Ken Awe Ta Dirigí e Pueblo di Dios?

1, 2. Despues ku Hesus a subi na shelu, kiko su apòstelnan lo a puntra nan mes?

HESUS su apòstelnan tabata pará riba Seru di Oleifi ta wak na laira. Nan a kaba di mira nan maestro i amigu, Hesus, subi bai laira te ora un nubia a kit’é for di nan bista. (Echo. 1:9, 10) Pa mas o ménos dos aña, Hesus a siña nan, animá nan i dirigí nan. Awor e no tabat’ei mas. Kiko nan lo a hasi?

² Promé ku Hesus a bai shelu, el a duna su siguidónan un enkargo: “Boso lo ta mi testigunan na Herúsalèm, den henter Hudea i Samaria, i te na e parti mas leu di tera.” (Echo. 1:8) Kon nan lo por a kumpli ku e asignashon akí? Ta bèrdat ku Hesus a sigurá nan ku pronto nan lo a haña spiritu santu. (Echo. 1:5) Pero ta ken lo a dirigí nan i organisá e kampaña mundial di prediká akí? Den antigwedat, Yehova a usa representante visibel pa dirigí i organisá su pueblo. Podisé e apòstelnan a puntra nan mes: ‘Yehova lo nombra un lider nobo awor?’

 3. (a) Despues ku Hesus a subi na shelu, ki desishon importante e fiel apòstelnan a tuma? (b) Kiko nos lo trata den e artíkulo akí?

³ Ménos ku dos siman despues, e disipelnan di Hesus a buska guia den e Skritura, pidi Yehova su yudansa den orashon i skohe Matías komo e di 12 apòstel pa tuma e lugá di Hudas Iskariot. (Echo. 1:15-26) Dikon tabata asina importante pa nan—i pa Yehova—pa skohe un otro apòstel? Wèl, Matías a satisfasé un nesesidat importante den asuntu di organisashon.a Hesus no a skohe e apòstelnan djis pa nan kompañ’é den su sirbishi, sino pa nan kumpli ku un papel importante den e pueblo di Dios. Kiko e papel akí tabata? Kon Yehova a prepará nan pa esei mediante Hesus? Tin hende den e pueblo di Dios djawe ku ta kumpli ku un papel similar? I kon nos por “kòrda riba esnan ku ta dirigí” nos, spesialmente esnan ku ta forma “e esklabo fiel i prudente”?—Heb. 13:7; Mat. 24:45.

 4. Ki papel e apòstelnan i otro ansianonan na Herúsalèm tabatin den promé siglo?

⁴ Na Pentekòste di aña 33, e apòstelnan a kuminsá dirigí e kongregashon kristian. Na e okashon ei, “Pedro a lanta para huntu ku e 11 apòstelnan” i a kompartí ku un grupo grandi di hudiu i prosélito bèrdatnan presioso ku por a skapa nan bida. (Echo. 2:14, 15) Hopi di nan a bira kristian i “a sigui presta atenshon na siñansa di e apòstelnan.” (Echo. 2:42) E apòstelnan tabata manehá e plaka di e kongregashon. (Echo. 4:34, 35) Ademas, nan tabata atendé e nesesidatnan spiritual di e pueblo di Dios. Nan a mustra esei, bisando: “Nos lo dediká nos na orashon i na siña hende e palabra di Dios.” (Echo. 6:4) Anto nan a asigná kristiannan ku eksperensia pa yuda ekspandé e trabou di prediká den teritorionan nobo. (Echo. 8:14, 15) Ku tempu, otro ansianonan ungí a djòin e apòstelnan pa yuda nan atendé e asuntunan di e kongregashonnan. Nan a forma un kuerpo gobernante ku tabata dirigí tur e kongregashonnan.—Echo. 15:2.

