“Señor, Siña Nos Hasi Orashon”

“Un di su disipelnan a bis’é: ‘Señor, siña nos hasi orashon.’”—LUKAS 11:1.

 1. Dikon un di e disipelnan di Hesus a pidi Hesus siña nan kon pa hasi orashon?

NA UN okashon na aña 32 di nos era, un disipel di Hesus a opservá Hesus ta hasi orashon. E no por a tende loke Hesus tabata bisa su Tata, pasobra probablemente Hesus tabata hasi un orashon silensioso. No opstante, ora Hesus a kaba, e disipel a bis’é: “Señor, siña nos hasi orashon.” (Lukas 11:1) Kiko a motiv’é pa hasi e petishon aki? Orashon tabata un parti regular di bida i adorashon di e hudiunan. E Skritura Hebreo ta kontené hopi orashon den e buki di Salmonan i tambe den otro parti. P’esei e disipel no tabata pidi pa Hesus siñ’é algu ku e no tabata sa nada di dje òf ku nunka e no a yega di hasi. Sin duda, e disipel tabata konosí ku e orashonnan di e lidernan religioso di hudaismo, orashonnan preskribí i pa formalidat. Pero awor el a opservá Hesus hasi orashon, i probablemente el a sinti ku tabatin un gran diferensia entre e orashonnan hipókrita di e rabinan i e manera ku Hesus a resa.—Mateo 6:5-8.

 2. (a) Kiko ta indiká ku Hesus su intenshon no tabata pa nos ripití e orashon modelo palabra pa palabra? (b) Dikon nos ta interesá pa sa kon pa hasi orashon?

² Rònt di 18 luna promé ku esei, den su Sermon Riba Seru, Hesus a duna su disipelnan un modelo kon pa nan hasi orashon. (Mateo 6:9-13) Podisé e disipel aki no tabata presente na e okashon ei, p’esei Hesus bondadosamente a ripití e puntonan esensial di e orashon modelo ei. Loke ta remarkabel ta e echo ku Hesus no a ripitié ku eksaktamente e mesun palabranan, lokual ta indiká ku no ta un orashon ritual el a duna pa ser resitá bes tras bes for di kabes. (Lukas 11:1-4) Nos tambe, meskos ku e disipel kende su nòmber no ta ser menshoná, ke siña kon pa hasi orashon pa asina nos orashonnan hala nos mas serka di Yehova. P’esei laga nos analisá e vershon mas kompletu di e orashon modelo, esun ku apòstel Mateo a skirbi. E ta konsistí di shete petishon; tres ta relashoná ku e propósito di Dios i kuater ta relashoná ku nos nesesidatnan material i spiritual. Den e artíkulo aki nos lo konsiderá e promé tres petishonnan.

Un Tata Amoroso

3, 4. Ora nos ta papia ku Yehova i ta yam’é “nos Tata,” kiko esei ta indiká?

³ For di kuminsamentu di e orashon, Hesus a mustra ku nos orashonnan mester reflehá un relashon íntimo i tòg respetuoso ku Yehova. Hesus a papia prinsipalmente na benefisio di su disipelnan ku tabata sintá pegá kuné riba e seru ei, i el a bisa nan pa dirigí nan mes na Yehova komo “nos Tata ku ta den shelu.” (Mateo 6:9) Segun un komentarista bíbliko, sea ku Hesus a papia na e idioma hebreo popular òf na arameo, e palabra ku el a usa pa “Tata” ta similar na e manera ku un mucha chikí kariñosamente lo a bisa “Tata.” Ora nos ta papia ku Yehova i ta yam’é “nos Tata,” esei ta indiká ku nos tin un relashon kariñoso i di konfiansa kuné.

