“Ta Pará Skirbí”

1-3. Ki konklushon sumamente importante Hesus tabata ke pa e hendenan di Názarèt yega na dje, i ki evidensia e ta duna?

TABATA na kuminsamentu di Hesus su ministerio. Kristu a bolbe na Názarèt, e stat kaminda el a lanta. Su meta tabata pa yuda e hendenan einan yega na un konklushon sumamente importante: É tabata e Mesias tan sperá, esun predisí for di hopi tempu pasá! Ki evidensia el a duna?

² Hopi hende sin duda a spera un milager. Nan a tende di e obranan asombroso ku Hesus a efektuá. Sin embargo, e no a duna nan ningun señal. Mas bien, manera tabata su kustumber, el a bai snoa. El a lanta para pa lesa i nan a entreg’é e buki di Isaias. Tabata trata di un ròl largu, probablemente lorá rònt di un par di bara, anto Hesus kuidadosamente a habri e ròl te ora el a haña e pasashi ku e tabata buska. E ora ei el a lesa na bos haltu loke awe ta Isaias 61:1-3.—Lukas 4:16-19.

³ E hendenan presente sin duda tabata konosé e pasashi ei. Tabata un profesia tokante e Mesias. Bista di tur hende den snoa tabata fihá riba Hesus. A reina un silensio. Anto Hesus a kuminsá splika, kisas pa basta ratu: ‘Awe e skritura aki a kumpli.’ E hendenan a keda asombrá di e palabranan agradabel ku el a papia, pero aparentemente hopi di nan tòg kier a mira un òf otro señal espektakular. Pero na lugá di esei, Hesus ku kurashi a usa un ehèmpel bíbliko pa saka nan falta di fe na kla. Poko despues, e hendenan di Názarèt a purba mat’é!—Lukas 4:20-30.

 4. Ki patronchi Hesus a establesé den su ministerio, i kiko nos lo konsiderá den e kapítulo aki?

⁴ Aki Hesus a establesé un patronchi ku el a mantené durante henter su ministerio. El a usa e Palabra inspirá di Dios komo e argumento mas fuerte pa loke el a bisa i hasi den su ministerio. Ta bèrdat ku su milagernan tabata di gran importansia pa demostrá ku e spiritu di Dios tabata kuné. Sin embargo, no tabatin nada mas importante pa Hesus ku e Santu Skritura. Laga nos analisá e ehèmpel ku el a pone den esaki. Nos lo konsiderá kon nos Shon a sita for di e Palabra di Dios, a defendé e Palabra di Dios i a splika e Palabra di Dios.

 5. Kiko Hesus tabata determiná pa laga su oyentenan sa, i kon el a demostrá ku loke el a bisa ta bèrdat?

⁵ Hesus tabata ke pa e hendenan sa di unda su mensahe a bin. El a bisa: “Mi siñansa no ta di mi, ma di esun ku a manda mi.” (Juan 7:16) Na un otro okashon, el a bisa: “Ami no ta hasi nada di mi mes, ma . . . mi ta papia e kosnan aki manera e Tata a siña mi.” (Juan 8:28) Ademas, e di: “E kosnan ku mi ta bisa boso mi no ta papia nan di mi mes; sino e Tata ku ta permanesé den union ku mi ta hasi su obranan.” (Juan 14:10, NW) Un manera ku Hesus a duna prueba ku e deklarashonnan ei tabata bèrdat ta pa medio di sita e Palabra skirbí di Dios bes tras bes.

6, 7. (a) Te na ki grado Hesus a sita for di e Skritura Hebreo, i dikon esaki ta impreshonante? (b) Kon e siñansa ku Hesus a duna tabata otro for di esun di e eskribanan?

