Nada Por “Separá Nos for di e Amor di Dios”

 1. Ki sintimentu negativo ta afektá hopi hende, inkluso algun kristian berdadero?

YEHOVA DIOS ta stima abo personalmente? Tin hende ta di akuerdo ku loke Juan 3:16 ta bisa, esta, ku Dios ta stima humanidat en general. Pero na mes momentu nan ta pensa: ‘Ta imposibel pa Dios stima ami komo persona.’ Tin biaha asta kristiannan berdadero tin duda tokante e asuntu aki. Desanimá, un hòmber a yega di bisa: “Ta duru pa mi kere ku Dios tin interes den mi.” Abo tambe sa sinti e tipo di dudanan ei de bes en kuando?

2, 3. Ken ta esun ku kier pa nos kere ku nos no ta bal nada i ku ta imposibel pa Yehova stima nos, i kon nos por bringa e pensamentu ei?

² Satanas tin masha gana pa nos kere ku Yehova Dios no ta stima nos ni balorá nos. Hopi bes Satanas ta sedusí hende dor di traha ku nan sentido di orguyo. (2 Korintionan 11:3) Pero den kaso di hende vulnerabel, e gusta kaba ku nan sentido di dignidat tambe. (Juan 7:47-49; 8:13, 44) I den e “último dianan” krítiko aki, esaki ta sosodé mas ku nunka. Awendia hopi hende ta krese den famianan “sin amor.” Otronan ta haña nan mes konstantemente enfrentá ku hende grosero, egoista i kabesura. (2 Timoteo 3:1-5) Despues di añanan di maltrato, rasismo òf odio, hende asina por kuminsá sinti ku nan no ta bal nada, i ku ta imposibel pa stima nan.

³ Si bo sa detektá e tipo di sintimentunan negativo ei den bo mes, no pèrdè speransa. De bes en kuando hopi di nos ta husga nos mes ku un severidat irasonabel asina. Pero kòrda ku e Palabra di Dios ta diseñá pa ‘korigí asuntu’ i pa ‘basha abou’ kosnan ku ta duru ankrá manera ‘fòrti.’ (2 Timoteo 3:16; 2 Korintionan 10:4) Beibel ta bisa: “Nos . . . lo sigurá nos kurason dilanti dje den kiko ku nos kurason kondená nos; pasobra Dios ta mas grandi ku nos kurason i sa tur kos.” (1 Juan 3:19, 20) Ban wak kuater manera ku e Skritura ta yuda nos “sigurá nos kurason” di ku Yehova ta stima nos.

4, 5. Kon e ilustrashon di Hesus tokante para di Jonchi ta mustra ku nos tin balor den Yehova su bista?

⁴ Pa kuminsá, Beibel ta bisa spesífikamente ku Dios ta konsiderá kada un di su sirbidónan balioso. Por ehèmpel, Hesus a bisa: “Dos mòfi [“para di Jonchi,” NW] no ta wòrdu bendí pa ún sèn? I ni un di nan lo no kai na suela si no ta e boluntat di boso Tata. I asta e drachinan di kabei riba boso kabes, tur ta kontá. P’esei, no tene miedu; boso bal mas ku un kantidat di mòfi.” (Mateo 10:29-31) Pensa un ratu kiko e palabranan ei lo a nifiká pa e hendenan ku tabata skuchando Hesus den promé siglo.

⁵ Kisas bo ta puntra bo mes pakiko un hende lo kier kumpra un para chikitu asina. Wèl, den tempu di Hesus nan tabata e para mas barata ku bo por a kumpra pa kome. Kòrda ku pa un moneda di poko balor un hende por a kumpra dos. Pero despues Hesus a bisa ku si un hende tabata dispuesto di paga dos moneda, e por a haña sinku di nan na lugá di kuater. Nan tabata laga e para èkstra bai komo si fuera e no ta bal nada mes. Pero maske hende por a pensa ku e kriaturanan ei no tin balor, kiko e Kreadó ta pensa di nan? Hesus a bisa: “Ni un di nan [ni sikiera esun ku nan a laga bai pòrnada] no ta wòrdu lubidá dilanti di Dios.” (Lukas 12:6, 7) Awor nos por kuminsá komprondé loke Hesus kier a bisa. Si Yehova ta balorá asta un solo para asina tantu, kuantu mas balor un hende lo tin? Manera Hesus a splika, Yehova konosé delaster un detaye tokante nos. Asta e kabeinan riba nos kabes ta kontá!

