Kon Bo Por Ta un Bon Tata

UN ARTÍKULO den e revista Economist tokante e deterioro di bida di famia a kuminsá ku e deklarashon interesante aki: “Pa traha yu ta fásil, ser un bon tata si no ta fásil.”

Ounke tin hopi kos difísil den bida, un di e kosnan di mas difísil—i a la bes mas importante—ta ser un bon tata. Tur tata lo mester kier ta un bon tata, ya ku e bienestar i felisidat di nan famia ta den wega.

Pakiko E No Ta Fásil

Den poko palabra, un di e motibunan prinsipal pakiko no ta fásil pa ser un bon tata ta imperfekshon heredá—tantu di mayornan komo di nan yunan. Beibel ta bisa: “E intenshon [“inklinashon,” NW] di kurason di hende ta malu for di su hubentut.” (Génesis 8:21) P’esei un eskritor di Beibel a rekonosé: “Den piká mi mama a konsebí mi.” (Salmo 51:5; Romanonan 5:12) E inklinashon pa hasi malu debí na piká heredá ta solamente ún di e opstákulonan ku ta pone ku ta difísil pa ser un bon tata.

E mundu aki mes tambe ta un opstákulo grandi. Pakiko? Pasobra, manera Beibel ta splika, “henter mundu ta bou di kontròl di e malbado,” kende ta ser identifiká komo “Diabel i Satanas.” Tambe Beibel ta yama Satanas “e dios di e mundu aki.” No ta nada straño anto ku Hesus a bisa ku su siguidónan ‘no mester ta parti di mundu,’ meskos ku e no ta parti di mundu.—1 Juan 5:19; Revelashon 12:9; 2 Korintionan 4:4; Juan 17:16.

Pa bo ta un bon tata ta importante pa bo ta semper konsiente di bo imperfekshon heredá, di Satanas e Diabel i di e mundu bou di su kontròl. E opstákulonan aki no ta kosnan imaginario. Nan ta real! Pero unda un hende hòmber por bai siña kon pa vense nan i kon pa bira un bon tata?

Ehèmpelnan Divino

Pa un tata haña yudansa pa vense e opstákulonan menshoná ariba, e por akudí na Beibel. Den dje nos ta haña ehèmpelnan estupendo. Hesus a identifiká e mihó ehèmpel ku tin ora el a siña su siguidónan resa: “Nos Tata ku ta den shelu.” Beibel ta deskribí nos Tata selestial dor di bisa simplemente: “Dios ta amor.” Kiko e ehèmpel di amor aki mester motivá un tata humano pa hasi? Apòstel Pablo a animá kristiannan pa “sea imitadónan di Dios . . . i kana den amor.”—Mateo 6:9, 10; 1 Juan 4:8; Efesionan 5:1, 2.

Si bo ta un tata, konsiderá kiko bo por siña for di un ehèmpel so kaba di e manera ku Dios a trata su Yu, Hesus. Mateo 3:17 ta bisa nos ku ora Hesus a batisá, Dios a deklará for di shelu: “Esaki ta mi Yu stimá, den kende mi tin goso.” Kiko nos por siña for di esaki?

Na promé lugá, ora un tata bisa un otro hende orguyosamente, ‘Esaki ta mi yu,’ pensa ki efekto esei tin riba e yu. Hóbennan ta desaroyá bon ora nan risibí atenshon di nan mayornan, spesialmente rekonosementu positivo. Probablemente un mucha lo sinti su mes motivá pa traha mas duru ainda pa proba ku e ta digno di rekonosementu faborabel.

Na di dos lugá, Dios a ekspresá su sintimentunan pa ku Hesus, refiriendo na dje komo “mi Yu stimá.” E ekspreshon di kariño ei for di su Tata lo mester a alegrá Hesus su kurason. Bo yunan tambe lo sinti nan animá si bo mustra mediante bo palabranan—i tambe mediante bo tempu, atenshon i interes—ku bo ta ègt stima nan.

Na di tres lugá, Dios a bisa su Yu: “Den bo mi tin goso.” (Marko 1:11) Esaki tambe ta hopi importante pa un tata hasi, esta, bisa su yunan ku e ta masha kontentu ku nan. Ta bèrdat ku hopi bes un mucha ta faya. Nos tur ta faya. Pero komo tata, bo ta buska oportunidat pa ekspresá bo satisfakshon pa e bon kosnan ku bo yunan ta hasi òf bisa?

