E Bírgennan Ta Siña Nos pa Keda Vigilá

Hesus tabata kontestando e pregunta ku su apòstelnan a hasi tokante e señal di su presensia i di e konklushon di e era. Anto pa sigui spièrta nan, el a konta nan un otro ilustrashon. Kumplimentu di e ilustrashon akí lo bira bisto durante Hesus su presensia.

Hesus a kuminsá e ilustrashon, bisando: “E Reino di shelu ta manera dies bírgen ku a kue nan lampi i sali pa bai kontra ku e brùidehòm. Sinku di nan tabata bobo, i sinku tabata prudente.”—Mateo 25:1, 2.

Hesus no tabata ke men ku mitar di su disipelnan ku lo heredá e Reino di shelu ta bobo i ku mitar ta prudente. Mas bien, e tabata ke ilustrá ku, relashoná ku e Reino, su disipelnan ta liber pa skohe si nan ke keda alerta òf ser distraí. Pero Hesus no tabatin ningun duda ku su siguidónan por keda fiel i risibí bendishon di su Tata.

Den e ilustrashon, tur e dies bírgennan ta sali pa bai yama e brùidehòm bonbiní i pa djòin e den e seremonia matrimonial. Ora e brùidehòm yega, e bírgennan lo usa nan lampi pa lusa su kaminda i lo onr’é segun ku e ta trese su brùit na e kas ku a ser prepará p’e. Pero kiko ta sosodé despues?

Hesus a splika: “Esnan bobo a bai ku nan lampi, ma nan no a bai ku zeta èkstra, miéntras ku esnan prudente sí a bai ku zeta den nan bòter huntu ku nan lampi. Komo ku e brùidehòm a tarda pa yega, nan tur a kabishá i pega soño.” (Mateo 25:3-5) E brùidehòm no a yega na e momento ku nan tabata sper’é. Ta parse ku el a tarda hopi, p’esei tur e bírgennan a pega soño. Podisé esaki a laga e apòstelnan kòrda riba e ilustrashon ku Hesus a konta tokante e hòmber di nasementu noble ku a biaha bai un tera leu i ku, despues di ‘tempu, a bini bèk despues di a keda koroná komo rei.’—Lukas 19:11-15.

Anto Hesus a sigui konta kiko a pasa ora ku finalmente e brùidehòm a yega. El a bisa: “Meianochi, un hende a grita: ‘Ata e brùidehòm! Sali bai kontr’é!’” (Mateo 25:6) E bírgennan tabata prepará? Nan a keda vigilá?

Hesus a sigui konta: “Anto tur e bírgennan ei a lanta i prepará nan lampi. Esnan bobo a pidi esnan prudente: ‘Duna nos un tiki di boso zeta, pasobra nos lampi ta serka di paga.’ Esnan prudente a kontestá nan ku e palabranan akí: ‘Si nos duna boso, kisas lo no tin sufisiente pa nos ni pa boso. Mihó boso bai serka e bendedónan i kumpra boso mes zeta.’”—Mateo 25:7-9.

Pues, e sinku bírgennan bobo no tabata prepará pa binida di e brùidehòm, pasobra nan no a keda vigilá. Nan no tabatin sufisiente zeta pa nan lampi i nan mester a bai buska mas. Hesus a sigui konta: “Ora nan a bai kumpra zeta, e brùidehòm a yega, i e bírgennan ku tabata kla a drenta huntu kuné den e fiesta di kasamentu, i porta a sera. Despues, e otro bírgennan tambe a bini i a bisa: ‘Señor, Señor, habri pa nos!’ El a kontestá nan: ‘Di bèrdat mi ta bisa boso: Mi no konosé boso.’” (Mateo 25:10-12) Ki un situashon tristu nan a haña nan aden pa motibu ku nan no a keda vigilá ni tabata prepará!

E apòstelnan a komprondé klaramente ku e brùidehòm den e ilustrashon ta referí na Hesus mes. Mas promé, Hesus mes a kompará su mes ku un brùidehòm. (Lukas 5:34, 35) Pero ken e bírgennan prudente ta representá? Ora Hesus a papia di e “tou chikitu,” ku lo heredá e Reino, el a bisa: “Sea bistí i prepará i keda ku boso lampi sendí.” (Lukas 12:32, 35) Pues, e apòstelnan por a komprondé ku e bírgennan den Hesus su ilustrashon tabata referí na nan i na otro disipelnan ku lo a bira parti di e tou chikitu. Awor, kiko Hesus kier a siña hende ku e ilustrashon akí?

Hesus no a laga ningun duda enkuanto esei. El a konkluí su ilustrashon, bisando: “Keda vigilá, pasobra boso no sa ni e dia ni e ora.”—Mateo 25:13.

Ta bisto ku Hesus tabata konsehá su disipelnan fiel pa nan “keda vigilá” durante su presensia. Dikon? Pasobra lo e bini bèk sigur! Sí, nan mester ta prepará i alerta, meskos ku e sinku bírgennan sabí, i keda ku nan mente fihá riba nan speransa presioso pa nan no pèrdè nan rekompensa.