 6. Dikon nos sa sigur ku ora Hesus a bisa ku e kabeinan riba nos kabes ta kontá, e no tabata irealístiko?

⁶ Nos kabeinan ta kontá? Un hende por pensa ku aki sí Hesus a bira irealístiko. Pero djis kòrda riba e speransa di resurekshon. Pa Yehova por krea nos di nobo, e mester konosé delaster un detaye di nos! E ta balorá nos asina tantu ku e ta kòrda tur kos tokante nos, inkluso nos kódigo genétiko i tur nos añanan di memoria i eksperensia.a Na komparashon ku tur esaki, konta nos kabeinan ta un kos simpel (komo promedio tin mas o ménos 100.000 riba nos kabes).

7, 8. (a) Segun ku Yehova ta listra kurasonnan humano, kua ta algun kualidat ku ta dun’é goso ora e topa nan? (b) Kua ta algun obra ku nos ta efektuá, ku Yehova ta balorá?

⁷ Di dos, Beibel ta siña nos kiko ta loke Yehova ta balorá di su sirbidónan. Den poko palabra nos por bisa ku e tin deleite den nos bon kualidatnan i den e esfuerso ku nos ta hasi. Rei David a bisa su yu Salomon: “SEÑOR ta skudriñá tur kurason i ta komprondé tur intenshon di e pensamentunan.” (1 Krónikanan 28:9) Segun ku Dios ta listra tur e míles di miónes di kurasonnan humano den e mundu violento i yen di odio aki, ora e topa un kurason ku ta stima pas, bèrdat i hustisia, e mester ta sinti un gran goso! Kiko ta sosodé ora Dios topa un kurason yen di amor p’e, un kurason ku ta buska manera pa siña tokante dje i kompartí loke e ta siña ku otro hende? Yehova ta bisa nos ku e tin atenshon pa hende ku ta konta otronan tokante dje. Asta e tin un “buki di rekuerdo” pa tur “esnan ku ta teme SEÑOR i ku ta onra su nòmber.” (Malakias 3:16) E kualidatnan ei ta presioso den su bista.

⁸ Kiko ta algun bon obra ku Yehova ta balorá? Sin duda, e ta balorá ku nos ta hasi esfuerso pa imitá su Yu Hesukristu. (1 Pedro 2:21) I un obra vital ku Dios ta balorá ta e predikashon di e bon nobo tokante su Reino. Na Romanonan 10:15 nos ta lesa: “Ki bunita ta e pianan di esnan ku ta prediká e evangelio di pas, esnan ku ta trese notisianan alegre di kosnan bon!” Normalmente kisas nos no ta haña ku nos pober pianan ta bunita. Pero den e teksto aki nan ta simbolisá e esfuerso ku Yehova su sirbidónan ta hasi pa prediká e bon nobo. Tur esfuerso hasí ku e meta ei ta bunita i presioso den su bista.—Mateo 24:14; 28:19, 20.

9, 10. (a) Dikon nos por tin sigur ku Yehova ta balorá e echo ku nos ta perseverá apesar di diferente difikultat? (b) Ki punto di bista negativo Yehova no ta haña nunka tokante su sirbidónan fiel?

⁹ Yehova ta balorá nos perseveransia tambe. (Mateo 24:13) Kòrda ku Satanas kier pa bo bira lomba pa Yehova. Kada dia ku bo keda leal na Yehova ta un otro dia den kua bo a yuda duna un kontesta na e reprochenan di Satanas. (Proverbionan 27:11) Tin biaha ku no ta fásil pa sigui perseverá. Problema di salú, difikultat finansiero, doló emoshonal i otro opstákulonan asina por pone kada dia bira un prueba. Ora algu ku nos ta spera ariba no yega mes lihé ku nos a pensa, esei tambe por desanimá nos. (Proverbionan 13:12) Ora nos keda wanta apesar di kosnan asina, ta mas presioso so nos perseveransia ta bira den Yehova su bista. Ta p’esei Rei David a pidi Yehova warda su lágrimanan den un “butishi.” I ku konfiansa el a bisa aserka: “Nan no ta den bo buki?” (Salmo 56:8) Sí, Yehova ta balorá i kòrda tur nos lágrimanan i tur e sufrimentu ku nos ta pasa aden manteniendo nos lealtat na dje. Nan tambe ta presioso den su bista.

