Pakico Testigo Di Jehova Ta Sigi Vigila
“Sigi vigila . . . pasobra boso no sa riba ki dia boso Señor ta bini.” —MATEO 24:42.
E CONSEHO bíblico di: “Sigi vigila,” ta aplica na tur sirbidor di Dios—sea hoven of bieu, sea recién dedicá of cu hopi aña di sirbishi. (Mateo 24:42) Pakico esei ta importante?
2 Cerca e fin dje ministerio di Jesús riba tera, el a profetiza dje siñal di su presencia invisibel cu poder di Reino. (Mateo, capítulo 24 i 25) El a duna detaye claro dje tempo di su presencia real—i suceso na cumplimento dje profecía ta mustra cu e tabata entronizá como Rey den cielo na 1914. El a siñala també na un circunstancia cu ne tempo ei ta pone e sinceridad di nos fe na prueba. Esei ta toca e tempo pe dal paso como Ehecutor pa destrui e mal sistema actual durante e tribulacion grandi di locual Jesús a bisa: “En cuanto e dia i ora ningun hende sa, ni angel di cielo ni e Yiu, sino e Tata so.” Tabata cu esei na mente cu el a bisa: “P’sei, sigi vigila, pasobra boso no sa riba ki dia boso Señor ta bini.”—Mateo 24:36, 42.
3 Ya cu nos no sa e dia i ora cu e tribulacion grandi lo cuminza, esei ta exigi pa nos cu ta bisa cu nos ta cristian, biba como cristian berdadero tur dia. E moda cu bo ta usa bo bida lo resulta den e aprobacion di Señor ora e tribulacion grandi ta yega? Of si bo ta muri promé, lo e cordábo como un hende cu lealmente a sirbi Jehova Dios te ne fin di bo bida actual?—Mateo 24:13; Revelacion 2:10.
Disípel di promé a haci esfuerzo pa keda vigilante
4 Jesucristo mes a pone ehempel di mas excelente di vigilancia spiritual. El a reza cu frecuencia i cu fervor na su Tata. (Lucas 6:12; 22:42-44) Ora dificultad a confronté, el a depende fuertemente riba e guía cu e Scritura ta contene. (Mateo 4:3-10; 26: 52-54) E no a permiti distraccion di su mes for dje trabao cu Jehova Dios a asigná na dje. (Lucas 4:40-44; Juan 6:15) Hende cu ta considera nan mes como sigidor di Jesús ta keda tanto vigilante?
5 Aveces, asta apóstol di Jesús a vacila. Como resultado di demasiado ansha i idea incorrecto, nan tabatin cu reconoce i trata cu desilusion. (Lucas 19:11; Echo 1:6) Promé cu nan a siña di depende henteramente riba Jehova, dificultad di ripiente a confundínan. P’sei, ora nan a detene Jesús, su apóstolnan a hui. Despues riba e anochi ei, Pedro, den miedu, a nenga bez tras bez di sikiera conoce Cristo. E apóstolnan no a tuma na pecho ainda e conseho di Jesús: “Sigi vigila i reza continuamente.” (Mateo 26:41, 55, 56, 69-75) Despues di su resureccion Jesús a usa e Scritura pa fortalece nan fe. (Lucas 24:44-48) I ora cu a parce cu algun di nan lo pone e ministerio cu a ser confiá na nan den e segundo lugar, Jesús a fortalece nan motivacion di concentra riba e trabao mas importante.—Juan 21:15-17.
6 Mas promé, Jesús a adverti su disípelnan di cu nan no por ta parti di mundo. (Juan 15:19) El a consehánan també pa no domina un e otro sino sirbi hunto como rumanan. (Mateo 20:25-27; 23:8-12) Nan a haci caso di tal conseho? Nan a duna preferencia ne trabao cu el a dúnanan?
7 Tan tempo cu e apóstolnan tabata na bida ainda, nan a proteha e congregacion. Historia ta duna testimonio di cu cristian di promé no a métenan den asunto político dje imperio romano i cu nan no tabatin homber halzá como clero. En cambio, nan tabata proclamador ardiente dje Reino di Dios. Na fin dje promé siglo caba, nan a duna testimonio den tur e imperio romano, haciendo disípel den Asia, Europa, i Nortáfrica.—Colosense 1:23.
8 Sin embargo, tal logramento den predicacion no kier men cu no tabata necesario mas pa nan keda vigilante spiritualmente. E binimento profetizá di Jesús tabata leu den futuro ainda. I ora e congregacion a drenta den e segundo siglo EC, situacion a presenta cu a pone den peliger e spiritualidad di hende cristian. Di ki manera?