5, 6. (a) Kon spiritu santu a duna e kuerpo gobernante poder? (Wak e promé plachi.) (b) Kon angel a yuda e kuerpo gobernante? (c) Kon e Palabra di Dios a guia e kuerpo gobernante?

⁵ E kristiannan di promé siglo a rekonosé ku Yehova Dios tabata usa nan Lider, Hesus, pa dirigí e kuerpo gobernante. Kon nan por tabatin sigur di esei? Di promé, spiritu santu a duna e kuerpo gobernante poder. (Huan 16:13) Tur kristian ungí a risibí spiritu santu, pero spiritu santu a yuda spesialmente e apòstelnan i e otro ansianonan na Herúsalèm kumpli ku nan papel komo superintendente. Por ehèmpel, na aña 49, spiritu santu a guia e kuerpo gobernante pa tuma un desishon tokante e kuestion di sirkunsishon. E kongregashonnan a obedesé nan instrukshon i “a sigui bira firme den fe i krese na kantidat dia tras dia.” (Echo. 16:4, 5) E karta den kua e kuerpo gobernante a informá e kongregashonnan di nan desishon ta demostrá tambe ku e kuerpo gobernante a desplegá Dios su fruta di spiritu, inkluso amor i fe.—Echo. 15:11, 25-29; Gal. 5:22, 23.

⁶ Di dos, angel a yuda e kuerpo gobernante. Por ehèmpel, promé ku Kornelio a batisá i bira e promé kristian ku no tabata hudiu ni sirkunsidá, un angel a bis’é pa e manda buska apòstel Pedro. Despues ku Pedro a prediká na Kornelio i su famia, spiritu santu a baha riba nan, aunke nan no tabata sirkunsidá. Esaki a motivá e apòstelnan i otro rumannan pa someté nan mes na e boluntat di Dios i aseptá hende ku no tabata sirkunsidá den e kongregashon kristian. (Echo. 11:13-18) Ademas, e angelnan a apoyá i yuda aselerá e trabou di prediká ku e kuerpo gobernante tabata dirigí. (Echo. 5:19, 20) Di tres, e Palabra di Dios a guia e kuerpo gobernante. E Skritura a dirigí e ansianonan ungí ei ora nan mester a tuma desishon tokante kreensia kristian òf ora nan mester a manda instrukshon pa e kongregashonnan.—Echo. 1:20-22; 15:15-20.

 7. Dikon nos por bisa ku ta Hesus tabata dirigí e promé kristiannan?

⁷ Aunke e kuerpo gobernante den e promé siglo tabatin outoridat den e kongregashon, nan a rekonosé ku ta Hesus tabata nan Lider. Apòstel Pablo a skirbi ku ta Kristu a “duna algun di nan komo apòstel.” Anto el a agregá: “Laga nos krese pa medio di amor den tur kos na armonia ku esun ku ta e kabes, esta, Kristu.” (Efe. 4:11, 15) En bes di karga nòmber di un apòstel prominente, e disipelnan “bou di guia di Dios” a ser yamá “kristian.” (Echo. 11:26) Ta bèrdat ku Pablo a rekonosé ku tabata importante pa “tene duru na e tradishonnan,” esta, na e kustumbernan basá riba e Skritura ku e kristiannan a haña di e apòstelnan i otro ruman hòmbernan ku a dirigí e kongregashon. Sinembargo, el a agregá: “Ma mi ke pa boso sa ku kabes di tur hòmber [inkluso e miembronan di e kuerpo gobernante] ta Kristu; . . . anto kabes di Kristu ta Dios.” (1 Kor. 11:2, 3) Sí, Yehova Dios a nombra Kristu Hesus, den su gloria selestial, pa dirigí e kongregashon.

8, 9. Rònt di aña 1870, ki papel importante Ruman Russell tabatin?

