Kiko e Reino di Dios Lo Logra?

E Reino di Dios ta gobernando kaba. Pronto lo e trese kambio grandi na tera. Laga nos trata algun kos ku lo bo por disfrutá di dje bou di e Reino di Dios.

1. Kon e Reino di Dios lo trese pas i hustisia na tera?

Komo Rei di e Reino di Dios, Hesus lo destruí tur hende malbado na e guera di Armagedon. (Revelashon 16:14, 16) Na e tempu ei, e siguiente promesa di Beibel lo kumpli kompletamente: “Djis akí, lo no tin hende malbado mas.” (Salmo 37:10) Mediante e Reino di Dios, Hesus lo hasi sigur ku lo tin pas i hustisia riba henter tera.—Lesa Isaías 11:4.

2. Kon bida lo ta ora Dios su boluntat kumpli riba tera?

Bou di gobernashon di e Reino di Dios, “hende hustu lo heredá tera, i nan lo biba riba dje pa semper.” (Salmo 37:29) Imaginá bo un mundu asina! Tur hende riba tera lo ta hustu, i nan lo stima Yehova i otro hende. Niun hende lo no bira malu i tur hende lo biba pa semper.

3. Kiko e Reino di Dios lo logra despues ku destruí tur hende malbado?

Hesus lo goberná komo Rei pa 1.000 aña despues ku hende malbado ser destruí. Durante e tempu ei, Hesus i e 144.000 personanan ku lo goberná huntu kuné lo yuda hende riba tera bira perfekto. Na final di e periodo di mil aña, henter tera lo ta un bunita paradeis i tur hende lo ta felis pasobra nan ta obedesé e leinan di Yehova. Despues, Hesus lo entregá e Reino bèk na su Tata, Yehova. Yehova su “nòmber [lo ser] santifiká” manera nunka promé. (Mateo 6:9, 10) Na e tempu ei, lo ta bisto ku Yehova ta un bon Gobernante i ku e ta kuida hende ku ta bou di su gobernashon. Despues, Yehova lo destruí Satanas, e demoñonan i kualke otro persona ku ke rebeldiá kontra Su gobernashon. (Revelashon 20:7-10) Tur loke e Reino di Dios logra lo dura pa semper.

KIKO MAS NOS POR SIÑA?

4. E Reino di Dios lo kaba ku gobernashon humano

Beibel ta bisa: “Hende ta dominá hende, i esei ta kousa sufrimentu.” (Eklesiástes 8:9) Yehova lo usa su Reino pa kaba ku tur inhustisia ku gobernashon humano a kousa.

Lesa Dánièl 2:44 i 2 Tesalonisensenan 1:6-8. Despues, analisá e siguiente preguntanan:

• Kiko Yehova i su Yu, Hesus, lo hasi ku gobièrnu humano i e hendenan ku ta apoyá e gobièrnunan ei?

• Di loke bo a siña tokante Yehova i Hesus, dikon bo por ta sigur ku loke nan lo hasi ta hustu?

5. Hesus ta e mihó Rei ku por tin

Komo Rei di e Reino di Dios, Hesus lo yuda hende ku ta biba riba tera na vários manera. Pasa e VIDIO pa wak kon Hesus a demostrá ku e ke yuda hende i ku Dios a dun’é poder pa hasi esei.

VIDIO: Hesus A Demostrá Kiko e Reino di Dios Lo Hasi (1:13)

E milagernan ku Hesus a hasi tempu ku e tabata riba tera ta mustra kiko e Reino di Dios lo hasi den futuro. Kua di e bendishonnan menshoná aki bo tin mas gana di mira kumpli? Pa siña mas tokante e bendishonnan ei, lesa e tekstonan ku tin nan tras.

6. E Reino di Dios lo trese un futuro maravioso

VIDIO: E Futuro Maravioso Ku Ta Spera Humanidat (4:38)

Lesa Salmo 145:16. Despues, analisá e siguiente pregunta:

• Kon bo ta sinti bo awor ku bo sa ku Yehova lo “satisfasé deseo di tur ser bibu”?

RESÚMEN

E Reino di Dios lo kumpli ku Dios su boluntat. E Reino di Dios lo hasi henter tera un paradeis kaminda hende hustu lo adorá Yehova pa semper.

Repaso

• Kon e Reino di Dios lo santifiká òf hasi Yehova su nòmber limpi?

• Dikon nos por tin sigur ku e Reino di Dios lo kumpli ku e promesanan ku tin den Beibel?

• Di tur e bendishonnan ku e Reino di Dios lo trese, kua di nan bo tin mas gana di mira kumpli?

MAS INFORMASHON INTERESANTE

Lesa e artíkulo akí pa haña sa kiko Armagedon ta.

“Kiko e Guera di Armagedon Ta?” (artíkulo riba jw.org)

Lesa loke lo sosodé durante e tempu ku Hesus a yama “tribulashon grandi.”—Mateo 24:21.

“Kiko e Tribulashon Grandi Ta” (artíkulo riba jw.org)

Wak kon un famia ta imaginá nan mes huntu den Paradeis.

Imaginá Bo Mes den Paradeis (1:50)

Pa wak kon un hòmber ku tabata kontra e sistema polítiko di su pais a haña e solushon ku e tabata buska, lesa e artíkulo “Mi Tabatin Hopi Pregunta.”

“Beibel Ta Kambia Bida di Hende” (E Toren di Vigilansia di 1 di yanüari 2012, na spañó)