Esnan cu no a sigi vigila
9 Algun hende cu a drenta den e congregacion a cuminza expresa nan kerimento usando palabra di filosofía griego, pa haci loke nan a predica mas aceptabel pa hende di mundo. Gradualmente, doctrina pagano, tal como e trinidad i inmortalidad natural di alma, a bira parti di un cristianismo contaminá. Esei a resulta den abandonamento dje speranza dje Reino. Pakico? Hende cu a adoptá e kerimento di inmortalidad di alma a conclui cu alma cu ta sigi biba despues di morto di curpa lo recibi tur bendicion dje Reino di Cristo den region spiritual. Pues, nan no a mira e necesidad di vigila pe presencia di Cristo cu poder di Reino.—Compara cu Galatio 5:7-9; Colosense 2:8; 1 Tesalonicense 5:21.
10 Otro desaroyo a enfatizá e situacion. Algun cu a yama nan mes superintendente cristian a cuminza usa nan congregacion como un medio pa alcanza prominencia pa nan mes. Astutamente nan a atribui na nan mes opinion i siñanza un balor igual cu e Scritura of asta superior cu e Scritura. Ora e oportunidad a presenta, tal iglesia apóstata asta a haci su mes disponibel pa sirbi interés dje gobierno político.—Echo 20:30; 2 Pedro 2:1, 3.
E resultado dje aumento di vigilancia
11 Despues di siglonan di abuso di parti dje Iglesia católico romano, algun reformador a protesta den siglo 16. Pero esei no a marca un bolbimento ne adoracion berdadero. Pakico no?
12 Aunque varios grupo protestante a líbranan for di poder di Roma, nan a hiba cu nan e siñanza básico i costumber dje apostasía—e sistema di clero i parokiano, també e kerimento den e trinidad, inmortalidad di alma, i tormento eterno despues di muri. I, mescos cu e Iglesia católico romano, nan a sigi ser un parti di mundo, den alianza estrecha cu elemento político. Pues, nan tabatin e tendencia di rechaza cualkier expectacion dje binimento di Cristo como Rey.
13 Sin embargo, Jesús a profetiza cu despues di morto dje apóstolnan, berdadero heredero di Reino (cu el a compara cu trigo) lo sigi crece hunto cu cristian falso (of, mal yerba) te ne tempo di cosecha. (Mateo 13:29, 30) Nos djawe no por traha un lista cu algun exactitud di tur esnan cu e Doño a considerá como trigo. Pero ta notable cu durante siglo 14, 15, i 16, tabatin hende cu a risca nan mes bida i libertad pa traduci e Bijbel na idioma di pueblo. Otronan no solamente a acepta e Bijbel como e Palabra di Dios sino també a rechaza e trinidad como no bíblico. Algun a rechaza kerimento den e inmortalidad di alma i tormento den e candela di fiernu como totalmente fuera di armonía cu e Palabra di Dios. També, durante siglo 19, como resultado di un aumento di estudio di Bijbel, grupo na América, Alemania, Inglaterra, i Rusia a cuminza expresa e conviccion di cu e tempo pe bolbimento di Cristo tabata cerca. Pero, e mayor parti di nan expectacion a resulta den desilusion. Pakico? Te na un grado grandi, tabata pa motibo cu nan a depende demasiadamente riba hende i insuficientemente riba e Scritura.
Con eseinan a resulta di ser vigilante
14 Anto, na 1870, Charles Taze Russell i algun socio di dje a forma un grupo pa estudio bíblico den Allegheny, Pensilvania. Nan no tabata e proménan pa distingi hopi berdad bíblico cu nan a acepta, pero ora nan tabata studiá, nan a establece e costumber di comproba cuidadosamente tur texto tocante un cierto cuestion.a Nan meta tabata, no pa haya texto comprobando un idea cu nan a inventa, sino di keda sigur cu nan a yega na conclusion cu tabata na armonía cu tur loke e Bijbel a bisa tocante un asunto.
15 Algun hende promé cu nan a realiza cu Cristo lo bolbe invisiblemente como un spiritu. Algun a mira cu e propósito dje bolbimento di Cristo tabata, no pa kima e tera i extermina tur bida humano, sino, mas bien, tabata pa bendiciona tur famía dje tera. Asta tabatin algun hende cu a realiza cu aña 1914 lo marca e fin di tempo gentil. Pero pa studiante di Bijbel asociá cu ruman Russell, eseinan tabata mas cu simplemente punto pa debatimento teológico. Nan a edifica nan bida rond di tal berdad i a haci proclamacion internacional di dje na un escala sin igual den e tempo ei.
