Con pa Haña Goso den Hacimentu di Disipel
UN DJE gosonan profundo cu un persona por experenciá ta esun di ta un co-trahador cu Dios. Awe, e trabou di Dios ta incluí reuní hendenan cu inclinacion hustu den e congregacion cristian i entrená nan pa biba como cristian awor i tambe pa sobrebibí pa drenta un mundu nobo.—Mikéas 4:1-4; Mateo 28:19, 20; 2 Pedro 3:13.
Tabata un fuente di gran goso pa e Testigonan di Jehova den América Latino pa mira un miyon hende bira disipel di Jesucristo desde 1980. Den e campo fructífero aki, unda hopi hende ta respetá i ta kere den e Bijbel, algun minister di tempu completo tabata capas pa yuda decénas di hende dedicá nan bida na Jehova. Teniendo asina tantu experencia, kisas nan por conta nos algu tocante e goso di haci disipel. Algun di nan sugerencianan por yudá bo haña e goso den hacimentu di disipel caminda bo ta biba.
Reconociendo “Carnénan” Potencial
“Den cualkier stad of pueblo cu boso drenta, busca te cu boso haña ken ta merecedor den dje,” Jesus a bisa ora el a manda su apostelnan bai predicá. (Mateo 10:11) Ora bo ta bai bishitá e hendenan, con bo por reconocé esnan cu por ser yudá spiritualmente? Edward, un minister di tempu completo pa mas cu 50 aña, ta bisa: “Nan ta manifestá esei dor di nan preguntanan sincero i nan satisfaccion ora nan haña contestanan for dje Scritura.” Carol ta agregá: “Si un persona confiá mi un problema personal of un preocupacion, esei ta en realidad un gritu pa yudansa. Mi ta purba haña informacion útil den e publicacionnan dje Sociedad Watch Tower. Interes personal asina hopi biaha ta hiba na un studio di Bijbel.” Sin embargo, no semper ta fácil pa reconocé esnan sincero. Luis ta relatá: “Algun hende cu ta parce di ta masha interesá ta resultá di no ta interesá mes, pero otronan cu na promé instante a parce di ta oponé a cambia ora nan a tende loke Bijbel realmente ta bisa.” Ya cu hopi latinoamericano ta respetá e Bijbel, Luis ta agregá, “Ami ta reconocé esnan cu por ser yudá spiritualmente ora nan ta aceptá un bes loke Bijbel ta siña despues cu mi mustr’é na nan.” Yudando tal personanan “merecedor” progresá spiritualmente ta trece berdadero goso i satisfaccion. Con bo por yuda nan?
Cuminsando Studionan di Bijbel
Usando publicacionnan cu ta un yudansa pa studio di Bijbel, producí dor di “e esclabo fiel i discreto,” ta generalmente e mihó manera pa yuda hende comprendé e berdad di Bijbel. (Mateo 24:45) Con bo por aumentá aprecio pa e balor di e publicacionnan bíblico ei? Edward ta bisa: “Siendo cu hende su circunstancia, personalidad i punto di bista ta varia asina hopi, mi ta purba di ta flexibel ora di cuminsá studionan.” Bo no por usa e mésun método cu tur hende.
Cu algun hende, kisas ta necesario pa hiba vários consideracion informal dje Scritura promé cu introducí e buki di studio di Bijbel. No obstante, un pareha misionero ta informá: “Generalmente nos ta ofrecé un studio na e promé bishita.” Di manera similar, un Testigo cu a yuda 55 hende te na e punto di dedicacion ta bisa: “E manera principal pa mi cuminsá studionan di Bijbel tabata pa cuminsá di biaha den e buki Bo por biba pa semper den Paradijs riba tera.” Aunke tin algun hende cu no ta gusta e idea di studia nada mes, otronan ta ansioso pa studia cualkier cos cu nan ta pensa lo yuda nan den nan bida. E oferta di un curso di Bijbel grátis na cas hopi biaha ta zona atractivo pa esakinan. Algun misionero ta splica e oferta aki, i despues ta bisa: “Gustosamente lo mi mustrá bo con nos ta hacié. Si bo ta gust’é bo por sigui. Si bo no ta gust’é, esei ta keda na abo.” Ora pon’é asina ei, hende no ta sinti miedu di acept’é.
Un otro Testigo cu a yuda hopi hende di poco recurso i educacion, ta bisa: “Mi a haña cu e tratadonan ta specialmente útil pa cuminsá studionan di Bijbel.” Cual sea e publicacion cu nan usa, e maestronan di tempu completo ta purba di duna e Bijbel e énfasis principal. Carola ta bisa: “Na e promé studio, mi ta usa e plachinan so i mas of ménos cincu texto, di manera cu e puntonan principal ta sali na cla i e Bijbel no ta parce difícil.”
