“E Esklabo Fiel” Ta Pasa e Tèst ku Éksito!

“Ta tempu pa huisio kuminsá ku e hendenan di e kas di Dios.” —1 Pedro 4:17.

 1. Kiko Hesus a haña ora el a inspekshoná e “esklabo”?

NA Pentekòste di aña 33 di nos era, Hesus a nombra un “esklabo” pa perkurá kuminda na e debido tempu pa e “otro kriánan” di su kas. Na 1914, Hesus a keda entronisá komo Rei, i pronto tabata tempu pa inspekshoná e “esklabo” ei. El a bin haña ku mayoria di e miembronan di e “esklabo” a duna prueba di ta “fiel i prudente.” P’esei el a pon’é na enkargo di “tur su propiedatnan.” (Mateo 24:45-47) Sin embargo, tabatin tambe un esklabo malbado ku no tabata ni fiel ni prudente.

“E Esklabo Malbado Ei”

2, 3. Di unda “e esklabo malbado ei” a sali, i kon el a desaroyá?

² Hesus a papia di e esklabo malbado inmediatamente despues di a menshoná “e esklabo fiel i prudente.” El a bisa: “Ma si e esklabo malbado ei bisa den su kurason: ‘Mi shon lo no bin p’awor,’ i e kuminsá bati su kompañeronan-esklabo i kome i bebe huntu ku burachénan, e shon di e esklabo ei lo bin riba un dia ku e no ta sper’é i na un ora ku e no sa, i lo kòrt’é na pida-pida i lo dun’é un lugá huntu ku e hipókritanan; ayanan lo tin yoramentu i mordementu riba djente.” (Mateo 24:48-51) E ekspreshon “e esklabo malbado ei” ta hala nos atenshon na e palabranan promé ku esei ku Hesus a bisa tokante e esklabo fiel i prudente. Sí, e “esklabo malbado” ta sali for di fila di e esklabo fiel.a Kon asina?

³ Promé ku 1914, hopi miembro di e esklabo fiel tabatin e speransa firme di topa ku e Brùidehòm den shelu e aña ei, pero nan speransa no a keda realisá. Komo resultado di esaki i otro desaroyonan, hopi di nan a keda desepshoná i un par a bira amargá. Algun di esnan amargá aki a kuminsá “bati” nan eks-rumannan ku palabra i a bai anda ku “burachénan,” gruponan religioso di kristiandat.—Isaias 28:1-3; 32:6.

 4. Kon Hesus a trata ku e “esklabo malbado” i ku tur esnan ku a demostrá e mesun aktitut?

⁴ E eks-kristiannan aki ku tempu a keda identifiká komo e “esklabo malbado,” i Hesus a “kòrt’é na pida-pida” es desir, a kastig’é severamente. Kon? El a rechasá nan, i nan a pèrdè e speransa di bai shelu. Sin embargo, nan no a wòrdu destruí mesora. Promé nan tabatin ku soportá un periodo di yoramentu i mordementu riba djente den “e skuridat pafó” di e kongregashon kristian. (Mateo 8:12) Dje tempu ei padilanti, tabatin algun otro persona ungí ku a demostrá e mesun aktitut malbado, i asina nan a identifiká nan mes ku e “esklabo malbado.” Tabatin tambe algun di e “otro karnénan” ku a imitá nan infieldat. (Juan 10:16) Tur e enemigunan ei di Kristu lo bai terminá den e mesun “skuridat pafó.”

 5. Kon e esklabo fiel i prudente a reakshoná, na kontraste ku e “esklabo malbado”?

⁵ Sin embargo, e esklabo fiel i prudente a pasa dor di e mesun tèstnan ku “e esklabo malbado ei.” Pero en bes di bira amargá, nan a ser reahustá. (2 Korintionan 13:11, NW) Nan amor pa Yehova i pa nan rumannan a bira mas fuerte. I esei a hasi nan un “pilar i sosten di e bèrdat” durante e “último dianan” turbulento aki.—1 Timoteo 3:15; 2 Timoteo 3:1.

Bírgennan Sabí i Bobo

 6. (a) Kon Hesus a ilustrá e aktitut prudente di e grupo di esklabo fiel? (b) Promé ku 1914, ki mensahe kristiannan ungí a proklamá?

