Conserba Bibu Atrabes Dje Tribulacion Grandi
“Esakinan ta esnan cu a sali for dje tribulacion grandi, i nan a laba nan pañanan largu i a haci nan blancu den e sanger dje Lamchi.”—REVELACION 7:14.
1. Ken lo saludá esnan resucitá den e resureccion terenal?
ORA miyones incontabel di hende ser lantá den e ‘resureccion dje hustunan i e inhustunan,’ nan lo no ser trecé bek na bida riba un tera bashí. (Echo 24:15) Nan lo lanta den un ambiente bunita drechá i lo haña cu alohamentu, paña i un abundancia di cuminda a ser prepará pa nan. Ken lo haci tur e preparacionnan aki? Claramente, lo tin hende bibando den e mundu nobo promé cu e resureccion terenal cuminsá. Ken? Bijbel ta indicá cu nan lo ta sobrebibientenan dje binidero tribulacion grandi. Di tur siñansa di Bijbel, esaki indudablemente ta un di esnan mas interesante—cu algun hende fiel lo ser conserbá bibu atrabes dje tribulacion grandi i lo no tin cu muri nunca. E Scritura Santu ta duna testimonio amplio dje speransa aki.
Manera e Dianan di Noe
2, 3. (a) Ki similaridad tin entre e dianan di Noe i nos tempu? (b) Kico e sobrebibencia di Noe i su famia atrabes dje Diluvio ta indicá?
2 Na Mateo 24:37-39, Jesucristo a haci un comparacion entre e dianan di Noe i e último dianan, den cua nos ta actualmente. El a bisa: “Mescos cu e dianan di Noe tabata, asina e presencia dje Yu di hende lo ta. Pasobra manera nan tabata den e dianan ei promé cu e diluvio, comiendo i bebiendo, hombernan casando i muhernan siendo duná den matrimonio, te n’e dia cu Noe a drenta den e arca; i nan no a haci caso te cu e diluvio a bini i a bari nan tur, asina e presencia dje Yu di hende lo ta.”
3 E Diluvio mundial a bari tur esnan cu no a presta atencion n’e mensahe di spiertamentu di Dios. Sin embargo, e no a bari Noe i su famia. Nan “a drenta den e arca,” manera Jesus a bisa. Debí na nan debocion piadoso, Jehova a percurá un caminda di escape pa nan. Segundo Pedro 2:5, 9 ta referí n’e sobrebibencia di Noe i su famia ora e ta bisa: “E [Dios] . . . a warda Noe, un predicador di husticia, salbo cu siete otronan ora el a trece un diluvio riba un mundu di hende malbado. Jehova sa con pa libra hende di debocion piadoso for di prueba.” Jesus a haci un comparacion entre e dianan di Noe i e último dianan pa mustra cu hende en general lo no haci caso di e mensahe di spiertamentu di Dios. No obstante, haciendo esei el a confirmá tambe cu Noe i su famia a obedecé Jehova Dios, a drenta e arca i a sobrebibí e Diluvio grandi. Sobrebibencia di Noe i su famia ta señalá n’e sobrebibencia dje fiel sirbidornan di Dios n’e fin dje mundu aki.
