Hasi Bon, òf Djis No Hasi Malu, ku Otro Hende?

“LOKE bo no ke pa hende hasi ku bo, no hasi ku nan,” segun e dicho di e famoso maestro i filósofo chines, Confucio. Awe, un 2.500 aña despues, ainda hopi hende ta kere ku dor di simplemente no hasi malu ku otro hende nan ta kumpli ku nan deber moral.

Sin duda e regla di komportashon aki di Confucio tin su méritonan. Pero di otro banda, Beibel ta revelá un otro dimenshon di komportashon i interakshon humano. Ademas di kometé piká dor di hasi malu ku bo próhimo, Beibel ta papia tambe di e piká di keda sin hasi loke ta bon p’e. E disipel kristian Santiago a skirbi: “Esun ku sa di hasi loke ta bon, i no ta hasié, p’e esaki ta piká.” (Santiago 4:17) En bes di simplemente instruí kristiannan pa no hasi malu ku otro hende, Hesukristu a duna e konseho aki: “Tur loke boso kier pa hende hasi pa boso, hasi meskos pa nan.”—Mateo 7:12.

E propósito original di Dios tabata pa tur hende trata otro manera nan ke wòrdu tratá. Den e manera ku el a krea hende, el a pone e ehèmpel di mas sublime den ekspresá interes p’e bienestar di otro hende: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” (Génesis 1:27) Esaki ta nifiká ku den su gran amor Dios a dota hende ku un konsenshi ku, ora e ser entrená korektamente, ta gui’é p’e trata otro hende den e manera ku e ke wòrdu tratá.

Awe hopi hende ta sufri desesperadamente—i sin speransa pa haña alivio—na man di personanan egoista i sin konsiderashon. Klaramente, loke ta nesesario no ta djis apstené di hasi loke ta malu i perhudisial ku otro hende, sino, mas bien, hasi loke ta bon i útil pa nan. P’e motibu aki, Testigunan di Yehova, di nan propio boluntat ta tuma akshon positivo pa yuda otro hende siña di e speransa maravioso hañá den e Palabra di Dios. Ora nan yama na kas di nan próhimo ku e bon nobo di Beibel, nan ta hasi esei ku un spiritu di amor, hasiendo ku otro hende loke nan ke pa otro hende hasi ku nan.