Kico e Reda Barridor i Piscá ta Nifica pa Bo?
“Ta duná na boso di comprende secreto sagrado dje reino di cielo.”—MATEO 13:11.
1, 2. Pakico nos por ta interesá den comparacion di Jesús?
BO TA gusta descubrí algo cu tabata wardá como secreto of ta gusta resolve rompecabeza? Con bo ta sintíbo si hacimento di esei por yudábo comprende mas claramente e papel cu bo ta hunga den e propósito di Dios? Felizmente, bo por tene e privilegio di comprende algo cu ta mashá balioso mediante un comparacion cu Jesús a conta. E comparacion a confundi hopi hende cu a scuché i desde e tempo ei a intrigá un cantidad incontable di otronan, pero bo por comprendele.
2 Ripara loke Jesús a bisa den Mateo capítulo 13 tocante su uso di comparacion. Su disípelnan a puntra: “Pakico bo ta papia cu nan usando comparacion?” (Mateo 13:10) Sí, pakico Jesús a usa comparacion cu e mayor parti di hende no por comprende? El a contestá den versículo 11 te 13: “Ta duná na boso di comprende secreto sagrado dje reino di cielo, pero no ta duná ne hendenan ei. . . . P’sei, mi ta papia cu nan usando comparacion, pasobra mirando, nan ta mira en bano, i tendiendo, nan ta tende en bano, ni no ta capta e sentido di dje.”
3. Di ki manera comprendimento di comparacion di Jesús por ta beneficioso pa nos?
3 Anto Jesús a aplica Isaías 6:9, 10, cu a pinta un pueblo cu tabata spiritualmente sordu i ciegu. Pero, nos no tin cu ser asina. Si nos ta comprende i ta anda conforme cu e comparacion, nos por ta mashá feliz—awor i te na eternidad den futuro. Jesús ta ofrecénos e sigiente garantía caloroso: “Boso wowo ta feliz pasobra nan ta mira, i boso orea pasobra nan ta tende.” (Mateo 13:16) E garantía ta aplica na tur comparacion di Jesús, pero láganos enfoca riba e comparacion breve dje reda barridor, skirbí den Mateo 13:47-50.
Un Comparacion cu un Nificacion Profundo
4. Kico Jesús a conta den su comparacion skirbí den Mateo 13:47-50?
4 “E reino di cielo ta mescos cu reda barridor bahá den lamá i ta coge piscá di tur sorto. Ora el a yena, nan a halé riba tera i, sintando, nan a recoge esnan bon den macuto, pero a tira afó esnan cu no ta sirbi. Asina lo tá den e conclusion dje sistema di cosnan: angel lo sali i separa hende malbado for dje hustonan i lo tíranan den fornu di candela. Ei ta unda lo tin nan yoramento i mordimento riba nan djente.”
5. Cua clase di pregunta por presenta en cuanto e nificacion dje comparacion tocante reda barridor?
5 Probablemente bo a mira hende pisca cu reda, por lo menos den cine of na television, di manera cu no ta difícil pa bo visualizá e comparacion di Jesús. Pero, kico di detaye i e nificacion di dje? Por ehempel, Jesús a bisa cu e comparacion ta tocante e “reino di cielo.” Pero, siguramente e no kier men cu “tur sorto” di hende, tanto esnan bon como esnan cu no ta sirbi, of hende malbado, lo ta den e Reino. Además, ken ta haci e piscamento? Tal piscamento i e separacion a sosode den e dia di Jesús, of e por ta limitá na nos tempo, “e conclusion dje sistema di cosnan”? Bo ta mira bo mes den e comparacion? Con bo por evita di ser hunto cu hende cu ta yora i ta morde riba nan djente?
6. (a) Pakico nos mester ta intensamente interesá pa comprende e comparacion dje reda barridor? (b) Kico ta clave pa comprendimento di dje?
6 Pregunta asina ta mustra cu en todo caso e comparacion no ta tanto senciyo. Pero, no lubida esaki: “Boso wowo ta feliz pasobra nan ta mira, i boso orea pasobra nan ta tende.” Láganos purba di investiga su nificacion pa nos orea no ser sordu ni nos wowo no ser ciegu en cuanto su importancia. Realmente, nos tin un yabi vital pa habri su nificacion. E artículo anterior a conta dje invitacion cu Jesús a duna piscador galileo pa bandona nan piscamento i acepta e trabao spiritual como “piscador di hende.” (Marco 1:17) El a bísanan: “Djawor padilanti boso lo pisca hende na bida.”—Lucas 5:10.