Un Patronchi dje Promé Siglo
4. Na cumplimentu cu e palabranan di Jesus, ki sucesonan a hiba n’e destruccion di Jerusalem na 70 E.C.?
4 Jesus a papia tambe di sucesonan pa tuma lugá na fin dje mundu aki. Na Mateo 24:21, 22, nos ta lesa: “N’e tempu ei lo tin tribulacion grandi tal como no a sosodé desde principio di mundu te awor, no, ni lo no sosodé atrobe. Realmente, aménos cu e dianan ei ser cortá, ningun carni lo ser salbá; pero pa causa dje scogínan e dianan ei lo ser cortá.” E palabranan aki tabatin un cumplimentu preliminar den e promé siglo di nos Era Comun. Na 66 E.C. e stad di Jerusalem a ser rondoná dor di ehércitonan romano bou di Cesto Galo. E trupanan romano a yega te n’e punto di cuminsá basha e muraya dje tempel abou, i hopi hudiu tabata cla pa entregá. Pero, inesperadamente i sin ningun aparente motibu, Cesto Galo a retirá su trupanan. Ora e cristiannan a mira e romanonan retirá, nan a actua riba e palabranan cu Jesus a papia hopi aña mas promé: “Ora boso mira Jerusalem rondoná pa ehército na campamentu, anto boso sa cu e desolacion di dje a yega cerca. Anto laga esnan den Hudea cuminsá hui p’e cerunan, i laga esnan cu ta meimei di dje retirá, i laga esnan den cunucu no drent’é.” (Lucas 21:20, 21) E hudiunan cristianisá, e scogínan, mesora a bandoná e stad condená di Jerusalem i asina a ser salbá for dje destruccion teribel cu a bini riba dje pronto despues. Na 70 E.C. e legionnan romano a regresá bou di General Tito. Nan a campa rond di Jerusalem, a rondoná e stad i a devast’é.
5. Den ki sentido e tribulacion riba Jerusalem tabata hací corticu na 70 E.C.?
5 E historiador hudiu Josefo ta conta cu 1.100.000 hudiu a muri, miéntras cu 97.000 a sobrebibí i a ser hibá como prizonero. E sobrebibientenan hudiu no-cristian ei siguramente no tabata “e scogínan” dje profecia di Jesus. Papiando n’e nacion hudiu rebelde, Jesus a bisa: “Mira! Boso cas ta ser lagá bandoná pa boso. Pasobra mi ta bisa boso, Boso di ningun manera lo mirá mi mas di awor en adelante te ora boso bisa, ‘Bendicioná ta esun cu ta bini den nomber di Jehova!’ ” (Mateo 23:38, 39) No tin ningun registro cu e hudiunan ei, cerá den Jerusalem, na último ora a aceptá Jesus como e Mesías, a bira cristian i a ricibí e fabor di Jehova. No obstante, e tribulacion cu a bini riba Jerusalem na 70 E.C. a ser hací corticu. E sitiamentu final dje ehército romano no tabata di un duracion largu. Esaki a permití algun hudiu sobrebibí, maske ta pa solamente ser mandá na vários parti dje Imperio Romano como catibu.
Un Multitud Grandi di Sobrebibiente
6, 7. (a) Cua gran stad religioso mester ser destruí ainda, como parti di un tribulacion sin igual? (b) Kico Juan a profetisá tocante e binidero tribulacion grandi riba e mundu aki?
6 Aunke e destruccion di Jerusalem na 70 E.C. en berdad a trece un “tribulacion grandi” riba e stad religioso ei, e cumplimentu mayor dje palabranan di Jesus mester ser realisá ainda. Un stad religioso mas grandi, Babilonia e Grandi, e imperio mundial di religion falsu, tin cu experenciá un tribulacion grandi mortífero siguí inmediatamente pa un tribulacion sin igual riba e resto di Satanas su sistema di cosnan. (Mateo 24:29, 30; Revelacion 18:21) Rond di 26 aña despues dje destruccion di Jerusalem, apostel Juan, na Revelacion 7:9-14, a skirbi tocante e tribulacion grandi aki cu ta enbolbé henter e mundu. El a mustra cu un multitud grandi di hende lo sobrebibi’é.
7 E sobrebibientenan aki, yamá e “multitud grandi,” ta ser identificá pa cierto accionnan decisivo cu nan ta tuma. Segun Revelacion 7:14, un dje 24 ancianonan den cielu a bisa Juan: “Esakinan ta esnan cu a sali for dje tribulacion grandi, i nan a laba nan pañanan largu i a haci nan blancu den e sanger dje Lamchi.” Sí, e multitud grandi ta aclamá Jehova como e fuente di nan salbacion. Nan ta ehercé fe den e sanger dramá di Jesus i tin un posicion hustu dilanti nan Creador i su Rey nombrá, Jesucristo.