⁴ Dor di bisa “nos Tata,” nos ta duna di konosé tambe ku nos ta parti di un famia grandi di hende hòmber i muhé ku ta rekonosé Yehova komo e Dunadó di Bida. (Isaias 64:8; Echonan 17:24, 28) Kristiannan ungí pa spiritu a wòrdu adoptá komo “yunan di Dios,” i na dje nan por “sklama: ‘Abba, Tata!’” (Romanonan 8:14, 15) Miónes di hende a bira nan kompañeronan leal. E hendenan aki a dediká nan bida na Yehova i a simbolisá nan dedikashon dor di batisá den awa. Tur e “otro karnénan” aki tambe por aserká Yehova den nòmber di Hesus i yama Yehova “nos Tata.” (Juan 10:16; 14:6) Nos por akudí ku regularidat na nos Tata selestial den orashon pa alab’é, pa gradisié pa tur e maneranan ku e ta ekspresá su bondat na nos, i pa kont’é tokante e kosnan ku ta preokupá nos, ku e konfiansa ku e ta interesá den nos i ta perkurá pa nos.—Filipensenan 4:6, 7; 1 Pedro 5:6, 7.

Amor pa Yehova Su Nòmber

 5. Kua ta e promé petishon di e orashon modelo, i dikon e ta na su lugá?

⁵ E promé petishon mesora ta indiká loke mester ta na promé lugá. E ta deklará: “Bo nòmber sea santifiká.” (Mateo 6:9) Sí, santifikashon di Yehova su nòmber mester ta e kos di mas importante pa nos pasobra nos stima Yehova i tin rabia di mira e tantísimo maneranan ku a trese desonor i bèrgwensa riba su nòmber. Satanas, dor di rebeldiá i pone e promé pareha humano desobedesé Dios, a kalumniá e nòmber di Yehova Dios pasobra el a kuestioná e manera ku Dios tabata ehersé su soberania universal. (Génesis 3:1-6) Ademas, for di e tempu ei en adelante, Yehova su nòmber a ser desonrá dor di e aktonan i doktrinanan bergonsoso di hende ku a pretendé di ta representá Dios.

 6. Kiko nos lo no hasi si nos ta pidi den orashon pa Yehova su nòmber sea santifiká?

⁶ Nos orashon ku ta pidi pa Yehova su nòmber sea santifiká ta mustra nos posishon relashoná ku e kuestion di soberania universal, esta, ku nos ta pará kompletamente tras di Yehova su derecho di goberná e universo. Yehova ke pa e universo ser habitá pa angel i hende ku boluntariamente i gososamente ta someté nan mes na su soberania hustu pasobra nan ta stim’é i ta stima tur loke su nòmber ta representá. (1 Krónikanan 29:10-13; Salmo 8:1; 148:13) Nos amor pa Yehova su nòmber lo yuda nos pa no hasi kosnan ku lo por trese desonor i bèrgwensa riba e nòmber santu ei. (Ezekiel 36:20, 21; Romanonan 2:21-24) Pas di universo i su habitantenan ta dependé di e santifikashon di Yehova su nòmber i di sumishon na su soberania motivá pa amor. P’esei nos orashon, “bo nòmber sea santifiká,” ta un ekspreshon di nos konfiansa ku Yehova su propósito lo kumpli pa su alabansa.—Ezekiel 38:23.

E Reino Ku Nos Ta Pidi P’e

7, 8. (a) Kiko ta e Reino ku Hesus a siña nos pidi p’e den orashon? (b) Kiko nos ta siña tokante e Reino aki den e buki di Daniel i di Revelashon?

⁷ E di dos petishon den e orashon modelo ta: “Ku bo reino bin.” (Mateo 6:10) E petishon aki ta estrechamente ligá ku esun anterior. E instrumento ku Yehova lo usa pa santifiká su nòmber santu ta e Reino Mesiániko, esta, su gobièrnu selestial, di kua su Yu Hesukristu ta e Rei legítimo. (Salmo 2:1-9) E profesia di Daniel ta presentá e Reino Mesiániko komo “un piedra” kòrtá for di un “seru.” (Daniel 2:34, 35, 44, 45) E seru ta representá Yehova su soberania universal, p’esei e Reino representá dor di e piedra, ta un manifestashon nobo di Yehova su gobernashon universal. Den e profesia, e piedra na su turno ta ‘bira un seru grandi i ta yena henter tera,’ indikando ku dor di goberná e tera e Reino Mesiániko lo representá Dios su outoridat supremo.

