Hesus Su Palabranan Ta Influensiá Bo Orashonnan?

“Ora Hesus a kaba di papia e palabranan akí, e multitutnan a keda asombrá di su siñansa.”​—MAT. 7:28.

1, 2. Dikon e multitut a keda asombrá ku Hesus su manera di siña hende?

NOS mester aseptá e palabranan di Dios su Yu unigénito, Hesukristu, i apliká nan den nos bida. Su manera di papia definitivamente tabata distinto for di tur otro hende. Ta p’esei, hende a keda asombrá di e manera ku el a siña nan den e Sermon Riba Seru!​—Lesa Mateo 7:​28 i 29.

² Yehova su Yu no a siña hende manera e eskribanan, kendenan a basa nan diskursonan largu riba siñansa di hende imperfekto. Kristu a siña nan “manera un hende ku tin outoridat,” pasobra loke el a papia a bini di Dios. (Juan 12:50) Awor, laga nos wak kon loke Hesus a bisa mas aleu den e Sermon Riba Seru por i mester influensiá nos orashonnan.

Nunka Hasi Orashon Manera e Hipókritanan

 3. Relatá brevemente loke Hesus a bisa na Mateo 6:5.

³ Orashon ta un parti importante di adorashon berdadero, i nos mester hasi orashon regularmente na Yehova. Pero Hesus su palabranan den e Sermon Riba Seru mester influensiá nos orashonnan. El a bisa: “Ora bo ta hasi orashon, no sea manera e hipókritanan, pasobra nan ta gusta para hasi orashon den snoa i na skina di kaya, pa hende mira nan. Di bèrdat mi ta bisa boso, ya nan tin nan pago kaba.”​—Mat. 6:5.

4-6. (a) Dikon e fariseonan tabata gusta para hasi orashon “den snoa i na skina di kaya” hanchu? (b) Den ki sentido e hipókritanan ei tabatin nan ‘pago kompletu kaba’?

⁴ Ora Hesus su disipelnan tabata hasi orashon, nan no mester a imitá hende ‘hipókrita’ manera e fariseonan ku tabata hustu den nan mes bista i ku tabata pretendé di ta masha deboto. (Mat. 23:​13-32) E hipókritanan ei tabata gusta hasi orashon pará “den snoa i na skina di kaya” hanchu. Dikon? Pa “hende mira nan.” E hudiunan den promé siglo tabatin e kustumber di hasi orashon huntu, komo kongregashon, durante e orarionan di ofresé ofrenda kimá na e tèmpel (rònt di nueb’or di mainta i tres or di mèrdia). Den áreanan di e tèmpel, hopi residente di Yerusalèm tabata hasi orashon huntu ku un multitut di adoradó. Pafó di Yerusalèm, hopi bes hudiunan deboto tabata para dos bes pa dia ‘den e snoanan’ pa hasi orashon.​—Kompará ku Lukas 18:​11 i 13.

⁵ Siendo ku mayoria di hende no tabata den serkania dje tèmpel òf di un snoa ora di hasi e orashonnan ku nos a kaba di menshoná, kisas nan tabata hasi orashon kaminda nan tabata na e momentonan ei. Algun tabata sòru pa nan ta pará ‘na skina di un kaya’ hanchu na e oranan di hasi orashon. Nan tabata kier pa hende ku tabata pasa na e skinanan ei “mira nan.” E hipókritanan deboto akí tabata “hasi orashonnan largu pa bista di hende” pa asina esnan ku opservá nan por a atmirá nan. (Luk. 20:47) Nos no mester tin e aktitut ei.

⁶ Hesus a bisa ku e hipókritanan ei tabatin ‘nan pago kompletu kaba.’ Nan tabatin masha deseo pa nan próhimo duna nan rekonosementu i elogio—i esei ta tur loke nan lo a haña. Esei lo tabata nan pago òf rekompensa kompletu, pasobra Yehova no tabata kontestá nan orashonnan hasí na un manera hipókrita. Di otro banda, Dios tabata kontestá e orashonnan di Kristu su berdadero siguidónan, manera Hesus su deklarashon mas aleu riba e tópiko akí ta mustra.

 7. Kiko Hesus tabata ke men ora el a konsehá pa hasi orashon den nos “kamber di mas paden”?

⁷ “Ma abo, ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata ku ta den skondí; i bo Tata, ku ta mira den skondí, lo rekompensá bo.” (Mat. 6:6) Hesus su instrukshon pa hasi orashon den un kamber di mas paden despues di a sera porta no a nifiká ku un persona no por a representá un kongregashon den orashon. El a duna e konseho akí pa desanimá hende di hasi orashon públiko djis pa hala atenshon na nan mes i pa haña elogio di otro hende. Nos tin ku kòrda esaki si nos haña e privilegio di representá Dios su pueblo den un orashon públiko. Laga nos kumpli tambe ku e otro instrukshonnan ku Hesus a duna relashoná ku orashon.

