E Sanacion Milagroso di Humanidad Ta Cerca

“NUNCA nos a mira un cos asina.” Esei ta loke e testigonan ocular dje sanacion milagroso i instantáneo di un homber paralítico cu Jesus a efectuá, a bisa. (Marco 2:12) Tambe Jesus a cura hende ciegu, surdu i coho, i su siguidónan a haci mescos. Cu ki poder Jesus a haci esei? Ki papel fe a hunga? Ki lus e experencianan aki dje promé siglo ta tira riba sanacion milagroso awe?—Mateo 15:30, 31.

“Bo Fe A Curá Bo”

Sanadónan di fe djawendia gusta cita Jesus su declaracion na un muher cu a sufri pa 12 aña di un derame di sanger i kende a bini cerca dje pa curacion: “Bo fe a curá bo.” (Lucas 8:43-48) Jesus su declaracion a indicá cu e muher su curacion a dependé di su fe? Esei tabata un ehempel di “sanacion di fe” manera e ta ser practicá awe?

Ora nos lesa e registro bíblico cuidadosamente, nos ta mira cu na mayoria ocasion Jesus i su disipelnan no a rekirí p’e enfermonan declará nan fe promé cu nan ser curá. E muher citá ariba a bini i, sin cu el a bisa Jesus nada, a mishi ketu-ketu cu su paña for di patras i “un bes su derame di sanger a para.” Na un otro ocasion, Jesus a sana un homber cu tabata entre esnan cu a bini pa arest’é. Asta el a sana un homber cu no tabatin idea ken Jesus tabata.—Lucas 22:50, 51; Juan 5:5-9, 13; 9:24-34.

Ki papel, anto, fe a hunga? Ora Jesus i su disipelnan tabata den e distrito di Tiro i Sidon, un muher di Fenicia a bini i a sclama: “Tene misericordia di mi, Señor, Yu di David. Mi yu muher ta teriblemente endemoniá.” Imaginá su desesperacion segun cu e tabata roga: “Señor, yudá mi!” Yen di compasion, Jesus a contestá: “O muher, bo fe ta grandi; laga sosodé cu bo manera bo ta deseá.” I su yu muher a ser saná “desde e ora ei.” (Mateo 15:21-28) Claramente, fe tabata enbolbí, pero ken su fe? Tuma nota cu Jesus a elogiá fe dje mama, no dje yu enfermo. I fe den kico? Dor di dirigí su mes na Jesus como “Señor, Yu di David,” e muher tabata reconociendo públicamente cu Jesus tabata e Mesías primintí. Esei no tabata un simpel expresion di fe den Dios of fe den e poder dje sanadó. Ora Jesus a bisa, “Bo fe a curá bo,” e tabata kier men cu sin fe den dje como e Mesías, esnan afligí lo no a bini cerca dje pa ser saná.

For dje ehempelnan bíblico aki, nos por mira cu e sanacion cu Jesus a efectuá tabata hopi diferente for di loke generalmente nos ta mira of tende hende pretendé awe. No tabatin un despliegue emocional fuerte—gritamentu, cantamentu, yoramentu duru, baimentu leu i cosnan asina—for dje multitudnan ni ningun excitacion dramático di parti di Jesus. Ademas, Jesus nunca a keda sin sana hende enfermo bou dje pretexto cu nan tabata falta fe of cu nan ofrendanan monetario no tabata suficiente.

Curacionnan Mediante e Poder di Dios

Con e sanacionnan di Jesus i su disipelnan a tuma lugá? “E poder di Jehova tabata ei p’e haci sanacion,” Bijbel ta contestá. (Lucas 5:17) Despues di un sanacion, Lucas 9:43 ta bisa, “nan tur a cuminsá keda babucá dje poder mahestuoso di Dios.” Apropiadamente, Jesus no a dirigí atencion na su mes como e sanadó. Na un ocasion el a bisa un homber cu el a libra for di molester di demoño: “Bai cas cerca bo famianan, i conta nan tur loke Jehova a haci pa bo i e misericordia cu el a tene di bo.”—Marco 5:19.

Siendo cu Jesus i e apostelnan a sana cu poder di Dios, ta fácil pa mira pakico esun cu a ser curá no semper tabatin mester di fe pa ser saná. Sin embargo, fe fuerte di parti dje sanadó sí tabata necesario. P’esei, ora Jesus su siguidónan no por a expulsá un demoño particularmente poderoso, Jesus a bisa nan e motibu: “Pa motibu di boso poco fe.”—Mateo 17:20.

Propósito di Sanacion Milagroso

Maske Jesus a haci hopi sanacion atrabes di su ministerio terenal, e no tabata siguiendo na promé lugá un ‘ministerio di sanacion.’ Su sanacion milagroso—pa cua e nunca a cobra e hendenan ni pidi ningun donacion—tabata secundario na su interes principal, esta di ‘predicá e bon nobo di reino.’ (Mateo 9:35) E registro ta bisa cu na un ocasion “el a ricibí nan amablemente i a cuminsá papia cu nan tocante e reino di Dios, i el a sana esnan cu tabatin mester di curacion.” (Lucas 9:11) Den e relatonan di Evangelio, bes tras bes Jesus a ser yamá “Maestro” pero nunca “Sanador.”