7. Kico Jesús tabata ilustrá ora el a papia tocante piscá?
7 Di acuerdo cu esei, piscá den e comparacion ta representa hende. Pues, ora versículo 49 ta menciona separacion di malbado for di hustonan, e no ta referi na bestia bon i malu di lamá, sino na hende husto i inhusto. Di igual manera, versículo 50 no mag hácinos kere cu bestia di lamá ta yora of ta morde riba nan djente. No. E comparacion ta tocante piscamento di hende i e separacion di nan despues, locual ta mashá serio, manera e resultado ta mustra.
8. (a) Kico nos por siña for di loke ta pasa piscá cu no ta sirbi? (b) Den bista di loke tabata bisá tocante piscá cu no ta sirbi, kico nos por conclui tocante e Reino?
8 Ripara cu piscá cu no ta sirbi, es decir, hende malbado, lo ser tirá den e fornu di candela, unda nan lo tin cu yora i morde riba nan djente. Na otro ocasion Jesús a enlazá tal yoramento i mordimento riba djente cu hende pafó dje Reino. (Mateo 8:12; 13:41, 42) Den Mateo 5:22 i 18:9, Jesús asta a menciona “Gehena di candela,” nificando destruccion permanente. Esei no ta mustra cu ta cuanto vital pa capta e sentido dje comparacion i anda di acuerdo cuné? Nos tur sa cu no tin hende malbado den e Reino di Dios, ni lo no tin. P’sei, ora Jesús a bisa cu e “reino di cielo ta manera un reda barridor,” e tabatin cu nifica cu en relacion cu e Reino di Dios, tin un rasgo manera un reda cu ta ser tirá pa coge varios sorto di piscá.
9. Di ki manera e comparacion tocante e reda barridor ta enbolbe angel?
9 Despues di a tira e reda i coge piscá, tabatin un trabao di separacion. Segun Jesús, ken ta haci e trabao? Mateo 13:49 ta identifica tal piscador i separador como angel. Pues, Jesús tabata bísanos di superintendencia di angel riba un instrumento na tera cu ta ser usá pa identifica hende—algun excelente i apropiado pe Reino di cielo, otronan cu no ta sirbi pa tal yamada.
Piscamento—Na Ki Tempo?
10. Cua razonamento por yúdanos determina cu e piscamento a extende pa un tempo basta largu?
10 E contexto ta yúdanos sa na ki tempo esei ta ser hací. Net promé cu esei, Jesús a conta un comparacion tocante sembramento di bon simía, pero despues mal yerba tabata sembrá den e cunucu, cu ta simboliza e mundo. El a splica den Mateo 13:38 cu e bon simía ta representa “yiunan dje reino; pero e mal yerba ta yiunan dje malbado.” Nan a crece banda di otro pa hopi siglo, te cu e cosecha den e conclusion dje sistema di cosnan. Anto e mal yerba tabata separá i kimá despues. Comparando esei cu e cuenta dje reda barridor, nos ta mira cu e cogimento di piscá den e reda tabatin cu extende pa hopi tempo.—Mateo 13:36-43.
11. Con un trabao di piscamento internacional a cuminza den e promé siglo?
11 Segun e comparacion di Jesús, e reda a coge piscá sin haci distincion, es decir, e reda barridor a coge bon piscá i també piscá cu no ta sirbi. Mientras cu e apóstolnan tabata na bida, angel cu a guia e trabao di pisca a usa e organizacion cristian di Dios pa coge “piscá” cu a bira cristian ungí. Bo por bisa cu promé cu Pentecoste di aña 33 EC, e piscamento di Jesús pa coge hende a resulta den rond di 120 disípel. (Echo 1:15) Pero, despues di establecimento dje congregacion di cristian ungí, piscamento a cuminza cu e instrumento cu e reda barridor a representa, i esei a coge miles di piscá excelente. Desde aña 36 EC, e piscamento a plama leu te na awa internacional, ora gentil tabata atraí na cristianismo i a bira miembro dje congregacion ungí di Cristo.—Echo 10:1, 2, 23-48.
12. Kico a desaroya despues di morto dje apóstolnan?
12 Durante e siglonan despues di morto dje apóstolnan, tabatin hende cristian cu a lucha pa conoce e berdad divino i pega na dje. Por lo menos algun di eseinan tabatin e aprobacion di Dios, i el a ungínan cu spiritu santo. Sin embargo, e morto dje apóstolnan a kita e frena i a permiti e desaroyo di un apostasía na tur parti. (2 Tesalonicense 2:7, 8) Un organizacion a crece cu no tabata digno di ser yamá e congregacion di Dios. El a pretende falsamente di ser e nacion santo ungí cu e spiritu di Dios pa goberna cu Jesús.
