Laga Bo Reino Bini”—Pero Ki Dia?

1, 2. (a) Kiko por hasi nos manera siegu? (b) Kiko nos sa tokante e Reino di Dios?

MANERA kisas bo a ripará, ora un kos pasa, no ta tur testigu okular ta kòrda e mesun detayenan tokante e suseso. Meskos tambe, un persona ku kaba di tende for di su dòkter ku e ta hopi malu, despues tin difikultat pa kòrda kiko presis e dòkter a bis’é. Òf tin biaha, un persona no por haña su yabi òf su brel, miéntras ku nan ta su dilanti. Dikon e kosnan akí ta pasa? Ekspertonan ta bisa ku esaki ta sosodé ora un hende ta purba di hasi vários kos pareu. Su mente ta muchu okupá, i esei ta pone ku e ta bira manera siegu i no ta ripará kos òf e ta lubidá kos. Aparentemente, nos selebro por konsentrá riba un solo kos a la bes.

² Awe tambe, hopi hende ta manera siegu pa loke ta pasando den mundu. Kisas nan ta atmití ku mundu a kambia hopi for di loke e tabata na aña 1914, pero nan no ta mira kiko ta e berdadero motibu tras di e susesonan akí. Komo studiantenan di Beibel, nos sa ku den un sentido e Reino di Dios a bini na 1914 ora ku Dios a hasi Hesus Rei den shelu. Pero tambe nos sa ku e orashon “Laga bo Reino bini. Laga bo boluntat sosodé, meskos ku den shelu, tambe riba tera” no a ser kontestá kompletamente ainda. (Mat. 6:10) Esei lo sosodé ora ku Dios pone un fin na e mundu malbado akí. Ta e ora ei numa e boluntat di Dios por sosodé riba tera meskos ku den shelu.

3. Kiko nos estudio di Beibel ta yuda nos mira?

³ Komo ku nos ta studia e Palabra di Dios regularmente, nos por mira ku profesianan ta kumpliendo aworakí. Ki un kontraste grandi esei ta ku hende en general! Nan ta asina okupá ku nan bida i aktividatnan ku nan no ta mira e evidensia ku Kristu ta na mando for di 1914 i ku pronto lo e destruí e mundu malbado akí. Pero pensa riba e pregunta akí: Si bo tin vários dékada ta sirbi Dios, bo a keda mesun konsiente i interesá den e nifikashon di nos tempu manera kisas bo tabata hopi aña pasá? Asta si bo no tin hopi tempu ku bo a bira un Testigu, riba kiko bo ta konsentrá bo atenshon? Sea loke sea bo kontesta ta, un kos nos sa sigur: Pronto Dios su Rei ungí lo dal paso pa laga e boluntat di Dios sosodé kompletamente riba tera. Laga nos analisá tres motibu importante dikon nos ta sigur di esaki.

4, 5. (a) Kiko Hesus ta hasiendo for di 1914? (Wak e promé plachi.) (b) Kiko e tres koredónan di kabai ku ta sigui Hesus ta representá, i kon e profesia akí a kumpli?

⁴ Na aña 1914, Hesukristu a risibí su korona selestial, es desir, el a bira Rei di e Reino di Dios. E profesia na Revelashon kapítulo 6 a deskribí Hesus sintá riba un kabai blanku. Asina ku el a bira Rei, el a sali bai pa kompletá su viktoria riba e mundu malbado di Satanas. (Lesa Revelashon 6:1, 2.) E profesia a indiká ku despues ku e Reino di Dios a kuminsá goberná, e situashon na mundu lo bai atras rápidamente. Guera, skarsedat di kuminda, malesa i otro kousanan di morto lo tuma lugá mas ku nunka promé. Den e profesia, e desasternan ei ta ser representá pa tres koredó di kabai ku a kuminsá kore djis tras di Hesukristu.—Rev. 6:3-8.