 8. Segun Mateo 6:7, ki manera inkorekto di hasi orashon nos tin ku evitá?

⁸ “Ora bo ta hasi orashon, no keda ripití palabranan bano manera e paganonan ta hasi, pasobra nan ta kere ku nan lo wòrdu tendí pa motibu di nan kantidat di palabra.” (Mat. 6:7) Ku e palabranan ei, Hesus a menshoná un otro manera inkorekto di hasi orashon, esta, ripití e mesun kosnan. Pero e no tabata ke men ku nunka nos mag ripití petishon i ekspreshonnan di gradisimentu sinsero den nos orashon. De echo, den e hòfi di Getsemané, riba e anochi promé ku Hesus a muri, bes tras bes el a usa “e mesun palabranan” den su orashon.​—Mar. 14:​32-39.

9, 10. Den ki sentido nos no mester keda ripití e mesun palabranan ora di hasi orashon?

⁹ No ta bon pa nos imitá e manera di hasi orashon di “e paganonan” ku ta keda ripití e mesun palabranan. Bes tras bes, nan ta “keda ripití” frasenan ku nan a siña for di kabes i ku ta inkluí hopi palabra innesesario. “For di mainta te mèrdia,” e adoradónan di Baal a roga e dios falsu ei, bisando: “O Baal, kontestá nos.” Pero esei no a yuda nan ku nada. (1 Rei. 18:26) Awe tambe, miónes di hende ta keda ripití un avalancha di palabra den nan orashonnan, pensando enbano ku nan “lo wòrdu tendí.” Pero Hesus ta yuda nos komprondé ku uso di un “kantidat di palabra” den orashonnan largu ku bes tras bes ta wòrdu ripití no tin ningun balor pa Yehova. Hesus a sigui bisa:

¹⁰ “P’esei, no sea meskos ku nan, pasobra boso Tata sa kiko boso tin mester, promé ku boso pidié.” (Mat. 6:8) Hopi lider religioso hudiu a bira meskos ku e paganonan; nan tabata usa un avalancha di palabra ora nan tabata hasi orashon. Orashon sinsero ku ta inkluí alabansa, gradisimentu i petishon ta un parti importante di adorashon berdadero. (Fil. 4:6) Sinembargo, lo ta inkorekto pa nos bisa e mesun kosnan bes tras bes ku e pensamentu ku ripitishon ta nesesario pa bisa Dios kiko ta nos nesesidatnan. Ora nos ta hasi orashon, nos tin ku kòrda ku nos ta dirigiendo nos mes na Esun ku ‘sa kiko nos tin mester, promé ku nos pidié.’

11. Kiko nos mester kòrda si nos tin e privilegio di hasi orashon públiko?

¹¹ Loke Hesus a bisa relashoná ku orashonnan inaseptabel mester yuda nos kòrda ku nos no por impreshoná Dios ku ekseso di palabra ni palabranan grandi. Ademas, ora nos ta hasi orashon públiko, nos mester realisá ku esaki no ta un okashon pa impreshoná nos oyentenan ni pa pone nan puntra nan mes ki ora por bisa “Amèn” pa kaba. No ta korekto tampoko pa usa orashon públiko pa hasi anunsio ni duna konseho, ya ku esei lo no kuadra ku e prinsipio tras di Hesus su palabranan den e Sermon Riba Seru.

Hesus Ta Siña Nos Kon pa Hasi Orashon

12. Kon lo bo splika e nifikashon di e petishon “bo nòmber sea santifiká”?

¹² Ounke Hesus a duna spièrtamentu kontra mal uso di e gran privilegio di hasi orashon, el a siña su disipelnan kon pa hasi orashon. (Lesa Mateo 6:​9-13.) E orashon ku el a duna nan komo un modelo no tabata pa siña for di kabes i ripití bes tras bes. Mas bien, e mester sirbi komo modelo pa nos orashonnan. Por ehèmpel, den su palabranan di introdukshon, Hesus a pone Dios na promé lugá. El a bisa: “Nos Tata ku ta den shelu, bo nòmber sea santifiká.” (Mat. 6:9) Ta korekto pa nos yama Yehova “nos Tata” pasobra e ta nos Kreador, kende ta biba “den shelu,” leu for di tera. (Deu. 32:6; 2 Kró. 6:21; Echo. 17:​24, 28) E uso di e palabra plural “nos” mester yuda nos kòrda ku nos kompañeronan di fe tambe tin un relashon íntimo ku Dios. E palabranan “bo nòmber sea santifiká” ta un petishon pa Yehova tuma akshon pa santifiká òf limpia su nòmber di tur reproche ku a bini riba dje desde e rebelion den Edén. Komo kontesta riba e orashon ei, Yehova lo eliminá maldat for di riba tera i asina santifiká su nòmber.​—Eze. 36:23.