⁸ Rònt di aña 1870, Charles Taze Russell huntu ku algun di su kolaboradónan a hasi esfuerso pa restorá adorashon kristian berdadero. Pa yuda nan prediká bèrdatnan bíbliko na vários idioma, nan a registrá Zion’s Watch Tower Tract Society na 1884 komo un korporashon legal. E presidente tabata Ruman Russell.b E tabata un studiante sobresaliente di Beibel, i ku kurashi el a prediká ku doktrinanan manera esun di Trinidat i inmortalidat di alma ta falsu. El a komprondé ku Kristu lo a bolbe na un manera invisibel i ku “e tempu stipulá di e nashonnan” lo a terminá na 1914. (Luk. 21:24) Ruman Russell a dediká tur su tempu, energia i plaka pa kompartí e bèrdatnan akí ku otro hende. Ta bisto ku den e tempu krusial ei den historia, Yehova i Hesus, kabes di e kongregashon, tabata usa Ruman Russell.

⁹ Ruman Russell no tabata ke atenshon spesial di hende. Na 1896, el a skirbi: “Nos no ke homenage ni venerashon pa nos mes ni pa loke nos ta skirbi. Tampoko nos no ke pa hende yama nos Pastor ni Rabi. Ni nos no ke pa hende yama boso ni kualke grupo di persona na nos nòmber.” El a bisa mas despues: “Esaki no ta obra di hende.”

10. (a) Na ki tempu Hesus a nombra “e esklabo fiel i prudente”? (b) Splika kon e Kuerpo Gobernante gradualmente a bira diferente for di e Sosiedat Watch Tower.

¹⁰ Na 1919, tres aña despues ku Ruman Russell a fayesé, Hesus a nombra “e esklabo fiel i prudente.” Ku ki propósito? Pa duna su sirbidónan di kas “kuminda na e debido tempu.” (Mat. 24:45) Durante e promé añanan ei, un grupo chikitu di ruman hòmber ungí ku tabata sirbi na e ofisina prinsipal na Brooklyn, New York, tabata prepará i manda kuminda spiritual pa Hesus su siguidónan. E ekspreshon “kuerpo gobernante” a kuminsá sali den nos publikashonnan den e dékada di 1940. E tempu ei e rumannan a asumí ku e ta referí por lo general na e direktornan di Watch Tower Bible and Tract Society. Pero, na 1971, e rumannan a hasi un distinshon entre e Kuerpo Gobernante i e direktornan di e Sosiedat Watch Tower, ya ku esei tabata un korporashon legal i no un institushon bíbliko. For di e aña ei padilanti, e Kuerpo Gobernante a inkluí ruman hòmbernan ungí ku no tabata direktor di e Sosiedat. Den añanan mas resien, ruman hòmbernan responsabel ku ta parti di e ‘otro karnénan’ a sirbi komo direktor di e entidat legal akí i di otro korporashonnan ku e pueblo di Dios ta usa. Esei a permití e Kuerpo Gobernante konsentrá riba preparashon i dunamentu di kuminda i guia spiritual. (Huan 10:16; Echo. 6:4) E Toren di Vigilansia di 15 di yüli 2013 a splika ku “e esklabo fiel i prudente” ta un grupo chikitu di ruman hòmber ungí ku ta forma e Kuerpo Gobernante.

11. Kon e Kuerpo Gobernante ta funshoná?

¹¹ E Kuerpo Gobernante ta tuma desishonnan importante huntu komo grupo. Kon asina? E miembronan ta reuní huntu tur siman, loke ta promové bon komunikashon i union. (Pro. 20:18) Kada aña, un otro miembro ta fungi komo presidente di e reunionnan akí, ya ku niun miembro di e Kuerpo Gobernante no ta konsiderá su mes mas importante ku e otronan. (1 Ped. 5:1) Asina tambe nan ta kambia tur aña e miembro ku ta presidente den kada un di e seis komiténan di e Kuerpo Gobernante. Anto e miembronan di e Kuerpo Gobernante no ta mira nan mes komo lider di nan rumannan, sino komo un di e “sirbidónan di kas,” ku ta haña alimento di e esklabo fiel i ta sigui su guia.

