E Gloria Mas Grandi dje Cas di Jehova

“‘Lo mi yena e cas aki cu gloria,’ Jehova di ehércitonan a bisa.”—AGEO 2:7.

 1. Con spiritu santu ta relacioná cu fe i obra?

ORA un Testigo di Jehova tabata predicá di cas pa cas, el a topa un señora pentecostal cu a bis’é, ‘Nos tin spiritu santu, pero boso ta esnan cu ta haci e trabou.’ Cu tacto e Testigo a splik’é cu un persona cu tin spiritu santu, como un consecuencia natural, lo ser motivá pa haci e trabou di Dios. Santiago 2:17 ta declará: “Fe, si e no tin obra, ta morto riba su mes.” Cu yudansa dje spiritu di Jehova, su Testigonan a cultivá fe fuerte, i el a ‘yena su cas cu gloria’ dor di pone nan haci obranan hustu—principalmente ‘predicá e bon nobo aki dje Reino den tur e tera habitá como testimonio pa tur nacion.’ Ora e trabou aki ser completá n’e satisfaccion di Jehova, “e ora ei e fin lo yega.”—Mateo 24:14.

 2. (a) Ocupando nos mes den e obra di Jehova lo trece ki bendicion? (b) Pakico nos mester ta contentu tocante cualkier aparente ‘tardansa’?

² For dje palabranan aki di Jesus, nos ta concluí cu nos trabou awe mester enfocá riba predicá na otronan “e glorioso bon nobo dje Dios felis,” cu cua nos a ser confiá. (1 Timoteo 1:11) Mas nos ocupá nos mes gososamente den Jehova su sirbishi, mas lihé e fin lo parce di yega. Na Habacuc 2:2, 3, nos ta lesa Jehova su palabranan: “Skirbi e vision, i pon’é claramente riba tablanan, pa esun cu ta lesa for di dje na bos haltu por hacié cu afluencia. Pasobra e vision ta ainda pa e tempu señalá, i e ta sigui ansha te n’e fin, i lo e no bisa un mentira. Asta si e mester tarda, keda den expectativa di dje; pasobra lo e ser realisá sin falta. Lo e no ta lat.” Sí, “e vision” lo ser realisá “asta si e mester tarda.” Siendo cu nos ta den e di 83 aña di Jesus su mando di Reino, algun por sinti cu nos ta den un periodo di tardansa awor aki. Sin embargo, nos no mester ta contentu cu e fin no a yega ainda? Durante e década aki di añanan ’90, restriccionnan riba e trabou di predicá e bon nobo a ser eliminá, casi milagrosamente, na Oost Europa, partinan di Africa i otro paisnan. E aparente ‘tardansa’ ta permitiendo tempu pa hopi mas ‘carné’ ser recogé for dje teritorionan aki cu recientemente a habri.—Juan 10:16.

 3. Pakico nos comprendimentu actualisá riba “e generacion aki” mester stimulá nos pa ocupá nos mes urgentemente den e obra di Dios?

³ “Lo e no ta lat,” e profeta ta bisa. Jesus a bisa cu e generacion malbado actual lo no pasa forbij te ora “tur e cosnan aki sosodé.” (Mateo 24:34) Acaso nos comprendimentu actualisá di su palabranan tocante ‘e generacion aki’ ta nificá cu nos actividad di predicá no ta asina urgente?a Echo ta mustra cu net lo contrario ta e caso! Nos generacion contemporáneo ta hundiendo den un estado di maldad i corupcion sin paralelo den tur historia di pasado. (Compará cu Echonan 2:40.) Nos mester ta ocupá den nos trabou urgentemente. (2 Timoteo 4:2) Tur e profecianan cu ta indicá e tempu p’e tribulacion grandi cuminsá ta mustra cu lo e bini di ripiente, instantáneamente, inesperá—manera un ladron. (1 Tesalonicensenan 5:1-4; Revelacion 3:3; 16:15) “P’e motibu aki, boso tambe demostrá cu boso ta prepará, pasobra na un ora cu boso no ta pensa cu e ta, e Yu di hende ta bini.” (Mateo 24:44) Segun cu e generacion di humanidad sin dios aki ta cologá na rand di destruccion, siguramente nos lo no kier tira nos speransa precioso di bida eterno afó dor di bolbe bek na “lora den lodo” di distraicionnan mundano!—2 Pedro 2:22; 3:10; Lucas 21:32-36.

