Hala Serka di Yehova i di Bo Rumannan

 1. Kon nos tin ku mira Yehova?

YEHOVA su famia ta konsistí di personanan ku ta ador’é. Entre nan, tin Hesus, kende ta “e promé yu di tur kreashon,” i un kantidat di angel. (Kol. 1:15, nota; Sal. 103:20) Ora Hesus tabata riba tera, el a yuda hende komprondé ku nan por mira Yehova komo nan Tata. Ora e tabata papia ku su disipelnan, el a referí na Yehova komo ‘su Tata, ku ta nan Tata tambe.’ (Huan 20:17) Anto ora nos dediká na Yehova i batisá, nos ta forma parti di un famia ku ta stima otro masha hopi mes.—Mar. 10:29, 30.

 2. Kiko nos lo studia den e artíkulo akí?

² Tin di nos ta haña ku ta difísil pa mira Yehova komo un Tata ku ta stima nos. Otronan no sa kon pa mustra nan rumannan ku nan stima nan. Den e artíkulo akí, nos lo mira kon Hesus a yuda nos mira Yehova komo un Tata ku ta stima nos i ku nos por aserká. Tambe nos lo wak kon nos por imitá Yehova na e manera ku nos ta trata nos rumannan.

 3. Kon e manera ku Hesus a siña su disipelnan hasi orashon ta hala nos serka Yehova?

³ Yehova ta stima nos masha tantu mes. Hesus ke pa nos mira Yehova meskos ku e ta mir’é, komo un Tata aserkabel ku ta stima su yunan. No komo un persona sin sintimentu ku ta manda riba nos so. Esei ta bon kla na loke Hesus a siña su disipelnan pa bisa den orashon. El a kuminsá su orashon ku: “Nos Tata.” (Mat. 6:9) E por a bisa nos yama Yehova “Todopoderoso,” “Kreador” òf “Rei di eternidat.” Tur e títulonan ei ta kuadra i nan ta den Beibel. (Gén. 49:25; Isa. 40:28; 1 Tim. 1:17) Pero, Hesus a bisa nos pa yama Yehova: Tata.

 4. Kon nos sa ku Yehova ke pa nos hala serka dje?

⁴ Abo ta haña ku ta difísil pa mira Yehova komo un Tata ku ta stima bo? Pa algun di nos sí. Kisas esei ta debí ku nos tabatin un infansia difísil. Ta un alivio pa sa ku Yehova sa presis kon nos ta sinti i dikon nos ta sinti asina. E ke hala serka nos. Ta p’esei su Palabra ta bisa nos: “Hala serka Dios, i lo e hala serka boso.” (Sant. 4:8) Yehova ta stima nos, i e ta primintí nos ku lo e ta e mihó Tata ku nos por tin.

 5. Segun Lukas 10:22, kon Hesus por yuda nos hala mas serka Yehova?

⁵ Hesus por yuda nos hala mas serka Yehova. No tin niun hende ku konosé Yehova mihó kuné. El a imitá e kualidatnan di su Tata asina perfekto ku el a bisa: “Esun ku a mira mi, a mira e Tata tambe.” (Huan 14:9) Meskos ku un ruman mayó, Hesus ta siña nos kon pa respetá i obedesé nos Tata, kon pa evitá di hasi kosnan ku ta hasiÉ tristu i kon pa haña Su aprobashon. Pero mas importante ainda, henter Hesus su bida aki riba tera ta duna nos un oportunidat di mira kuantu amor Yehova tin. (Lesa Lukas 10:22.) Laga nos ban wak algun ehèmpel di esei.

 6. Kon nos sa ku Yehova a skucha Hesus su orashonnan?

⁶ Yehova ta skucha su yunan. Ban wak kon el a skucha su Yu primogénito. Sin duda, Yehova a skucha su orashonnan ku el a hasi ora e tabata riba tera. (Luk. 5:16) El a skucha Hesus pidié guia pa desishonnan importante, manera ora di skohe su 12 apòstelnan. (Luk. 6:12, 13) Tambe el a skucha Hesus ora ku e tabata den angustia. Djis promé ku Hudas a traishon’é, Hesus a roga su Tata pa yud’é ku e prueba difísil ku tabatin su dilanti. Na e okashon ei, Yehova no a djis skucha su Yu stimá, pero el a manda un angel pa fortales’é.—Luk. 22:41-44.

 7. Splika kon bo ta sinti bo sabiendo ku Yehova ta skucha bo orashonnan.

⁷ Yehova ta skucha nos orashonnan i ta kontestá nan na e mihó momento i na e mihó manera. (Sal. 116:1, 2) Un ruman muhé na India a mira kon Yehova a kontestá su orashonnan. E tabata trata ku problemanan emoshonal i tabata roga Yehova pa yudansa. El a skirbi: “E Broadcasting di mei 2019 tabata papia tokante kon pa dil ku preokupashon i ansiedat. El a yega nèt na ora. Yehova a kontestá mi.”