⁸ Huntu ku Kristu den e gobièrnu di Reino aki tin 144.000 persona mas, “kumprá for di entre hende” pa goberná kuné komo rei i saserdote. (Revelashon 5:9, 10; 14:1-4; 20:6) Daniel ta referí na esakinan komo “e pueblo santu di Dios Haltísimo,” kende, huntu ku Kristu nan Kabes, ta risibí “reinado, outoridat i grandesa riba tur e reinonan na mundu. Reinado di e pueblo lo keda pa semper. I podernan na mundu lo sirbi i obedesé e pueblo.” (Daniel 7:13, 14, 18, 27, BPK) Esei ta e gobièrnu selestial ku Kristu a siña su siguidónan pidi p’e den orashon.

Pakiko Sigui Pidi pa e Reino Bin?

 9. Dikon ta apropiá pa nos pidi pa e Reino di Dios bin?

⁹ Den su orashon modelo, Kristu a siña nos pidi pa e Reino di Dios bin. Kumplimentu di profesianan bíbliko ta indiká ku e Reino Mesiániko a keda establesé den shelu na aña 1914.a Pues, ta apropiá ainda pa nos sigui pidi pa e Reino ei “bin”? Sigur ku sí. Pasobra den e profesia di Daniel, e Reino Mesiániko, simbolisá pa un piedra, ta riba kaminda pa un choke ku gobièrnunan polítiko humano, simbolisá pa un imágen inmenso. E piedra aki ainda tin ku bin dal den e imágen ei ku un gòlpi asina duru ku lo e garn’é hasié stòf. E profesia di Daniel ta bisa: “E reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”—Daniel 2:44.

10. Dikon nos ta anhelá pa e Reino di Dios bin?

¹⁰ Nos ta anhelá pa mira e Reino di Dios bin kontra e sistema di kosnan malbado di Satanas, pasobra esaki lo nifiká santifikashon di Yehova su nòmber santu i eliminashon di tur persona ku ta oponé soberania divino. Ku fervor nos ta resa: “Ku bo reino bin,” i huntu ku apòstel Juan, nos ta bisa: “Amèn. Bin, Señor Hesus.” (Revelashon 22:20) Sí, laga Hesus bin pa santifiká e nòmber di Yehova i vindiká Yehova su soberania, pa asina e palabranan di e salmista por bira un realidat: “Pa nan por sa ku abo so, kende su nòmber ta [Yehova], ta e Haltísimo riba henter tera.”—Salmo 83:18.

“Ku Bo Boluntat Sosodé”

11, 12. (a) Kiko nos ta pidi p’e ora nos resa pa Dios su boluntat “sosodé na tera meskos ku den shelu”? (b) Kiko mas nos orashon pa Yehova su boluntat sosodé ta enserá?

¹¹ Hesus siguientemente a siña su disipelnan pidi: “Ku bo boluntat sosodé na tera meskos ku den shelu.” (Mateo 6:10) Universo a bini na eksistensia debí na e boluntat di Yehova. Kriaturanan selestial poderoso ta grita: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” (Revelashon 4:11) Yehova tin un propósito pa “tantu loke ta den e shelunan komo loke ta riba tera.” (Efesionan 1:8-10) Bon mirá, ora nos ta pidi den orashon pa Dios su boluntat sosodé, nos ta pidi Yehova pa kumpli ku su propósito. Ademas, nos ta mustra di e manera ei ku nos ta anhelá pa e boluntat di Dios kumpli den henter universo.

