“Kore . . . pa Boso Por Gana”

“Kore di tal manera anto pa boso por gana.”​—1 KOR. 9:24.

1, 2. (a) Kiko Pablo a usa pa animá e kristiannan hebreo? (b) Sirbidónan di Dios a ser konsehá pa hasi kiko?

DEN e karta na e hebreonan, apòstel Pablo a usa e ilustrashon di un kareda pa animá su rumannan kristian. El a rekordá nan ku no ta nan so tabata kore den e kareda pa bida. Nan tabata rondoná pa un ‘nubia grandi di testigu,’ kendenan a terminá e kareda ku éksito. Si e kristiannan hebreo a tene bon kla na mente e echonan di fe i e esfuerso vigoroso di e fiel koredónan di pasado akí, nan lo a haña e motivashon pa sigui padilanti i no stòp di kore e kareda.

² Den e artíkulo anterior, nos a konsiderá e kurso di bida di vários persona di e ‘nubia di testigu’ akí. Nan tur a demostrá ku ta fe firme a yuda nan keda fiel na Dios komo si fuera nan tabata perseverá den un kareda pa yega final. Nos por siña un lès for di e éksito ku nan tabatin. Manera e artíkulo anterior a menshoná, Pablo a duna e siguiente konseho na su rumannan den fe, inkluso nos: “Laga nos tambe pone un banda tur strobashon [òf, “peso,” BPK], i e piká ku ta mara nos asina fásil, i ku perseveransia laga nos kore e kareda ku ta poní nos dilanti.”​—Heb. 12:1.

 3. Kiko tabata e punto di Pablo su konseho ora el a referí na e koredónan den e weganan griego?

³ Korementu tabata un di e eventonan atlétiko popular den tempu di Pablo. E buki Backgrounds of Early Christianity (Background di Kristianismo di Promé) ta bisa ku “e griegonan tabata train i kompetí blo sunú.”a Den tal kaso, e koredónan tabata kita tur karga òf peso ku no tabata nesesario i ku por a pone nan kore mas pokopoko. Aunke nos awe lo no a haña esei korekto, nan tabata kore asina ku e solo meta di gana e premio. Pablo su punto tabata ku pa gana e premio den e kareda pa bida ta masha importante pa e koredónan kita tur loke por stroba nan. Esaki tabata bon konseho pa e kristiannan di e tempu ei, i e ta bon konseho pa nos tambe awe. Kiko ta algun peso òf karga ku lo por stroba nos di gana e premio den e kareda pa bida?

“Pone un Banda Tur Strobashon”

 4. Ku kiko e hendenan den tempu di Noe tabata preokupá?

⁴ Pablo a konsehá pa “pone un banda tur strobashon.” Esei ta inkluí tur loke por stroba nos di duna pleno atenshon na e kareda ku nos ta den i di hasi nos bèst pa termin’é. Kiko ta algun di e kosnan ku por ta un strobashon òf peso? Si nos konsiderá Noe—un di e ehèmpelnan ku Pablo a sita—nos ta kòrda ku Hesus a bisa ku “meskos ku a sosodé den e dianan di Noe, asina lo ta tambe den e dianan di e Yu di hende.” (Luk. 17:26) Hesus no tabata papia di e destrukshon sin presedente ku lo tuma lugá; e tabata referí prinsipalmente na e manera di biba di e hendenan. (Lesa Mateo 24:​37-39.) Mayoria di hende den tempu di Noe no tabata interesá mes den Dios, te pa nan a hasi esfuerso pa agrad’é. Kiko a kita nan atenshon? Nada ekstraordinario. Kosnan normal di bida: kome, bebe i kasa. E berdadero problema tabata, manera Hesus a bisa, ku nan “no a komprondé,” òf mihó bisá “no a hasi kaso [NW].”