 4. Ki situacion a exigí mas suministro di “alimento n’e debido tempu,” i con e necesidad aki a ser satisfacé?

⁴ Na cumplimentu dje profecia di Jesus, na 1914 tabatin “un principio di dolor di angustia” segun cu humanidad a drenta e “conclusion dje sistema di cosnan.” Tristesa, sucesonan catastrófico i maldad a aumentá te n’e tempu aki. (Mateo 24:3-8, 12) N’e mésun tempu, Jehova a comisioná e clase ungí di esclabo fiel i discreto pa percurá ‘alimento spiritual n’e debido tempu’ p’e cas di nan Doño, Cristo. (Mateo 24:45-47) For di su trono den shelu, e Rey Mesiánico aki ta dirigiendo awor un maraviyoso programa di alimentacion spiritual rond e tera.

Abundancia di “Artículonan di Cuminda”

 5. Ki atencion e artículo básico di “cuminda” ta ricibiendo?

⁵ Considerá e preparacion di “artículonan di cuminda.” (Lucas 12:42) E artículo básico riba e menú cristian ta e Palabra di Dios, Bijbel. Pa siña Bijbel eficasmente, un traduccion fácil pa lesa i exacto ta un necesidad primario. Den transcurso di añanan e necesidad aki a ser satisfacé progresivamente, specialmente cuminsando na 1950 ora e Traducción del Nuevo Mundo de las Escrituras Griegas Cristianas a ser publicá na ingles. Pa 1961 e Traducción del Nuevo Mundo di henter e Bijbel a bira disponibel, i edicionnan a aparecé pronto den otro idiomanan principal. E 3 volúmennan cu a ser publicá durante e aña di sirbishi di 1996 ta trece e total na 27, di cua 14 ta e Bijbel completo. Afin di haci e traduccion aki di Bijbel, i tambe di otro yudansanan bíblico, rond di 1.174 cristian dedicá ta trahando awor tempu completo riba trabounan di traduccion den 77 pais.

 6. Con e Sociedad a satisfacé e demanda pa publicacionnan bíblico?

⁶ Como respaldo p’e trabou dje ehército di traductornan aki, e 24 sucursalnan dje Sociedad Watch Tower cu ta haci trabou di imprenta a bin ta produciendo publicacionnan na cantidadnan cada bes mas grandi. Pa logra esaki, mas mashin di imprenta ‘rotary’ di alta velocidad ta sigui ser instalá den sucursalnan principal. Produccion dje revistanan Toren di Vigilancia i Spierta! a crece cu cada luna, alcansando un total combiná di 943.892.500 copia, un aumento di 13,4 porciento p’e aña cu a pasa. Produccion total di Bijbel i buki cu kaft duru na Merca, Brazil, Finlandia, Alemania, Italia, Hapon, Korea i México so a aumentá cu 40 porciento for di 1995 pa 76.760.098 copia na 1996. Otro sucursalnan tambe a duna un contribucion significativo n’e aumento total den produccion di literatura.

 7. Con Isaías 54:2 ta haña mayor urgencia awor?

⁷ Hopi dje aumento a bira necesario durante e añanan ’90 dor dje eliminacion di restriccionnan riba Testigonan di Jehova na Oost Europa i Africa. E hamber pa alimento spiritual ta grandi den e lugánan aki. P’esei e yamada di Isaías ta resoná cada bes cu mas urgencia: “Haci e lugá di bo tent mas espacioso. I laga nan extendé e telanan di tent di bo magnífico tabernáculo. No tene bo mes atras. Alargá e cabuyanan di bo tent, i haci e stacanan ei di bo tent fuerte.”—Isaías 54:2.