Hesus a siña bon for di su Tata selestial. Tempu ku e tabata riba tera, el a demostrá ku palabra i ehèmpel ki sintimentu su Tata tabatin pa ku Su yunan riba tera. (Juan 14:9) Asta ora ku Hesus tabata okupá i bou di tenshon, el a saka tempu pa sinta i papia ku mucha. El a bisa su disipelnan: “Laga e muchanan bin serka mi; no stroba nan.” (Marko 10:14) Boso ku ta tata por sigui e ehèmpel di Yehova Dios i di su Yu mas plenamente?

Bon Ehèmpel Ta Importante

Ta sumamente importante pa bo pone un bon ehèmpel pa bo yunan. Si abo mes no ta someté bo n’e disiplina di Dios i lag’é guia bo, probablemente bo esfuersonan pa “lanta nan den e disiplina i instrukshon di Señor” lo tin masha poko efekto. (Efesionan 6:4) Pero, ku yudansa di Dios, bo por vense kualke opstákulo pa kumpli ku su mandamentu pa kuida bo yunan.

Konsiderá e ehèmpel di Viktor Gutschmidt, un Testigu di Yehova di eks-Union Soviétiko. Na òktober di 1957, el a ser sentensiá na 10 aña di prizon pa motibu ku el a papia tokante su fe. El a laga dos yu muhé chikitu atras huntu ku su esposa, Polina. Den prizon, nan a permitié skirbi karta na su famia pero a prohibié di bisa kualke kos tokante Dios òf di un tópiko religioso. Asta ora el a haña su mes den e difikultat aki, Viktor tabata determiná pa ta un bon tata, i e tabata sa ku tabata sumamente importante pa siña su yunan tokante Dios. Kiko el a hasi anto?

Viktor a konta: “Mi a haña informashon den e revistanan soviétiko Young Naturalist i Nature. Mi tabata pinta plachi di bestia i hende riba pòstkart i inkluí un kuenta òf un eksperensia relashoná ku naturalesa.”

Polina a bisa: “Manera nos a risibí e pòstkartnan aki, mesora nos tabata relashoná nan ku temanan di Beibel. Por ehèmpel, ora tabata trata di e bunitesa di naturalesa, selva- òf riunan, mi tabata lesa Isaias kapítulo 65,” ku ta splika tokante e promesanan di Dios pa kombertí tera den un paradeis.

E yu muhé di Viktor, Yulia, a konta: “Despues Mama tabata hasi orashon ku nos, i nos tabata yora. E pòstkartnan aki a hunga un papel importante den nos kriansa.” Polina a bisa ku dor di esei, “for di nan infansia e muchanan tabata stima Dios mashá.” Kon e situashon di e famia ei ta awor?

Viktor a splika: “Awor tur mi dos yu muhénan ta kasá ku ansianonan kristian, i tur dos tin famianan spiritualmente fuerte ku yunan ku ta sirbiendo Yehova fielmente.”

Pa bo pone un bon ehèmpel no solamente bo mester ta kreativo sino tambe bo tin ku hasi hopi esfuerso. Probablemente bo yunan lo sinti nan konmoví ora nan mira nan tata hasi su bèst. Un yu ku a dediká hopi aña den sirbishi di tempu kompletu, yen di apresio a bisa di su tata: “Tin biaha Tata tabata bini asina kansá for di trabou ku apénas e por a tene su wowonan habrí, pero kon ku el a hasi, nos tabatin nos studio di Beibel, i esaki a yuda nos mira e seriedat di e studio di famia.”

Ta bisto anto ku pa bo ta un bon tata, ta masha importante pa bo pone un bon ehèmpel—ku palabra i akshon. Bo tin ku hasi esei pa bo mira e siguiente proverbio bíbliko kumpli: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—Proverbionan 22:6.

Pues kòrda, no ta solamente loke bo ta bisa ta konta; ta foral loke bo ta hasi—e ehèmpel ku bo ta pone. Un eksperto kanades riba tereno di eduká mucha for di infansia a skirbi: “E mihó manera pa logra pa nos yunan komportá nan mes [manera nos ke] ta dor di demostrá e komportashon deseá nos mes.” En bèrdat, si bo ke pa bo yunan duna balor na kosnan spiritual, ta esensial pa abo mes tambe hasi esei.

Traha Tempu pa Nan!

Bo yunan mester mira bo bon ehèmpel. Esei ta nifiká ku bo tin ku dediká tempu na nan—hopi tempu, no djis un tiki aki un tiki aya. Sigui e konseho di Beibel pa ‘kumpra tempu,’ esta, legumai kosnan ménos importante pa bo por ta huntu ku nan. (Efesionan 5:15, 16, NW) Realmente, kiko ta mas importante ku bo yunan? Un televishon pantaya grandi, un sèt profeshonal di palu di gòlf, un bunita kas, bo trabou?