13. (a) Kon Dios lo kumpli ku e petishon “ku bo reino bin”? (b) Kiko e echo ku Dios su boluntat lo sosodé na tera ta enserá?

¹³ “Ku bo reino bin. Ku bo boluntat sosodé na tera meskos ku den shelu.” (Mat. 6:10) E petishon akí den e orashon modelo mester yuda nos kòrda ku e “reino” ta e gobièrnu Mesiániko selestial den man di Kristu i e “santunan” resusitá ku lo ta huntu kuné. (Dan. 7:​13, 14, 18; Isa. 9:​6, 7) Ora nos ta pidi pa e “bin” nos ta hasi un petishon na Dios pa su Reino bini kontra tur esnan riba tera ku ta oponé e gobernashon di Dios. Esei lo sosodé pronto i lo habri kaminda pa un paradeis mundial unda lo tin hustisia, pas i prosperidat. (Sal. 72:​1-15; Dan. 2:44; 2 Ped. 3:13) Yehova su boluntat ta sosodé den shelu, i e petishon pa e tuma lugá riba tera ta un súplika na Dios p’e kumpli ku su propósito pa ku nos planeta, lokual ta enserá eliminá su opositornan awe meskos ku el a hasi den pasado.​—Lesa Salmo 83:​1 i 2 i 13-18.

14. Dikon ta apropiá pa pidi pa “nos pan di kada dia”?

¹⁴ “Duna nos awe nos pan di kada dia.” (Mat. 6:11; Luk. 11:3) Ora nos ta hasi e petishon akí, nos ta pidiendo Dios pa perkurá e kuminda nesesario pa “kada dia.” Esaki ta indiká ku nos tin fe den Yehova su abilidat di perkurá pa nos nesesidatnan diariamente. E no ta un petishon pa haña mas di loke nos tin mester. E petishon akí pa nos nesesidatnan diario kisas ta laga nos kòrda ku Dios a manda e israelitanan pa rekohé tur dia ‘e porshon di mana pa un dia.’​—Eks. 16:4.

15. Splika kiko e petishon “pordoná nos nos debenan, meskos ku nos tambe ta pordoná nos debedónan” ta nifiká.

¹⁵ E siguiente petishon den e orashon modelo ta hala nos atenshon na algu ku nos mester hasi. Hesus a bisa: “Pordoná nos nos debenan, meskos ku nos tambe ta pordoná nos debedónan.” (Mat. 6:12) E Evangelio di Lukas ta mustra ku e “debenan” akí ta referí na nos “pikánan.” (Luk. 11:4) Ta solamente si nos “ta pordoná” esnan ku ta peka kontra nos, nos por ferwagt pordon for di Yehova. (Lesa Mateo 6:​14 i 15.) Nos mester pordoná otro hende libremente.​—Efe. 4:32; Kol. 3:13.

16. Kon nos mester komprondé e petishon enkuanto tentashon i esun enkuanto liberashon for di e malbado?

¹⁶ “No hiba nos den tentashon, ma libra nos for di e malbado.” (Mat. 6:13) E dos petishonnan akí den Hesus su orashon modelo tin di haber ku otro. Kon nos mester komprondé nan? Un kos ta sigur, Yehova no ta tenta nos pa kometé piká. (Lesa Santiago 1:13.) Satanas—“e malbado”—ta e berdadero “Tentadó.” (Mat. 4:3) Sinembargo, Beibel sa referí na Dios komo si fuera e ta hasi kosnan ku e simplemente ta permití. (Ruth 1:​20, 21; Ekl. 11:5) P’esei, e palabranan “no hiba nos den tentashon” ta un petishon pa Yehova no permití nos sukumbí ora nos haña nos ku tentashon pa desobedes’é. Finalmente, e súplika pa “libra nos for di e malbado” ta un petishon pa Yehova no permití Satanas vense nos. I nos por tin e konfiansa ku Dios ‘lo no permití pa nos wòrdu tentá mas ku nos por soportá.’​—Lesa 1 Korintionan 10:13.

‘Sigui Pidi, Buska i Bati’

17, 18. Kiko ke men ‘sigui pidi, buska i bati’?