 8. Den ki manera Yehova a laga Hesus mira ku e ta stim’é?

⁸ Yehova stima nos den e mesun manera ku el a stima Hesus ora ku e tabata riba tera. (Huan 5:20) El a perkurá pa Hesus su nesesidatnan spiritual, emoshonal i físiko. Yehova no a keda sin bisa su Yu ku e tin su aprobashon i kuantu e ta stim’é. (Mat. 3:16, 17) Debí ku Hesus tabata sa ku e por a konta ku su Tata den shelu, nunka el a sintié su so.—Huan 8:16.

 9. Kon nos sa ku Yehova ta stima nos?

⁹ Meskos ku Hesus, nos tur a yega di sinti kuantu Yehova ta stima nos. Djis para pensa un ratu: Yehova a hala bo serka dje, el a perkurá pa bo tin rumannan den kongregashon ku ta stima bo, ku ke hasi bo felis i ta kla pa yuda bo ora ku bo ta sinti ku bo no por mas. (Huan 6:44) Ademas, Yehova ta duna bo tur loke bo mester pa asina bo keda ku un fe fuerte. I te asta e ta yuda nos ku tur loke nos tin mester pa biba. (Mat. 6:31, 32) Ora ku nos pensa kuantu Yehova ta stima nos, nos amor p’e ta krese mas ainda.

10. Kiko nos por siña for di e manera ku Yehova ta trata nos rumannan?

¹⁰ Yehova ta stima delaster un di nos rumannan. Pero, kisas pa nos no ta semper fásil pa nos stima nan òf pa demostrá nan ku nos ta stima nan. Esei kisas ta debí na nos kultura i e manera ku nos a lanta. Nos tur ta imperfekto i p’esei nos ta hasi fout, nos ta traha riba nèrvio di otro i ta desapuntá otro. Pero, nos tur por hasi esfuerso pa stima nos rumannan mas. Kon? Esei ta di wak kon nos Tata ta stima nan i hasi meskos. (Efe. 5:1, 2; 1 Huan 4:19) Ban wak kon nos por imitá Yehova.

11. Kon Hesus a mustra “tierno kompashon” meskos ku Yehova?

¹¹ Yehova ta mustra “tierno kompashon.” (Luk. 1:78) Un hende ku ta kompasivo ta preokupá ora e mira otro hende ta sufri i e ta buska manera pa yuda nan i duna nan alivio. Hesus a sinti kompashon pa hende meskos ku Yehova. (Huan 5:19) Na un okashon, ora Hesus a mira un multitut, “el a haña duele di nan pasobra nan tabata soyá i deskuidá manera karné sin wardadó.” (Mat. 9:36) Hesus a hasi mas ku djis sinti kompashon pa nan. El a kura esnan ku tabata malu i a yuda esnan ku tabata kansá i kargá.—Mat. 11:28-30; 14:14.

12. Kua ta algun manera ku nos por mustra kompashon?

¹² Promé ku nos por mustra kompashon na nos rumannan, nos tin ku sa den kiko nan ta pasando. Por ehèmpel, un ruman muhé por tin hopi problema ku salú, pero nunka e no ta keha. Kisas lo e keda hopi kontentu si e haña poko yudansa. Puntra bo mes: ‘Kon e ruman ta hasi perkurá pa e nesesidatnan di su famia? Lo e keda kontentu si mi yud’é prepará kuminda òf limpia kas?’ Imaginá ku un ruman hòmber a pèrdè trabou. Lo bo por hinka algu den ènvelòp, kisas na un manera anónimo, ku por yud’é lora te ora ku e haña un otro trabou?

13-14. Kon nos por ta generoso meskos ku Yehova?

¹³ Yehova ta generoso. (Mat. 5:45) Si nos ke ta kompasivo, nos no mester warda te ora nos rumannan pidi nos yudansa. Meskos ku Yehova, nos por tuma inisiativa. Tur dia e ta laga solo sali sin ku nos tin ku pidié esei. Anto tur hende, asta esnan ku no ta yam’é danki, ta disfrutá di e rayonan di solo. E echo ku Yehova ta duna nos tur loke nos tin mester, no ta laga bo komprondé ku e stima nos? Sin duda nos ta stima Yehova masha tantu mes pa e echo ku e ta asina generoso.

¹⁴ Hopi di nos rumannan ta hasi meskos ku nos Tata selestial i ta tuma inisiativa den mustra generosidat. Por ehèmpel, na 2013 e tifon devastador Haiyan a asotá Filipinas. Masha hopi di nos rumannan a pèrdè nan kas i tur loke nan tabatin. Pero, nan rumannan rònt mundu mesora a duna nan yudansa. Hopi di nan a duna sèn, a yuda drecha i asta rekonstruí kasi 750 kas den ménos ku un aña. Anto durante e pandemia di COVID-19, nos a yuda nos rumannan tambe. Ora ku mesora nos ta yuda nos rumannan, nos ta laga nan mira ku nos ta stima nan.

15-16. Segun Lukas 6:36, den ki manera nos por imitá nos Tata den shelu?