8. Ki relacion excelente ta existí entre e “multitud grandi” i e resto dje rumannan ungí di Jesus?
8 Awe, casi cincu miyon miembro dje multitud grandi ta bibando bou dje liderato activo dje Rey celestial, Jesucristo. Nan ta sumiso na Cristo i ta den asociacion estrecho cu su rumannan ungí cu ainda ta riba tera. En cuanto e trato cu e multitud grandi ta duna e ungínan aki, Jesus ta bisa: “Di berdad mi ta bisa boso, Te n’e grado cu boso a haci’é na un di esnan mas chikitu di mi rumannan, boso a haci’é na mi.” (Mateo 25:40) Pa motibu cu nan ta rindi yudansa inegoistamente n’e rumannan ungí di Cristo, esnan dje multitud grandi ta ser husgá di a haci bon na Jesus mes. Esaki ta yuda nan tene un relacion sigur cu Jesucristo i cu Jehova Dios. Nan a haña e privilegio pa uni cu e resto ungí den bira Testigonan di Dios i cargadornan di su nomber.—Isaías 43:10, 11; Joël 2:31, 32.
Kedando Lantá
9, 10. (a) Kico nos mester haci pa mantené nos posicion hustu dilanti e Yu di hende? (b) Con nos mester actua afin di “keda lantá”?
9 E multitud grandi mester mantené nan posicion hustu dilanti e Yu di hende sin interupcion, locual ta rekerí keda vigilá te n’e fin. Jesus a declará esaki claramente ora el a bisa: “Presta atencion na boso mes pa boso curason nunca bira cargá cu comementu di mas i bebementu pisá i ansiedadnan di bida, i di ripiente e dia ei bini riba boso instantáneamente manera un las. Pasobra lo e bini riba tur esnan cu ta biba riba cara di tur e tera. Keda lantá, anto, na tur tempu haciendo súplica pa boso por logra scapa di tur e cosnan aki cu ta destiná pa sosodé, i para dilanti e Yu di hende.”—Lucas 21:34-36.
10 Pa logra para dilanti e Yu di hende, nos mester tin su aprobacion, locual nos lo no tin si nos ta permití nos mes ser influenciá dor di pensamentu dje mundu aki. Pensamentu mundano ta seductivo i por pone un persona entregá demasiadamente na placernan carnal of bira asina cargá cu problemanan di bida cu e no ta tene interesnan di Reino mas na promé lugá. (Mateo 6:33) Un curso asina ta debilitá un persona spiritualmente i por lagu’é keda indiferente tocante su responsabilidadnan pa cu Dios i otro hende. Lo e por bira inactivo of pone na peliger su lugá den e congregacion dor di cometé picá serio, tal bes asta manifestando un actitud no-repentí. Cada individuo den e multitud grandi mester presta atencion na su mes. E mester keda separá for dje mundu malbado aki i su prácticanan.—Juan 17:16.
11. Aplicacion di cua principionan bíblico lo yuda nos sobrebibí Armagedon?
11 Pa logra esei, Jehova a percurá loke nos mester pa medio di su Palabra, su spiritu santu i su organisacion visibel. Nos mester probechá plenamente di esakinan. Ademas, nos mester ta deboto i obediente na Dios si nos ta spera di haña su fabor. Entre otro, nos mester desaroyá un odio profundo pa loke ta malu. E salmista a bisa: “Mi no a sinta cu homber di falsedad; i cu esnan cu ta sconde loke nan ta mi no ta drenta. Mi a odia e congregacion di malechornan, i cu e malbadonan mi no ta sinta. No kita mi alma huntu cu pecadornan, ni mi bida huntu cu hombernan culpabel di sanger.” (Salmo 26:4, 5, 9) Den e congregacion cristian, tantu hóben como bieu mester limitá nan asociacion cu esnan cu no ta dedicá na Jehova. Pa ricibí e fabor di Dios, nos ta haci esfuerso pa ta sin culpa i sin mancha dje mundu. (Salmo 26:1-5; Santiago 1:27; 4:4) Asina, nos lo ta sigur cu na Armagedon, Jehova lo no bari nos den morto huntu cu e malbadonan.