⁶ Un análisis kuidadoso di tur e palabranan ku tin registrá di Hesus ta revelá ku el a sita direktamente for di mas ku mitar di e bukinan di e kánon di e Skritura Hebreo òf a referí indirektamente na nan. Na promé instante esei kisas no ta zona impreshonante. Podisé bo ta puntra bo mes dikon durante e tres añanan i mei ku Hesus a prediká i siña hende públikamente e no a sita for di tur e bukinan inspirá ku tabatin. Wèl, por ta masha bon ku el a hasié. No lubidá ku ta un frakshon so di e palabranan i echonan di Hesus tin registrá den Beibel. (Juan 21:25) De echo, den apénas un par di ora lo bo por lesa na bos haltu tur e palabranan di Hesus ku tin registrá. Awor, imaginá ku bo ta papia tokante Dios i su Reino pa djis un par di ora i bo ta logra referí na mas ku mitar di e bukinan di e Skritura Hebreo! Es mas, den mayoria di kaso Hesus no tabatin ròlnan skirbí huntu kuné. Ora ku el a tene su famoso Sermon Riba Seru, el a inkluí kantidat di referensia direkto i indirekto na e Skritura Hebreo; anto tur for di kabes!

⁷ E tekstonan ku Hesus a sita a demostrá su rèspèt profundo pa e Palabra di Dios. Su oyentenan “a keda asombrá di su siñansa, pasobra e tabata siña nan manera un hende ku tin outoridat i no manera e eskribanan.” (Marko 1:22) Ora e eskribanan tabata siña hende, nan tabata gusta referí na e asina yamá lei oral, sitando palabranan di rabinan eduká di pasado. Hesus ni ún biaha no a sita e lei oral òf un rabi komo outoridat. Mas bien, el a konsiderá e Palabra di Dios komo e outoridat final. Bes tras bes el a bisa: “Ta pará skirbí.” Repetidamente el a usa e palabranan ei òf palabranan similar ora el a siña su siguidónan i ora el a korigí ideanan robes.

8, 9. (a) Kon Hesus a sostené e outoridat di e Palabra di Dios ora el a limpia e tèmpel? (b) Den ki manera e lidernan religioso na e tèmpel a demostrá gran falta di rèspèt pa e Palabra di Dios?

⁸ Ora Hesus a limpia e tèmpel na Yerusalèm, el a bisa: “Ta pará skirbí: ‘Mi kas lo wòrdu yamá un kas di orashon’; ma boso ta hasié un kueba di ladron.” (Mateo 21:12, 13; Isaias 56:7; Jeremias 7:11) E dia promé, el a efektuá hopi obra maravioso einan. Mucha hòmbernan chikí, ku a keda profundamente impreshoná, a kuminsá alab’é. Sin embargo, tur rabiá e lidernan religioso a puntra Hesus si e no a tende loke e muchanan ei tabata bisa. El a kontestá nan: “Sí; boso no a lesa nunka: ‘For di boka di mucha chikitu i di yunan na pechu bo a prepará alabansa pa bo mes’?” (Mateo 21:16; Salmo 8:2) Hesus tabata ke pa e hòmbernan ei sa ku ta e Palabra di Dios a outorisá loke tabata tumando lugá einan.

⁹ E lidernan religioso ei despues a sera kabes i a konfrontá Hesus, puntrando: “Ku ki outoridat bo ta hasi e kosnan aki?” (Mateo 21:23) Hesus a splika bon kla kaba ta ken tabata e Fuente di su outoridat. No ta ku idea- òf doktrinanan nobo el a bin kuné. Simplemente el a apliká loke e Palabra inspirá di su Tata tabata bisa. Pues en realidat, tabata e saserdote- i eskribanan ei ku a demostrá gran falta di rèspèt pa Yehova i su Palabra. Nan a meresé Hesus su kondena plenamente ora ku el a revelá kon malisioso nan motibunan tabata.—Mateo 21:23-46.