Manteniendo e Interes Bibu
Hende ta gusta sinti cu nan ta haciendo progreso, pues Jennifer ta recomendá: “Duna bida na e studio. Sigui bai dilanti.” Conduciendo e studio regularmente sin salta simannan tambe ta yuda e studiantenan di Bijbel sinti cu nan ta haciendo progreso. Algun persona recien interesá tin asina tantu pregunta cu ta difícil pa nan desaroyá nan conocimentu dor di concentrá riba un tema a la bes. Un misionero ta bisa: “Bo ta come tres cuminda pa dia—desayuno, cuminda di merdia i cena, pero si bo purba come e cantidad ei di cuminda den un solo biaha, lo bo haña un indigestion. Si bo purba comprendé demasiado punto bíblico pareu, lo bo haña un indigestion spiritual, pues djis pensa riba e par di puntonan cu nos a considerá awe i otro siman nos lo agregá mas na nan.” Jesus a bisa su apostelnan: “Mi tin hopi cos pa bisa boso ainda, pero boso no por soportá nan actualmente.”—Juan 16:12.
Un otro manera pa mantené e interes bibu ta dor di animá esnan cu bo ta bishitá pa sigui pensa riba Dios su Palabra despues cu bo bai. Yolanda ta recomendá: “Laga un pregunta sin contestá. Duna nan algun huiswerk pa haci, manera lesa un parti dje Bijbel of investigá un tópico cu ta interesá nan.”
Desaroyando Amor pa Jehova
Bo goso lo aumentá ora bo yuda bo studiantenan bira “hacidornan dje palabra, i no scuchadornan so.” (Santiago 1:22) Con bo por haci esei? Cristiannan berdadero ta ser motivá dor di amor pa Jehova. Pedro, cu ta di México, ta splica: “Hende no por stima un persona cu nan no conocé, pues for di cuminsamentu mes dje studio, mi ta siña nan e nomber di Dios for dje Bijbel, i mi ta busca oportunidadnan pa enfatisá e cualidadnan di Jehova.” Den combersacion, bo por desaroyá aprecio pa Jehova dor di expresá bo sintimentunan p’e. Elizabeth ta bisa: “Semper mi ta purba mencioná e bondad di Jehova. Durante mi studionan, si mi mira un flor precioso, un para bunita of un pushi chikitu hugueton, semper mi ta mencioná cu esei ta e obra di Jehova.” “Papia tocante e mundu nobo primintí di Dios como e realidad cu bo sa lo bini,” Jennifer ta sugerí. “Puntra nan kico nan lo gusta pa haci den e mundu nobo.”
Ora un persona ta meditá apreciativamente riba loke e ta siña tocante Jehova, esei ta sink bai den su curason i ta impuls’é na accion. Pero e no por meditá aménos cu e ta corda nan. Un repaso breve di tres of cuater punto principal despues di cada studio ta un yudansa pa e memoria. Hopi maestro di Bijbel ta laga esnan nobo skirbi textonan clave huntu cu un nota patras den nan Bijbel. Un misionero for di Inglatera ta splica un otro beneficio di repasonan: “Mi ta puntra nan con e informacion a beneficiá nan. Esaki ta pone nan meditá cu aprecio riba e camindanan i leynan di Jehova.”
Un fiel Testigo cu a gradua for dje di tres klas di Galad ta bisa: “Nos mester ta entusiasmá. Nos studiantenan mester realisá cu nos ta kere den loke nos ta siña.” E fe cu a hací bo un ‘hacidor felis dje palabra’ por ta contagioso si bo expresá esei.—Santiago 1:25.
“Mi ta haña cu hende ta sinti nan mas cerca di Dios ora mi yuda nan reconocé e contestanan pa nan oracionnan,” un Testigo cu a yuda hopi hende adorá Jehova ta bisa. “Mi ta duna nan ehempelnan for di mi mes experencia, manera esun aki: Ora ami cu mi compañera a yega den un asignacion nobo como pioneronan, nos tabatin solamente un poco berdura, un paki di margarina i ningun cen. Nos a caba e cuminda pa cena i a bisa, ‘Awor nos no tin nada pa mañan.’ Nos a pone esei den oracion i a bai drumi. Trempan e siguiente mainta un Testigo local a yama na porta i a introducí su mes, bisando, ‘Mi a haci oracion pidiendo Jehova pa manda pioneronan. Awor mi por compañá boso casi henter dia, pero ya cu mi ta biba den cunucu, lo mi mester come merdia cerca boso, pues mi a trece huntu cu mi e cuminda aki pa nos tur.’ E tabata un cantidad grandi di carni i berdura. Semper mi ta conta mi studiantenan cu Jehova nunca ta laga nos si nos ta busca su Reino promé.”—Mateo 6:33.