13. Pakico nos por bisa cu cristiandad a hunga un papel den tiramento di reda barridor?
13 Bo ta kere cu hende infiel cu a pretende di ser cristian a hunga un papel den e comparacion dje reda barridor? Wel, tin un motibo pa contestá cu sí, tabata asina. E reda barridor simbólico a inclui cristiandad. Ta cierto cu pa siglonan e Iglesia Catolico a purba di stroba pueblo di haya Bijbel. No obstante, através dje siglonan miembro di cristiandad a hunga papel clave traduciendo, copiando, i plamando e Palabra di Dios. Despues, religion a forma of a apoya sociedad bíblica, cu a traduci e Bijbel na idioma di tera remoto. També, nan a manda misionero médico i maestro, cu a cumpra hende cu cuminda. Esei a recoge un gran cantidad di piscá cu no ta sirbi, cu no tabatin e aprobacion di Dios. Pero, por lo menos esei a pone miyones di hende no cristian na contacto cu e Bijbel i cu un forma di cristianismo, aunque e tabata corrupto.
14. Di ki manera cierto trabao cu religion di cristiandad a haci a contribui ne piscamento pa bon piscá?
14 Mientras tanto, hende fiel cu tabata plamá a pega ne Palabra di Dios i a haci tanto esfuerzo posibel. Na cualkier tempo dado, nan a compone e berdadero congregacion ungí di Dios riba tera. I nos por keda sigur cu nan també tabata coge piscá, of hende, hopi di locual Dios a considera excelente i a ungí cu su spiritu. (Romano 8:14-17) Tal disípel excelente creyente den cristianismo por a hiba e berdad bíblico na hopi hende cu religion falso a cumprá of cu a gana conocimento bíblico limitá for dje Scritura cu sociedad bíblica di cristiandad a traducí na nan idioma. Ta cierto cu e coleccion di piscá excelente a sigi, aunque e mayor parti cu cristiandad a recoge no ta sirbi desde e punto di bista di Dios.
15. Específicamente, kico e reda barridor dje comparacion a representa?
15 Pues, e reda barridor ta representa un instrumento terrenal cu ta pretende di ser e congregacion di Dios i cu ta coge piscá. E ta inclui tanto cristiandad como e congregacion di cristian ungí, cua congregacion a sigi coge piscá excelente, bao dje guía invisibel di angel, di acuerdo cu Mateo 13:49.
Nos Tempo ta Special
16, 17. Pakico e tempo den locual nos ta biba ta tanto importante den e cumplimento dje comparacion di Jesús tocante e reda barridor?
16 Láganos considera awor e factor di tempo. Pa siglonan e instrumento usá como reda barridor a coge bon piscá i també hopi di esnan cu no ta sirbi, of hende malbado. Anto e tempo a yega ora angel a cuminza participa den un trabao importante di separacion. Na ki tempo? Wel, versículo 49 ta bisa claramente cu esei ta durante e “conclusion dje sistema di cosnan.” Esei ta cuadra cu loke Jesús a bisa den e comparacion di carné i cabrito: “Ora e Yiu di hende ta yega den su gloria, i tur angel hunto cuné, anto lo e sinta riba su trono glorioso. I tur nacion lo ser reuni dilanti dje, i lo e separa hende un for di otro, mescos cu wardador ta separa carné foi cabrito.”—Mateo 25:31, 32.
17 P’sei, di acuerdo cu Mateo 13:47-50, un trabao importante di separacion bao di guía di angel a sigi desde e “conclusion dje sistema di cosnan” a cuminza na 1914. Esei a bira specialmente claro despues di 1919, ora e resto dje ungínan a sali liber for di esclabitud spiritual temporal i a bira un instrumento mas efectivo pa haci e trabao di piscamento.
18. Di ki manera bon piscá tabata recogí den macuto?
18 Kico tabatin cu sosode e bon piscá despues dje separacion? Versículo 48 ta bisa cu angel cu a pisca i a separá “a recoge e bon [piscá] den macuto, pero esnan cu no ta sirbi, nan a tira afó.” Macuto ta un lugar di proteccion unda bon piscá ta poní. Esei ta sosode den nos tempo? Sigur cu sí. Ora bon piscá simbólico ta ser cogí bibo, nan ta ser huntá hunto den congregacion di cristian berdadero. Tal congregacion semehante di macuto ta yuda protehá i conserbánan pa sirbishi divino, no ta berdad? No obstante, algun hende por puntra: ‘Mashá bon mes, pero kico esei tin cu ber cu mi bida actual i den futuro?’
19, 20. (a) Pakico ta vital awe pa capta e sentido dje comparacion? (b) Cua piscamento importante a ser hací desde 1919?