10. Kon nos por imitá Hesus den e manera ku el a usa e Palabra di Dios, i ki hèrmèntnan nos tin ku Hesus no tabatin?

¹⁰ Meskos ku Hesus, kristiannan berdadero djawe ta konfia riba e Palabra di Dios den e ministerio. Ta konosí rònt mundu ku Testigunan di Yehova ta ansioso pa kompartí un mensahe di Beibel ku otro hende. Masha hopi biaha nos publikashonnan ta sita for di Beibel i tambe referí na dje. Anto den nos ministerio, nos ta hasi meskos i ta purba hala atenshon na e Skritura ki ora ku nos papia ku un hende. (2 Timoteo 3:16) Nos ta keda masha kontentu ora un hende permití nos lesa for di Beibel i papia kuné tokante e balor i nifikashon di e Palabra di Dios! Nos no tin un memoria perfekto manera Hesus, pero sí nos tin hopi hèrmènt ku Hesus no tabatin na su disposishon. Fuera di e Beibel kompletu imprimí na mas i mas idioma, nos tin hopi yudansa pa haña kualke versíkulo ku nos ta buska den Beibel. Laga nos ta determiná pa sigui sita for di Beibel i dirigí hende na dje ki ora ku nos haña un chèns!

11. Dikon Hesus frekuentemente mester a defendé e Palabra di Dios?

¹¹ Hesus a konstatá ku e Palabra di Dios tabata frekuentemente bou di atake, pero esei no a sorprend’é niun ora so. El a bisa su Tata den orashon: “Bo palabra ta bèrdat.” (Juan 17:17) Anto Hesus tabata sa bon-bon ku Satanas, “e prens di e mundu aki,” ta “un gañadó i e tata di mentira.” (Juan 8:44; 14:30) Tres biaha Hesus a sita for di e Skritura ora el a rechasá e tentashonnan di Satanas. Satanas a sita un versíkulo for di Salmo i deliberadamente a aplik’é robes, anto Hesus mesora a defendé e Palabra di Dios kontra tal mal uso.—Mateo 4:6, 7.

12-14. (a) Kon e lidernan religioso a mustra falta di rèspèt pa e Lei di Moisés? (b) Kon Hesus a defendé e Palabra di Dios?

¹² Hopi biaha Hesus a defendé e Santu Skritura kontra mal uso, mal interpretashon i ideanan engañoso. E lidernan religioso di su tempu a representá e Palabra di Dios na un manera desbalansá. Nan a pone masha hopi énfasis riba wardamentu di e detayenan di mas chikí di e Lei di Moisés, pero a pone masha tiki énfasis riba aplikashon di e prinsipionan riba kua e leinan tabata basá. Nan a fomentá pues un forma di adorashon superfisial, unu ku a konsentrá riba aparensia djafó en bes di riba loke tabata mas importante, kosnan manera hustisia, miserikòrdia i fieldat. (Mateo 23:23) Kon Hesus a defendé e Lei di Dios?

¹³ Hesus a usa bes tras bes den su Sermon Riba Seru e frase “boso a tende ku a wòrdu bisá” pa introdusí un regla di e Lei di Moisés. El a sigui despues ku e frase “ma ami ta bisa boso,” i a splika un prinsipio ku a bai mas profundo ku djis warda e Lei superfisialmente. Akaso e tabata presentá argumentonan kontra e Lei? Nò, e tabata defendé e Lei. Por ehèmpel, e hendenan tabata bon na haltura di e lei pa “no mata.” Pero Hesus a bisa nan ku esun ku odia otro hende ta violá e spiritu di e lei ei. Di igual manera, esun ku kultivá mal deseo pa un hende ku no ta su kasá ta violá e prinsipio fundamental di e lei di Dios kontra adulterio.—Mateo 5:17, 18, 21, 22, 27-39.

¹⁴ Por último, Hesus a bisa: “Boso a tende ku a wòrdu bisá: ‘Stima bo próhimo i odia bo enemigu.’ Ma ami ta bisa boso, stima boso enemigunan, . . . hasi orashon pa esnan ku ta maltratá boso i ta persiguí boso.” (Mateo 5:43, 44) Akaso e mandamentu pa “odia bo enemigu” tabata saká for di e Palabra di Dios? Nò, ta e lidernan religioso a bini ku e lei ei. Nan a meskla Dios su Lei perfekto ku pensamentu humano i asina a debilitá e Lei. Sin miedu Hesus a defendé e Palabra di Dios kontra e efektonan perhudisial di tradishon humano.—Marko 7:9-13.