⁶ Despues ku Hesus a papia di “e esklabo malbado ei,” el a duna dos komparashon òf parábola pa mustra dikon algun kristian ungí lo a resultá di ta fiel i prudente miéntras ku otronan nò.b Pa ilustrá e kualidat di ta prudente òf sabí, el a bisa: “E ora ei e reino di shelu lo ta di kompará ku dies bírgen ku a kohe nan lampi i a sali bai pa kontra ku e brùidehòm. I sinku di nan tabata bobo i sinku tabata sabí. Pasobra e bobonan a hiba nan lampi, ma nan no a hiba zeta, ma e sabínan a hiba zeta den nan flasko, huntu ku nan lampi.” (Mateo 25:1-4) E dies bírgennan ta pone nos kòrda riba kristiannan ungí promé ku 1914. Nan a kalkulá ku e brùidehòm, Hesukristu, tabata serka di aparesé. P’esei, nan “a sali bai” pa kontra kuné, predikando ku kurashi ku “e tempunan [stipulá] di e paganonan” lo a terminá na 1914.—Lukas 21:24.

 7. Na ki tempu i dikon kristiannan ungí na moda di papia “a pega soño”?

⁷ Nan tabatin rason. E tempu stipulá di e nashonnan a terminá na 1914, i e Reino di Dios bou di Kristu Hesus a kuminsá funshoná. Pero esei a tuma lugá den shelu invisibel. Riba tera, hende a kuminsá sufri e “ai” profetisá. (Revelashon 12:10, 12) Esei a trese un tempu di tèst. Komo ku e kristiannan ungí no tabata komprondé e asuntu muchu bon, nan a pensa ku “e brùidehòm tabata tarda pa bin.” Nan a keda konfundí i a konfrontá hostilidat di parti di mundu, i p’esei en general nan a baha man na nan aktividat i kasi a stòp ku e predikashon públiko organisá. Manera e bírgennan den e parábola, den sentido spiritual nan “a kuminsá kabishá i a pega soño.” I ta meskos a pasa tambe despues di morto di e apòstelnan di Hesus ku e personanan infiel ku tabata deklará di ta kristian.—Mateo 25:5; Revelashon 11:7, 8; 12:17.

 8. Kiko a hiba na e gritu: “At’e brùidehòm!,” i tabata tempu pa kristiannan ungí hasi kiko?

⁸ Anto na 1919 un kos inesperá a pasa. Nos ta lesa: “Ma meianochi por a tende un gritu: ‘At’e brùidehòm! Sali bai kontr’é.’ E ora ei tur e bírgennan ei a lanta i a prepará nan lampi.” (Mateo 25:6, 7) Nèt ora ku e situashon tabata parse sumamente skur, a sali un yamada pa bira aktivo! Na 1918, Hesus, “e mensahero di e aliansa,” a bini na Yehova su tèmpel spiritual pa inspekshoná i limpia Dios su kongregashon. (Malakias 3:1) Awor, kristiannan ungí tabatin ku sali bai kontr’é den e patio terenal di e tèmpel ei. Tabata tempu pa nan laga nan lus “bria.”—Isaias 60:1; Filipensenan 2:14, 15.

9, 10. Na 1919, dikon algun kristian tabata “sabí” i algun tabata “bobo”?

⁹ Pero warda! Den e parábola, algun di e mucha muhénan tabatin un problema. Hesus a sigui bisa: “E bobonan a bisa e sabínan: ‘Duna nos poko di boso zeta, pasobra nos lampinan ta bai paga.’” (Mateo 25:8) Sin zeta, e lampinan lo no a duna lus. E zeta di lampi ta laga nos kòrda riba e Palabra di Dios ku ta kontené e bèrdat i tambe riba Dios su spiritu santu, dos kos ku ta permití adoradónan berdadero ser kargadónan di lus. (Salmo 119:130; Daniel 5:14) Promé ku 1919 kristiannan ungí prudente—apesar ku temporalmente nan tabata den un kondishon débil—a buska diligentemente pa sa ta kiko ta Dios su boluntat pa nan. P’esei ora e yamada a bini pa laga nan lus bria, nan tabata prepará.—2 Timoteo 4:2; Hebreonan 10:24, 25.

¹⁰ Sin embargo, tabatin sierto ungínan ku no tabata prepará pa hasi sakrifisio ni pa hasi esfuerso personal, ounke sí nan tabata deseá sinseramente pa ta huntu ku e Brùidehòm. P’esei ora tabata tempu pa bira aktivo den e predikashon di e bon nobo, nan no tabata prepará. (Mateo 24:14) Asta nan a purba slow e aktividat di nan kompañeronan seloso, dor di pidi nan, na moda di papia, pa un tiki di nan zeta. Den e parábola di Hesus, kon e bírgennan sabí òf prudente a respondé? Nan a bisa: “No ta bai tin sufisiente pa nos i pa boso tambe; mihó boso bai serka e bendedónan i kumpra pa boso mes.” (Mateo 25:9) Asina tambe kristiannan ungí fiel na 1919 a nenga di hasi kualke kos ku lo por a mengua nan kapasidat di karga lus. Pues anto, nan a pasa e tèst ku éksito.