Algun “Lo No Muri Hamas”
12, 13. (a) Promé cu el a resucitá Lázaro, ki palabranan Jesus a expresá cu Marta no a comprendé completamente? (b) Kico e palabranan di Jesus tocante algun cu ‘lo no muri hamas’ no tabata kier men?
12 Ta excitante pa contemplá sobrebibencia dje fin dje sistema di cosnan aki i e posibilidad di no tin cu muri nunca. Esaki ta e prospecto cu Jesus ta ofrecé na nos. Djis promé cu el a resucitá su amigu morto, Lázaro, Jesus a bisa Marta, ruman muhé di Lázaro: “Ami ta e resureccion i e bida. Esun cu ta ehercé fe den mi, aunke e muri, lo yega na biba; i tur cu ta bibu i ta ehercé fe den mi lo no muri hamas. Abo ta kere esaki?” Marta a kere den e resureccion, pero e no a comprendé tur loke Jesus tabata bisando.—Juan 11:25, 26.
13 Jesus no tabata kier men cu su fiel apostelnan lo a sigui biba den carni i lo no a muri nunca. Al contrario, despues el a indicá cu su disipelnan lo muri. (Juan 21:16-23) En berdad, nan ungimentu cu spiritu santu na Pentecoste 33 E.C. a nificá cu nan lo tabatin cu muri afin di ricibí nan herencia celestial como rey i sacerdotenan. (Revelacion 20:4, 6) Pues, cu pasamentu di tempu, tur cristian di promé siglo a fayecé. Sin embargo, loke Jesus a bisa tabata cu un propósito. Su palabranan tocante biba sin muri hamas, lo ser cumplí.
14, 15. (a) Con e palabranan di Jesus tocante algun cu ‘lo no muri hamas’ lo ser cumplí? (b) Kico ta e situacion dje mundu aki, pero ki speransa e hustunan tin?
14 Na promé lugá, fiel cristiannan ungí hamas lo experenciá morto eterno. (Revelacion 20:6) Tambe, Jesus su palabranan ta señalá na un tempu specífico ora Jehova Dios lo intervení den asuntunan humano i lo eliminá maldad for di tera, mescos cu el a haci den dia di Noe. Esnan fiel cu ta ser hañá haciendo e boluntad di Dios n’e tempu ei lo no tin cu muri dor dje obranan di huicio di Dios. Mas bien, mescos cu Noe i su famia, nan lo tin e oportunidad di sobrebibí e destruccion di un mundu. Un speransa asina ta sólido, siendo cu e ta basá riba siñansanan di Bijbel i ilustrá mediante ehempelnan. (Compará cu Hebreo 6:19; 2 Pedro 2:4-9.) E cumplimentu di profecia bíblico ta mustra cu masha pronto e mundu actual consistiendo di un sociedad humano inhustu ta bai caba den destruccion. E situacion actual ta ireversibel, pasobra e mundu ta incoregiblemente malbado. Loke Dios a bisa tocante e mundu di Noe su dia ta cierto tambe dje mundu djawe. Maldad ta yena curason dje gran mayoria di humanidad, i nan pensamentunan ta solamente malu tur ora.—Génesis 6:5.