 8. Ki reaccion generoso ta yuda percurá sosten financiero?

⁸ P’esei, tabata necesario pa expandé facilidadnan den hopi dje 104 sucursalnan dje Sociedad. Debí n’e mal situacion económico den mayoria teritorio cu a habri recientemente, un gran parti dje costo p’e expansion aki ta ser cubrí dor di contribucionnan p’e obra mundial for dje paisnan mas próspero. Felismente, congregacionnan i personanan individual a respondé di curason, segun e spiritu di Exodo 35:21: “Anto nan a bini, tur hende kende su curason a impuls’é, i nan a trece, tur hende kende su spiritu a incit’é, e contribucion di Jehova pa e obra.” Nos ta probechá dje oportunidad aki pa gradicí tur cu a participá den e dunamentu generoso aki.—2 Corintionan 9:11.

 9. Con Romanonan 10:13, 18 ta ser cumplí awe?

⁹ Durante 1996 e publicacionnan dje Sociedad Watch Tower en berdad a glorificá e nomber i propósitonan di Jehova den tur skina dje tera. Ta net manera apostel Pablo a predicí. Citando e profecia di Joël i Salmo 19, el a skirbi: “‘Tur hende cu inbocá e nomber di Jehova lo ser salbá.’ No obstante, mi ta puntra, Nan no a keda sin tende, no ta berdad? Wel sí, en realidad, ‘nan zonido a sali den tur e tera, i nan declaracionnan te n’e extremidadnan dje tera habitá.’” (Romanonan 10:13, 18) Dor di engrandecé e nomber precioso Jehova dje manera ei, su pueblo a hunga un papel importante den yena su cas di adoracion cu gloria. Sin embargo, con a bai cu e proclamacion aki specíficamente durante 1996? Por fabor, examiná e cuadro cu ta sigui na página 18 te 21.

Cosechando Rond Mundu

10. Ki rasgonan sobresaliente bo ta ripará den e actividad di Jehova su pueblo, manera e ta ser resumí den e cuadro na página 18 pa 21?

¹⁰ Nunca Jesus su palabranan hañá na Lucas 10:2 tabatin un nificacion mas grandi: “E cosecha, en berdad, ta grandi, pero e trahadornan ta poco. P’esei roga n’e Doño dje cosecha pa manda trahadornan na su cosecha.” Bo ta respondiendo n’e yamada ei? Miyones di hende rond e tera ta respondiendo. E máximo nobo di 5.413.769 publicador di Reino cu a raportá sirbishi di veld durante 1996 ta confirmá esaki. Ademas, 366.579 ruman nobo a ser bautisá. Cuantu nos ta atesorá e ‘cosnan deseabel aki di tur e nacionnan,’ kendenan awor ta tuma parti den ‘yena Jehova su cas di adoracion cu gloria’!—Ageo 2:7.

11. Pakico nos tur tin motibu pa ta contentísimo?

¹¹ Informenan di expansion den camponan recien habrí ta remarcabel. Acaso algun di nos ta envidiá esnan cu awor ta disfrutá di un aumento asina? Al contrario, nos ta alegrá cu nan. Tur pais tabatin un cuminsamentu chikitu. Zacarías, un profeta contemporáneo di Ageo, a skirbi: “Ken a despreciá e dia di cosnan chikitu?” (Zacarías 4:10) Nos ta contentísimo cu den paisnan unda e trabou di duna testimonio ta bon establecí, tin awor miyones di publicador di Reino, i e teritorio ta ser cubrí frecuentemente, asta tur siman den hopi stad grandi. Nos tin motibu pa floha nos mannan miéntras Jehova ta extendé awor e oportunidad pa salbacion na paisnan caminda anteriormente e trabou tabata prohibí? Nunca! “E cunucu ta e mundu,” Jesus a bisa. (Mateo 13:38) Mester sigui duna un testimonio cabal, mescos cu e disipelnan di promé a duna un testimonio cabal n’e conclusion dje sistema di cosnan hudiu.—Echonan 2:40; 10:42; 20:24; 28:23.

