E Palabra di Yehova Ta Bibu
Puntonan Sobresaliente di e Buki di Mateo
E PROMÉ persona ku a skirbi un relato interesante tokante e bida i ministerio di Hesus ta Mateo. E tabata un persona hopi será ku Hesukristu i tabatin un tempu ku e tabata kobradó di belasting. E Evangelio di Mateo, ku originalmente a ser skirbí na hebreo i despues tradusí na griego, a ser kompletá rònt di aña 41 di nos era. El a sirbi komo un konekshon entre e Skritura Hebreo i e Skritura Griego Kristian.
E Evangelio konmovedor i signifikativo aki, ku aparentemente a ser skirbí prinsipalmente pa lektornan hudiu, ta presentá Hesus komo e Mesias primintí, e Yu di Dios. Si nos presta bon atenshon na su mensahe, lo e fortalesé nos fe den e Dios berdadero, su Yu i Su promesanan.—Heb. 4:12.
“E REINO DI SHELU TA SERKA”
Mateo a enfatisá e tema di Reino i e siñansanan di Hesus. Pero pa e hasi esei, e no por a presentá e susesonan den un órden estriktamente kronológiko. Por ehèmpel, el a relatá e Sermon Riba Seru den e prinsipio di su buki, miéntras ku Hesus a duna e diskurso aki rònt di un aña despues ku el a kuminsá su ministerio.
Durante su ministerio na Galilea, Hesus a hasi milager, duna instrukshon relashoná ku e ministerio na e 12 apòstelnan, denunsiá e fariseonan i a konta ilustrashonnan ku ta resaltá vários aspekto di e Reino. Despues el a sali di Galilea i a yega na “e region di Hudea, na e otro banda di Hordan.” (Mat. 19:1) Na kaminda, Hesus a bisa su disipelnan: ‘Nos ta bai Yerusalèm; i e Yu di hende lo wòrdu kondená na morto. I riba e di tres dia lo e wòrdu lantá.’—Mat. 20:18, 19.
Kontesta Riba Pregunta Bíbliko:
3:16—Den ki sentido “e shelunan a wòrdu habrí” ora Hesus a batisá? Aparentemente, esaki ta indiká ku e ora ei Hesus a rekordá e bida ku e tabatin den shelu promé ku el a bin na tera.
5:21, 22, BPK—Ekspresá rabia ta mas serio ku warda renkor? Hesus a bisa ku un persona ku ta keda rabiá òf warda renkor kontra su ruman ta kometiendo un piká serio. Sin embargo, e situashon ta bira mas serio ora e persona ei ta usa palabranan di despresio pa ekspresá su rabia. I pa motibu di esei, e persona aki ta keda responsabel dilanti un korte mas haltu ku e korte di hustisia lokal.
5:48—Ta realmente posibel pa nos ta “perfekto, meskos ku [nos] Tata selestial ta perfekto”? Sí, den un sentido relativo. Den e kaso aki, Hesus tabata trata e tema di amor i el a bisa su oyentenan pa nan imitá Dios i sea perfekto òf kompletu den nan amor. (Mat. 5:43-47) Kon asina? Dor di ekspandé nan amor pa stima nan enemigunan tambe.
7:16—Na kua “fruta” nos por identifiká e religion berdadero? E fruta aki no ta nos kondukta so. E ta enserá nos kreensianan tambe, esta, e siñansanan ku nos ta pega na dje.
10:34-38—E mensahe bíbliko ta responsabel pa divishon den famia? Di ningun manera. Mas bien, ta e posishon ku miembronan di famia ku no ta kreyente ta tuma ta trese divishon. Podisé nan ta rechasá òf oponé kristianismo, i ta esei ta trese divishon den famia.—Luk. 12:51-53.
11:2-6—Si Juan tabata sa kaba ku Hesus tabata e Mesias debí ku el a tende Dios su bos di aprobashon, pakiko el a puntra si Hesus tabata ‘Esun ku mester a bin’? Kisas Juan a puntra esaki pa e haña un konfirmashon serka Hesus personalmente. Pero fuera di esei, Juan tabata ke sa si tabatin “un otro” ku lo a bin ku poder di Reino i kumpli ku tur speransa ku hudiunan tabatin. Hesus su kontesta a mustra ku lo no tabatin ningun otro persona pa bin despues di dje.
19:28—Kiko “e diesdos tribunan di Israel” ku lo ser husgá ta representá? Nan no ta representá e 12 tribunan di Israel spiritual. (Gal. 6:16; Rev. 7:4-8) E apòstelnan ku Hesus tabata papia kuné lo a bira parti di Israel spiritual i no huesnan di su miembronan. Hesus a sera ‘un pakto ku nan pa un reino,’ i nan mester a bira ‘un reino i saserdotenan pa Dios.’ (Luk. 22:28-30, NW; Rev. 5:10) Ta e miembronan di Israel spiritual mester “husga mundu.” (1 Kor. 6:2) P’esei, e “diesdos tribunan di Israel”—ku esnan riba trononan selestial lo husga—evidentemente ta representá e mundu di humanidat ku no ta forma parti di e klase di rei i saserdote ku e 12 tribunan no-saserdotal riba e Dia di Ekspiashon a prefigurá.—Lev., kap. 16.
Lès pa Nos:
4:1-10. E relato aki ta siña nos ku Satanas ta un persona real i no un kualidat di maldat. E ta usa “e deseo di karni i e deseo di wowo i e orguyo di bida [esta, “kana prònk ku loke bo tin,” BPK]” pa tenta nos. Sin embargo, ora nos ta apliká prinsipionan bíbliko den nos bida, esaki lo yuda nos keda fiel na Dios.—1 Juan 2:16.
