Con Nos Mester Haci Oracion na Dios?

ORA un disipel a pidi instruccion relacioná cu oracion, Jesus no a nenga di dun’é instruccion. Segun Lucas 11:2-4, Jesus a contestá: “Ora boso ta reza, bisa anto: Tata, bo Nomber sea santificá, Ku bo Reino bini. Duna nos cada dia nos pam di tur dia, i pordoná nos nos picarnan, pasobra nos mes tambe ta pordoná tur hende, ku debe nos algo. I no hinca nos den tentacion.” (Testament Nobo di Nos Senjor Hesu-Cristo católico) Esaki ta generalmente conocí como e Oracion di Nos Tata. E ta transmití un mundu di informacion.

Pa cuminsá, e promé palabra mes ta bisa nos na ken nos mester dirigí nos oracionnan—na nos Tata. Ripará cu Jesus no a laga ningun lugá pa haci oracion na un otro persona, imágen, “santu,” ni sikiera na dje. Sí, Dios a declará: “Lo mi no duna mi gloria na un otro, ni mi alabansa na cosnan tayá.” (Isaías 42:8, Douay Version católico) P’esei, nos Tata celestial no ta tende oracionnan dirigí na cualkier cos of persona cu no ta e mes, sin importá con sincero e adorador por ta. Den Bijbel, solamente Jehova Dios ta ser yamá e “Tendedor di oracion.”—Salmo 65:2.

Algun hende por bisa cu e “santunan” ta actua meramente como intercesor cu Dios. Pero Jesus mes a instruí: “Ami ta e caminda i e berdad i e bida. Ningun hende ta yega n’e Tata sino pa medio di mi. Tambe, cualkier cos cu boso pidi den mi nomber, lo mi haci esaki, p’e Tata ser glorificá en relacion cu e Yu.” (Juan 14:6, 13) Asina Jesus a excluí e idea cu cualkier persona yamá un santu lo por sirbi den e papel di intercesor. Observá tambe loke apostel Pablo a bisa relacioná cu Cristo: “No solamente el a muri pa nos—el a lanta for di morto, i ei na man drechi di Dios e ta para i ta boga pa nos.” “E ta biba pa semper pa intercedé pa tur cu ta acudí na Dios mediante dje.”—Romanonan 8:34; Hebreonan 7:25, Jerusalem Bible católico.

E Nomber cu Tin cu Ser Santificá

E siguiente palabranan di Jesus su oracion tabata: “Bo Nomber sea santificá.” Con bo por santificá, of apartá, e nomber di Dios aménos cu bo a conoc’é i a us’é? Mas cu 6.000 biaha den e “Testament Bieu,” Dios ta ser identificá n’e nomber personal Jehova.

Un nota riba Exodo 6:3 den e Douay Version católico ta bisa relacioná cu e nomber di Dios: “Algun hende moderno a traha e nomber Jehova . . . , pasobra e manera corecto di pronunciá e nomber [di Dios], cua ta den manuscrito hebreo, debí na falta di uso pa hopi tempu, awor ta completamente perdí.” P’esei New Jerusalem Bible católico ta usa e nomber Yahweh. Aunke algun erudito ta preferá e pronunciacion ei, “Jehova” ta un manera legítimo di pronunciá e nomber divino na papiamento i cu ta establecí pa hopi tempu. Otro idiomanan tin nan propio maneranan di pronunciá e nomber divino. E cos principal ta cu nos ta usa e nomber pa asina santifik’é. Bo iglesia a siñá bo usa e nomber di Jehova den oracion?

Temanan Apropiado pa Oracion

Jesus siguientemente a siña su disipelnan pa pidi den oracion: “Ku bo reino bini.” E Evangelio di Mateo ta agregá e palabranan: “Ku bo boluntad socedé tanto den cielo como na tera.” (Mateo 6:10, TN católico) E Reino di Dios ta un gobiernu den man di Jesucristo. (Isaías 9:6, 7) Segun profecia bíblico, pronto lo e kita tur gobiernu humano for di nan puesto i lo introducí un era di pas mundial. (Salmo 72:1-7; Daniel 2:44; Revelacion 21:3-5) P’esei, cristiannan berdadero ta haci e binimentu dje Reino un tema cu cada bes ta bini bek den nan oracionnan. Bo iglesia a siñá bo haci esei?