11. Kiko a pasa ku e bírgennan bobo?

¹¹ Hesus a konkluí: “Miéntras ku [e bírgennan bobo] a bai pa kumpra, e brùidehòm a yega, i esnan ku tabata prepará a drenta bai huntu kuné na e fiesta di kasamentu; i e porta a wòrdu será. I mas despues e otro bírgennan tambe a bin, bisando: ‘Señor, señor habri pa nos.’ Ma el a kontestá i a bisa: ‘Di bèrdat mi ta bisa boso, mi no konosé boso.’” (Mateo 25:10-12) Sí, algun kristian no tabata prepará pa yegada di e Brùidehòm. Pues, nan no a pasa e tèst ku éksito i a pèrdè e oportunidat di asistí na e fiesta di kasamentu selestial. Ki un tragedia!

E Parábola di e Talentonan

12. (a) Kiko Hesus a usa pa ilustrá fieldat? (b) Ken tabata e hòmber ku “a bai hasi un biahe”?

¹² Despues di ilustrá e aktitut prudente, Hesus a duna un ilustrashon di fieldat. El a bisa: “Ta manera un hòmber ku ta bai hasi un biahe pa un tera leu, i kende a yama su esklabonan i a entregá nan su propiedat. I na esun el a duna sinku talento, na e otro dos, i na e otro ún, kada un segun su kapasidat; i despues el a bai hasi un biahe.” (Mateo 25:14, 15) E hòmber den e parábola ta Hesus mes, kende “a bai hasi un biahe” ora el a subi na shelu na aña 33 di nos era. Pero promé ku Hesus a bai shelu el a enkargá “su propiedat” na su disipelnan fiel. Kon?

13. Kon Hesus a prepará un kampo grandi di aktividat i outorisá su “esklabonan” pa hasi negoshi?

¹³ Durante Hesus su sirbishi riba tera, el a kuminsá prepará un kampo grandi di aktividat dor di prediká e bon nobo di e Reino den henter e pais di Israel. (Mateo 9:35-38) Promé ku el “a bai hasi un biahe,” el a enkargá e kampo di aktividat na su disipelnan fiel, bisando: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:18-20) Ku e palabranan aki, Hesus a outorisá su “esklabonan” pa hasi negoshi te ora e regresá, “kada un segun su kapasidat.”

14. Dikon Kristu no a ferwagt di tur kristian pa nan hasi e mesun kantidat di negoshi?

¹⁴ E ekspreshon “kada un segun su kapasidat” ta indiká ku no ta tur kristian di promé siglo tabatin e mesun sirkunstansia òf posibilidat. Algun di nan, manera Pablo i Timoteo, tabatin e libertat ku nan por a partisipá plenamente den e trabou di prediká i siña otro hende. E sirkunstansianan di otro kristiannan kisas a limitá nan libertat di aktua masha hopi. Por ehèmpel, algun kristian tabata esklabo, i otronan tabata enfermo, di edat avansá òf tabatin responsabilidat di famia. Klaru ku sierto privilegionan di kongregashon no tabata disponibel pa tur disipel. Hende muhé ungí i algun hòmber ungí no tabata siñadó den e kongregashon. (1 Korintionan 14:34; 1 Timoteo 3:1; Santiago 3:1) Sin embargo, sea kual sea nan situashon personal, tur disipel ungí di Kristu—hòmber i muhé—tabata asigná pa hasi negoshi, es desir, hasi bon uso di nan oportunidatnan i sirkunstansianan den e sirbishi kristian. E disipelnan di Kristu di tempu moderno ta hasi meskos.

Tempu di Inspekshon Ta Kuminsá!

15, 16. (a) Ki ora tabata tempu pa regla kuenta? (b) Ki oportunidatnan nobo pa ‘hasi negoshi’ Kristu a duna esnan fiel?

¹⁵ E parábola ta sigui: “Awor despues di hopi tempu e shon di e esklabonan ei a bolbe i a regla kuenta ku nan.” (Mateo 25:19) Na 1914—anto bèrdat esei ta hopi tempu despues di aña 33—Kristu Hesus a kuminsá su presensia komo rei. Tres aña i mei despues, na 1918, el a bin na Dios su tèmpel spiritual i a kumpli ku e palabranan di Pedro: “Ta tempu pa huisio kuminsá ku e hendenan di e kas di Dios.” (1 Pedro 4:17; Malakias 3:1) Tabata tempu pa regla kuenta.