Si tatanan no dediká tempu na nan yunan pa kria nan ora nan ta chikitu, nan lo tin ku paga karu despues. Tatanan ku a mira nan yunan kai den inmoralidat òf asta pèrdè tur interes den kosnan spiritual hopi bes tin remordimentu profundo. Nan ta lamentá ku tempu nan yunan chikitu realmente tabatin mester di nan, nan no a dediká sufisiente tempu na nan.

Kòrda, e tempu pa pensa tokante e konsekuensianan di bo desishonnan ta ora bo yunan ta chikitu. Beibel ta yama bo yunan “un herensia di Señor,” algu ku Dios mes a konfia den bo man. (Salmo 127:3) Pues nunka lubidá ku bo tin ku duna kuenta na Dios pa nan!

Yudansa Ta Disponibel

Un bon tata ta ansioso pa risibí yudansa ku lo benefisiá su yunan. Despues ku un angel a bisa e esposa di Manoa ku e tabata bai haña un yu, Manoa a resa pidi Dios: “Pa fabor, laga e hòmber di Dios ku bo a manda bin serka nos atrobe, pa e siña nos kiko nos mester hasi pa e mucha ku mester nase.” (Huesnan 13:8, 9) Meskos ku mayornan djawe, ki klase di yudansa Manoa tabatin mester? Laga nos mira.

Brent Burgoyne, un dosente na e Universidat di Kaapstad, Suráfrika, a remarká: “Un di e regalonan di mas presioso ku bo por duna un yu ta pa siñ’é un sèt di norma i balor.” Un informe den Daily Yomiuri di Hapon ta mustra ku en bèrdat mucha mester siña un sèt di norma i balor. E korant a bisa: “[Un] enkuesta ta mustra ku 71 porshento di mucha hapones nunka no a ser siñá pa nan tata ku nan no tin mag di gaña.” Esei no ta un situashon lamentabel?

Ken por perkurá pa un sèt di norma i balor konfiabel? E mesun persona ku a duna Manoa guia: Dios mes! Pa Dios duna yudansa, el a manda su Yu stimá, Hesus, komo Maestro—manera nan tabata yam’é komunmente. E buki Siña for di e Gran Maestro, ku ta saka lès for di siñansanan di Hesus, ta disponibel awor den hopi idioma pa bo usa ora bo ta instruí bo yunan chikitu.

Siña for di e Gran Maestro no solamente ta splika norma- i balornan basá riba e Palabra di Dios sino tambe ta ilustrá e teksto skirbí ku mas ku 160 plachi ku tin preguntanan al kaso. Por ehèmpel, den kapítulo 22 ku e título “Pakiko Nos No Mester Gaña,” tin e plachi ku tin na página 32 di e revista aki. E teksto riba e página kaminda e plachi aki ta aparesé ta bisa: “Laga nos bisa ku un mucha hòmber ta bisa su tata: ‘Nò, mi no a skòp bala den kas.’ Pero kiko awor si el a hasié tòg? Ta malu si e bisa ku e no a hasié?”

Otro lèsnan motivador nos por haña den kapítulonan titulá “Obedensia Ta Skapa Bo,” “Nos Tin Ku Resistí Tentashon,” “Un Lès Tokante Bondat,” “Nunka Bira Ladron!,” “Dios Ta Haña Tur Fiesta Bon?,” “Kon pa Hasi Dios Kontentu” i “Pakiko Nos Mester Traha,” djis pa menshoná algun di e 48 kapítulonan den e buki aki.

E prólogo di e buki ta konkluí bisando: “Loke mucha tin mester di dje prinsipalmente ta pa bo dirigí nan na e Fuente di tur sabiduria, nos Tata den shelu, Yehova Dios. Esei ta loke Hesus e Gran Maestro a hasi semper. Nos ta spera sinseramente ku e buki aki lo yuda abo i bo famia dirigí boso bida di tal manera ku boso ta agradá Yehova, ku bendishon eterno komo resultado.”a

Ta bisto anto ku ser un bon tata ta enserá pone un bon ehèmpel pa bo yunan, dediká hopi tempu na nan, i yuda nan biba segun e normanan di Dios ku el a revelá den Beibel.

[Nota]

[Plachi na página 8]

Ounke Viktor Gutschmidt tabata den prizon, el a logra ser un bon tata

[Plachinan na página 8, 9]

Tempu ku Viktor tabata enkarselá pa motibu di su fe, el a pinta e plachinan aki p’e instruí su yunan

[Plachi na página 9]

Yunan di Viktor na 1965

[Plachi na página 10]

Tatanan mester ta aktivamente enbolbí den siña nan yunan