19 E cumplimento di loke tin den e ilustracion no tabata limitá ne siglonan entre e tempo dje apóstolnan i 1914. Durante e tempo ei, e instrumento semehante di reda barridor a yega di recoge dos clase di hende cu a pretende di practica cristianismo, tanto esnan falso como esnan berdadero. Sí, el a recoge bon piscá i esnan cu no ta sirbi. Además, e trabao di separacion cu angel ta haci no a termina ayá rond di 1919. Di ningun manera! Den algun aspecto e comparacion dje reda barridor ta aplica te na nos mes tempo. E ta afecta nos i també nos futuro inmediato. Ta importante pa nos comprende con i pakico ta asina si nos kier pe sigiente palabra aplica na nos: “Feliz ta boso wowo pasobra nan ta mira, i boso orea pasobra nan ta tende” cu comprendimento.—Mateo 13:16.
20 Por tá cu bo sa cu despues di 1919 e resto ungí a ocupánan den e trabao di predica den cooperacion cu e angelnan, cu a sigi usa e reda barridor simbólico pa hala piscá riba tera, pa separa bon pisca for di esnan cu no ta sirbi. Informe dje tempo ei ta mustra cu e reda simbólico cogiendo bon piscá pa ser ungí cu e spiritu di Dios a sigi, mientras cu el a coge e últimonan dje 144.000. (Revelacion 7:1-4) Pero, tabata rond di 1935 cu e recogimento di bon piscá pa ungimento cu spiritu santo a termina básicamente. Ne tempo ei, e congregacion dje resto ungí tabatin cu tira e reda afó, den un sentido, i sinta cu man cruzá, sperando nan recompensa celestial? Di ningun manera!
Bo Participacion den e Piscamento
21. Cua otro piscamento a wordu hací den nos tempo? (Lucas 23:43)
21 E comparacion di Jesús dje reda barridor a enfocá riba bon piscá cu lo ser recompensá cu un lugar den e Reino di cielo. Sin embargo, además dje comparacion, tin otro piscamento simbólico cu ta sosode na escala grandi, manera e artículo anterior a ilustra. Tal piscamento, no ta pe bon piscá ungí mencioná den e comparacion di Jesús, sino pa piscá simbólico pa ser cogí bibo i duná e speranza maraviyoso di bida den Paradijs riba tera.—Revelacion 7:9, 10; compara cu Mateo 25:31-46.
22. Nos por disfruta di cua resultado feliz, i cua alternativa tin?
22 Si esei ta e speranza cu bo tin, anto bo por alegrá cu Jehova Dios a permiti un trabao di piscamento sigi te awor. Esei a haci posibel pa bo obtene un prospecto maraviyoso. Prospecto? Sí, esei ta e palabra apropiado pa usa, siendo cu e resultado ta depende dje mantenecion di nos fieldad na Esun cu ta dirigi e esfuerzo continuo di piscamento. (Sofonías 2:3) No lubida cu den e comparacion tur piscá cu e reda barridor a coge no a alcanza un bon fin. Jesús a bisa cu esnan cu no ta sirbi, of hende malbado, ta wordu separá for dje hustonan. Pakico? Den Mateo 13:50, Jesús a pinta e consecuencia serio pa piscá cu no ta sirbi, of esnan malbado. Nan lo ser tirá den e fornu di candela, loke ta nifica destruccion eterno.—Revelacion 21:8.
23. Kico ta haci e trabao di pisca awe tanto importante?
23 Tin un futuro glorioso pe bon piscá ungí, i també pe piscá simbólico cu por biba pa semper riba tera. Pa un bon motibo, anto, e angelnan ta percura pa un trabao di piscamento exitoso ser hací awor mes rond di mundo. I cuanto piscá nan ta coge! Bo por wel bisa cu na su manera, e ta un cogimento tanto milagroso como e cogimento di piscá mes cu e apóstolnan a disfruta ora nan a tira nan reda den obedencia na Jesús.
24. Nos mester deseá di haci kico respecto e piscamento spiritual?
24 Bo ta participa tanto activamente posibel den e trabao di piscamento spiritual cu ta salba bida? Apesar dje alcance di nos participacion individual te awor, cada un di nos cu beneficio por tira bista riba loke ta ser lográ mundialmente den e trabao grandi di pisca i salba bida cu ta ser hací awor. E bista di esei mester estimulános pa manifesta e mayor celo den tiramento di reda pa pisca durante e dianan net dilanti nos!—Compara cu Mateo 13:23; 1 Tesalonicense 4:1.
Bo ta Corda e Puntonan Aki?
◻ E dos clase di piscá den e comparacion di Jesús dje reda barridor ta representa kico?
◻ Den ki sentido religion di cristiandad a hunga papel den tiramento di reda barridor?
◻ Pakico e piscamento cu ta sosode den nos tempo ta tanto crítico?
◻ E comparacion dje reda barridor mester impulsa cada un di nos pa haci ki clase di examinacion propio?
[Plachi na página 18]
Hende a pisca den Lamá di Galilea pa siglonan
[Rekonosementu]
Pictorial Archive (Near Eastern History) Est.