¹² Mediante e orashon ei nos ta demostrá tambe ku nos ta dispuesto pa armonisá nos bida ku e boluntat di Yehova. Hesus a deklará: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:34) Meskos ku Hesus, nos komo kristiannan dediká ta deleitá den hasi e boluntat di Dios. Nos amor pa Yehova i pa su Yu ta motivá nos pa no hiba nos bida “konforme e pashonnan di hende, sino konforme e boluntat di Dios.” (1 Pedro 4:1, 2; 2 Korintionan 5:14, 15) Nos ta lucha pa nos no hasi e kosnan ku nos sa ta kontrario ku Yehova su boluntat. (1 Tesalonisensenan 4:3-5) Dor di saka tempu pa lesa i studia Beibel, nos ta sigui “komprondé kiko ta e boluntat” di Yehova, ku entre otro ta enserá ku nos mester tin un partisipashon aktivo den predikashon di ‘e bon nobo aki di e reino.’—Efesionan 5:15-17; Mateo 24:14.

Yehova Su Boluntat den Shelu

13. Kon Dios su boluntat tabata sosodé hopi promé ku e rebelion di Satanas a tuma lugá?

¹³ Yehova su boluntat tabata sosodé den shelu hopi promé ku un di su yunan spiritual a rebeldiá i bira Satanas. E buki di Proverbionan ta deskribí Dios su Yu primogénito komo sabiduria personifiká. E ta mustra ku durante un periodo di tempu ku ta muchu largu pa nos konta, Dios su Yu unigénito tabata alegrá òf ‘regosihá semper su dilanti,’ felis di por hasi e boluntat di su Tata. Ku tempu, el a bira Yehova su “trahadó eksperto” ora di krea tur kos “tantu den e shelunan komo riba tera, [kosnan] visibel i invisibel.” (Proverbionan 8:22-31; Kolosensenan 1:15-17) Yehova a usa Hesus komo su Palabra, es desir, su Bosero.—Juan 1:1-3.

14. Kiko nos por siña for di Salmo 103 tokante e manera ku e angelnan ta kumpli ku Yehova su boluntat den shelu?

¹⁴ E salmista ta mustra ku Yehova su soberania ta riba tur kreashon i ku e multitutnan di angel ta skucha su palabranan di instrukshon i su mandamentunan. Nos ta lesa: “SEÑOR a establesé su trono den e shelunan; i su reino ta goberná riba tur kos. Bendishoná SEÑOR, boso, su angelnan, poderoso den fortalesa, ku ta ehekutá su palabra, obedesiendo e bos di su palabra! Bendishoná SEÑOR, boso tur, su ehérsitonan, boso ku ta sirbié i ku ta hasi su boluntat. Bendishoná SEÑOR, boso tur, su obranan, na tur parti di su dominio [òf, soberania].”—Salmo 103:19-22.

15. Kon e echo ku Hesus a risibí poder di Reino a kontribuí ku e boluntat di Dios ta sosodé den shelu?

¹⁵ Despues di Satanas su rebelion, ainda e por a drenta den shelu, manera e buki di Jòb ta indiká. (Jòb 1:6-12; 2:1-7) Sin embargo, e buki di Revelashon a profetisá ku lo yega e ora ku lo saka Satanas i su demoñonan for di shelu. E tempu ei aparentemente a yega poko despues ku Hesukristu a risibí poder di Reino na 1914. Desde e tempu ei, no tabatin lugá mas pa e rebeldenan aki den shelu. Nan ta restringí na e bisindario di tera. (Revelashon 12:7-12) Den shelu no ta tende niun stèm mas ku ta disputá Yehova su soberania, sino solamente stèmnan uní ku ta aklamá “e Lamchi,” Kristu Hesus, i ku ta alabá Yehova den sumishon. (Revelashon 4:9-11) Yehova su boluntat di bèrdat ta kumpliendo den shelu.