¹⁷ Apòstel Pablo a urgi su rumannan den fe: “Perseverá den orashon.” (Rom. 12:12, NW) Hesus a duna un instrukshon similar ora el a bisa: “Sigui pidi, i lo wòrdu duná na boso; sigui buska i boso lo haña; sigui bati, i lo habri pa boso. Pasobra ken ku pidi ta risibí i ken ku buska ta haña, i pa ken ku bati lo ser habrí.” (Mat. 7:​7, 8, NW) Pues, ta korekto pa “sigui pidi” pa kualke kos ku ta konforme ku Dios su boluntat. Na armonia ku Hesus su palabranan, apòstel Juan a skirbi: “Esaki ta e konfiansa ku nos tin [Dios] su dilanti, ku si nos pidi kualke kos konforme su boluntat, e ta tende nos.”​—1 Juan 5:14.

¹⁸ Hesus su konseho pa ‘sigui pidi i buska’ ta nifiká ku nos mester hasi orashon ferviente i no entregá. Ademas, nos tin ku “sigui bati” pa nos por disfrutá di e bendishon-, benefisio- i rekompensanan ku e Reino lo trese. Pero nos por tin e konfiansa ku Dios lo kontestá nos orashonnan? Sí, si nos ta fiel na Yehova, nos por tin e konfiansa ei, pasobra Kristu a bisa: “Ken ku pidi ta risibí i ken ku buska ta haña, i pa ken ku bati lo ser habrí.” Yehova su sirbidónan tin hopi eksperensia ku ta duna prueba ku Dios en bèrdat ta Esun “ku ta skucha orashon.”​—Sal. 65:2.

19, 20. En bista di Hesus su palabranan na Mateo 7:​9-11, den ki sentido Yehova ta manera un tata amoroso?

¹⁹ Hesus a kompará Dios ku un tata amoroso ku ta perkurá bon kosnan pa su yunan. Imaginá ku bo tabata presente ora Hesus a duna e Sermon Riba Seru i bo a tende Hesus bisa: “Kual di boso, si su yu hòmber pidié pan, lo dun’é un piedra? Òf si e pidi piská, lo e dun’é un kolebra? Si boso anto, siendo malbado, sa di duna boso yunan loke ta bon, kuantu mas boso Tata ku ta den shelu lo duna loke ta bon na esnan ku pidié!”​—Mat. 7:​9-11.

²⁰ Ounke un tata humano ta “malbado” den un sierto sentido debí na piká heredá, di naturalesa e ta stima su yunan. Lo e no gaña su yu; mas bien, lo e hasi esfuerso pa dun’é “loke ta bon.” Ku e aktitut di un tata, nos amoroso Tata selestial ta duna nos “kosnan bon,” manera su spiritu santu. (Luk. 11:13) I spiritu santu por fortalesé nos pa nos por rindi sirbishi aseptabel na Yehova, e Perkurador di “tur bon regalo i tur don perfekto.”​—Sant. 1:17.

Sigui Benefisiá di Hesus Su Palabranan

21, 22. Kiko ta hasi e Sermon Riba Seru un diskurso remarkabel, i kon bo ta haña e palabranan akí di Hesus?

²¹ No tin duda, e Sermon Riba Seru ta e mihó diskurso ku un hende a yega di duna riba tera. Loke e ta konta nos tokante Yehova, i e manera kla ku e ta hasi esei ta hasié un diskurso remarkabel. Manera e puntonan ku nos a trata den e seri di artíkulo akí ta mustra, nos por benefisiá mashá si nos apliká e konsehonan ku e diskurso akí ta kontené. Hesus su palabranan por mehorá nos bida awor i duna nos e speransa di un futuro felis.

²² Den e artíkulonan akí, nos a analisá solamente un par di e hoyanan spiritual ku tin den Hesus su Sermon Riba Seru. No ta nada straño ku e personanan ku a tende su diskurso “a keda asombrá di su siñansa.” (Mat. 7:28) Sin duda, nos tambe lo reakshoná asina ora nos yena nos mente i kurason ku e palabranan akí i otronan di balor inkalkulabel ku e Gran Maestro, Hesukristu, a ekspresá.

Kiko Bo Ta Kontestá?

• Kiko Hesus a bisa di orashonnan hasí na un manera hipókrita?

• Dikon nos mester evitá ripitishon i uso di hopi palabra ora nos ta hasi orashon?

• Ki petishonnan Hesus su orashon modelo ta kontené?

• Kon nos por ‘sigui pidi, buska i bati’?

[Plachi na página 23]

Hesus a kondená e hipókritanan ku a hasi orashon djis pa hende tende i mira nan

[Plachi na página 25]

Bo sa dikon ta apropiá pa pidi pa nos pan di kada dia?