LÈS 38
Mustra Apresio pa Bida—Un Regalo di Dios
Bida por ta masha dushi. Asta ora nos tin problema, nos por sigui disfrutá di vários kos den bida. Sí, bida ta un regalo di Dios. Kon nos por mustra ku nos ta apresiá bida? Anto kiko ta e motibu di mas importante pa hasi esei?
1. Dikon nos mester apresiá bida?
Nos mester apresiá bida pasobra e ta un regalo di nos Tata amoroso, Yehova. Yehova ta “e fuente di bida” pasobra el a krea tur ser bibu. (Salmo 36:9) “É ta duna tur hende bida, rosea i tur kos.” (Echonan 17:25, 28) Yehova ta duna nos tur loke nos tin mester pa keda na bida. Pero esei no ta tur kos. E ta duna nos un variedat di e kosnan ei pa asina nos por disfrutá di bida.—Lesa Echonan 14:17.
2. Kon nos por mustra Yehova ku nos ta apresiá bida?
For di ora bo mama a sali na estado di bo, Yehova tabata interesá den bo. David, un di Dios su sirbidónan, a bisa Dios bou di inspirashon: “Bo wowonan a mira mi ora ku mi tabata den barika di mi mama.” (Salmo 139:16) Bo bida ta presioso pa Yehova. (Lesa Mateo 10:29-31.) Yehova lo ta hopi tristu si un hende deliberadamente kita bida di un persona òf asta su mes bida.a (Éksodo 20:13) Nos lo hasi Yehova tristu tambe si nos pone nos bida na peliger innesesariamente òf si nos no hasi esfuerso pa protehá bida di otro hende. Ora nos ta kuida nos mes i ta respetá bida di otro hende, nos ta mustra ku nos ta apresiá bida.
KIKO MAS NOS POR SIÑA?
Laga nos wak algun manera ku bo por mustra ku bo ta apresiá bida, ku ta un regalo di Dios.
3. Kuida bo salú
Komo kristian, nos a primintí Yehova ku semper nos lo hasi su boluntat i ku nos lo usa henter nos bida pa sirbié. Ta komo si fuera nos ta ofresé nos kurpa komo un sakrifisio na Dios. Lesa Romanonan 12:1, 2. Despues, analisá e siguiente preguntanan:
Kiko mester motivá bo pa kuida bo salú?
Kon ta algun manera ku bo por hasi esei?
4. Protehá bo bida i bida di otro hende
Beibel ta animá nos pa evitá kualke kos ku por pone nos bida òf bida di otro hende na peliger. Pasa e VIDIO pa haña sa algun kos ku bo por hasi pa ta safe.
Proverbionan 22:3 ta bisa: “Un hende sabí ta mira peliger, i e ta evit’é, pero un hende imprudente no ta evitá peliger, i e ta sufri konsekuensia.” Awor, analisá kon abo i otro hende por ta safe . . .
na kas.
na trabou.
ora di hasi deporte.
ora abo ta shofùr di un vehíkulo òf ora bo ta pasahero den kualke vehíkulo.
5. Respetá bida di un yu ku no a nase ainda
Na un manera poétiko, David a splika ku Yehova ta interesá den tur loke ta pasa ku un yu for di ora e ta den barika di su mama. Lesa Salmo 139:13-17. Despues, analisá e siguiente pregunta:
Den bista di Yehova, bida ta kuminsá ora un bebi nase òf ora un mama sali na estado?
E leinan ku Yehova a pone pa e nashon di Israel a protehá tantu un muhé ku ta na estado komo su yu ku no a nase ainda. Lesa Éksodo 21:22, 23.b Despues, analisá e siguiente preguntanan:
Kiko Yehova a pensa di un persona ku aksidentalmente a pone fin na bida di un yu ku no a nase ainda?
Kon lo e sinti si un persona hasi esei intenshonalmente?c
Kiko abo ta pensa di Dios su punto di bista?
Asta un hende muhé ku ta konsiente di e balor di bida por sinti ku aborto ta su úniko opshon. Lesa Isaías 41:10. Despues, analisá e siguiente preguntanan:
Si un hende muhé ta sintié preshoná pa kometé aborto, serka ken e mester buska yudansa? Dikon?
LOKE HENDE SA BISA: “Un hende muhé tin derecho di kometé aborto pasobra ta su kurpa.”
Kiko ta konvensé bo ku Yehova ta balorá bida di tantu un hende muhé na estado komo bida di un yu ku no a nase ainda?
RESÚMEN
Beibel ta bisa ku nos mester stima, respetá i protehá nos mes bida i bida di otro hende, pasobra bida ta un regalo di Yehova.
Repaso
Dikon bida di hende ta presioso pa Yehova?
Kon Yehova ta sinti ora un hende deliberadamente pone fin na su mes bida òf na bida di un otro persona?
Dikon bo ta gradisidu pa bida?
MAS INFORMASHON INTERESANTE
Kon nos por gradisí Yehova pa e echo ku nos ta na bida?
Wak kontesta riba e pregunta “Dios ta pordoná un hende muhé ku a kometé aborto?”
“Kiko Beibel Ta Bisa Tokante Aborto?” (artíkulo riba jw.org)
Wak kon Dios su punto di bista di bida lo yuda nos skohe rekreo ku no ta pone nos bida na peliger.
“Bo Mester Riska Bo Bida ku ‘Deportenan Ekstremo’?” (Spièrta! di 8 di òktober 2000)
Kiko si un persona tin gana di kometé suisidio? Wak kon Beibel por yud’é.
“Mi No Ke Biba Mas—Beibel Por Yuda Mi Stòp di Pensa di Kometé Suisidio?” (artíkulo riba jw.org)
a Yehova ta masha interesá den hende di kurason kibrá. (Salmo 34:18) E ta komprondé e sintimentunan doloroso ku por pone un hende haña gana di muri, i e ke yud’é. Pa wak kon Yehova por yuda un persona ku tin e sintimentunan ei, lesa e artíkulo “Mi No Ke Biba Mas—Beibel Por Yuda Mi Stòp di Pensa di Kometé Suisidio?” ku ta ser menshoná den e sekshon Mas Informashon Interesante di e lès akí.
b Éksodo 21:22, 23 (NW): “Si dos hòmber ta bringa ku otro i nan heridá un muhé na estado i e muhé duna lus prematuro pero e muhé ku e bebi keda na bida, e hòmber kulpabel mester paga e kompensashon ku e kasá di e muhé ta eksigí. E mester paga di akuerdo ku loke e huesnan disidí. Pero si un di nan muri, e ora ei mester duna bida pa bida.”
c Hende ku a yega di kometé aborto no mester laga sintimentu di kulpa kaba ku nan, pasobra Yehova por pordoná nan. Pa mas informashon, wak e artíkulo “Kiko Beibel Ta Bisa Tokante Aborto?” ku ta ser menshoná den e sekshon Mas Informashon Interesante di e lès akí.