 5. Kiko por yuda nos terminá e kareda ku éksito?

⁵ Meskos ku Noe i su famia, nos tin hopi di hasi tur dia. Nos tin ku gana nos pan di kada dia, i nos tin ku kuida nos mes i nos famia. Esei por tuma gran parti di nos tempu, energia i rekursonan. Anto foral ora nos ta konfrontá difikultatnan ekonómiko ta fásil pa nos bira masha preokupá tokante e nesesidatnan di bida. Ademas, komo kristiannan dediká, nos tin responsabilidatnan teokrátiko importante. Nos ta prediká, prepará pa reunionnan kristian i asistí na nan, i nos ta mantené nos mes spiritualmente fuerte pa medio di estudio personal i di famia. Apesar di tur e kosnan ku Noe tabatin di hasi pa sirbi Dios, el a hasi “konforme tur loke Dios a orden’é.” (Gén. 6:22) Un kos ta sigur, pa nos por kore e kareda kristian te na final, ta masha importante pa nos tin ménos peso posibel pa karga i tambe pa nos evitá di tuma kualke karga ku ta innesesario.

6, 7. Kua konseho di Hesus nos mester tene na mente?

⁶ Kiko Pablo tabata ke men ora el a bisa “pone un banda tur strobashon”? Klaru ku nos no por libra nos mes kompletamente di tur responsabilidat ku nos tin. En konekshon ku esaki, kòrda riba loke Hesus a bisa: “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan akí e paganonan ta buska; ma boso Tata selestial sa ku boso tin mester di tur e kosnan akí.” (Mat. 6:​31, 32) E palabranan di Hesus ta indiká ku asta kosnan supuestamente normal, manera kuminda i paña, por bira un karga òf un piedra ku ta pone nos trompeká si nos no tene nan na nan debido lugá.

⁷ Tuma nota di loke Hesus a bisa: “Boso Tata selestial sa ku boso tin mester di tur e kosnan akí.” Esaki ta laga nos komprondé ku nos Tata selestial, Yehova, lo hasi su parti pa perkurá pa nos nesesidatnan. Klaru ku e echo ku nos lo tin “tur e kosnan akí” no ta nifiká ku nos lo tin tur loke nos tin gana di dje. Tòg Hesus a bisa nos pa no preokupá pa ‘e kosnan ku e paganonan ta buska.’ Dikon? Pasobra mas despues Hesus a konsehá su oyentenan: “Tene kuidou pa boso kurason no ta kargá pa kousa di paranda i buracheria [òf, “komementu di mas i bebementu di mas,” NW] i e preokupashonnan di bida, i e dia ei no bini diripiente riba boso manera un trampa.”​—Luk. 21:​34, 35.

 8. Dikon ta awor ta tempu pa “pone un banda tur strobashon”?

⁸ Nos ta den e rekta final. Lo ta un lástima si nos permití nos mes ser kargá ku pesonan innesesario ku lo por stroba nos nèt awor ku nos ta asina serka di e fin! P’esei, e siguiente konseho di apòstel Pablo ta hopi bon: “Sirbi Dios ta duna hopi benefisio, basta bo ta satisfecho ku loke bo tin.” (1 Tim. 6:6, BPK) Si nos tuma e palabranan di Pablo na pechu, nos lo tin mas chèns di gana e premio.

“E Piká Ku Ta Mara Nos Asina Fásil”

9, 10. (a) Na kiko e ekspreshon “e piká ku ta mara nos asina fásil” ta referí? (b) Kon nos paña, na moda di papia, por mara òf bruha den nos pianan?

⁹ Fuera di “tur strobashon” òf peso, Pablo ta menshoná tambe pa pone un banda “e piká ku ta mara nos asina fásil.” Kiko esei lo por ta? Esei ta falta di fe. E palabra griego tradusí komo ‘mara asina fásil’ ta aparesé un biaha so den Beibel, den e versíkulo akí. E komentarista bíbliko Albert Barnes a remarká: “Meskos ku un koredó lo tene kuidou pa e no tin paña bistí ku sigur lo lora rònt di su pianan i strob’é di kore, asina mester ta e kaso tambe ku e kristian, kende mester sòru pa pone tur kos un banda ku lo por ta manera e paña ei.” Na moda di papia, un kristian no mester laga nada mara òf bruha den su pianan, es desir, debilitá su fe òf asta pon’é pèrdè su fe. Kon un kristian ta pèrdè su fe?