12. Komo ku e Kuerpo Gobernante no ta haña inspirashon divino ni no ta perfekto, ki preguntanan ta lanta?

¹² E Kuerpo Gobernante no ta haña inspirashon divino ni no ta perfekto. P’esei, e por faya den asuntunan di siñansa bíbliko òf di organisashon. De echo, den e Índice de las publicaciones Watch Tower tin e suptema “Aclaración de creencias,” ku tin un lista di ahustenan ku tabatin den nos manera di komprondé sierto bèrdatnan di Beibel desde 1870.c Hesus no a bisa ku su esklabo fiel lo a produsí kuminda spiritual perfekto. P’esei, kon nos por kontestá Hesus su pregunta: “Ken realmente ta e esklabo fiel i prudente?” (Mat. 24:45) Ki prueba tin ku e Kuerpo Gobernante ta e esklabo fiel ei? Laga nos analisá e mesun tres medionan ku a guia e kuerpo gobernante di e promé siglo.

13. Kon spiritu santu a yuda e Kuerpo Gobernante?

¹³ Prueba ku spiritu santu ta guia e Kuerpo Gobernante. Spiritu santu a yuda e Kuerpo Gobernante komprondé bèrdatnan bíbliko ku nan no tabata komprondé promé. Por ehèmpel, pensa riba e lista di ahustenan den nos kreensia ku nos a menshoná den e paragraf anterior. Klaru ku niun hende no meresé elogio pasobra ta nan a deskubrí i splika “e kosnan profundo di Dios” akí. (Lesa 1 Korintionan 2:10.) E Kuerpo Gobernante ta pensa meskos ku apòstel Pablo, kende a bisa: “Nos ta papia e kosnan akí, no ku palabra ku nos a siña for di sabiduria humano, sino ku palabra ku nos a siña for di spiritu santu.” (1 Kor. 2:13) Despues di siglonan di siñansa falsu i sin un guia kla, kon bini for di 1919 tabatin un oumento asina grandi den konosementu spiritual? E úniko splikashon pa esei ta e yudansa di spiritu santu.

14. Segun Revelashon 14:6 i 7, kon angel ta yuda e pueblo di Dios awe?

¹⁴ Prueba ku e angelnan ta yuda e Kuerpo Gobernante. Awe e Kuerpo Gobernante tin e tarea inmenso di dirigí mas ku ocho mion publikadó den e trabou di prediká rònt mundu. Kon bini e trabou akí tabatin asina bon resultado? Un motibu ta ku e angelnan ta yuda nos. (Lesa Revelashon 14:6, 7.) Masha hopi biaha publikadónan a yama na kasnan kaminda un hende a kaba di pidi Dios den orashon pa yud’é.d E echo ku e trabou di prediká i di hasi disipel ta sigui krese, apesar di oposishon severo den algun pais, ta posibel solamente ku yudansa sobrehumano, esta, di e angelnan.

15. Ki diferensia tin entre e Kuerpo Gobernante i e lidernan di kristiandat? Duna un ehèmpel.

¹⁵ E Palabra di Dios ta guia e Kuerpo Gobernante. (Lesa Huan 17:17.) Tuma nota di lo siguiente. E Toren di Vigilansia na ingles di 1 di yüni di 1973 (na spañó, 15 di òktober) a puntra: “Hende ku no a stòp di huma tabako ta kualifiká pa batisá?” E kontesta tabata: “E Skritura ta yuda nos yega na e konklushon ku nan no por batisá.” Despues di sita vários teksto bíbliko ku ta sostené e punto akí, E Toren di Vigilansia ei a splika dikon mester ekspulsá un hende ku no ke stòp di huma. (1 Kor. 5:7; 2 Kor. 7:1) E artíkulo a bisa: “Esaki no ta un desishon pa loko òf djis pa dikta riba hende. E norma estrikto akí realmente ta bini di Dios, kende ta ekspresá su mes via di su Palabra skirbí.” Niun otro organisashon religioso ta asina dispuesto pa dependé kompletamente riba e Palabra di Dios, asta ora esaki por ta un reto pa algun di su miembronan. Un buki tokante religion, publiká resientemente na Merka, a bisa: “Lidernan kristian regularmente ta ahustá nan siñansanan pa asina esakinan kuadra ku kreensia i opinion popular di nan miembronan i di sosiedat en general.” Si e Kuerpo Gobernante ta laga e Palabra di Dios, i no opinion popular, guia nan desishonnan, ta ken realmente ta dirigiendo e pueblo di Dios awe?

