Hesus A Kalma Tormenta Riba Laman

Hesus tabatin un dia largu i duru na Kapernaum. Ora a bira anochi, el a bisa su disipelnan: “Laga nos krusa bai na otro banda di laman.”—Marko 4:35.

Nan tabata bai e region di e gerasenonan, un área den Dekápolis. Dekápolis tabata keda ost di Galilea i tabata konsistí di vários stat ku tabata dominá pa kultura griego. Apesar di esei, tabatin hopi hudiu ta biba na Dekápolis.

Ora Hesus a subi boto pa bandoná Kapernaum, algun hende a nota esei. Dikon nos ta bisa asina? Pasobra tabatin mas boto ku a subi laman. (Marko 4:36) Pa krusa Laman di Galilea no tabata tuma muchu tempu. E Laman di Galilea tabata mas o ménos 21 kilometer largu i 11 kilometer hanchu. Aunke e tabata un lago di awa dushi, e no tabata plat.

Hesus, aunke e tabata un hòmber perfekto, tabata kansá despues di un dia largu di aktividat spiritual. P’esei, manera nan a kuminsá nabegá, el a bai patras den e boto, pone su kabes riba kusinchi i drumi.

Vários di su apòstelnan tabata bon nabegante. Pero e biahe akí no a bai fásil. Laman di Galilea tabata rondoná pa seru i hopi biaha e temperatura di e superfisie di e awa tabata kayente. Tin biaha, airu friu di e serunan tabata baha riba e superfisie kayente di e laman, kreando tormenta fuerte. I esei ta loke a sosodé durante e biahe akí. Olanan grandi tabata bati kontra e boto i yen’é ku awa di manera ku tur hende abordo “tabata den peliger.” (Lukas 8:23) I Hesus tabata ketu bai na soño!

E tripulantenan, konfiando riba nan propio eksperensia, a traha duru pa kontrolá e boto. Pero e biaha akí sí nan no por a logra dominá e boto. P’esei, ora nan a mira ku nan bida tabata na peliger, nan a lanta Hesus i bis’é: “Señor, salba nos; nos ta serka di muri!” (Mateo 8:25) Sí, nan tabatin miedu di hoga.

Ora Hesus a lanta, el a puntra nan: “Pakiko boso tin tantu miedu asina, hende di poko fe?” (Mateo 8:26) Anto Hesus a skual bientu i laman, bisando: “Silensio! Keda ketu!” (Marko 4:39) I esakinan a kalma kompletamente! (Marko i Lukas ta relatá e suseso impreshonante akí enfatisando promé kon Hesus a silensiá e tormenta i despues nan ta menshoná e falta di fe di e disipelnan.)

Bo por imaginá bo ki efekto esaki tabatin riba e disipelnan? Nan a kaba di mira kon un tormenta fuerte i un laman brutu a kalma kompletamente. P’esei nan a haña miedu. Nan tabata bisa otro: “Ta ken esaki ta anto? Pasobra asta bientu i laman ta obedes’é.” I nan a yega tera sano i salvo. (Marko 4:41–5:1) Kisas e otro botonan ku a subi laman a bira bai kosta wèst bèk.

Ta un gran konsuelo pa sa ku e Yu di Dios tin poder pa kontrolá e forsanan di naturalesa! Ora Hesus dirigí pleno atenshon na nos planeta Tera durante su gobernashon Mesiániko, tur kaminda hende lo sinti nan safe i trankil, pasobra lo no tin desaster natural mas!