Kon Nos Por Ta Limpi den Bista di Dios?

Imaginá bo un mama amoroso preparando su yu hòmber pa bai skol. E ta hasi sigur ku su yu a baña i ku su paña ta limpi i na òrdu. Esaki ta yuda su yu keda bon di salú i ta mustra otro hende ku su mayornan ta sòru bon p’e. Meskos ku un mayor ke pa su yu ta limpi, nos Tata, Yehova, ke pa nos ta físikamente i moralmente limpi, esta, limpi den nos manera di pensa, papia i di hasi kos. Ora nos ta limpi, nos mes ta benefisiá i nos ta onra Yehova.

1. Kon nos por ta físikamente limpi?

Yehova ta bisa nos: “Boso mester ta santu.” (1 Pedro 1:16) Pa nos por ta santu, nos mester ta físikamente i moralmente limpi. Nos por ta físikamente limpi ora nos ta baña regularmente i ora nos ta tene nos paña, kas i vehíkulo limpi i na òrdu. Ademas, nos por yuda tene nos Salòn di Reino limpi. Ora nos ta mantené nos mes físikamente limpi, nos ta trese onor pa Yehova.—2 Korintionan 6:3, 4.

2. Pa nos ta limpi, ki mal hábito nos mester evitá?

Beibel ta konsehá nos pa “limpia nos mes di tur impuresa di karni i di spiritu.” (2 Korintionan 7:1) Pues, nos mester evitá kualke kos ku por ta malu pa nos kurpa i mente. Nos pensamentunan mester agradá Yehova. P’esei, nos ta hasi esfuerso pa rechasá kualke pensamentu inapropiá. (Salmo 104:34) Ademas, nos ta hasi esfuerso pa no papia palabra malu ni bisa kos ofensivo.—Lesa Kolosensenan 3:8.

Kiko mas por stroba nos di ta físikamente i moralmente limpi? Algun supstansia por hasi nos kurpa daño. P’esei, nos no ta usa tabako, ni droga, ni nos no ta kou betelnoot (un nechi popular na Asia) òf blachi di koka, ni nos no ta hasi mal uso di remedi. Ora nos evitá e tipo di kosnan akí, nos lo tin un mihó salú i nos lo mustra ku nos ta respetá bida. Ademas, pa nos ta moralmente limpi, nos ta evitá práktika impuru manera masturbashon i wakmentu di pornografia. (Salmo 119:37; Efesionan 5:5) Aunke por ta difísil pa vense e mal hábitonan akí, nos por logra ku Yehova su yudansa.—Lesa Isaías 41:13.

KIKO MAS NOS POR SIÑA?

3. Ora nos ta físikamente limpi, nos ta onra Yehova

Ora nos lesa e leinan ku Yehova a duna e nashon di Israel den tempu di Beibel, nos ta mira ku pa Yehova ta masha importante pa su pueblo ta limpi. Lesa Éksodo 19:10 i 30:17-19. Despues, analisá e siguiente preguntanan:

• Kon e versíkulonan akí ta yuda nos mira Yehova su punto di bista tokante limpiesa físiko?

• Kiko bo por hasi regularmente pa keda físikamente limpi?

Ta tuma tempu i energia pa nos ta físikamente limpi. Pero nos por hasi esei sin importá unda nos ta biba òf sin importá si nos ta riku òf pober. Pasa e VIDIO. Despues, analisá e siguiente pregunta:

VIDIO: Dios Ta Stima Hende Limpi (4:10)

• Dikon hende ku nos ta prediká na dje lo respetá Yehova mas ora nan mira ku nos kosnan ta limpi i na òrdu?

4. Stòp ku mal hábito

Si bo ta huma òf usa droga, kisas bo sa kon difísil ta pa stòp ku un di e mal hábitonan ei. Kiko por yuda bo? Pensa kon e hábito ei por afektá bo bida. Lesa Mateo 22:37-39. Despues, analisá kon uso di tabako òf droga ta afektá . . .

• un persona su amistat ku Yehova.

• un persona su famia i otro hende.

Pensa kiko bo por hasi pa vense un mal hábito i hasié.a Pasa e VIDIO.

VIDIO: Nos Mester Tin Dominio Propio (2:47)

Lesa Filipensenan 4:13. Despues, analisá e siguiente pregunta:

• Kon orashon, lesamentu di Beibel i asistensia na reunion por duna un persona forsa pa vense mal hábito?

5. Lucha kontra pensamentu i práktika impuru

Lesa Kolosensenan 3:5. Despues, analisá e siguiente preguntanan:

• Kon nos por sa ku wakmentu di pornografia, sextingb i masturbashon ta impuru den bista di Yehova?

• Bo ta kere ta rasonabel ku Yehova ta pidi nos pa ta moralmente limpi? Dikon bo ta pensa esei?

Haña sa kon bo por lucha kontra pensamentu impuru. Pasa e VIDIO.

VIDIO: Tuma Akshon pa Keda Limpi (1:51)

Hesus a usa un ilustrashon pa mustra ku nos mester ta determiná pa hasi loke sea ta nesesario pa keda moralmente limpi. Lesa Mateo 5:29, 30. Despues, analisá e siguiente pregunta:

• Hesus no tabata ke men ku nos mester hasi nos mes daño, sino ku nos mester tuma akshon. Kiko un persona mester ta determiná pa hasi pa evitá pensamentu impuru?c

Si bo ta lucha pa vense pensamentu impuru, Yehova ta apresiá bo esfuerso. Lesa Salmo 103:13, 14. Despues, analisá e siguiente pregunta:

• Si bo ta luchando pa vense un mal hábito, kon e teksto akí ta animá bo pa sigui lucha?

No entregá! Un rekaida no ke men ku bo a pèrdè e bataya

Ta fásil pa pensa: ‘M’a faya, pues mihó mi entregá.’ Pero pensa riba esaki: Djis pasobra un koredó a trompeká i kai no ke men ku el a pèrdè e kareda, ni ku e mester kuminsá di nobo. Di mes manera, un rekaida no ke men ku bo a pèrdè e bataya pa vense un mal hábito. E no ke men tampoko ku tur e progreso ku bo a hasi kaba tabata pòrnada. Ta normal pa haña rekaida; esei ta parti di e bataya. Pues, no entregá! Ku yudansa di Yehova, bo por vense bo mal hábito.

RESÚMEN

Nos ta agradá Yehova ora nos ta mantené nos kurpa i mente limpi i ora nos ta evitá práktika impuru.

Repaso

• Dikon ta asina importante pa nos ta limpi?

• Kon bo por ta físikamente limpi?

• Kon bo por evitá pensamentu i práktika impuru?

MAS INFORMASHON INTERESANTE

Kiko ta algun kos simpel ku bo por hasi pa ta físikamente limpi asta si bo ta pober?

Salú i Higiena—Laba Man (3:01)

Wak algun sugerensia práktiko ku por yuda bo stòp di huma.

“Kon Bo Por Stòp di Huma?” (Spièrta! di mei 2010, na spañó)

Wak kon pornografia ta afektá bo.

“Pornografia Ta Inofensivo òf Perhudisial?” (E Toren di Vigilansia di 1 di ougùstùs 2013)

Wak kon un hòmber a logra stòp di wak pornografia.

“Mi A Faya Hopi Biaha Promé Ku Mi A Logra” (E Toren di Vigilansia Num. 4 2016)