⁵ Manera e profesia a indiká, guera a “kita pas for di riba tera.” Esaki a sosodé apesar ku hopi nashon a primintí di kooperá ku otro i mantené pas. Desaroyonan mundial di último tempu a demostrá ku Promé Guera Mundial tabata apénas e promé di e tantísimo gueranan grandi ku a tuma lugá. I aunke hende a hasi hopi progreso ekonómiko i sientífiko desde 1914, skarsedat di kuminda ta sigui ta un di e kosnan ku por kousa konflikto i guera rònt mundu. Ademas, ken por nenga ku tur tipo di malesa, desaster natural i otro tragedia ta kaba ku bida di miónes di hende tur aña. E susesonan akí ta mas peligroso, ta tuma lugá ku mas frekuensia i ta mata mas hende ku nunka promé den historia humano. Abo ta tuma na pechu loke esaki ta nifiká?

6. Ken a tuma nota ku profesia di Beibel tabata kumpli, i esaki a motivá nan pa hasi kiko?

⁶ E komienso di Promé Guera Mundial i e epidemia di grip spañó a kita e atenshon di hopi hende di tal manera ku nan no a realisá kiko tabata e berdadero motibu tras di e susesonan ei. Ma kristiannan ungí sí tabata spera ansiosamente pa “e tempu stipulá di e nashonnan” terminá na aña 1914. (Luk. 21:24) Nan no tabata sa presis kon esei lo a sosodé, pero loke sí nan tabata sa ta ku na 1914 un suseso importante lo a tuma lugá relashoná ku e Reino di Dios. Asina ku nan a komprondé kon profesia di Beibel a kumpli, nan a anunsiá ku kurashi ku e gobernashon di Dios a kuminsá. Nan esfuerso pa proklamá e Reino a resultá den persekushon intenso. E echo ku e persekushon akí a tuma lugá den hopi nashon tabata riba su mes kaba un kumplimentu di profesia. Durante e dékadanan ku a sigui, enemigu di e Reino a usa lei, dekreto, violensia, kastigu di prizòn i asta sentensia di morto pa purba di para e trabou di prediká.—Sal. 94:20; Rev. 12:15.

7. Dikon mayoria di hende no ta mira kiko tin tras di loke ta tumando lugá den mundu awe?

⁷ Siendo ku tin asina tantu evidensia ku e Reino di Dios ta gobernando kaba den shelu, dikon mayoria di hende no ta aseptá loke esaki ta nifiká? Dikon nan no por mira ku e susesonan mundial ta kumpliendo ku profesia di Beibel, presis manera e pueblo di Dios tin basta aña ta prediká? Akaso nan ta konsentrá solamente riba loke nan por mira ku nan wowo? (2 Kor. 5:7) Òf nan ta asina preokupá ku asuntunan humano ku nan no ta mira loke Dios ta hasiendo? (Mat. 24:37-39) Òf ta e idea- i metanan di e mundu di Satanas ta kita nan tinu for di loke ta tumando lugá? (2 Kor. 4:4) Nos mester tin fe i tambe e abilidat di mira mas ayá di loke tin djis nos dilanti pa nos por komprondé loke e Reino di Dios ta hasiendo. Nos ta masha kontentu ku nos por mira kiko tin tras di tur loke ta tumando lugá!

8-10. (a) Kon 2 Timoteo 3:1-5 a kumpli? (b) Dikon nos por bisa ku maldat ta bayendo di malu pa pió?

⁸ Tin un di dos motibu pakiko nos sa ku lo no dura mashá mas promé ku e Reino di Dios kuminsá goberná e tera: Awe tin mas maldat ku nunka den e mundu akí, i e ta bira pió. Durante kasi 100 aña, nos a mira e profesia di 2 Timoteo 3:1-5 kumpli. I un kos ta sigur, e kondishonnan deskribí den e profesia ei tambe a bira pió, ta tuma lugá ku mas frekuensia i a plama na tur parti di mundu. Bo tambe ta mira esei? Laga nos konsiderá algun ehèmpel ku ta demostrá esaki.—Lesa 2 Timoteo 3:1, 13.

⁹ Kompará loke hende tabata haña skandaloso den dékada di 1940 òf di 1950 ku loke ta tuma lugá awe na trabou, den mundu di entretenimentu, deporte i moda. Violensia i inmoralidat ekstremo ta kos di tur dia. Hende ta kompetí ku otro pa wak ken ta mas feros, mas inmoral òf mas kruel ku otro. Programanan di televishon ku pa hopi hende tabata inaseptabel den dékada di 1950, awor ta ser konsiderá apropiá pa sinta wak komo famia. I hopi hende a ripará ku homoseksualnan tin gran influensia den mundu di entretenimentu i di moda i ta promové nan estilo di bida públikamente. Nos ta masha gradisidu ku nos sí sa kiko Dios ta pensa di e kosnan akí!—Lesa Hudas 14, 15.