¹⁰ Un kristian no ta pèrdè su fe di un dia pa otro. Esei lo por tuma lugá gradualmente, asta sin ku e ta ripará. Pablo a spièrta mas promé den su karta pa e peliger ku nos por drif bai i asina “apartá” for di e Dios bibu i pa e peliger ku nos por desaroyá “un kurason malbado i inkrédulo.” (Heb. 2:1; 3:12) Ora un koredó su paña mara òf bruha den su pianan, kasi semper e ta kai. E riesgo di trompeká i kai ta mas grandi ainda si e koredó no a hasi kaso di un hende ku a spièrt’é pa e peliger di bisti sierto pañanan ora e ta kore. Kiko lo por pone ku e no ta hasi kaso di e peliger? Kisas e ta negligente i no ta hasi kaso ora spièrt’é, òf e tin demasiado konfiansa den su mes òf e ta asina okupá ku e no ta presta atenshon. Ki lès nos por saka for di e konseho di Pablo?

11. Kiko lo por pone nos pèrdè nos fe?

¹¹ Nos tin ku kòrda ku si un kristian pèrdè su fe, esei ta e resultado final di loke el a bin ta hasi atraves di tempu. Relashoná ku “e piká ku ta mara nos asina fásil,” un otro komentarista bíbliko a remarká ku esei ta “e piká ku tin mas bentaha kontra nos, pa medio di e sirkunstansianan ku nos ta den, nos kurpa físiko, nos kompania.” E idea ta ku nos ambiente, nos debilidatnan personal i e hendenan ku nos ta asosiá kuné tur por tin un influensia masha grandi riba nos. Nan por debilitá nos fe òf asta pone nos pèrdè nos fe.​—Mat. 13:​3-9.

12. Ki rekordatorionan nos mester tuma na pechu si nos no ke pèrdè nos fe?

¹² Atraves di añanan, e esklabo fiel i prudente a bin ta rekordá nos pa tene kuidou ku loke nos ta wak i skucha, es desir, e kosnan ku nos ta fiha nos kurason i nos mente riba dje. Nos a haña spièrtamentu tokante e peliger di enbolbé nos mes den korementu tras di plaka i kos material. Podisé e mundu di entretenimentu i e avalancha di artefaktonan nobo riba merkado ta atraé nos mashá i por pone nos desviá. Lo ta un eror grave pa pensa ku tal konseho ta demasiado estrikto òf ku e ta apliká pa otro hende so, miéntras ku e peligernan ei di un manera òf otro lo no afektá nos. E trampanan ku e mundu di Satanas ta pone den nos kaminda pa mara òf bruha den nos pianan ta sutil i engañoso. Algun ruman a pèrdè nan fe pasobra nan tabata negligente i no a hasi kaso di spièrtamentu, òf nan tabatin demasiado konfiansa den nan mes òf nan tabata asina okupá ku nan no a presta atenshon. Si esei pasa ku nos, nos lo por pèrdè e premio di bida.​—1 Juan 2:​15-17.

13. Kon nos por protehá nos mes kontra influensianan perhudisial?

¹³ Dia aden dia afó, nos ta keda eksponé na hende ku ta promové e metanan, norma- i balornan i manera di pensa di e mundu. (Lesa Efesionan 2:​1 i 2.) Sinembargo, ta dependé prinsipalmente di nos te na ki grado nos ta laga e kosnan ei afektá nos i kon nos ta reakshoná riba e influensianan akí. E aire di e “prens di laira” ku Pablo a papia di dje ta mortal. Nos mester ta konstantemente alerta pa e ‘aire’ ei no stek nos i asina stroba nos di terminá e kareda. Kiko por yuda nos perseverá den e kareda? Hesus ta e koredó perfekto ku, na moda di papia, ta bai nos dilanti den e kareda. (Heb. 12:2) Tambe nos tin e ehèmpel di Pablo mes, pasobra el a konta su mes entre e koredónan den e kareda kristian i a urgi e rumannan den fe pa imit’é.​—1 Kor. 11:1; Fil. 3:14.

Kon Bo “Por Gana” e Premio?

14. Kon Pablo a konsiderá su partisipashon den e kareda?

¹⁴ Kon Pablo a konsiderá su partisipashon den e kareda? Den su último diskurso na e ansianonan di Efeso, el a bisa: “Mi no ta konsiderá mi bida di ningun balor, ni komo algu presioso pa mi mes, kontal ku mi por terminá e kurso di mi bida i e ministerio ku mi a risibí di Señor Hesus.” (Echo. 20:24) E tabata dispuesto pa sakrifiká tur kos, inkluso su bida, afin di terminá e kareda. Pa Pablo, tur su esfuerso i trabou duru en konekshon ku e bon notisia lo no a bal nada si e no a terminá e kareda. Sinembargo, e no tabatin un konfiansa eksagerá, pensando ku sin duda lo e gana e kareda. (Lesa Filipensenan 3:​12-14.) Ta kasi na final di su bida numa el a bisa ku un sierto grado di konfiansa: “Mi a lucha e bon lucha, mi a terminá e kareda, mi a warda e fe.”​—2 Tim. 4:7.

