas di Bijbel. Of tal bes bo ta profesá di a ser ungí pa reina cu Cristo den cielu. Algun den e congregacion ta disfrutá di privilegionan special como minister di tempu completo, anciano of sirbidornan ministerial. Puntra bo mes, ‘Con Jehova lo sintié si mi usa loke el a duná mi como un base pa sintí mi superior cu otronan?’ Siguramente, esaki lo desagrad’é.—Filipensenan 2:3, 4.

Ora un cristian ta manifestá un actitud di superioridad pa motibu di su abilidadnan, privilegionan of autoridad cu Dios a dun’é, en realidad e ta hortando Dios dje gloria i e crédito cu solamente E ta merecé. Bijbel claramente ta spierta e cristian “pa no pensa mas di su mes di loke ta necesario pa pensa.” E ta urgi nos: “Keda dispuesto en cuanto otronan mescos cu boso ta en cuanto boso mes; no tene boso mente fihá riba cosnan haltu, sino laga cosnan humilde guia boso. No bira discreto den boso mes bista.”—Romanonan 12:3, 16.

“Stop di Husga”

Segun un encyclopedia di Bijbel, un persona cu ta hustu den su mes bista “ta considerá su mes sea moralmente recto of den un posicion hustu dilanti Dios debí na su pegamentu n’e letra di rekisitonan legal sin tuma nan berdadero intencion na cuenta.” Un otro fuente ta describí hende cu ta hustu den nan mes bista como “hende excesivamente religioso cu ta dedicá tur nan tempu pa busca malu den otronan.”

E fariseonan tabata culpabel di esaki. Cu tempu nan reglanan trahá dor di hende a parce mas importante cu Dios su ley i principionan. (Mateo 23:23; Lucas 11:41-44) Nan a nombra nan mes como hues i tabata cla pa condená cualkier hende cu no a cumpli cu nan normanan di husticia den nan mes bista. Nan actitud superior i admiracion propio exagerá a generá un necesidad pa dominá otro hende. Nan inabilidad pa dominá Jesus a haci nan furioso, di manera cu nan a traha complot pa mat’é.—Juan 11:47-53.

Ta ki desagradabel pa ta den compania di un hende cu ta establecé su mes como hues, semper buscando fout, scudriñando i vigilando tur hende rond di dje. Realmente, ningun hende den e congregacion tin e autoridad pa imponé riba otronan su opinionnan i reglanan cu e mes a traha. (Romanonan 14:10-13) Cristiannan balansá ta realisá cu hopi aspecto di bida diario ta cai den e esfera di decision personal. Specialmente esnan cu tin un tendencia di ser perfeccionista i exigente mester evitá di husga otronan.

Ta cierto cu e congregacion cristian ta autorisá pa tin reglanan cu ta contribuí n’e funcionamentu suave di Jehova su organisacion terenal. (Hebreonan 13:17) Pero algun a troce e reglanan aki of a agregá nan propio reglanan. Den un área tur studiante masculino den e Scol di Ministerio Teocrático tabatin cu bisti flus i botoná nan bachi ora di duna discurso. Un studiante cu a faya pa haci esei lo a ser descualificá pa duna discurso den futuro. En bes di traha reglanan pisá i stijf asina, lo no ta mas razonabel i na armonia cu e spiritu dje Palabra di Dios pa duna guia bondadoso i personal segun e necesidad?—Santiago 3:17.

Ser hustu den bo mes bista tambe por promové e opinion cu si un cristian ta pasando den hopi dificultad personal, e mester ta spiritualmente deficiente. Esaki ta netamente loke Elifas, Bíldad i Zófar, kendenan tabata hustu den nan mes bista, a pensa di fiel Job. Nan no tabatin un cuadro completo dje situacion, pues tabata arogante di nan parti pa acusá Job di malecho. Jehova a disipliná nan pa nan evaluacion trocí di Job su pruebanan.—Mira Job, capítulonan 4, 5, 8, 11, 18, 20.

Celo Mal Dirigí

Ser hustu den bo mes bista i ser celoso hopi biaha ta relacioná cu otro. Apostel Pablo a papia di hudiunan cu inclinacion religioso como hende cu tin “celo pa Dios; pero no segun conocimentu exacto; pasobra, no conociendo e husticia di Dios sino buscando pa establecé esun di nan mes, nan no a someté nan n’e husticia di Dios.” (Romanonan 10:2, 3) Como fariseo, Pablo mes tabata extremamente celoso, aunke su celo tabata mal dirigí, no basá riba Jehova su husticia.—Galationan 1:13, 14; Filipensenan 3:6.

Apropiadamente Bijbel ta spierta: “No bira demasiado hustu, ni mustra bo mes excesivamente sabí. Pakico bo mester causa desolacion pa bo mes?” (Eclesiástes 7:16) Den e congregacion un cristian por start sali den un forma conciencial, pero su conciencia i celo por degenerá den ser hustu den su mes bista. Ora hende ta ser guiá pa sabiduria humano mas bien cu Jehova su husticia, celo religioso por perhudicá otronan. Con?

Mayornan, por ehempel, por bira demasiado ocupá atendiendo e necesidadnan spiritual di otronan, i den e proceso nan por neglishá e necesidadnan di nan mes famia. Of mayornan por ta excesivamente celoso, exigiendo mas di nan yunan cu nan lo por haci. (Efesionan 6:4; Colosensenan 3:21) Algun yu, incapas pa cumpli cu tal exigencianan irazonabel, ta reaccioná dor di hiba un bida dobel. Un mayor razonabel lo tuma e limitacionnan di su famia na cuenta i haci ahustenan apropiado.—Compará cu Génesis 33:12-14.

Celo extremo tambe por priva nos di tacto, empatia i ternura, cuanan ta vital den nos tratamentu cu otronan. Un persona por traha masha duru pa promové interesnan di Reino. Sin embargo, cu tempu su celo extremo por causa daño na otronan. Pablo a bisa: “Si mi tin e don di profetisá i mi conocé tur secreto sagrado i tur conocimentu, i si mi tin tur e fe pa por trasladá cerunan, pero no tin amor, mi ta nada. I si mi duna tur mi pertenencianan pa alimentá otronan, i si mi entregá mi curpa, pa mi por gaba, pero no tin amor, esei no ta di ningun probecho pa mi.”—1 Corintionan 13:2, 3.

Dios Ta Faborecé Esnan Humilde

Como cristiannan nos tin cu identificá e peliger di bira hustu den nos mes bista promé cu e cuminsá desaroyá. Nos mester evitá un actitud di superioridad, e custumber di husga otronan, i celo ciegu basá riba sabiduria humano.

Segun cu nos ta “tene cuidou” cu actitudnan farisaico, en bes di husga otronan como hende hustu den nan mes bista, lo ta mihó pa enfocá riba nos mes tendencia i inclinacionnan. Ta cierto cu Jesus a husga e fariseonan i a condená nan como “yunan di víbora” merecedor di destruccion eterno. Pero Jesus por a lesa curason di hende. Nos no por.—Mateo 23:33.

Laga nos busca Dios su husticia i no di nos mes. (Mateo 6:33) Solamente e ora ei nos por tin Jehova su fabor, pasobra Bijbel ta spierta nos tur: “Faha boso mes cu humildad di mente un pa cu otro, pasobra Dios ta oponé hende halsá, pero e ta duna bondad inmerecí na esnan humilde.”—1 Pedro 5:5.