Dikon Testigunan di Yehova Ta Prediká di Kas pa Kas?

▪ Beibel ta bisa ku Hesus a duna su siguidónan e mandamentu akí: “Bai, i hasi hende di tur nashon mi disipel, . . . i siña nan.” (Mateo 28:19, 20) E mandamentu akí ta konta pa tur kristian? E promé disipelnan di Hesus a komprondé ku esei ta asina. Apòstel Pedro, por ehèmpel, a bisa: “[Hesus] a manda nos prediká na e pueblo i duna testimonio kabal.” (Echonan 10:42) I apòstel Pablo a bisa: “Ta mi obligashon esei ta. Realmente, ai di mi si mi no deklará e bon notisia!”—1 Korintionan 9:16.

No ta Pablo i Pedro so a obedesé e mandamentu di Hesus, sino tur kristian den promé siglo. E trabou di prediká tabata e trabou di mas importante pa nan. (Echonan 5:28-32, 41, 42) I awe, Testigunan di Yehova tambe ta hasi esfuerso pa kumpli ku e mandamentu ei. Nan ta prediká e mesun mensahe ku Hesus a prediká, esta, “e Reino di shelu.”—Mateo 10:7.

Awor, na ken nos mester prediká e mensahe di Reino? Hesus a indiká ku nos mester prediká na tur hende, tur kaminda. El a bisa su disipelnan: “Boso lo ta mi testigunan . . . na e parti mas leu di tera.” (Echonan 1:8) El a asta profetisá ku promé ku e fin yega, “e bon notisia akí di e Reino lo ser prediká den henter e tera habitá, komo testimonio pa tur nashon.” (Mateo 24:14) P’esei, e kristiannan di promé siglo tabata hasi esfuerso pa papia ku tur hende, no solamente ku nan konosínan òf ku hende ku no tabata pertenesé na un religion. (Kolosensenan 1:23; 1 Timoteo 2:3, 4) Awendia tambe Testigunan di Yehova ta hasi esfuerso pa prediká na tur hende.a

Kua ta e método mas efikas pa prediká e mensahe di Reino? Hesus, kende tabata sa kon pa alkansá mas tantu hende posibel, a manda su disipelnan bai prediká den stat, pueblo i di kas pa kas. (Mateo 10:7, 11, 12) Despues di e morto i resurekshon di Hesus, su disipelnan a sigui prediká “di kas pa kas.” (Echonan 5:42) Meskos ku Hesus, nan tambe a duna testimonio informal i prediká na lugánan públiko. (Huan 4:7-26; 18:20; Echonan 17:17) Awe, Testigunan di Yehova ta usa e mesun métodonan ei pa prediká na tur hende.

Pero Hesus a indiká ku no ta tur hende lo skucha òf aseptá e mensahe. (Mateo 10:14; 24:37-39) Esei mester stroba kristiannan di prediká? Pensa riba e ilustrashon akí: Suponé ku tabatin un temblor severo i ku bo ta forma parti di un tim di reskate. Lo bo stòp di buska sobrebibiente djis despues di un ratu pasobra ta algun hende so boso por a reskatá? Nò. Tanten ku tin speransa di reskatá sikiera ún persona, lo bo sigui buska. Di mes manera, Hesus a instruí su disipelnan pa perseverá den e trabou di prediká tanten ku tin speransa pa haña hende ku lo aseptá e mensahe di Reino. (Mateo 10:23; 1 Timoteo 4:16) Dikon? Pasobra bida di hende ta den wega. P’esei mes Testigunan di Yehova ta sigui bai di kas pa kas en buska di hende ku ke tende i aseptá e mensahe di Reino. Di e manera ei, Testigunan di Yehova ta demostrá ku nan ta stima Dios i nan próhimo.—Mateo 22:37-39; 2 Tesalonisensenan 1:8.

E revista ku bo ta lesando akí ta siña hende tokante e mensahe di Reino. Pa mas informashon, papia ku Testigunan di Yehova ora bo topa ku nan òf skirbi e editornan di e revista akí.

[Nota]