Moviendo Semper Padilanti

12. Ki incentivo nos tin pa move “stret padilanti”? (Mira tambe e cuadro, “Cosechando ‘For di e Extremidad dje Tera.’”)

¹² Sí, nos tin cu keda al paso, moviendo “stret padilanti” cu e garoshi angelical celestial di Jehova. (Ezekiel 1:12) Nos ta corda e palabranan di Pedro: “Jehova no ta lento en cuanto su promesa, manera algun hende ta considerá lentitud, sino e tin pacenshi cu boso pasobra e no ta deseá pa ningun ser destruí sino ta deseá pa tur alcansá repentimentu.” (2 Pedro 3:9) Laga e celo ehemplar di nos rumannan den paisnan económicamente pober move nos na accion. Cualkier aparente tardansa pa Armagedon dal aden ta permitiendo cientos di miles di hende ser recogé den e paisnan aki i tambe den teritorionan hopi bon trahá. No ekibocá bo mes: “E gran dia di Jehova ta cerca. E ta cerca, i tin un puramentu masha tantu di dje.” (Sofonías 1:14) Mester tin un puramentu di nos parti tambe pa duna un testimonio final cabal!

13, 14. (a) Kico nos por bisa dje distribucion di publicacionnan durante 1996? (b) Ki plannan special congregacionnan por traha tur aña, i con bo ta planea pa participá?

¹³ Aunke e detayenan no ta bisto den e cuadro di informe di sirbishi, tabatin un aumento notabel den e distribucion di Bijbel, buki i revista durante aña pasá. Por ehempel, revistanan lagá rond mundu a mustra un aumento di 19 porciento, cu un total di 543.667.923 copia lagá. Nos revistanan ta yuda nos bon den e vários rasgonan di predicacion—riba caya, den parke, na parada di bus, den área di negoshi. Informenan ta indicá cu den algun teritorio saturá dor dje predicacion di Reino, profesionalnan a keda impresioná cu e calidad di nos revistanan i ta aceptando studionan di Bijbel.

¹⁴ Tur aña durante e luna di april, congregacionnan generalmente ta organisá actividad special di revista, incluyendo un campaña di traha henter un dia di cas pa cas i den lugánan público. Bo congregacion lo participá den esaki durante april 1997? Edicionnan sobresaliente di april di E Toren di Vigilancia i Spierta! a ser prepará, i nan presentacion simultáneo rond mundu siguramente mester laga su marca! Riba e isla di Chipre, e congregacionnan, usando como nan lema “alcansá mas tantu hende posibel cu e mensahe di Reino,” asta a continuá tur luna cu un programa asina di traha cu revista, alcansando un máximo nobo di 275.359 revista lagá p’e aña, un aumento di 54 porciento.

Ageo Su Mensahenan Final

15. (a) Pakico Jehova a manda mas mensahe mediante Ageo? (b) Ki les e di tres mensahe di Ageo mester transmití na nos?

¹⁵ Jehova a manda Ageo, 63 dia despues cu el a transmití su di dos mensahe, cu un di tres proclamacion cu nos por wel tuma na pechu awe. Ageo a papia como si fuera e hudiunan tabata poniendo e tempu ei e fundeshi dje tempel, locual en realidad nan a pone 17 aña mas promé. Un biaha mas Jehova a haña cu tabata apropiado pa efectuá un limpiesa. E sacerdotenan i e pueblo a floha nan mannan i p’esei tabata impuru den Jehova su bista. Ta posibel cu algun di Jehova su pueblo a floha nan mannan awe, asta bayendo den e camindanan permisivo i materialista dje mundu? Ta urgente pa nos tur fiha nos curason “desde e dia aki padilanti” pa trece gloria p’e nomber di Jehova, siendo sigur di su promesa: “Desde e dia aki lo mi otorgá bendicion.”—Ageo 2:10-19; Hebreonan 6:11, 12.