¹⁰ Pero tin bes nos kurason no kier pa nos stòp di sinti nos kulpabel. E por nenga di aseptá e evidensianan di ku nos tin balor den bista di Dios. Lo e por komo si fuera keda papia den nos orea i bisa: ‘Pero tin hopi otro hende ku ta mas ehemplar ku mi. Yehova lo ta hopi desapuntá ora e kompará mi ku nan!’ Yehova no ta kompará. Ademas, su manera di pensa no ta infleksibel ni severo. (Galationan 6:4) Ora e lesa nos kurason, e ta hasié ku hopi kuidou, i e ta balorá tur kos bon ku e topa, maske kon insignifikante esakinan por parse.

11. E manera ku Yehova a trata ku e kaso di Abias ta siña nos kiko tokante Dios?

¹¹ Di tres, segun ku Yehova ta listra nos, ta komo si fuera e ta sefta ku kuidou pa saka loke ta bon. Por ehèmpel, ora Yehova a dekretá ehekushon di henter e dinastia apóstata di Rei Jeroboam, El a duna òrdu pa Abias, un di e yunan di e rei, haña un entiero desente. Dikon? “Den dje . . . algu bon a wòrdu hañá pa ku e SEÑOR Dios di Israel.” (1 Reinan 14:1, 10-13) Den un sentido Yehova a sefta kurason di e hóben anto haña “algu bon” den dje. I maske kon chikitu i insignifikante e pida kos bon ei por tabata, Yehova a haña ku e ta sufisiente importante pa laga skirbié den su Palabra. Asta el a rekompensá e hóben dor di mustr’é un grado apropiá di miserikòrdia apesar ku e tabata miembro di un famia apóstata.

12, 13. (a) Kon e kaso di Rei Josafat ta mustra ku Yehova ta buska loke ta bon den nos, asta ora nos peka? (b) Kon Yehova ta aktua manera un Mayor amoroso den loke ta trata nos bon obranan i nos bon kualidatnan?

¹² Den kaso di e bon rei Josafat nos por haña un ehèmpel asta mas bunita. Ora e rei a aktua na un manera bobo, un profeta di Yehova a bis’é ku el a “trese rabia di SEÑOR riba su mes.” Esei ta un kos serio! Pero Yehova su mensahe no a keda te ei. El a sigui bisa: “Sin embargo, tin algu bon den bo.” (2 Krónikanan 19:1-3) Pues, Yehova su rabia hustu no a sieg’é di manera ku e no por a mira ku tabatin kos bon tambe den Josafat. Di bèrdat tin un diferensia grandi entre Dios i hende imperfekto! Ora nos rabia ku un hende nos tin e tendensia di bira siegu pa su bon kualidatnan. I ora nos peka, e desapunte, bèrgwensa i kulpa ku nos ta sinti por siega nos di manera ku nos no ta mira ni nos propio bon kualidatnan. Pero kòrda ku si nos repentí di nos pikánan i hasi un berdadero esfuerso pa no bolbe kai den nan, Yehova ta pordoná nos.

¹³ Segun ku Yehova ta sefta loke tin den nos, e ta benta e pikánan ei afó meskos ku un hende ku ta koba oro ta benta piedra i tera sin balor afó. I kiko Dios ta hasi ku bo bon kualidatnan i bo bon obranan? Ah, nan ta e “pipitanan di oro” ku e ta warda! Bo a yega di nota kon mayornan amoroso ta warda pintura i proyekto di skol di nan yunan manera tesoro? Tin biaha nan ta keda warda nan pa dékadanan largu, asta despues ku e yunan mes a lubidá riba nan. Yehova ta e Mayor di mas amoroso ku tin. Tanten ku nos keda fiel na dje, nunka e no ta lubidá nos bon obranan i nos bon kualidatnan. De echo, den su bista lo ta inhustu pa lubidá nan; i nunka e no ta inhustu. (Hebreonan 6:10) I tin un otro manera ku e ta sefta nos tambe.

