“Keda Sigui Mi”

1-3. (a) Den ki manera Hesus a bai laga su apòstelnan, i dikon esaki no tabata un despedida tristu? (b) Dikon nos tin ku siña tokante e bida ku Hesus a hiba desde ku el a regresá na shelu?

DIESUN hòmber tabata pará huntu riba un seru. Ku gran amor i atmirashon nan tabata mira e di 12 persona. E tabata den kurpa humano, pero de echo tabata Hesus resusitá, kende a bolbe bira e yu spiritual di mas poderoso di Yehova. Tabata pa delaster biaha ku Hesus a reuní ku su apòstelnan riba Seru di Oleifi.

² E seru aki siguramente a trese hopi rekuerdo pa Hesus. E ta forma parti di un kareda di seru di kalki enfrente di Yerusalèm na otro banda di Roi Kedron. Ta na barika di e serunan aki e pueblo di Betania tabata keda, kaminda Hesus a resusitá Lázaro. Apénas algun siman promé, Hesus a sali for di Bètfage ku a keda djis ei banda pa hasi su entrada triunfal den Yerusalèm. Probablemente e hòfi di Getsemané, kaminda Hesus a pasa e oranan di agonia promé ku su aresto, tambe tabata situá na Seru di Oleifi. Anto awor riba e mesun seru aki Hesus a prepará pa bai laga su amigu- i siguidónan di mas íntimo atras. Su palabranan di despedida tabata hopi bondadoso. Anto diripiente el a kuminsá subi bai shelu! E apòstelnan a keda pará, tur babuká, ta mira nan Shon stimá ta subi bai laira. Finalmente, un nubia a kit’é for di nan bista i nan no a mir’é mas.—Echonan 1:6-12.

³ E esena aki ta laga bo pensa riba un despedida tristu, di sintimentunan miksto? Wèl, e no tabata asina. De echo, manera dos angel a rekordá e apòstelnan, Hesus su historia definitivamente no a kaba. (Echonan 1:10, 11) Den hopi sentido, su subida pa shelu tabata apénas e komienso. E Palabra di Dios no ta laga nos den skuridat tokante kiko a sigui pasa ku Hesus. Ta importante pa haña sa di e bida ku Hesus a hiba for di dia ku el a bai for di tera. Pakiko? Kòrda e palabranan ku Hesus a papia ku Pedro: “Keda sigui mi.” (Juan 21:19, 22, NW) Nos tur tin ku obedesé e mandamentu ei, no simplemente komo un eskoho temporal sino komo nos estilo di bida. Pa por hasi esei, nos tin ku komprondé kiko nos Shon ta hasiendo awor i ki asignashonnan el a haña den shelu.

 4. Kon Beibel a revelá di antemano kiko lo a pasa den shelu despues ku Hesus lo a bolbe einan?

⁴ E Skritura no ta bisa nada tokante Hesus su yegada den shelu, ki bonbiní el a haña ni di su reenkuentro gososo ku su Tata. Sin embargo, Beibel a revelá sí di antemano kiko lo a pasa den shelu asina ku Hesus lo a bolbe bèk einan. Ta asina ku pa 15 siglo largu, e pueblo hudiu regularmente tabata testigu di un seremonia sagrado. Un biaha pa aña, e sumo saserdote a drenta den e Santísimo di e tèmpel pa spat e sanger di e sakrifisionan di Dia di Ekspiashon dilanti di e arka di aliansa. Riba e dia ei, e sumo saserdote a prefigurá e Mesias. Despues ku Hesus a bolbe na shelu el a kumpli ku e nifikashon profétiko di e seremonia ei un biaha pa semper. El a drenta den shelu den e presensia mahestuoso di Yehova—e lugá di mas santu den universo—i a presentá na su Tata e balor di su sakrifisio di reskate. (Hebreonan 9:11, 12, 24) Yehova a asept’é?

5, 6. (a) Kiko tabata e evidensia ku Yehova a aseptá Kristu su sakrifisio di reskate? (b) Ken ta benefisiá di e reskate, i kon?