16. Den ki manera nos por kòrda riba e Kuerpo Gobernante?

¹⁶ Lesa Hebreonan 13:7. E palabra tradusí komo “kòrda” por ser tradusí tambe komo “menshoná.” P’esei, un manera ku nos por “kòrda riba esnan ku ta dirigí” ta di menshoná e Kuerpo Gobernante den nos orashonnan. (Efe. 6:18) Pensa un ratu riba nan responsabilidat di proveé kuminda spiritual, di supervisá e trabou di prediká rònt mundu i di manehá e fondonan ku nan ta risibí di donashon. Siguramente nos mester menshoná nan konstantemente den nos orashonnan!

17, 18. (a) Kon nos ta kooperá ku e Kuerpo Gobernante? (b) Den ki otro manera nos ta demostrá ku nos ta apoyá e esklabo fiel i Hesus?

¹⁷ Di mes, nos no mester kòrda riba e Kuerpo Gobernante ku palabra so; tambe nos mester sigui su instrukshonnan ku ta yega serka nos mediante nos publikashonnan i nos reunion-, asamblea- i kongresonan. Ademas, e ta nombra superintendentenan di sirkuito, kendenan na nan turno ta nombra ansianonan di kongregashon. E superintendentenan di sirkuito i e ansianonan ta kòrda e Kuerpo Gobernante ora ku nan ta sigui nan instrukshonnan estriktamente. Anto nos tur ta demostrá ku nos ta respetá nos Lider, Hesus, ora nos ta obediente i ta sumiso na e hòmbernan ku e ta usa pa dirigí nos.—Heb. 13:17.

¹⁸ Un otro manera ku nos por kòrda e Kuerpo Gobernante ta ora nos ta hasi nos bèst den e trabou di prediká. Pablo a urgí kristiannan pa imitá e fe di e rumannan ku ta dirigí e kongregashon. E esklabo fiel a demostrá un fe ekstraordinario den e manera ku e ta promové e predikashon di e bon notisia di Reino ku entusiasmo. Abo ta un di e otro karnénan ku ta apoyá e ungínan den e trabou importante akí? Lo bo sinti bo masha kontentu ora bo Lider, Hesus, bisa: “Kiko ku boso a hasi pa un di esnan di mas chikitu di mi rumannan, ta pa mi boso a hasié.”—Mat. 25:34-40.

19. Dikon bo ta determiná pa sigui nos Lider, Hesus?

¹⁹ Hesus no a bandoná su siguidónan despues ku el a bolbe na shelu. (Mat. 28:20) E tabata sa personalmente kon bon e spiritu santu, e angelnan i e Palabra di Dios a yud’é dirigí su disipelnan tempu e tabata riba tera. P’esei, el a duna e esklabo fiel e mesun yudansa. Komo kristiannan ungí, e miembronan di e esklabo akí “ta sigui e Lamchi unda ku e bai.” (Rev. 14:4) Pues, ora nos sigui nan guia, en realidat nos ta sigui nos Lider, Hesus, kende pronto lo hiba nos na bida eterno. (Rev. 7:14-17) I esei ta algu ku niun lider humano no por primintí!