Yehova Su Boluntat pa Tera

16. Kon e orashon modelo ta mustra ku loke kristiandat ta siña tokante e speransa di humanidat no ta korekto?

¹⁶ E iglesianan di kristiandat ta ekskluí tera for di e propósito di Dios, ya ku nan ta pretendé ku tur bon hende ta bai shelu. Pero Hesus a siña nos pidi den orashon: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Nos lo por bisa—asta si nos tin hopi imaginashon—ku en general Yehova su boluntat ta sosodé awe riba tera? Un tera plagá pa violensia, inhustisia, malesa i morto? Di ningun manera! P’esei nos mester pidi Dios sinseramente den orashon pa su boluntat sosodé na tera, na armonia ku e promesa ku apòstel Pedro a skirbi: “Ma segun su promesa nos ta sperando shelunan nobo [e gobernashon di e Reino Mesiániko den man di Kristu] i un tera nobo [un sosiedat humano hustu], den kual ta biba hustisia.”—2 Pedro 3:13.

17. Kiko ta Yehova su propósito pa tera?

¹⁷ Yehova tabatin un propósito pakiko el a krea tera. El a inspirá profeta Isaias pa skirbi: “Pasobra, asina SEÑOR, Kende a krea e shelunan, ta bisa (E ta e Dios, Kende a forma tera i a trah’é; El a estables’é, i no a krea esaki pa e keda bashí, ma El a form’é pa e wòrdu habitá): ‘Ami ta SEÑOR, i no tin ningun otro.’” (Isaias 45:18) Dios a pone e promé pareha humano den un hòfi ku tabata un paraiso i a instruí nan: “Sea fruktífero i multipliká, i yena e tera i hasi esaki someté na bo.” (Génesis 1:27, 28; 2:15) Ta masha kla anto ku e propósito di e Kreadó ta pa un rasa perfekto di hende hustu habitá e tera. Hende ku felismente ta someté nan mes na Yehova su soberania i ta biba pa semper den e Paraiso ku Kristu a primintí.—Salmo 37:11, 29; Lukas 23:43.

18, 19. (a) Kiko mester sosodé promé ku Dios su boluntat tuma lugá plenamente riba tera? (b) Ki otro aspektonan di Hesus su orashon modelo nos lo analisá den e siguiente artíkulo?

¹⁸ Yehova su boluntat pa e tera no por sosodé nunka tanten ku e tera ta poblá ku hende hòmber i muhé ku ta resistí su soberania. Dios lo usa ehérsitonan spiritual poderoso bou di e liderato di Kristu pa “destruí esnan ku ta destruí e tera.” Henter e sistema di kosnan malbado di Satanas—ku su religion falsu, polítika korupto, komersio golos i desonesto, i forsanan militar destruktivo—lo ser eliminá pa semper. (Revelashon 11:18; 18:21; 19:1, 2, 11-18) Yehova su soberania lo ta vindiká i su nòmber santifiká. Tur esaki nos ta pidi p’e ora nos resa: “Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.”—Mateo 6:9, 10.

¹⁹ Sin embargo, den su orashon modelo Hesus a mustra ku nos por pidi tokante kosnan personal tambe. Den e siguiente artíkulo nos lo analisá e aspektonan aki di su instrukshon tokante orashon.

[Nota]

Komo Repaso

• Dikon ta na su lugá pa ora nos ta papia ku Yehova nos yam’é “nos Tata”?

• Dikon ta sumamente importante pa nos pidi pa Yehova su nòmber sea santifiká?

• Dikon nos ta pidi pa Dios su Reino bin?

• Kiko nos ta indiká ora nos pidi pa Dios su boluntat sosodé na tera meskos ku den shelu?

[Plachi na página 9]

Hesus su orashonnan tabata hopi distinto for di e orashonnan hipókrita di e fariseonan

[Plachi na página 10]

Kristiannan ta resa pa Dios su Reino bin, pa su nòmber sea santifiká i pa su boluntat sosodé