16 Sin embargo, nan tabatin cu sigi vigila. Pakico? Por ehempel, aunque nan tabata sa cu profecía bíblico a siñalá na 1914, nan no tabata sa exactamente kico lo sosode ne aña ei. Esei a pónenan na prueba. Den The Watch Tower di 1 di November di 1914, ruman Russell a skirbi: “Láganos corda cu nos ta den un tempo di prueba. . . . Si tin un motibo cu por resulta den un bandonamento di kerimento den Señor i den Su Berdad i kita for di hacimento di sacrificio pe Propósito di Señor, anto no tabata simplemente amor di Dios den nan curazón cu a conmove interés den Señor, sino tabata otro cos; probablemente e speranza di cu e tempo tabata cortico; nan consagracion tabata solamente pa un cierto tempo.”
17 Algun a bandona e sirbishi di Jehova Dios den e tempo ei. Pero A. H. Macmillan tabata uno cu no a hacié. Hopi aña despues, el a admiti francamente: “Tabatin bez cu nos expectacion pa un cierto fecha tabata mas cu loke e Scritura ta garantizá.” Kico a yudé mantene un balanza bíblico? Manera el a bisa, el a realiza cu “ora tal expectacion no a wordu cumplí, esei no a cambia e propósito di Dios.” El a agrega: “Mi a siña cu nos mester admiti nos falta i sigi scudriña e Palabra di Dios pa haya mas iluminacion.”b Humildemente, tal studiante di Bijbel di promé a laga e Palabra di Dios reahusta nan punto di bista.—2 Timoteo 3:16, 17.
18 Durante e añanan despues, nan necesidad di sigi vigila no a mengua. Naturalmente nan tabata sa cu hende cristian no mester ta parti di mundo. (Juan 17:14; Santiago 4:4) Di acuerdo cu esei, nan no a uni cu cristiandad apoyando e Liga di Nacion como un expresion político dje Reino di Dios. Pero, nan no a mira claramente e cuestion di neutralidad cristian te cu 1939.—Mira The Watchtower di 1 di November di 1939.
19 Nan nunca tabatin un grupo di clero, aunque algun anciano eligí a kere cu predicacion den e congregacion tabata tur loke nan mester haci. Sin embargo, cu un deseo intenso pa conforma cu e Scritura, e organizacion a considera e papel di anciano den e luz dje Scritura, haciendo esei bez tras bez mediante artículo den The Watchtower. Cambio tabata hací den e organizacion na armonía cu loke e Scritura a indica.
20 E organizacion henter tabata recibí un preparacion acelerá pa cumpli plenamente cu e trabao cu e Palabra di Dios ta detayá pa nos dia. (Isaías 61:1, 2) Te na ki grado e bon nobo mester ta predicá den nos tempo? Jesús a bisa: “Den tur nacion e bon nobo tin cu ser predicá promé.” (Marco 13:10) Desde un punto di bista humano, e trabao hopi bez a parce imposibel.
21 Sin embargo, cu confianza den Cristo como Cabez dje congregacion, e grupo di esclabo fiel i prudente a bai dilanti. (Mateo 24:45) Cu fe i firmeza nan a informa e pueblo di Jehova Dios di cu tin trabao pa haci. Desde 1919 padilanti, énfasis aumentante tabata duná ne sirbishi di feld. Pa hopi hende, no tabata fácil pa bai di cas pa cas i papia cu hende straño. (Echo 20:20) Pero artículo di estudio tal como “Bendicioná ta esnan sin miedu” (na 1919) i “Tene bon curashi” (na 1921) a yuda algun ruman cuminza den e trabao, cu confianza den Jehova.
22 E yamada, na 1922, pa “anunciá, anunciá, anunciá, e Rey i su reino” a percura estímulo necesario pa duna e trabao e prominencia cu el a merece. Desde 1927 padilanti, anciano cu no a acepta tal responsabilidad bíblico tabata kitá. Rond dje tempo ei, representante biahero dje Sociedad, peregrino, tabata asigná pa ser director regional di sirbishi, dunando instruccion personal na publicador den e sirbishi di feld. Tur hende no por bira pionero, pero na fin di siman hopi ruman tabata dedica henter dia ne sirbishi, lantando madrugá, parando brevemente pa come un sandwich, anto sigiendo den e sirbishi te laat djatardi. Eseinan tabata tempo significante di desaroyo teocrático, i nos ta saca hopi probecho for di un repaso dje manera cu Jehova Dios tabata guia su pueblo. E ta sigi haci esei. Cu su bendicion, e trabao di predica e bon nobo dje Reino establecí lo ser hibá na un conclusion exitoso.
Bo ta sigi vigila?
23 Respondiendo ne guía di Jehova Dios, su organizacion ta sigi alertános na costumber i actitud cu por identificános como parti di mundo, i p’sei den peliger di desparce cuné. (1 Juan 2:17) També, nos individualmente tin cu sigi vigila, aceptando e guía di Jehova. Además, Jehova Dios ta dúnanos instruccion tocante bibando i trahando hunto. Su organizacion a yúdanos aumenta nos aprecio pa loke amor cristian realmente ta nifica. (1 Pedro 4:7, 8) Nos vigilancia continuo ta exigi pa nos haci esfuerzo sincero pa aplica tal conseho, apesar di imperfeccion humano.