⁵ Nos ta haña e kontesta ora nos konsiderá kiko a pasa poko despues ku Hesus a subi na shelu. Un grupo chikitu di mas o ménos 120 kristian tabata huntu den un sala ariba na Yerusalèm ora ku diripiente un zonidu manera un bientu violento i fuerte a yena e lugá. Loke a parse lenga di kandela a bai para riba nan kabes, nan a yena ku spiritu santu i a kuminsá papia den vários lenga. (Echonan 2:1-4) E suseso aki a nifiká e nasementu di un nashon nobo, Israel spiritual, ku tabata Dios su “rasa skohí” i “saserdosio real” nobo, apuntá pa kumpli ku Dios su boluntat riba tera. (1 Pedro 2:9) Pues, tabata bisto ku Yehova Dios a aseptá i a aprobá e sakrifisio di reskate di Kristu. Dramamentu di spiritu santu tabata un di e promé bendishonnan ku e reskate a hasi posibel.

⁶ Di e tempu ei en adelante, e reskate di Kristu a benefisiá su siguidónan rònt mundu. Sea ku nos ta parti di e “tou chikitu” di kristian ungí, ku lo goberná ku Kristu den shelu, òf parti di e “otro karnénan,” ku lo biba bou di su gobernashon riba tera, nos ta benefisiá di su sakrifisio. (Lukas 12:32; Juan 10:16) E sakrifisio ei ta e base pa nos speransa i pa nos haña pordon pa nos pikánan. Tanten ku nos ta sigui “kere” òf ehersé fe den e reskate ei, siguiendo Hesus dia tras dia, nos por tin un konsenshi limpi i un speransa briante pa futuro.—Juan 3:16.

 7. Ki outoridat Hesus a haña despues ku el a bolbe na shelu, i kon abo por apoy’é?

⁷ Kiko Hesus ta hasiendo den shelu desde ku el a bolbe einan? E tin gran outoridat. (Mateo 28:18) Sí, Yehova a apunt’é pa goberná riba e kongregashon kristian, un asignashon ku el a kumpli kuné na un manera amoroso i hustu. (Kolosensenan 1:13) Manera Beibel a profetisá, Hesus a perkurá hòmbernan responsabel pa atendé e nesesidatnan di su tou. (Efesionan 4:8) Por ehèmpel, el a skohe Pablo p’e ta un “apòstel di e paganonan,” i a mand’é bai plama e bon nobo na paisnan leu. (Romanonan 11:13; 1 Timoteo 2:7) Kasi na final di promé siglo, Hesus a manda mensahenan di elogio, konseho i korekshon na shete kongregashon den e provinsia romano di Asia. (Revelashon, kapítulo 2-3) Abo ta rekonosé Hesus komo Kabes di e kongregashon kristian? (Efesionan 5:23) Pa bo por keda siguié, lo bo mester fomentá un spiritu di obedensia i koperashon den bo kongregashon lokal.

8, 9. Ki outoridat Hesus a haña na 1914, i kiko esei lo mester nifiká pa nos den e desishonnan ku nos ta tuma?

⁸ Hesus a haña mas outoridat ainda na aña 1914. E aña ei el a keda nombrá komo Rei di Yehova su Reino Mesiániko. Ora ku e gobernashon di Hesus a kuminsá “tabatin guera den shelu.” Ku ki resultado? Satanas ku su demoñonan a ser tirá abou riba tera, lokual a inisiá un era di “ai.” E gueranan, kriminalidat, teror, malesa, temblor i hamber ku ta reina i ku ta afligí hende den nos tempu ta rekordá nos ku Hesus ta gobernando aktualmente den shelu. Satanas ainda ta “e prens di e mundu aki” pa “un poko tempu mas.” (Revelashon 12:7-12; Juan 12:31; Mateo 24:3-7; Lukas 21:11) Sin embargo, Hesus ta dunando hende na tur parti di mundu e oportunidat pa aseptá su gobernashon.