¹⁵ Yehova ta miserikòrdioso i kla pa pordoná. (Lesa Lukas 6:36.) Tur dia nos Tata den shelu ta pordoná nos. (Sal. 103:10-14) Aunke Hesus su siguidónan tabata imperfekto, tòg e tabata miserikòrdioso ku nan i a pordoná nan. E tabata asta dispuesto pa sakrifiká su bida pa asina nos pikánan por ser pordoná. (1 Huan 2:1, 2) E echo ku Yehova i Hesus ta asina miserikòrdioso i kla pa pordoná, no ta laga bo haña gana di hala serka nan?

¹⁶ Ora ku nos ta pordoná nos rumannan libremente, nos ta stima otro mas. (Efe. 4:32) Aunke no ta fásil pa pordoná tur ora, nos tin ku hasi esfuerso pa hasié tòg. Un ruman a haña ku e artíkulo den E Toren di Vigilansia “Pordoná Otro Libremente” a yud’é hasi esei.b El a skirbi: “Ora ku mi a studia e artíkulo akí mi a komprondé ku pordoná ta algu importante i ku ta benefisiá mi. Sí, e artíkulo a splika ku ora bo ta dispuesto pa pordoná no ta nifiká ku bo ta aprobá un hende su mal komportashon òf minimisá e daño ku esei ta kousa. Pero, loke sí e ta nifiká ta ku bo no ta keda tene e hende na kurason i ku bo ta keda ku bo pas.” Ora nos pordoná nos rumannan libremente, nos ta mustra nan ku nos ta stima nan i ku nos ta meskos ku nos Tata Yehova.

17. Segun Mateo 5:16, kon nos por onra nos Tata selestial?

¹⁷ Ta un gran onor i privilegio pa pertenesé na un famia ku ta stima otro i ku ta internashonal. Nos ke pa mas tantu hende posibel adorá nos Dios huntu ku nos. Ku esei na mente, nos mester tene kuidou pa nos no hasi nada ku por laga hende papia malu di Yehova su sirbidónan òf di nos Tata selestial. Semper nos ta purba pa komportá nos mes bon pa asina mas tantu hende skucha e bon notisia.—Lesa Mateo 5:16.

18. Kiko lo yuda nos prediká sin miedu?

¹⁸ Tin biaha, algun hende por ridikulisá nos òf asta persiguí nos pasobra nos ta obedesé nos Tata selestial. Kiko nos tin ku hasi si nos tin miedu di papia ku otro hende tokante nos kreensianan? Nos por tin sigur ku Yehova i su Yu lo yuda nos. Hesus a bisa su disipelnan ku nan no mester preokupá tokante kon pa papia òf kiko pa bisa. Dikon nò? El a splika nan: “E momento ei boso lo haña sa kiko pa bisa, pasobra no ta boso ta papia, ma ta e spiritu di boso Tata ta papia pa medio di boso.”—Mat. 10:19, 20.

19. Kon Robert a prediká ku kurashi?

¹⁹ Wak loke a pasa ku Robert na Suráfrika. Tempu ku nèt el a kuminsá studia i ku e no tabata sa masha kos di Beibel, e mester a presentá dilanti un korte militar. Ku kurashi el a splika ku e tabata ke keda neutral pasobra e ta stima su rumannan. Robert a balorá su lugá den Yehova su famia. Diripiente asina, e hues a puntr’é: “Ken ta bo rumannan?” Robert no a ferwagt e pregunta ei, pero mesora e teksto di dia a bini na su mente. Pa e dia ei esei tabata Mateo 12:50: “Esun ku ta hasi boluntat di mi Tata ku ta den shelu, ta esei ta mi ruman hòmber, mi ruman muhé i mi mama.” Aunke ku Robert tabata sa masha tiki tokante Beibel, Yehova su spiritu a yud’é kontestá e pregunta ei i tur e otronan ku a bini. Yehova lo tabata masha orguyoso di Robert! Anto Yehova ta orguyoso di nos tambe ora nos ta konfia riba dje pa prediká, spesialmente den situashonnan difísil.

20. Kiko nos mester ta determiná pa hasi? (Huan 17:11, 15)

²⁰ Laga nos sigui balorá e onor i privilegio ku nos tin di por pertenesé na Yehova su famia ku ta stima otro masha hopi mes. Nos tin e mihó Tata ku ta eksistí i masha hopi ruman ku ta stima nos. Semper nos ke ta gradisidu pa e kosnan ei. Satanas i su siguidónan malbado ta purba di laga nos duda ku nos Tata ta stima nos i ta purba di habri nos famia for di otro. Pero, Hesus a hasi orashon pa nos i a pidi nos Tata pa protehá nos pa asina nos famia por keda uní. (Lesa Huan 17:11, 15.) Anto Yehova ta kontestando e orashon ei. Meskos ku Hesus, nos no mester duda ku nos Tata selestial stima nos i ku lo e yuda nos. Laga nos ta determiná pa sigui hala serka Yehova i nos rumannan den kongregashon.