¹⁰ Nos por kompará tambe loke hende tabata konsiderá komportashon rebelde di hóbennan den dékada di 1950 ku loke hóbennan ta hasi awe. Por ehèmpel, den e tempu ayá, e preokupashon di mayornan tabata si nan yunan ta huma, bebe òf baila na un manera indesente. Awe a bira masha normal pa tende notisianan spantoso manera lo siguiente: Un alumno di 15 aña ta tira riba su kompañeronan di klas i ta mata 2 i heridá 13. Un grupo di tiner burachi ta mata un mucha muhé di 9 aña kruelmente i ta maltratá su tata ku su primu. Segun un otro informe, hóbennan den un pais di Asia ta responsabel pa mitar di tur e krímennan ku a tuma lugá durante e último 10 añanan. Ta ken por nenga ku awe kosnan ta bayendo di malu pa pió?

11. Dikon hopi hende no ta realisá ku kosnan ta bayendo di malu pa pió?

¹¹ Apòstel Pedro a indiká korektamente “ku den e último dianan lo tin hasidó di bofon ku ta aktua segun nan propio deseonan i ku ta bisa den forma di chèrchè: ‘El a primintí ku lo e bini, pero unda su binida a keda? Figurá bo, for di dia ku nos antepasadonan a bai sosegá, tur kos ta sigui eksaktamente manera nan tabata for di kuminsamentu di kreashon.’” (2 Ped. 3:3, 4) Kiko lo por ta e motibu ku algun hende ta reakshoná asina? Parse ku mas nos kustumbrá di mira algu, ménos atenshon nos ta presta na dje. Por ehèmpel, si e aktitut i moralidat di hende en general bai atras pokopoko durante un periodo largu, kisas nos lo no ripará esei mes. Pero si e komportashon di un bon amigu kambia di un dia pa otro, esei lo shòk nos. Ma esaki no ta kita ku e manera gradual ku normanan moral ta bai atras ta peligroso.

12, 13. (a) Dikon nos no mester laga e kosnan ku ta tuma lugá den mundu desanimá nos? (b) Kiko lo yuda nos perseverá den e último dianan “difísil pa trata kuné” akí?

¹² Apòstel Pablo a spièrta nos ku e último dianan lo ta “difísil pa trata kuné.” (2 Tim. 3:1) Pero nan lo no ta imposibel pa trata kuné, pues nos no tin nodi di skonde pa realidat. Ku yudansa di Yehova, di su spiritu i di e kongregashon kristian, nos por vense kualke desepshon òf miedu ku nos por tin. Nos por keda fiel. “Nos a risibí e poder ku ta surpasá esun di hende, esta, e poder ku ta bini di Dios, no di nos mes.”—2 Kor. 4:7-10.

¹³ Ta bon pa tuma nota ku Pablo a introdusí e profesia tokante e último dianan bisando “sa esaki.” E palabranan ei ta un garantia ku e profesia akí lo kumpli sigur. Nos no tin duda ku e mundu malbado akí lo sigui bai di malu pa pió, te ora ku Yehova kai aden pa pone un fin na dje. Nos a siña for di historia ku ora norma moral bai hopi atras den un sosiedat òf nashon, esaki ta hiba nan na kolapso total. Pero nunka promé den historia, henter e mundu a bira asina inmoral. Hopi hende kisas no ta hasi kaso di loke esei ta nifiká, pero e desaroyo úniko akí ku a bin ta tuma lugá for di aña 1914 mester konvensé nos ku pronto e Reino di Dios lo dal paso desisivo pa kaba ku maldat.

14-16. Kiko ta e di tres motibu pakiko nos ta kere ku e Reino di Dios lo “bini” pronto?