⁹ Ta di sumo importansia pa nos tuma nos posishon na banda di e Rei Mesiániko. Den tur nos desishonnan diario, nos tin ku buska su aprobashon, no aprobashon di e mundu degradá aki. Segun ku e “Rei di Reinan i Señor di Señornan” aki ta inspekshoná humanidat, su kurason hustu ta kima di rabia i ta abundá ku goso. (Revelashon 19:16) Dikon?

10. Ki karakter Hesus tin di naturalesa, sin embargo ta kiko ta yena nos Shon ku rabia hustu?

¹⁰ Nos Shon, meskos ku su Tata, ta felis di naturalesa. (1 Timoteo 1:11, NW) Komo hende, Hesus no tabata ni krítiko ni eksigente. Sin embargo, tin hopi kos ta pasando riba tera awe ku lo mester ta yen’é ku rabia hustu. Definitivamente e ta rabiá ku tur e organisashonnan religioso ku falsamente ta pretendé di ta represent’é. El a profetisá esei: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu. Hopi lo bisa mi den e dia ei: ‘Señor, Señor, nos no a hasi hopi milager den bo nòmber?’ E ora ei lo mi deklará na nan: ‘Nunka mi no a konosé boso; bai for di mi, boso ku ta hasi inikidat.’”—Mateo 7:21-23.

11-13. Dikon algun hende kisas ta keda strañá pa e palabranan ku Hesus ta dirigí na esnan ku ta hasi “hopi milager” den su nòmber, sin embargo dikon e ta rabiá? Ilustrá esei.

¹¹ Hopi hende awe ku ta yama nan mes kristian lo por haña e palabranan ei straño. Pakiko Hesus lo dirigí palabranan fuerte asina na hende ku a hasi “hopi milager” den su nòmber? E iglesianan di kristiandat a spònser obranan di karidat, a yuda pober, traha hospital i skol, i a hasi hopi otro obra mas. Pa komprondé dikon nan ta meresé Hesus su rabia, konsiderá e siguiente ilustrashon.

¹² Un tata ku mama tin ku bai di biahe. Nan no por bai ku e muchanan, pues nan ta kontratá un baby-sitter. E instrukshon ku nan ta dun’é ta simpel: “Kuida e muchanan. Duna nan kuminda, sòru pa nan ta limpi i wak pa nada no pasa ku nan.” Pero ora e mayornan bolbe kas, nan ta keda di shòk pa mira nan yunan tur hambrá. E muchanan ta tur sushi, enfermo i infelis. Nan ta yorando pa haña atenshon di e baby-sitter, pero e no ta hasi kaso di nan. Dikon? Pasobra e ta riba trapi ta laba bentana. Rabiá, e mayornan ta eksigí un splikashon. E baby-sitter ta kontestá: “Wak tur loke mi a hasi! E bentananan no ta limpi? Mi a drecha kos na kurpa di kas tambe, i tur esei pa boso!” Esaki lo laga e mayornan sinti nan mihó? Nò! Niun ora so nan no a pidié hasi e tareanan ei; úniko kos ku nan tabata ke ta p’e kuida e muchanan. E echo ku e no a kumpli ku nan instrukshon ta hasi nan furioso.

¹³ Kristiandat a aktua meskos ku e baby-sitter ei. Hesus a laga instrukshon serka su representantenan pa nan alimentá e hendenan spiritualmente dor di siña nan e bèrdat di e Palabra di Dios i yuda nan keda spiritualmente limpi. (Juan 21:15-17) Sin embargo, kristiandat a faya barbaramente i no a obedesé su instrukshon. Kristiandat a laga e hendenan spiritualmente hambrá, konfundí pa falsedat i ignorante di e bèrdatnan fundamental di Beibel. (Isaias 65:13; Amos 8:11) Asta su intentonan pa drecha e mundu aki no por hustifiká su desobedensia deliberá. De echo, e sistema mundial aki ta manera un kas ku a keda destiná pa basha abou! E Palabra di Dios ta mustra bon kla ku pronto e sistema mundial di Satanas lo ser destruí.—1 Juan 2:15-17.