¹⁶ Kiko e esklabonan, Hesus su rumannan ungí, a hasi ku e “talentonan” di e Rei? Di aña 33 padilanti, inkluso te ku e añanan ku a hiba na 1914, hopi di nan a traha duru den Hesus su ‘negoshi.’ (Mateo 25:16) Asta durante e promé guera mundial, nan a demostrá un deseo fuerte pa sirbi nan Shon. P’esei awor tabata na su lugá pa duna esnan fiel oportunidatnan nobo pa ‘hasi negoshi.’ E tempu di fin di e sistema di kosnan aki a yega. Mester a prediká e bon nobo rònt mundu. Mester a kosechá “e kosecha di tera.” (Revelashon 14:6, 7, 14-16) Mester a lokalisá e miembronan final di e trigu kolektivo i rekohé “un multitut grandi” di otro karné.—Revelashon 7:9; Mateo 13:24-30.

17. Kon kristiannan ungí fiel a ‘drenta den e goso di nan shon’?

¹⁷ Tempu di kosecha ta un tempu di alegria. (Salmo 126:6) P’esei tabata apropiá ku na 1919 ora ku Hesus a enkargá su rumannan ungí fiel ku mas responsabilidat, el a bisa: “Bo tabata fiel den poko kos, lo mi enkargá bo ku hopi kos; drenta, tuma parti den e goso di bo shon.” (Mateo 25:21, 23) Ademas, e goso di e Shon komo Rei resien entronisá di e Reino di Dios ta surpasá nos imaginashon. (Salmo 45:1, 2, 6, 7) E grupo di esklabo fiel ta tuma parti den e goso ei dor di representá e Rei i oumentá su interesnan riba tera. (2 Korintionan 5:20) E palabranan profétiko di Isaias 61:10 ta ekspresá nan goso: “Lo mi gosa grandemente den SEÑOR; mi alma lo regosihá den mi Dios, pasobra el a bisti mi ku e bistínan di salbashon.”

18. Dikon algun kristian ungí no a pasa e inspekshon ku éksito, i ku ki resultado?

¹⁸ Lamentablemente, algun kristian no a pasa e inspekshon ku éksito. Nos ta lesa: “Esun ku a risibí ún talento a bin i a bisa: ‘Señor, mi tabata sa ku bo ta un hende severo, ku ta kosechá kaminda bo no a sembra, i ku ta rekohé kaminda bo no a stroi simia. I mi tabatin miedu, i mi a bai i a skonde bo talento bou di tera. Ata loke ta di bo aki.’” (Mateo 25:24, 25) Asina tambe algun kristian ungí no a hasi ‘negoshi.’ Promé ku 1914 nan no a kompartí nan speransa ku entusiasmo ku otro hende, i nan no kier a kuminsá na 1919. Kon Hesus a reakshoná riba nan aktitut tribí? El a kita tur nan privilegionan. Nan a wòrdu ‘tirá den e skuridat pafó, kaminda lo tin yoramentu i mordementu riba djente.’—Mateo 25:28, 30.

E Inspekshon Ta Sigui

19. Den ki manera e proseso di inspekshon ta sigui, i kiko tur kristian ungí ta determiná pa hasi?

¹⁹ Klaru ku mayoria di esnan ku lo a bira Kristu su esklabonan ungí durante e tempu di fin, no tabata sirbi Yehova ainda ora ku Hesus a kuminsá su inspekshon na 1918. Akaso nan a pèrdè e chèns di ser inspekshoná? Apsolutamente ku nò. E proseso di inspekshon simplemente a kuminsá na 1918/1919 ora ku e esklabo fiel i prudente komo grupo a pasa e tèst ku éksito. Kristiannan ungí individual ta sigui bou di inspekshon te ora ku seya nan permanentemente. (Revelashon 7:1-3) Konsiente di esaki, Kristu su rumannan ungí ta determiná pa sigui ‘hasi negoshi’ fielmente. Nan ta determiná pa ta prudente, i pa keda ku un bon stòk di zeta pa asina e lus sigui bria bon kla. Nan sa ku ora kada un di nan yega na final di su bida den fieldat, Hesus lo risibié den su kas selestial.—Mateo 24:13; Juan 14:2-4; 1 Korintionan 15:50, 51.

20. (a) Kiko e otro karnénan awe ta determiná pa hasi? (b) Kristiannan ungí ta konsiente di kiko?