16. Ki ‘sagudimentu’ ta cerca di tuma lugá, i kico lo resultá for di dje?

¹⁶ Riba e mésun dia ei, e palabra di “Jehova di ehércitonan” a bini na Ageo pa di cuater i último biaha. El a duna di conocé kico e echo cu Jehova ta “sagudí shelu i tera” ta enbolbé, bisando: “Siguramente lo mi tumba e trono di reinonan i destruí e forsa dje reinonan dje nacionnan; i lo mi tumba e garoshi i su ginetenan, i e cabainan i nan ginetenan siguramente lo bini abou, cada un dor dje spada di su ruman.” (Ageo 2:6, 21, 22) E ‘sagudimentu’ lo alcansá asina su culminacion ora Jehova limpia e tera completamente na Armagedon. P’e tempu ei “e cosnan deseabel di tur e nacionnan” lo a drenta paden, pa forma un núcleo di sociedad humano p’e mundu nobo. Ki motibunan pa alegrá i duna alabansa na Jehova!—Ageo 2:7; Revelacion 19:6, 7; 21:1-4.

17. Con Jesus a ser poné como un “renchi di seyo”?

¹⁷ Concluyendo su profecia, Ageo ta skirbi: “‘Den e dia ei,’ ta e expresion di Jehova di ehércitonan, ‘lo mi tumá bo, O Zorobabel . . . , i siguramente lo mi poné bo como un renchi di seyo, pasobra abo ta esun kende mi a scoge,’ ta e expresion di Jehova di ehércitonan.” (Ageo 2:23) Cristo Jesus ta awor Jehova su antitípico Rey Mesiánico i Sumo Sacerdote, combinando den shelu e funcionnan cu Gobernador Zorobabel i Sumo Sacerdote Hosué a ocupá separadamente den e Jerusalem terenal. Manera un renchi oficial di seyo n’e man drechi di Jehova, Jesus ta esun cu a bira “Sí” como Jehova su instrumento pa realisá e hopi “promesanan di Dios.” (2 Corintionan 1:20; Efesionan 3:10, 11; Revelacion 19:10) Henter e mensahe profético di Bijbel ta enfocá riba e echo cu Jehova a percurá Cristo como Rey i Rescatador sacerdotal.—Juan 18:37; 1 Pedro 1:18, 19.

18. Con e ‘expresion di conclusion di Jehova di ehércitonan’ lo haña un cumplimentu refrescante?

¹⁸ Berdaderamente den nos tempu aki, e gloria di mas grandi ta ser hañá den Jehova su tempel spiritual radiante! I pronto, despues cu Jehova a bari henter e sistema di Satanas, Ageo 2:9 lo haña mas cumplimentu deleitabel: “‘Den e lugá aki lo mi duna pas,’ ta e expresion di Jehova di ehércitonan.” Pas por fin!—un pas duradero i universal, garantisá dor di Jehova su “renchi di seyo,” Cristo Jesus, e “Prins di Pas,” di ken ta pará skirbí: “N’e abundancia dje gobiernu di prins i na pas lo no tin fin . . . E celo mes di Jehova di ehércitonan lo haci esaki.” (Isaías 9:6, 7) Pa tur eternidad e gloria di Jehova su cas di adoracion lo ser reflehá na tur parti dje dominio pacífico di su soberania universal. Laga nos permanecé pa semper den e cas ei!—Salmo 27:4; 65:4; 84:10.

[Nota]

Bo Por Splica?

◻ Con, awe, e cas di Jehova ta ser ‘yená cu gloria’?

◻ Pakico ta mas urgente cu nunca pa predicá e bon nobo?

◻ Ki incentivo pa predicá urgentemente e Raport di Aña di Sirbishi pa 1996 ta duna?

◻ Con Cristo ta sirbiendo como Jehova su “renchi di seyo”?

[Kuadro na página 15]

Cosechando “For di e Extremidad dje Tera”

NA Isaías 43:6, nos ta lesa Jehova su mandamentu: “No tene atras. Trece mi yu hombernan desde leu, i mi yu muhernan for di e extremidad dje tera.” E texto aki ta hañando un cumplimentu excepcional awe na Oost Europa. Tuma por ehempel, e pais ex-comunista di Moldova. Tin pueblonan caminda asta te cu mitar dje poblacion awor ta Testigo. Nan tin cu biaha distancianan largu pa haña teritorio pa predicá, pero nan ta haci e esfuerso! Hopi publicador den e congregacionnan aki ta yunan di mayornan cu a ser exiliá pa Siberia den cuminsamentu di añanan ’50. Awor nan famianan ta hibando delantera den e trabou di cosecha. Di e 12.565 publicadornan, 1.917 a ser bautisá e aña cu a pasa aki. Cuarent’i tres dje congregacionnan tin rond di 150 publicador cada un, i circuitonan a aumentá for di cuater pa ocho den e aña di sirbishi nobo.