Interesantemente, Jesus a mustra tambe cu nos oracionnan por incluí asuntunan personal cu ta preocupá nos. El a bisa: “Duna nos cada dia nos pam di tur dia, i pordoná nos nos picarnan, pasobra nos mes tambe ta pordoná tur hende, ku debe nos algo. I no hinca nos den tentacion.” (Lucas 11:3, 4, TN católico) E palabranan di Jesus ta implicá cu nos por busca e boluntad di Dios den asuntunan di tur dia, cu nos por acercá Jehova tocante cualkier cos cu lo por ta wori nos of ta stroba nos pas mental. Pidiendo Dios regularmente den e manera aki ta yuda nos apreciá nos dependencia riba dje. Asina nos ta bira mas conciente di su influencia den nos bida. Pidiendo Dios diariamente pa pordoná nos pa nos ofensanan di igual manera ta probechoso. Dje manera ei nos ta bira mas conciente di nos debilidadnan—i mas tolerante dje faltanan di otro hende. Jesus su exhortacion pa nos pidi den oracion pa ser librá di tentacion tambe ta apropiado, specialmente en bista dje moralidad dje mundu aki cu ta decayendo. Na armonia cu e oracion ei, nos ta soru di evitá circunstancia i situacionnan cu lo por hiba nos na malecho.

No tin duda, anto, cu e Oracion di Nos Tata ta bisa nos hopi tocante hacimentu di oracionnan cu ta agradá Dios. Pero Jesus su intencion tabata pa nos tuma e oracion aki i simplemente recit’é regularmente?

Mas Conseho Tocante Oracion

Jesus a duna mas instruccion tocante oracion. Na Mateo 6:5, 6, nos ta lesa: “Ora boso ta haci oracion, boso no mag ta manera e hipócritanan; pasobra nan ta gusta haci oracion pará den e snoanan i na skina dje camindanan hanchu pa hende mira nan. . . . Sin embargo abo, ora bo ta haci oracion, drenta den bo kamber privá i, despues di cera bo porta, haci oracion na bo Tata cu ta den secreto; anto bo Tata cu ta mira den secreto lo recompensá bo.” E palabranan aki ta siña nos cu no mester haci oracion den un manera di broma of pa show pa asina impresioná un hende. Bo ta drama bo curason na Jehova den privá, manera Bijbel ta insta?—Salmo 62:8.

Jesus a duna e spiertamentu aki: “Y ora bo ta haci oracion, no ripiti semper bai e mes palabanan, manera paganunan, qu ta corda, qu nan lo worde scuchá pa motibu di nan hopi palabanan.” (Mateo 6:7, E Testament Nobo) Claramente, Jesus no a aprobá di siñamentu di oracion for di cabes—ménos ainda di lesa nan for di un of otro buki. Su palabranan ta excluí tambe e uso di rosario.

Un misal católico ta admití lo siguiente: “Kisas nos mihó oracion ta nos propio pensamentunan spontáneo ora nos ta acudí na [Dios] den gratitud of den necesidad, den tempu di tristesa, of den nos adoracion diario i regular di dje.” Jesus su propio oracionnan tabata spontáneo, no siñá for di cabes. Por ehempel, lesa e oracion di Jesus skirbí na Juan capítulo 17. E ta pega n’e oracion modelo, enfatisando Jesus su deseo pa mira e nomber di Jehova ser santificá. Jesus su oracion tabata spontáneo i di e profundidad di su curason.

Oracionnan cu Dios Ta Tende

Si nan a siñá bo haci oracionnan siñá for di cabes, pa resa na “santunan” of na imágennan, of pa usa artículonan religioso, manera e rosario, e idea di haci oracion n’e manera cu Jesus a describí, na promé instante, por hinca miedu den bo. Sin embargo, e clave pa haci esei ta di conocé Dios—su nomber, su propósitonan, su personalidad. Bo por logra esaki mediante un studio cabal dje Bijbel. (Juan 17:3) Testigonan di Jehova ta cla i dispuesto pa yudá bo relacioná cu esaki. Sí, nan a yuda miyones di hende rond mundu pa “purba i mira cu Jehova ta bon”! (Salmo 34:8) Mas bo yega na conocé Dios, mas lo bo ser impulsá pa alab’é den oracion. I mas bo hala cerca Jehova den oracion reverencial, mas íntimo bo relacion cuné lo bira.

P’esei, nos ta insta tur adorador berdadero di Dios pa “haci oracion incesantemente.” (1 Tesalonicensenan 5:17) Haci sigur cu bo oracionnan ta berdaderamente na armonia cu Bijbel, incluyendo e instruccionnan di Jesucristo. Den e manera aki bo por ta sigur cu bo oracionnan lo tin e aprobacion di Dios.

[Plachi na página 7]

Mas nos siña tocante Jehova, mas nos ta ser impulsá pa haci oracion na dje di curason