14, 15. (a) Dikon nunka nos imperfekshonnan no ta stroba Yehova di mira nos bon kualidatnan? Duna un ehèmpel. (b) Kiko Yehova lo hasi ku e bon kualidatnan ku e ta topa den nos, i manera kiko su pueblo fiel ta den su bista?

¹⁴ Yehova ta wak mas ayá di nos imperfekshonnan; e ta mira nos potensial. Laga nos tuma un ehèmpel: Hende ku stima obra di arte ta hasi masha hopi esfuerso pa restorá pintura i otro obranan, asta ora nan ta severamente dañá. Por ehèmpel, dia ku un hende a bini ku un rifel i a tira riba un dibuho na balor di 30 mion dòler di Leonardo da Vinci den e Galeria Nashonal di Lònden, Inglatera, niun hende no a pensa mes ku, ya ku e dibuho a daña, mester a tir’é afó numa. Mesora nan a kuminsá traha riba e restorashon dje obra maestro aki di kasi 500 aña. Dikon? Pasobra e ta algu presioso den bista di stimadónan di arte. Abo no bal mas ku un dibuho trahá di kreit i karbon? Den Dios su bista ta sigur ku bo bal mas, apesar di kuantu daño bo imperfekshon heredá a kousa bo. (Salmo 72:12-14) Yehova Dios, e Kreadó ábil di famia humano, lo hasi loke sea ta nesesario pa tur hende ku reakshoná bon na su kuido amoroso ser restorá na perfekshon.—Echonan 3:21; Romanonan 8:20-22.

¹⁵ Sí, tin bes Yehova ta mira bon kualidatnan den nos ku ni nos mes no ta mira. I segun ku nos ta sirbié, e lo pone e bon kualidatnan ei krese te ora ku finalmente nos bira perfekto. Ni maske kon malu e mundu di Satanas a trata nos, Yehova sí ta balorá su sirbidónan fiel. Nan ta deseabel manera rikesa; presioso den su bista.—Hageo 2:7.

16. Kua ta e prueba di mas grandi di Yehova su amor pa nos, i kon nos sa ku e regalo aki ta pa nos personalmente?

¹⁶ Di kuater, Yehova ta demostrá su amor pa nos na hopi manera. Sin duda, e sakrifisio di reskate di Kristu ta e kontesta mas poderoso ku tin kontra e mentira satániko di ku nos no bal nada i ku nos no meresé amor. Nunka nos no mester lubidá ku e agonia di morto ku Hesus a sufri riba e staka di tormento, i e agonia mas grandi ainda ku Yehova a soportá dor di mira su Yu stimá muri, ta prueba di nan amor pa nos. Lamentablemente, hopi hende no por kaba di kere ku e regalo aki ta konta pa nan personalmente. Nan no ta sinti ku nan meres’é. Pero kòrda ku apòstel Pablo a yega di persiguí siguidónan di Kristu. I sin embargo el a skirbi: “E Yu di Dios . . . a stima mi, i a entregá su mes pa mi.”—Galationan 1:13; 2:20.

17. Via ki medionan Yehova ta hala nos na su mes i na su Yu?

¹⁷ Yehova ta demostrá su amor pa nos dor di yuda kada un di nos probechá di e benefisionan di e sakrifisio di reskate di Kristu. Hesus a bisa: “Ni un hende no por bin serka mi, si no ta e Tata ku a manda mi a hal’é.” (Juan 6:44) Sí, ta Yehova personalmente ta hala nos serka su Yu i n’e speransa di bida eterno. Kon? Pa medio di e obra di prediká ku ta alkansá kada un di nos individualmente, i pa medio di Yehova su spiritu santu ku e ta usa pa yuda nos kapta bèrdatnan spiritual i pone nan na práktika apesar di nos limitashonnan i imperfekshonnan. P’esei, Yehova por bisa di nos meskos ku el a bisa di Israel: “Mi a stima bo ku un amor eterno; p’esei ku miserikòrdia mi a hala bo.”—Jeremias 31:3.

