Beibel Por Yuda Bo Haña Goso

OUNKE Beibel no ta un buki di medisina, e ta papia sí di e efekto ku emoshonnan—sea positivo òf negativo—por tin riba un persona su salú mental i físiko. Beibel ta bisa: “Un kurason kontentu ta un bon remedi, ma un spiritu abatí ta seka wesu.” Un otro kaminda e ta deklará: “Si bo desmayá den e dia di angustia, bo forsa ta keda limitá.” (Proverbionan 17:22; 24:10) Sintimentu di desanimashon por kaba ku nos energia, lokual ta hasi nos sinti nos suak i vulnerabel sin niun deseo pa kambia òf buska yudansa.

Desanimashon por afektá un persona den sentido spiritual tambe. Hende ku ta sinti nan indigno hopi bes ta haña ku nunka nan no por tin un bon relashon ku Dios ni haña su aprobashon. Simone, menshoná den e artíkulo anterior, a duda ku e tabata “e klase di persona ku Dios lo a aprobá.” Sin embargo, ora nos analisá Beibel, e Palabra di Dios, nos ta ripará kon Dios ta faboresé personanan ku ta hasi esfuerso pa agrad’é.

Dios Ta Ègt Interesá den Hende

Beibel ta bisa nos ku Yehova “ta serka di e hende di kurason kibrá, i ta salba esnan di spiritu abatí.” Dios no ta ‘despresiá un kurason kibrá,’ pero e ta primintí “pa rebibá spiritu di e hende kibrá i pa rebibá kurason di e humilde.”—Salmo 34:18; 51:17; Isaias 57:15.

Na un okashon Hesus, e Yu di Dios, a haña ta nesesario pa hala atenshon di su disipelnan riba e echo ku Dios ta buska loke ta bon den Su sirbidónan. Pa ilustrá esei, el a konta ku Dios ta ripará ora un mòfi kai na tera—algu ku mayoria hende lo konsiderá di poko importansia. Tambe el a resaltá ku Dios konosé e mas mínimo detaye di hende, asta e kantidat di drachi di kabei riba nan kabes. Hesus a konkluí su ilustrashon bisando: “No tene miedu; boso bal mas ku un kantidat di mòfi.” (Mateo 10:29-31)a Hesus a indiká ku maske kiko un hende por pensa di su mes, si e tin fe, e tin hopi balor den bista di Dios. De echo, apòstel Pedro ta kòrda nos ku “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

Mantené un Punto di Bista Balansá

E Palabra di Dios ta urgi nos pa keda balansá den e manera ku nos ta mira nos mes. Apòstel Pablo a skirbi bou di inspirashon: “Dor di e grasia duná na mi, mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio, di akuerdo ku e midí di fe ku Dios a duna bo.”—Romanonan 12:3.

Klaru ku nos lo no kier pensa asina haltu di nos mes te ku nos ta kere ku nos ta masha kos; ni nos no ke bai n’e otro ekstremo i pensa ku nos no ta bal nada. Mas bien, nos meta mester ta pa kultivá un punto di bista rasonabel di nos mes, unu ku ta tene kuenta ku tantu nos puntonan fuerte komo nos limitashonnan. Un señora kristian a ekspres’é den e forma aki: “Mi no ta dje mal hende ei, pero mi no ta un pan di Dios tampoko. Mi tin mi kosnan bon i mi kosnan ménos bon, meskos ku tur otro hende.”

Klaru ku no ta fásil pa haña e punto di bista balansá ei. Kisas nos tin ku hasi bastante esfuerso pa eliminá un punto di bista sumamente negativo di nos mes ku den transkurso di añanan a kria rais fuerte den nos. No opstante, ku yudansa di Dios nos por kambia nos personalidat i tambe nos perspektiva den bida. En realidat, ta esei ta loke e Palabra di Dios ta impulsá nos pa hasi. E ta bisa nos: “Pone un banda e hende bieu ku ta wòrdu korumpí konforme e pashonnan engañoso, i . . . wòrdu renobá den e spiritu di boso mente, i . . . bisti e hende nobo, ku a wòrdu kreá segun Dios den hustisia i santidat berdadero.”—Efesionan 4:22-24.

Dor di hasi esfuerso pa kambia ‘e spiritu di nos mente,’ esta, e inklinashon dominante di nos mente, nos por kambia nos personalidat for di unu ku ta hopi negativo pa unu positivo. Lena, menshoná den e artíkulo anterior, a bin realisá ku miéntras e no a eliminá e pensamentu ku ningun hende no por stim’é ni yud’é, nada lo no por a kambia e sintimentunan ei. Ki konseho práktiko hañá den Beibel a yuda Lena, Simone i otro personanan hasi e kambio ei?