14. Ki trabou ta hasi Hesus kontentu awe, i dikon?

¹⁴ Di otro banda, Hesus lo mester ta hopi kontentu ora e wak abou for di shelu i mira miónes di hende ta kumpli ku e enkargo di hasi disipel ku el a duna su siguidónan promé ku el a bai for di tera. (Mateo 28:19, 20) Ta un gran privilegio di por kontribuí na e goso di e Rei Mesiániko! Laga nos ta determiná pa nunka stòp di yuda “e esklabo fiel i prudente.” (Mateo 24:45) Distinto for di klero di kristiandat, e grupo chikitu aki di ruman ungí obedientemente a hiba delantera den e trabou di prediká i fielmente a alimentá e karnénan di Kristu.

15, 16. (a) Kiko Hesus ta pensa di e falta di amor ku ta reina awe, i kon nos por sa esei? (b) Kon bin kristiandat meresé e rabia di Hesus?

¹⁵ Nos por tin sigur ku e Rei ta rabiá ora e ta mira e falta di amor ku ta reina riba tera awe. Kisas nos ta kòrda kon e fariseonan a kritiká Hesus pasobra el a kura hende riba sabat. Nan kurason tabata asina duru, nan tabata asina terko, ku nan no por a mira mas ayá di nan propio interpretashon di e Lei di Moisés i di e lei oral. E milagernan di Hesus a trese masha hopi benefisio mes pa hende! Pero e goso, e alivio, e fe mas fuerte ku e milagernan ei a produsí no a nifiká nada pa e fariseonan. Kiko Hesus a pensa di e hòmbernan ei? Un biaha el “a wak nan tur ku kara rabiá, tristu pa motibu di e duresa di nan kurason.”—Marko 3:5.

¹⁶ Awe, Hesus ta mira hopi mas tantu kos ku ta lag’é sinti su mes masha “tristu.” E lidernan di kristiandat ta siegá pa nan deboshon na tradishon- i doktrinanan ku no ta na armonia ku e Skritura. Ademas, e predikashon di e bon nobo di e Reino di Dios ta hasi nan furioso. Den hopi parti di mundu, klero a instigá persekushon kruel kontra e kristiannan ku sinseramente ta purba prediká e mensahe ku Hesus a prediká. (Juan 16:2; Revelashon 18:4, 24) Na mesun tempu, e miembronan ei di klero hopi biaha ta animá nan propio siguidónan pa bai guera i kita bida di otro hende, komo si fuera esei lo agradá Hesukristu!

17. Kon e berdadero siguidónan di Hesus ta hasi su kurason kontentu?

¹⁷ Na kontraste, e berdadero siguidónan di Hesus ta hasi esfuerso pa mustra amor na nan próhimo. Nan ta prediká e bon nobo na “tur klase di hende,” manera Hesus a hasi, apesar di oposishon. (1 Timoteo 2:4, NW) Anto e amor ku nan ta mustra na otro ta sobresaliente; esei ta e marka prinsipal ku ta identifiká nan. (Juan 13:34, 35) Segun ku nan ta trata nan rumannan kristian ku amor, rèspèt i dignidat, nan realmente ta siguiendo Hesus, i ta hasi e kurason di e Rei Mesiániko kontentu!

18. Kiko ta hasi nos Shon masha tristu, sin embargo kon nos por agrad’é?

¹⁸ Nos tin ku kòrda tambe ku nos Shon ta sinti su mes masha tristu ora su siguidónan keda sin perseverá i ta laga nan amor pa Yehova fria i ta stòp di sirbié. (Revelashon 2:4, 5) Sin embargo, Hesus ta keda kontentu ku esnan ku ta perseverá te na fin. (Mateo 24:13) Pues riba tur kos, laga nos kòrda semper riba e mandamentu aki di Kristu: “Keda sigui mi.” (Juan 21:19, NW) Ban konsiderá algun di e bendishonnan ku e Rei Mesiániko lo drama riba esnan ku perseverá te na fin.

19, 20. (a) Sigui Hesus ta hiba na ki bendishon for di awor? (b) Kon e echo ku nos ta sigui Kristu por yuda nos satisfasé nos nesesidat di tin un tata?