24 Consistentemente, e esclabo fiel i prudente ta hácinos corda: “Confia den Jehova cu tur bo curazón i no depende di bo mes comprendimento.” (Proverbio 3:5) “Reza sin fin.” (1 Tesalonicense 5:17) Nos ta ser consehá pa funda nos decisionan riba e Palabra di Dios, laga su palabra ser ‘un lampi pa nos pia i un luz pa nos camina.’ (Salmo 119:105) Amorosamente, nos ta ser animá pa pone promé den nos bida e predicacion dje bon nobo dje Reino di Dios, e trabao cu Jesús a profetiza pa nos dia.—Mateo 24:14.
25 Sí, e esclabo fiel i prudente siguramente ta sigi vigila. Nos individualmente també tin cu sigi vigila. Como resultado di haci esei, láganos ser hayá hunto cu esnan cu ta pará aprobá dilanti dje Yiu di hende ora e ta bini pa ehecuta huicio.—Mateo 24:30; Lucas 21:34-36.
[Footnotes]
a Faith on the March, di A. H. Macmillan, Prentice-Hall, Inc., 1957, bladji 19-22.
b Mira The Watchtower di 15 di Augustus di 1966, bladji 504-510.
[Study Questions]
1. Na ken e conseho “sigi vigila” ta aplica?
2, 3. (a) Jesús a duna detaye claro di cua siñal, i cumplimento dje profecía a mustra kico? (b) Cua circunstancia mencioná den Mateo 24:42 ta pone na prueba e sinceridad di nos fe, i di ki manera?
4. Kico nos por siña for dje ehempel di Jesús di vigilancia spiritual?
5. (a) Pakico apóstol di Jesús tabatin e problema di mantene nan balanza spiritual? (b) Jesús a duna su apóstolnan cua yudanza despues di su resureccion?
6. Mas promé, Jesús a spierta su disípelnan tocante cua dos trampa?
7, 8. (a) Con e registro di hende cristian dje promé siglo ta mustra cu nan a tuma na pecho e conseho di Jesús? (b) Pakico vigilancia spiritual continuo tabata importante?
9, 10. (a) Despues di morto dje apóstolnan, cua suceso a mustra cu hopi hende yamá cristian no a sigi vigila? (b) Cua texto citá den e paragraf por a yuda hende yamá cristian keda spiritualmente fuerte?
11, 12. Pakico e Reformacion Protestante no a indica un bolbimento ne adoracion berdadero?
13. (a) Kico ta mustra cu algun hende berdaderamente a apreciá e Palabra di Dios? (b) Durante siglo 19, ki suceso a yega di ser di interés special pa algun hende yamá cristian? (c) Pakico hopi a experimenta desilusion?
14. Splica e moda di studia e Bijbel cu C. T. Russell i socio di dje a usa.
15. (a) Kico otro hende además di ruman Russell a yega di realiza? (b) Kico a identifica Studiante di Bijbel como distinto di eseinan?
16. Na aña 1914, pakico ruman Russell a skirbi: “Nos ta den un tempo di prueba”?
17. Con A. H. Macmillan, i otronan mescos cuné, a mantene nan balanza spiritual?
18. Con vigilancia cristian a produci beneficio progresivo den e asunto di no ser parti di mundo?
19. Cua beneficio den e superintendencia dje congregacion tabata e resultado dje vigilancia continuo dje organizacion?
20-22. Con e organizacion completo a ser prepará progresivamente pa cumpli cu e trabao profetizá di proclama e Reino mundialmente?
23. En cuanto amor cristian i separacion for di mundo, con nos por demonstra individualmente cu nos ta sigi vigila?
24, 25. Di ki manera vital nos mester sigi vigila, cu cua prospecto na bista?
[Caption on page 23]
Jesús a keda ocupá den e trabao cu su Tata a asigná na dje. També el a haci oracion fervoroso
[Caption on page 24]
Charles Taze Russell na su edad avanzá
[Caption on page 25]
Mas cu 4.700.000 proclamador di Reino ta activo den tur e mundo
[Caption on page 26]
Un repaso
◻ Segun cu Mateo 24:42 ta mustra, pakico nos tin cu sigi vigila?
◻ Con Jesús i sigidor di dje di e promé siglo a mantene vigilancia spiritual?
◻ Desde 1870, kico a sosode door cu sirbidor di Jehova Dios a sigi vigila?
◻ Kico ta duna prueba cu nos individualmente ta sigi vigila?