15 Jehova a permití hende goberná e tera pa siglonan sin interferencia divino, pero nan tempu ta cerca di caba. Pronto Jehova lo caba cu tur maldad riba tera, net manera Bijbel ta bisa. (Salmo 145:20; Proverbio 2:21, 22) Sin embargo, lo e no destruí e hustunan huntu cu e malbadonan. Nunca Dios a haci un cos asina! (Compará cu Génesis 18:22, 23, 26.) Pakico lo e destruí esnan cu ta haciendo esfuerso pa sirbi’é fielmente, cu temor piadoso? Ta solamente razonabel cu Jehova su fiel adoradornan, kendenan ta na bida ora e tribulacion grandi cuminsá, lo haña fabor den su bista i lo no ser destruí, mescos cu Noe i su famia no a ser destruí ora e mundu malbado di su dia a yega na un fin desastroso. (Génesis 7:23) Nan lo tin proteccion divino i lo sobrebibí e fin dje mundu aki.
16. Ki cosnan maraviyoso lo sosodé den e mundu nobo, nificando kico pa sobrebibientenan?
16 Kico lo sosodé e ora ei? Den e mundu nobo, bendicionnan di sanacion lo bini pa humanidad segun cu e beneficionan dje sacrificio di rescate di Jesus ta ser aplicá completamente. Bijbel ta papia di un “riu [simbólico] di awa di bida, cla manera cristal, coriendo for dje trono di Dios i dje Lamchi pasando meimei di su caminda hanchu. I n’e banda aki dje riu i n’e otro banda tabatin palunan di bida produciendo diesdos cosecha di fruta, dunando nan frutanan tur luna. I e blachinan dje palunan tabata p’e curacion dje nacionnan.” (Revelacion 22:1, 2) Maraviyosamente, e “curacion” ei ta incluí e conkista riba e morto adámico mes! “Realmente lo e traga morto pa semper, i e Señor Soberano Jehova siguramente lo limpia e lágrimanan di tur cara.” (Isaías 25:8) Asina, esnan cu sobrebibí e tribulacion grandi pa drenta den e mundu nobo no mester enfrentá morto nunca!
Un Speransa Sigur
17. Con sigur e speransa cu algun lo sobrebibí Armagedon i lo no “muri hamas” ta?
17 Nos por tin pleno confiansa den e speransa asombroso aki? Cu tur siguransa! Jesus a indicá na Marta cu lo tin un tempu ora hende lo biba sin muri hamas. (Juan 11:26) Ademas, den capítulo 7 dje Revelacion cu Jesus a duna Juan, el a revelá cu un multitud grandi ta sali for dje tribulacion grandi, na bida. Nos por kere Jesucristo i e relato histórico dje Diluvio di dia di Noe? Indudablemente! Ademas, Bijbel tin otro relatonan di ocasionnan ora Dios a preservá su sirbidornan bibu atrabes di periodonan di huicio i e caida di nacionnan. Nos mester spera ménos di dje den e tempu di fin aki? Tin cualkier cos imposibel p’e Creador?—Compará cu Mateo 19:26.
18. Con nos por tin e siguransa di haña bida den Jehova su hustu mundu nobo?
18 Dor di sirbi Jehova fielmente awor, nos tin e siguransa di bida eterno den su mundu nobo. Pa miyones incontabel di hende, bida den e mundu nobo ei lo bini mediante e resureccion. Sin embargo, den nos dia, miyones dje pueblo di Jehova—sí, un multitud grandi cu ningun hende por conta of pone límite na dje—lo tin e privilegio único di ser conserbá bibu atrabes dje tribulacion grandi. I nan lo no tin cu muri nunca.
Splica Por Fabor
◻ Con sobrebibencia di Armagedon a ser prefigurá den dia di Noe?
◻ Kico nos mester haci pa por keda pará ora Jesus bini pa ehecutá e huicionan di Jehova?
◻ Pakico nos por bisa cu sobrebibientenan di Armagedon no tin nodi “muri hamas”?
[Plachi na página 15]
Cristiannan a scapa e tribulacion di Jerusalem