15. Kon Hesus a defendé e Lei di Dios kontra intentonan pa lag’é parse muchu estrikto, asta sin miserikòrdia?

¹⁵ Un otro manera ku e lidernan religioso a duna un idea robes di e Lei di Dios tabata dor di lag’é parse muchu estrikto, asta sin miserikòrdia. Ora ku e disipelnan di Hesus a kita algun tapushi di maishi miéntras nan tabata pasando den un kunuku, algun fariseo a pretendé ku nan a kibra sabat. Hesus a usa un ehèmpel bíbliko pa defendé e Palabra di Dios kontra e punto di bista desbalansá aki. El a referí na e úniko insidente den e Skritura ku ta menshoná ku nan a usa e pan di presensia pafó di e santuario, esta, ora David ku su hòmbernan hambrá a kom’é. Hesus a mustra e fariseonan ei ku nan no a komprondé Yehova su miserikòrdia i kompashon.—Marko 2:23-27.

16. Kon e lidernan religioso a korumpí e mandamentu di Moisés relashoná ku divorsio, i kon Hesus a reakshoná?

¹⁶ E lidernan religioso a formulá tambe burakunan legal pa kibra e forsa di e Lei di Dios. Por ehèmpel, e Lei a permití un hòmber divorsiá di su kasá si el a haña “algu indesente” den e muhé, evidentemente un problema serio ku a trese bèrgwensa riba e famia. (Deuteronomio 24:1) Sin embargo, den tempu di Hesus, e lidernan religioso tabata usa e echo ku e Lei a permití un divorsio asina komo un èksküs pa laga un hòmber divorsiá di su kasá pa tur tipo di motibu, asta pasobra el a kima e hòmber su kuminda!a Hesus a mustra ku nan a duna un idea kompletamente robes di e palabranan di Moisés. Anto e ora ei el a restorá Yehova su norma original pa matrimonio, esta, ún esposo pa ún esposa, lagando inmoralidat seksual komo e úniko base válido pa divorsio.—Mateo 19:3-12.

17. Kon kristiannan djawe por imitá Hesus den defendé e Palabra di Dios?

¹⁷ Siguidónan di Kristu djawe tambe ta sinti nan obligá na defendé e Santu Skritura kontra atake. Ora lidernan religioso ta bisa indirektamente ku e normanan moral di e Palabra di Dios ta antikuá, nan de echo ta atakando Beibel. Meskos ta e kaso tambe ora ku religionnan ta siña doktrinanan falsu i presentá nan komo saká for di Beibel. Pa nos, ta un privilegio di por sali na defensa di Dios su Palabra puru di bèrdat i mustra, por ehèmpel, ku Dios no ta parti di un Trinidat. (Deuteronomio 4:39) Ora di hasi esei, nos ta defendé e Palabra di Dios ku takto, ku berdadero suavedat i rèspèt profundo.—1 Pedro 3:15.

18, 19. Ki ehèmpelnan ta mustra ku Hesus tabatin un abilidat maravioso pa splika e Palabra di Dios?

¹⁸ Hesus tabata na bida den shelu ora ku skirbimentu di e Skritura Hebreo a tuma lugá. Lo e tabata kontentu di por a bin na tera i yuda splika e Palabra di Dios! Por ehèmpel, pensa riba e dia memorabel despues di su resurekshon ora el a topa ku dos di su disipelnan riba kaminda pa Emaus. Promé ku nan a rekonos’é, nan a kont’é kon tristu i konfundí nan tabata pa motibu di morto di nan Shon stimá. Kon el a reakshoná? “Kuminsando ku Moisés i ku tur e profetanan el a splika nan e kosnan tokante di su mes den tur e Skrituranan.” Ki efekto esei tabatin riba e disipelnan? Despues nan a bisa otro: “Nos kurason no tabata kima den nos miéntras ku e tabata papia ku nos na kaminda, miéntras ku e tabata splika nos e Skrituranan?”—Lukas 24:15-32.