Remarcabel tambe, ta e expansion na Albania. Ei un man yen di Testigo leal a wanta e dictaduranan di mas cruel atrabes di mas o ménos 50 aña. Un cantidad di nan a ser matá. Esaki ta pone nos corda Jesus su promesa: “No tene miedu di loke boso ta bai sufri. Mira! E Diabel lo sigui tira algun di boso den prizon pa boso ser poní na prueba plenamente . . . Proba di ser fiel te na morto mes, i lo mi duna boso e corona di bida.” (Revelacion 2:10; mira tambe Juan 5:28, 29; 11:24, 25.) Kico nos ta mira awor na Albania? Berdaderamente un cumplimentu impresionante dje promesa di Jehova hañá na Isaías 60:22: “E chikitu mes lo bira mil”! Na 1990, solamente un publicador a raportá sirbishi di veld na Albania. Sin embargo, mas “trahador” for di Italia i otro paisnan a contestá e yamada di Jesus: “Bai, pues, i haci disipel di hende . . . , bautisando nan.” (Mateo 28:19; Lucas 10:2) P’e ocasion di Memorial dje morto di Jesus na 1996, 773 publicador tabata activo den veld, i esakinan a reuní 6.523 persona na nan reunion di Memorial, mas cu ocho biaha e cantidad di publicador! Asistencianan asombroso a ser raportá for di áreanan isolá. Aunke no tabatin publicadornan local, e stadnan di Kukës i Divjakë tabatin asistencianan di 192 i 230 respectivamente. Krujë, cu solamente un publicador, tabatin 212 presente. E 30 publicadornan na Korçë a huur facilidadnan pa riba 300 persona. Despues cu e cantidad ei a perta den e auditorio, mester a nenga 200 persona mas di drenta ya cu no tabatin mas espacio. Berdaderamente un cunucu hechu pa cosechá!

For di Rumania ta bini e informe aki: “Miéntras nos tabata haci e trabou di cas-pa-cas, nos a topa un persona cu a bisa cu e ta un Testigo di Jehova i tabata biba den un pueblo chikitu den cua, na nos conocimentu, no tabatin Testigo. El a bisa nos cu ademas di dje tabatin 15 otro persona cu pa hopi aña tabata tene reunion riba diahuebs i diadomingo i cu nan a cuminsá predicá di cas pa cas. E siguiente dia nos a bai n’e pueblo ei. Tabatin 15 homber, muher i mucha ta warda nos i nan a aceptá 20 buki i 20 dje último revistanan. Nos a mustra nan con pa conducí studionan di Bijbel. Nos a canta huntu i a contestá nan preguntanan di mas urgente. Esun cu tabata hiba delantera den e grupo a confesá: ‘Un par di dia pasá, mi a haci oracion cu awa na wowo pa Jehova manda un wardador pa nos, i mi oracion a ser contestá.’ Nos tabata sumamente contentu, i ora nos tabata bai, manera un huérfano cu por fin a haña un tata, el a bisa: ‘Por fabor, no lubidá nos. Bini bek cerca nos!’ Nos a haci esei, i awor nos ta conduciendo shete studio di Bijbel den e pueblo ei. Den hopi teritorio bírgen, e trabou ta cuminsá den un manera maraviyoso cu literatura bíblico, cu ta ser apreciá mashá, i esaki ta mustra cu e trabou ta di un fuente divino.”

[Tabèl na página 18-21]

RAPORT DI AÑA DI SIRBISHI PA 1996 DI TESTIGONAN DI JEHOVA MUNDIALMENTE

(Wak e edishon imprimí di e revista akí.)

[Plachinan na página 16, 17]

“E cosnan deseabel di tur e nacionnan” ta ser recogé den e Islanan di Laman (1), Sur América (2), Africa (3), Asia (4), Nort América (5) i Europa (6)