Prinsipionan di Beibel Ku Ta Promové Goso

“Tira bo karga riba SEÑOR, i e lo sostené bo.” (Salmo 55:22) E kos di mas importante ku por yuda nos haña berdadero goso ta orashon. Simone a bisa: “Ki ora ku mi sinti mi desanimá, mi ta akudí na Yehova i pidié su yudansa. Nunka mi no a haña mi den un situashon den kua mi no a sinti su forsa i su guia.” Ora e salmista ta animá nos pa tira nos karga riba Yehova, den un sentido e ta rekordando nos ku Yehova no solamente ta interesá den nos sino ku tambe e ta mira nos komo individuonan ku ta meresé su yudansa i sosten. Riba e anochi di e Pasku Hudiu di aña 33 di nos era, Hesus su disipelnan a keda tristu ora el a bisa nan ku pronto e lo a bandoná nan. Hesus a animá nan pa resa na e Tata, i despues el a agregá: “Pidi, i boso lo risibí, pa boso goso por ta kompletu.”—Juan 16:23, 24.

“Tin mas felisidat den duna ku tin den risibí.” (Echonan 20:35, NW) Manera Hesus a siña su disipelnan, dunamentu ta e klave pa haña berdadero goso den bida. Ora nos ta apliká e bèrdat bíbliko aki, e ta yuda nos enfoká riba e nesesidatnan di otro hende en bes di riba nos mes limitashonnan. Ora nos yuda otro hende i mira kon gradisidu nan ta keda, nos ta sinti nos mes mihó. Lena tabata konvensí ku ora e ta kompartí e bon nobo di Beibel regularmente ku su próhimo, esei ta yud’é den dos manera. E di: “Na promé lugá, e ta duna mi e klase di felisidat i satisfakshon ku Hesus a papia di dje. Na di dos lugá, mi ta risibí hopi reakshon positivo di otro hende, lokual ta yuda mi haña goso.” Dor di duna generosamente di nos mes, e palabranan di Proverbionan 11:25 lo kumpli riba nos: “E hende generoso lo prosperá, i esun ku duna di bebe tambe lo haña di bebe.”

“Tur e dianan di esun ku ta afligí ta malu, ma esun di kurason kontentu semper tin fiesta.” (Proverbionan 15:15) Ta keda na kada un di nos kon nos ta mira nos mes i nos sirkunstansianan. Nos por ta manera esun ku ta mira tur kos den forma negativo i ta sinti su mes afligí, òf nos por skohe pa pensa den forma positivo, sinti nos ‘kontentu di kurason’ i ser gososo komo si fuera nos ta na un fiesta. Simone a bisa: “Mi ta purba di keda mas positivo posibel. Mi ta mantené mi mes okupá den estudio personal i den sirbishi, i mi ta perseverá den orashon. Tambe mi ta purba rondoná mi mes ku hende positivo, i mi ta purba yuda otro hende.” Tal aktitut di kurason ta hiba na berdadero goso, nèt manera Beibel ta animá nos: “Sea kontentu den SEÑOR i regosihá, boso, hustunan, i grita di alegria, boso tur ku ta rekto di kurason.”—Salmo 32:11.

“Un amigu ta stima tur ora bai, i un ruman ta nasí pa tempu di atversidat.” (Proverbionan 17:17) Ora nos ta ekspresá kiko nos ta sinti na un amigu stimá òf un konsehero di konfiansa, esei por yuda nos trata ku sintimentunan negativo i kore ku esakinan promé ku nan kaba ku nos. Si nos papia ku otro hende, esei por yuda nos mira kosnan for di un ángulo balansá i positivo. Simone a atmití: “E echo ku mi por deshogá mi mes ta yuda mi hopi. Bo tin ku konta un hende kon bo ta sinti. Hopi bes esei ta tur loke ta nesesario.” Dor di hasi esaki, lo bo mira ku loke e siguiente proverbio ta bisa ta un gran bèrdat: “Ansha den kurason di hende ta hasié abatí, ma un bon palabra ta hasié kontentu.”—Proverbionan 12:25.

Loke Bo Por Hasi

Nos a konsiderá apénas un par di e hopi prinsipionan maravioso i práktiko di Beibel ku por yuda nos vense sintimentunan negativo i haña berdadero goso. Si bo ta un hende ku ta luchando ku e sintimentu ku bo no ta sirbi pa nada, nos ta animá bo pa bo analisá Beibel, e Palabra di Dios, mas mihó. Siña desaroyá un sintimentu realístiko i saludabel tokante bo mes i tokante bo relashon ku Dios. Nos ta spera sinseramente ku e guia ei di e Palabra di Dios lo yuda bo haña berdadero goso den tur loke bo ta hasi.

[Nota]

[Plachi na página 7]

Un bida na armonia ku prinsipionan di Beibel ta promové goso