¹⁹ Mas despues riba e mesun dia ei, Hesus a reuní ku su apòstelnan i otro disipel. Tuma nota kiko el a hasi pa nan: “El a habri nan huisio pa nan komprondé e Skrituranan.” (Lukas 24:45) Sin duda, e okashon felis ei a laga nan kòrda riba e tantísimo biahanan ku Hesus a hasi algu similar pa nan, i pa ken ku kier a tende. Hopi biaha el a sita tekstonan bon konosí i a splika nan di tal manera ku esei tabatin un efekto maravioso riba e mente di su oyentenan, ya ku nan a haña un komprondementu nobo i mas profundo di e Palabra di Dios.

20, 21. Kon Hesus a splika e palabranan ku Yehova a papia ku Moisés na e mata na kandela?

²⁰ Na un okashon asina, Hesus tabata papiando ku un grupo di saduseo. Nan tabata un sekta di hudaismo asosiá ku e saserdosio hudiu, i nan no a kere den resurekshon. Hesus a bisa nan: “Enkuanto resurekshon di e mortonan, boso no a lesa loke Dios a papia ku boso, bisando: ‘Ami ta e Dios di Abraham, i e Dios di Isaak, i e Dios di Jakòb’? E no ta e Dios di e mortonan, sino di e bibunan.” (Mateo 22:31, 32) Esaki tabata un teksto ku nan a konosé bon, skirbí pa un hòmber ku e saduseonan a atmirá masha hopi, esta, Moisés. Pero bo ta mira e impakto di Hesus su splikashon?

²¹ Moisés a kòmbersá ku Yehova na e mata na kandela rònt di aña 1514 promé ku nos era. (Eksodo 3:2, 6) E tempu ei, Abraham tabatin 329 aña morto, Isaak tabatin 224 aña morto i Jakòb tabatin 197 aña morto. Sin embargo, ainda Yehova a bisa “mi ta” nan Dios. E saduseonan ei tabata sa ku Yehova no ta manera un òf otro dios pagano di e mortonan, ku segun mitologia a reina den un mundu supteráneo. Nò, e tabata e Dios “di e bibunan,” manera Hesus a bisa. Pues kiko esei a nifiká? Hesus su konklushon tabata impaktante: “Pa e tur ta biba.” (Lukas 20:38) Yehova su sirbidónan stimá ku a muri ta bon konserbá den su memoria perfekto i sin límite. Pues Yehova su propósito di resusitá e personanan ei ta asina sigur ku por papia di nan komo si fuera nan ta bibu. (Romanonan 4:16, 17) Esei no ta un splikashon maravioso di e Palabra di Dios? Nada straño ku ‘e multitutnan a keda asombrá’!—Mateo 22:33.

22, 23. (a) Kon nos por imitá Hesus ora di splika e Palabra di Dios? (b) Kiko nos lo konsiderá den e siguiente kapítulo?

²² Kristiannan djawe tin e privilegio di imitá Hesus su manera di splika e Palabra di Dios. Nos tin ku atmití ku nos no tin un mente perfekto. Apesar di esei, hopi biaha nos por kompartí ku otro hende un teksto bíbliko ku nan konosé kaba i splika nan sierto aspekto di e teksto ei ku kisas nunka nan no a kai ariba. Un ehèmpel: Podisé henter nan bida nan a ripití e orashon “Bo nòmber sea santifiká” i “Ku bo reino bin,” sin ku nunka nan a siña kiko e nòmber di Dios ta òf kiko e Reino ta. (Mateo 6:9, 10) Ki un oportunidat maravioso nos tin ora un hende permití nos duna un splikashon kla i simpel di e bèrdatnan bíbliko ei!

²³ Pues, pa por imitá e manera ku Hesus a kompartí e bèrdat nos tin ku sita for di e Palabra di Dios, defend’é i splik’é. Laga nos ban konsiderá awor algun di e métodonan efektivo ku Hesus a usa pa yega na kurason di su oyentenan ku e bèrdatnan di Beibel.