18, 19. (a) Kua ta e manera di mas íntimo ku Yehova ta demostrá su amor pa nos, i kiko ta mustra ku e tin interes den kada un di nos? (b) Kon e Palabra di Dios ta sigurá nos ku Yehova ta skucha nos ku empatia?

¹⁸ Kisas ta e privilegio ku nos tin di resa na Dios ta loke ta permití nos sinti su amor n’e manera di mas íntimo. Beibel ta invitá nos tur pa “hasi orashon sin stòp” na Dios. (1 Tesalonisensenan 5:17) E ta skucha. Beibel ta asta yam’é “abo ku ta skucha orashon.” (Salmo 65:2) E no a delegá e funshon aki na niun otro persona, ni sikiera na su propio Yu. Pensa un ratu: E Kreadó di universo ta pidi nos insistentemente pa nos aserk’é den orashon, ku tur frankesa. I kon e ta skucha nos? Na un manera indiferente, sin interes? Apsolutamente!

¹⁹ Yehova tin empatia. Kiko esei kier men? Un fiel kristian di edat a yega di bisa: “Empatia ta ora bo doló ta den mi kurason.” Ta bèrdat ku nos doló ta afektá Yehova? Tokante e sufrimentunan ku su pueblo Israel a pasa aden nos por lesa ku “den tur nan aflikshon e tabata afligí.” (Isaias 63:9) Yehova no a djis mira nan sufri; el a sinti pa nan. Yehova su propio palabranan dirigí na su sirbidónan ta yuda nos komprondé te na ki grado e ta sinti pa nan: “Esun ku mishi ku boso ta mishi ku [“mi,” NW] pret’i wowo.”b (Zakarias 2:8) Esta doloroso! Sí, Yehova ta sinti pa nos. Ora nos pasa den doló, e tambe ta sinti.

20. Ki punto di bista desbalansá nos mester evitá di haña pa nos por kumpli ku e konseho na Romanonan 12:3?

²⁰ Ningun kristian ku un punto di bista balansá lo no usa e evidensia aki di Dios su amor i apresio komo èksküs pa bira halsá òf sintié masha kos. Apòstel Pablo a skirbi: “Dor di e grasia duná na mi, mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio, di akuerdo ku e midí di fe ku Dios a duna bo.” (Romanonan 12:3) Un otro tradukshon ta ekspres’é asin’aki: “Mi por bisa kada un di boso: no pensa ku boso ta mas di loke boso ta, pero sea realístiko.” (BPK) P’esei, maske e kalor di e amor di nos Tata selestial ta asina un deleite pa nos, laga nos mantené sano huisio i kòrda ku nos no a hasi nada pa meresé e amor di Dios.—Lukas 17:10.

21. Ki mentiranan satániko nos mester keda bringa, i ku kua bèrdat bíbliko nos por keda sigurá nos kurason?

²¹ Laga kada un di nos hasi tur loke ta den su poder pa rechasá tur mentira di Satanas, inkluso e mentira di ku nos no ta bal nada i no meresé di ser stimá. Si kosnan ku bo a pasa aden den bida a pone bo sinti ku bo ta un problema muchu grandi asta pa e inmenso amor di Dios, òf ku bo bon obranan ta muchu insignifikante pa hala atenshon asta di su wowonan ku ta mira tur kos, òf ku bo pikánan ta muchu hopi asta pa morto di su Yu stimá por kubri, anto bo a ser gañá. Rechasá e engañonan ei ku tur bo kurason! Laga nos sigui sigurá nos kurason ku e bèrdat ekspresá den e palabranan inspirá aki di Pablo: “Mi ta konvensí ku ni morto, ni bida, ni angelnan, ni prinsipadonan, ni kosnan presente, ni kosnan futuro, ni podernan, ni haltura, ni profundidat, ni ningun otro kos kreá, lo por separá nos for di e amor di Dios ku ta den Kristu Hesus nos Señor.”—Romanonan 8:38, 39.