¹⁹ Sigui Hesus ta e kaminda pa un bida hopi bendishoná for di awor. Si nos aseptá Kristu komo nos Shon, siguiendo su instrukshon i usando su ehèmpel komo nos guia, nos lo haña tesoronan ku hende rònt parti di mundu ta buskando sin por haña. Nos lo ser bendishoná ku trabou ku ta duna nos bida propósito, un famia di rumannan den fe uní den un berdadero laso di amor, un konsenshi limpi i pas mental. Den poko palabra, nos lo haña un bida felis ku ta duna satisfakshon. Anto tin mas kos ku nos lo haña.

²⁰ Yehova a duna Hesus komo un “Tata Eterno” pa esnan ku tin e speransa di biba pa semper riba tera. Hesus ta remplasá e promé tata humano, Adam, kende lamentablemente a laga tur su desendientenan na kaya. (Isaias 9:6, 7) Si nos aseptá Hesus komo nos “Tata Eterno” i ehersé fe den dje, nos tin un speransa sigur di bida eterno. Ademas, asina nos ta hala mas i mas serka di Yehova Dios. Manera nos a siña, e mihó manera pa obedesé e mandamentu divino, “sea imitadónan di Dios, manera yunan stimá,” ta di hasi esfuerso pa sigui e ehèmpel di Hesus dia aden dia afó.—Efesionan 5:1.

21. Kon siguidónan di Kristu ta reflehá lus den un mundu skur?

²¹ Segun ku nos ta imitá Hesus i su Tata, Yehova, nos tin un privilegio maravioso. Nos ta reflehá un lus briante. Den un mundu tapá ku skuridat, kaminda míles di miónes di hende ta ser gañá pa Satanas i ta imitá su karakterístikanan, nos ku ta sigui Kristu ta reflehá tur kaminda e lus di mas briante, esta, e lus di bèrdatnan spiritual, e lus di bon kualidatnan kristian, e lus di berdadero goso, pas i amor. Na mesun tempu, nos ta hala mas serka di Yehova, i esei ta e meta di mas haltu ku kualke kriatura inteligente por pone.

22, 23. (a) Ki bendishonnan den futuro lo bin pa esnan ku fielmente ta keda sigui Hesus? (b) Kiko lo mester ta nos determinashon?

²² Pensa tambe riba loke Yehova ke hasi pa bo den futuro pa medio di su Rei Mesiániko. Pronto e Rei ei lo hiba un guera hustu kontra Satanas su sistema di kosnan malbado. E viktoria di Hesus ta sigur! (Revelashon 19:11-15) Despues di esei, Kristu lo kuminsá ku su Reinado di Mil Aña riba tera. Su gobièrnu selestial lo distribuí e benefisionan di e reskate na tur hende fiel, elevando nan na perfekshon. Imaginá bo ku salú perfekto, semper hóben i fuerte, trahando felismente huntu ku un famia humano uní pa transformá e tera aki den un paradeis! Na fin di Hesus su reinado di Mil Aña lo e entregá e gobernashon bèk na su Tata. (1 Korintionan 15:24) Si bo keda sigui Kristu fielmente, lo bo haña un bendishon asina maravioso ku e ta asta difísil pa imaginá, esta, “e libertat glorioso di e yunan di Dios”! (Romanonan 8:21) Sí, nos lo tin tur e bendishonnan ku Adam ku Eva tabatin i a pèrdè. Siendo yunan terenal di Yehova, nos lo ta librá pa semper di e mancha di piká di Adam. Di bèrdat, “lo no tin morto mas.”—Revelashon 21:4.

²³ Kòrda e hóben gobernante riku ku nos a papia di dje den Kapítulo 1. El a nenga Hesus su invitashon: “Bin, sigui mi.” (Marko 10:17-22) No kometé e eror ei nunka! Nos ta spera ku bo ta aseptá Hesus su invitashon ku goso i entusiasmo. Sea determiná pa perseverá, pa keda sigui e Bon Wardadó dia aden dia afó, aña aden aña afó, i asina biba pa mir’é hiba finalmente tur e propósitonan di Yehova na nan glorioso kumplimentu!