¹⁴ Kosnan ku a pasa den e pueblo di Dios ta un di tres motibu pakiko nos por tin sigur ku e fin ta serka. Por ehèmpel, promé ku e Reino di Dios a kuminsá goberná den shelu, un grupo di ruman ungí tabata sirbi Dios diligentemente. Kiko nan a hasi ora ku na 1914 profesia no a kumpli manera nan a ferwagt? Mayoria di nan a sigui sirbi Yehova fielmente i a mantené nan integridat bou di prueba i persekushon. Atraves di añanan, mayoria di e ungínan ei—si no ta tur—a keda fiel te ora nan a finalisá nan bida riba tera.

¹⁵ Hesus a bisa den su profesia detayá tokante e último dianan di e mundu di Satanas: “E generashon akí lo no kaba na nada promé ku tur e kosnan akí tuma lugá.” (Lesa Mateo 24:33-35.) Nos ta komprondé ku “e generashon akí” ku Hesus a menshoná ta inkluí dos grupo di kristian ungí. E promé grupo tabata presente na 1914 i a komprondé mesora ku Kristu a kuminsá goberná komo Rei e aña ei. E rumannan ku a forma e grupo akí no tabata simplemente na bida na 1914, sino tambe nan a ser ungí ku spiritu santu e aña ei òf mas promé.—Rom. 8:14-17.

¹⁶ Tur e kristiannan di e di dos grupo inkluí den “e generashon akí” a ser ungí ku spiritu santu durante e periodo ku esnan di e promé grupo ainda tabata na bida riba tera. Pues, no ta tur persona ungí awe ta ser inkluí den “e generashon akí” ku Hesus a papia di dje. Awe, e ungínan den e di dos grupo ta birando basta bieu. Pero e palabranan di Hesus na Mateo 24:34 ta duna nos e siguransa ku ­henter ‘e generashon akí lo no kaba na nada’ promé ku nan mira e kuminsamentu di e tribulashon grandi. Esaki mester konvensé nos mas ainda ku djis akí e Rei di e Reino di Dios lo destruí e malbadonan i trese un hustu mundu nobo.—2 Ped. 3:13.

17. Kiko e evidensia ku nos a analisá ta yuda nos komprondé?

¹⁷ Kiko e tres evidensianan ku nos a analisá ta yuda nos komprondé? Hesus a spièrta nos ku nos no sa—ni lo no sa—e dia i ora ku e fin ta bini. (Mat. 24:36; 25:13) Pero manera Pablo a bisa, nos por sa sí “den ki tempu” esei lo ta. (Lesa Romanonan 13:11.) Nos sa ku nos ta den e último dianan. Si nos presta atenshon na profesianan di Beibel i na loke Yehova Dios i Hesukristu ta hasiendo, nos no por keda sin mira e evidensia konvinsente ku en bèrdat e fin di e mundu malbado akí ta hopi serka.

18. Kiko lo pasa ku e hendenan ku ta nenga di aseptá Hesukristu komo nan Rei?

¹⁸ Pronto, e hendenan ku ta nenga di aseptá e outoridat di Hesukristu, Esun ku ta koriendo e kabai blanku, lo haña nan obligá ta atmití ku nan tabata robes. Nan lo no mira un salida. Ora esei sosodé, hopi di nan lo sklama morto spantá: “Ken por soport’é?” (Rev. 6:15-17) Wèl, Revelashon kapítulo 7 ta kontestá e pregunta akí. E dia ei, ta e ungínan huntu ku e kristiannan ku tin e speransa di biba pa semper riba tera lo por “soport’é” pasobra nan tin e aprobashon di Dios. Djis despues di esei, “un multitut grandi” di e otro karnénan akí lo sobrebibí e tribulashon grandi.—Rev. 7:9, 13-15.

19. Komo un di e personanan ku tin sigur ku e fin ta serka, kiko bo ta spera ansiosamente riba dje?

¹⁹ Si nos sigui presta atenshon na e profesianan di Beibel ku ta kumpliendo den nos tempu, e mundu di Satanas lo no haña chèns di kita nos tinu. Tampoko nos lo no keda sin mira kiko tin tras di e susesonan mundial di nos tempu. Pronto Kristu lo kompletá su viktoria i destruí e mundu malbado akí durante e guera hustu di Armagedon. (Rev. 19:11, 19-21) Djis imaginá kon felis nos lo ta despues di esei!—Rev. 20:1-3, 6; 21:3, 4.