5:1–7:29. Sea konsiente di bo nesesidat spiritual. Sea pasífiko. Evitá pensamentunan inmoral. Kumpli ku bo palabra. Ora bo ta hasi orashon, duna interesnan spiritual prioridat riba kosnan material. Sea riku pa ku Dios. Buska promé e Reino i Dios su hustisia. No husga otro hende. Hasi e boluntat di Dios. E Sermon Riba Seru ta kontené lèsnan realmente práktiko!
9:37, 38. Nos mester aktua na armonia ku nos petishon na e Doño pa e “manda trahadó na su kosecha” dor di partisipá ku entusiasmo den e trabou di hasi disipel.—Mat. 28:19, 20.
10:32, 33. Nunka nos mester tin miedu di papia tokante nos fe.
13:51, 52. Unabes nos komprondé e bèrdatnan tokante e Reino, nos tin e responsabilidat di siña otro hende i kompartí e tesoronan aki ku nan.
14:12, 13, 23. Ta masha importante pa nos tin periodonan ku nos ta nos so pa por meditá na un manera signifikativo.—Mar. 6:46; Luk. 6:12.
17:20. Nos mester tin fe pa vense opstákulonan manera seru ku ta stroba nos progreso spiritual i pa trata ku difikultat. Nos no mester ta negligente i keda sin edifiká i fortalesé nos fe den Yehova i su promesanan.—Mar. 11:23; Luk. 17:6.
18:1-4; 20:20-28. Debí na imperfekshon humano i un background religioso ku a duna importansia na prominensia, Hesus su disipelnan tabata masha preokupá tokante ken ta mas grandi. Nos mester kultivá e kualidat di humildat dor di vigilá kontra tendensianan pekaminoso i mantené un punto di bista apropiá di nos privilegio- i responsabilidatnan.
“E YU DI HENDE LO WÒRDU ENTREGÁ”
Na aña 33 di nos era, dia 9 di nisan, Hesus a yega Yerusalèm “sintá riba un buriku.” (Mat. 21:5) E siguiente dia el a bai n’e tèmpel i a hasié limpi. Dia 11 di nisan el a siña hende den e tèmpel, i el a denunsiá e eskriba- i fariseonan. Despues di esei, el a duna su disipelnan “e señal di [su] presensia i dje konklushon dje sistema di kosnan.” (Mat. 24:3, NW) E siguiente dia el a bisa nan: “Boso sa ku aki dos dia ta e fiesta di pasku [hudiu], i e Yu di hende lo wòrdu entregá” pa ser klabá na un staka.—Mat. 26:1, 2.
Tabata dia 14 di nisan. Despues ku Hesus a instituí e Memorial di su binidero morto, el a ser traishoná, arestá i klabá na staka. Tres dia despues di esei, el a ser lantá for di morto. Promé ku el a bai shelu, Hesus resusitá a duna su siguidónan e mandamentu aki: “P’esei, bai i hasi tur e nashonnan disipel di mi.”—Mat. 28:19.
Kontesta Riba Pregunta Bíbliko:
22:3, 4, 9—Na ki tempu e tres invitashonnan pa e fiesta di kasamentu a sali? E promé invitashon pa reuní e miembronan di e klase di brùit, a sali ora Hesus i su siguidónan a kuminsá prediká na aña 29 di nos era i el a sigui te na aña 33. (Rev. 21:1, 2) E di dos invitashon a kuminsá ora spiritu santu a ser dramá na Pentekòste di aña 33, i el a sigui te na aña 36 di nos era. Tur dos invitashon tabata dirigí eksklusivamente na e hudiunan, prosélitonan hudiu i e samaritanonan. Sin embargo, e di tres invitashon a bai pa hende riba kaminda grandi pafó di e stat, esta, pa personanan no-hudiu insirkunsidá. Esei a kuminsá na aña 36 di nos era ku e kombertimentu di Cornelio, un funshonario di ehérsito romano, i el a sigui te den nos tempu.
23:15, NW—Dikon un prosélito òf un persona ku e fariseonan a kombertí, ta “meresedor di Gehena dos bes mas tantu” ku e fariseonan mes? Algun hende ku a bira prosélito di e fariseonan, anteriormente kisas tabata kometé pikánan grave. Sin embargo, ora nan a kombertí i a bira fanátiko manera e fariseonan, nan a bira pió ku nan, podisé bayendo den mas ekstremo kompará ku nan maestronan kondená. P’esei, nan tabata “meresedor di Gehena” asta mas tantu ku e fariseonan hudiu.
27:3-5—Dikon Hudas a sinti remordimentu? No tin ningun indikashon ku Hudas su remordimentu tabata debí na berdadero repentimentu. En bes di buska pordon serka Dios, el a konfesá su malecho serka e saserdotenan prinsipal i e ansianonan. Debí ku Hudas a kometé “un piká ku ta hiba na morto,” ta lógiko ku el a sintié kulpabel i desesperá. (1 Juan 5:16) Su remordimentu tabata resultado di su desesperashon.
Lès pa Nos:
21:28-31. Loke realmente ta konta pa Yehova ta ku nos ta hasi su boluntat. Por ehèmpel, nos mester partisipá ku entusiasmo den e trabou di prediká e Reino i di hasi disipel.—Mat. 24:14; 28:19, 20.
22:37-39. Di un manera breve i al kaso, e dos mandamentunan di mas grandi ta resumí loke Dios ta rekerí di esnan ku ta ador’é.
[Plachi na página 10]
Bo ta partisipá ku entusiasmo den e trabou di kosecha?
[Rekonosementu]
© 2003 BiblePlaces.com
[Plachi na página 10]
Mateo ta enfatisá e tema di Reino