15. Kiko Pablo a animá su kompañeronan di kareda pa hasi?

¹⁵ Ademas, Pablo tabatin masha gana di mira su kompañeronan kristian tambe terminá e kareda i no kai afó na kaminda. Por ehèmpel, el a urgi e kristiannan na Filipos pa traha duru pa alkansá nan salbashon. Nan mester a ‘tene duru na e palabra di bida.’ El a sigui bisa: “Pa den e dia di Kristu mi por tin motibu pa gloria, pasobra mi no a kore en bano, ni a traha en bano.” (Fil. 2:16) Asina tambe el a urgi e kristiannan na Korinto: “Kore di tal manera anto pa boso por gana [e premio].”​—1 Kor. 9:24.

16. Dikon e meta, òf premio, mester ta real pa nos?

¹⁶ Den un kareda largu, manera por ehèmpel un máratòn, e koredó na promé instante no ta mira e liña final. Pero tòg durante henter e kareda e ta keda pensa riba e final. Anto ora e sa ku e meta final ta serka, e ta bira mas determiná ainda. Asina mester ta den nos kareda. E meta, òf premio, mester ta real pa nos. Esei lo yuda nos pa ta determiná pa alkans’é.

17. Kon fe ta yuda hende keda ku nan bista fihá riba e premio?

¹⁷ Pablo a skirbi: “Fe ta e siguransa di kosnan ku hende ta spera, e konvikshon di kosnan ku hende no ta mira.” (Heb. 11:1) Abraham ku Sara tabata dispuesto pa bai laga un bida kómodo atras i biba komo “stranhero i eksiliado riba tera.” Kiko a yuda nan hasi esei? “For di un distansia” nan a “mira” e promesanan di Dios kumpli. Moisés a rechasá “e plasernan pasahero di piká” i “e tesoronan di Egipto.” Kiko a dun’é e fe i fortalesa pa hasi esei? “E tabatin su bista riba e rekompensa.” (Heb. 11:​8-13, 24-26) Ta di komprondé dikon Pablo a introdusí e deskripshon di kada un di e personanan akí ku e ekspreshon “pa medio di fe.” Ta nan fe a hasi posibel ku nan por a wak mas leu ku e prueba- i difikultatnan ku nan tabata konfrontá i mira kiko Dios tabata hasiendo pa nan i lo a hasi pa nan den futuro.

18. Ki pasonan nos por dal pa pone “e piká ku ta mara nos asina fásil” un banda?

¹⁸ Ta bon pa nos meditá riba e hòmber- i muhénan ku tabatin berdadero fe, menshoná den Hebreonan kapítulo 11, i imitá nan ehèmpel. Ora nos hasi esei, nos por kultivá fe i pone “e piká ku ta mara nos asina fásil” un banda. (Heb. 12:1) Ademas, nos por “konsiderá kon pa stimulá otro pa stima i hasi bon obra” dor di reuní huntu ku hende ku ta kultivá e mesun fe ei.​—Heb. 10:24.

19. Dikon ta importante pa keda ku bista fihá riba e premio?

¹⁹ Nos ta den e rekta final di nos kareda. Kasi nos por mira e liña final. Pa medio di fe i ku yudansa di Yehova, nos tambe por “pone un banda tur strobashon, i e piká ku ta mara nos asina fásil.” Sí, nos por kore di tal manera ku nos por gana e premio, esta, e bendishonnan ku Yehova, nos Dios i Tata, a primintí.

[Nota]

Bo Ta Kòrda?

• Pone “tur strobashon” un banda ta enserá kiko?

• Kiko lo por pone un kristian pèrdè fe?

• Dikon nos mester keda ku nos bista fihá riba e premio?

[Plachi na página 26]

Kiko ta “e piká ku ta mara nos asina fásil,” i kon e por mara òf bruha den nos pianan?