²⁰ E multitut grandi di otro karné a imitá nan rumannan ungí. Nan sa ku e echo ku nan konosé Dios su propósito ta trese gran responsabilidat. (Ezekiel 3:17-21) P’esei, ku yudansa di Yehova su Palabra i spiritu santu, nan tambe ta sòru pa nan tin un bon stòk di zeta mediante studio i asistensia na reunionnan kristian. I nan ta laga nan lus bria, dor di partisipá den e trabou di prediká i di siña hende i asina ta ‘hasi negoshi’ huntu ku nan rumannan ungí. Sin embargo, kristiannan ungí ta bon konsiente di e echo ku ta den nan man Kristu a pone e talentonan. Ta nan tin ku rindi kuenta pa e manera ku ta atministrá e propiedatnan di Señor riba tera. Ounke nan kantidat ta tiki, nan no por bula pipa pa nan responsabilidat i lag’é na enkargo di e multitut grandi. Ku esaki na mente, e esklabo fiel i prudente ta sigui hiba delantera den manehá e negoshi di e Rei, gradisidu pa e apoyo ku nan ta haña di miembronan dediká di e multitut grandi. Anto e multitut grandi aki ta rekonosé e responsabilidat di nan rumannan ungí i ta sinti nan mes privilegiá di por traha bou di nan supervishon.

21. Ki spièrtamentu ta apliká na tur kristian for di promé ku 1919 te ku awe?

²¹ Pues anto, ounke e dos parábolanan aki a klarifiká susesonan ku a tuma lugá na 1919 i rònt di e époka ei, básikamente nan ta apliká na tur kristian berdadero durante e último dianan. Di e manera aki, ounke e spièrtamentu ku Hesus a duna na final di e parábola di e dies bírgennan ta apliká na promé lugá na kristiannan ungí promé ku 1919, su prinsipio ta apliká na tur kristian. P’esei laga nos tur tuma na pechu e palabranan di Hesus: “Sea alerta anto, pasobra boso no sa e dia ni e ora ku e Yu di hende ta bin.”—Mateo 25:13.

[Nota]

Bo Por Splika?

• Na ki tempu Hesus a inspekshoná su siguidónan, i kiko el a haña?

• Dikon algun kristian ungí a desaroyá e aktitut di “e esklabo malbado ei”?

• Kon nos por demostrá ku nos ta spiritualmente prudente?

• Imitando Hesus su fiel rumannan ungí, den ki manera nos por sigui ‘hasi negoshi’?

[Kuadro na página 16]

NA KI TEMPU HESUS TA BIN?

Den Mateo kapítulo 24 i 25, Beibel ta bisa ku Hesus ta “bin” den diferente sentido. E no tin ku move físikamente for di kaminda e ta pa e por “bin.” Mas bien, e ta “bin” den e sentido di dirigí su atenshon na humanidat òf na su siguidónan, hopi bes pa huisio. Pues, na 1914 el a “bin” pa kuminsá su presensia komo Rei entronisá. (Mateo 16:28; 17:1; Echonan 1:11) Na 1918 el a “bin” komo mensahero di e aliansa i a kuminsá husga esnan ku tabata deklará ku nan ta sirbi Yehova. (Malakias 3:1-3; 1 Pedro 4:17) Na Armagedón, lo e “bin” pa ehekutá huisio riba Yehova su enemigunan.—Revelashon 19:11-16.

E binida (òf, yegada) ku vários bes Beibel ta referí na dje den Mateo 24:29-44 i 25:31-46 ta na “e gran tribulashon.” (Revelashon 7:14) Di otro banda, e binida ku Beibel ta referí na dje vários biaha den Mateo 24:45 pa 25:30 tin di hasi ku su husgamentu desde 1918 padilanti di esnan ku ta deklará ku nan ta su disipel. Lo no ta rasonabel pa bisa, por ehèmpel, ku e dunamentu di rekompensa na e esklabo fiel, e huisio di e bírgennan bobo i e huisio di e esklabo floho ku a skonde e talento di e Shon, lo tuma lugá ora Hesus “bin” na e gran tribulashon. Pasobra esei lo nifiká ku hopi di e ungínan lo ser hañá infiel na e tempu ei i ku lo tin ku remplasá nan. Sin embargo, Revelashon 7:3 ta indiká ku pa e tempu ei tur esklabo ungí di Kristu lo a ser ‘seyá’ permanentemente kaba.

[Plachi na página 14]

E “esklabo malbado” no a haña bendishon na 1919

[Plachi na página 15]

E bírgennan sabí tabata kla prepará ora e brùidehòm a yega

[Plachi na página 17]

E esklabonan fiel a hasi “negoshi”

E esklabo floho nò

[Plachinan na página 18]

E ungínan i e “multitut grandi” ta sigui laga nan lus bria