Ofrecé Yudansa Práctico
Mas ta enbolbí den hacimentu di disipel di Cristo cu conducí studionan di Bijbel. Un misionero cu a sirbi pa hopi aña como un superintendente biahero ta bisa: “Dedicá tempu na nan. No pura bai despues dje studio. Si ta apropiado, keda i combersá un ratu.” Elizabeth ta bisa: “Mi ta mustra interes den nan pasobra bida ta enbolbí. Hopi biaha mi ta preocupá pa nan como si fuera nan tabata mi yunan.” Otro Testigonan a duna e sugerencianan aki: “Bishitá nan ora nan ta malu.” “Ora bo pasa cerca di nan cas, por ehempel den e ministerio di veld, haci nan un bishita breve pa introducí otro Testigonan na nan.” Eva ta bisa: “Scucha cu atencion pa comprendé e antecedente dje persona i su situacion den bida. Esakinan ta afectá e manera cu hende ta reaccioná na e berdad i por stroba nan progreso. Sea nan amigu, di manera cu nan lo tin e confiansa di papia tocante nan problemanan.” Carol ta agregá: “Interes genuino den e persona ta importante ya cu e cambionan cu e berdad lo trece den su bida tin biaha lo nificá cu e ta perde famia i amigunan. Generalmente ta bon pa e studiante sa unda nos ta biba i tin e confiansa di bini cerca nos na cualkier momento.” Yud’é mira e congregacion como su famia nobo.—Mateo 10:35; Marco 10:29, 30.
“Sea alerto pa ofrecé yudansa práctico. Sinta huntu cu nan na e reunionnan i yuda nan cu nan yunan,” Yolanda ta bisa. Mustrando esnan nobo con pa entrená nan yunan, mehorá nan normanan di limpiesa, prepará comentarionan pa e reunionnan i duna partinan den e Scol di Ministerio Teocrático tur ta parti di e trabou di haci disipel. Un otro ruman muher ta agregá: “Ta importante pa entrená esnan nobo pa e ministerio. Si bo pasa e aspecto di entrenamentu aki por haltu, algun ta keda cu temor pa e trabou di predicá, ta perde nan goso den sirbi Jehova i no ta logra mustra awante.” Pues duna entrenamentu cuidadoso den e trabou di cas-pa-cas, hacimentu di rebishita i cuminsá studionan di Bijbel. Bo goso lo ta grandi ora bo mira bo studiante haci progreso cu bo yudansa i guia.
Fortalecé Nan pa Mustra Awante
“Tin un tendencia pa neglishá studiamentu una bes cu e studiante ta bautisá,” un hacidor di disipel experenciá ta spierta. Tantu e maestro como e studiante mester corda cu un cristian recien bautisá ta leu di ta spiritualmente maduro. E falta hopi pa crece ainda den su fe, den su aprecio pa e ley di Dios i den su amor pa Jehova. Ta vital pa anim’é pa desaroyá un bon custumber di studio personal di manera cu lo e sigui haci progreso.—1 Timoteo 4:15.
Esun nobo por tin mester di yudansa pa progresá i bira un miembro hospitalario dje asociacion di rumannan. E por tin mester di guia den trata cu e imperfeccionnan dje rumannan segun cu e ta hala mas cerca di nan. (Mateo 18:15-35) E por tin mester di yudansa pa bira un maestro ábil, capas pa haci su mes investigacion. Un misionero ta relatá: “Despues di su bautismo un studiante kier a mehorá su abilidad como maestra, pues el a bisá mi, ‘Mi mester cuminsá conducí un studio nobo otro siman, pero mi mester refrescá mi memoria riba e promé capítulonan cu mi a studia. Por fabor, lo bo por considerá e capítulonan aki cu mi atrobe, unu a la bes, di manera cu mi por tuma nota dje splicacionnan dje textonan i ilustracionnan, i e ora ei mi por usa nan ora mi ta bai conducí mi studio?’ El a bira un excelente maestra, teniendo cuater di su studiantenan cu a bautisá na un asamblea.”
Pakico Hacimentu di Disipel Ta Bale la Pena
“Hacimentu di disipel ta nificá mas alabadornan di Jehova. E ta nificá bida pa esnan cu ta aceptá e berdad,” Pamela ta bisa. “Mi simplemente ta gusta siña otronan e berdad—e ta algu asina bunita! Bo ta mira e studiantenan crece gradualmente, haciendo cambionan den nan bida i venciendo obstáculonan cu lo a parce insuperabel si no tabata p’e spiritu di Jehova. Hopi di esnan cu a yega di stima Jehova a bira mi amigunan masha stimá.”
“Ora mi mira esnan cu mi a yuda bira disipel,” un misionero for di Alemania ta relatá, “mi ta mira algun hende hopi tímido cu a haci asina tantu progreso como ministernan di Dios cu casi mi no por kere. Mi ta mira hende cu a vence obstáculonan inmenso, claramente cu Jehova su yudansa. Mi ta mira famianan cu un tempu tabata kibrá pero cu awor ta uní—yunan felis cu mayornan responsabel. Mi ta mira hendenan cu ta disfrutá di un bida cu propósito, alabando Jehova. Esaki ta e goso di haci disipel.”
Sí, ser un co-trahador cu Jehova Dios den e trabou di haci disipel ta un fuente incomparabel di goso. E experencianan dje misioneronan i pioneronan a duna prueba di esei. Bo por haña e mésun goso i satisfaccion si bo aplicá e sugerencianan i haci esfuerso di henter alma. Cu Jehova su bendicion, bo goso lo ta completo.—Proverbionan 10:22; 1 Corintionan 15:58.