Pakico, anto, Jesus a efectuá curacionnan milagroso? Esei tabata principalmente pa establecé su identidad como e Mesías primintí. Ora Juan Bautista a ser encarcelá inhustamente, e tabata kier un garantia cu el a cumpli cu loke Dios a mand’é haci. El a manda su mes disipelnan cerca Jesus i a puntra: “Bo ta Esun Cu Ta Bini, of nos tin cu spera un otro?” Ripará loke Jesus a bisa Juan su disipelnan: “Bai boso caminda i informá Juan loke boso ta tende i ta mira: E ciegunan ta mira atrobe i e cohonan ta cana rond, e leprosonan ta ser hací limpi i e surdunan ta tende, i e mortonan ta ser lantá, i esnan pober ta haña e bon nobo declará na nan.”—Mateo 11:2-5.

Sí, e echo cu Jesus a efectuá no solamente sanacion sino tambe e otro obranan milagroso registrá den e Evangelionan a establecé su identidad firmemente como “Esun Cu Ta Bini,” e Mesías primintí. No tabatin necesidad pa ningun hende “spera un otro.”

Curacionnan Milagroso Awe?

Nos mester spera, anto, pa Dios duna prueba di su poder awe mediante curacionnan? No. Cu e obranan milagroso cu Jesus a efectuá cu poder di Dios, el a establecé fuera di tur duda cu e tabata e Mesías cu Dios a primintí cu lo a bini. Jesus su obranan poderoso ta registrá den Bijbel pa tur hende lesa. No ta necesario pa Dios duna prueba di su poder dor di ripití e obranan ei na tur generacion di hende.

Interesantemente, curacionnan i otro obranan milagroso tabata convincente solamente te na un cierto grado. Asta algun testigo ocular di Jesus su milagernan no a kere cu e tabatin e apoyo di su Tata celestial. “Aunke el a haci asina hopi señal dilanti nan, nan no tabata pone fe den dje.” (Juan 12:37) P’e motibu ei, despues cu apostel Pablo a considerá e vários donnan milagroso—profetisá, papia den lenga, sana i cosnan asina—cu Dios a duna vários miembro dje congregacion cristian di promé siglo, el a ser inspirá pa bisa: “Sea cu tin don di profetisá, nan lo ser eliminá; sea cu tin lenga, nan lo caba; sea cu tin conocimentu, lo e ser eliminá. Pasobra nos tin conocimentu parcial i nos ta profetisá parcialmente; pero ora loke ta completo yega, loke ta parcial lo ser eliminá.”—1 Corintionan 12:28-31; 13:8-10.

Naturalmente, fe den Dios ta vital pa nos bienestar. Sin embargo, si un persona basa su fe riba promesanan falsu di curacion, esei lo hiba solamente na decepcion. Ademas, relacioná cu e tempu di fin, Jesus a duna e spiertamentu aki: “Lo lanta Cristonan falsu i profetanan falsu i lo haci señalnan i milagernan grandi pa desviá, si ta posibel, asta e scogínan.” (Mateo 24:24) Ademas di trabou di charlatan i engaño, lo tin tambe manifestacionnan di poder demoniaco. Como resultado, pretensionnan di sucesonan inexplicabel no mester sorprendé nos, i esakinan siguramente no ta base pa berdadero fe den Dios.

Siendo cu ningun hende awe ta efectuá curacionnan manera Jesus a haci, nos ta den un desbentaha? Di ningun manera. Realmente, esnan cu Jesus a sana cu tempu por a bira malu atrobe. Nan tur a bira bieu i a muri. E beneficionan di sanacion cu nan a ricibí tabata di relativamente corto duracion. Sin embargo, Jesus su curacionnan milagroso tin nificacion duradero den e sentido cu nan a prefigurá futuro bendicionnan.

P’esei, despues di a examiná e Palabra di Dios, Bijbel, Alexandre i Benedita, mencioná den e artículo anterior, no a pone nan fe mas den sanacion di fe i curacionnan spiritista di actualidad. No obstante, nan ta convencí cu sanacionnan milagroso no ta cos di pasado. Con asina? Mescos cu miyones di persona rond mundu, nan ta anhelá n’e bendicionnan di sanacion bou dje Reino di Dios.—Mateo 6:10.

Lo No Tin Enfermedad ni Morto Mas

Manera nos a mira anteriormente, e meta principal di Jesus su ministerio no tabata pa sana e enfermonan i haci otro milagernan. Mas bien, el a haci e predicacion dje bon nobo dje Reino di Dios su trabou principal. (Mateo 9:35; Lucas 4:43; 8:1) E Reino ei ta e medio mediante cua Dios lo realisá e sanacion milagroso di humanidad i deshací di tur e daño cu picá i imperfeccion a causa n’e famia humano. Con i na ki tempu lo e realisá esaki?

Prediciendo e futuro lehano, Cristo Jesus a duna su apostel Juan un vision profético: “Awor a sosodé e salbacion i e poder i e reino di nos Dios i e autoridad di su Cristo!” (Revelacion 12:10) Tur evidencia ta mustra cu desde 1914 e gran opositor di Dios, Satanas, a ser tirá abou den becindario dje tera, i e Reino ta funcionando awor como un realidad! Jesus a ser instalá como e Rey dje Reino Mesiánico i awor ta cla pa haci cambionan grandi riba tera.

Den e futuro masha cercano, Jesus su gobiernu celestial lo goberná riba un hustu sociedad humano nobo, en efecto “un tera nobo.” (2 Pedro 3:13) Con e condicionnan lo ta e tempu ei? Ata aki un glorioso bistaso di antemano: “Mi a mira un shelu nobo i un tera nobo; pasobra e shelu anterior i e tera anterior a pasa bai . . . I [Dios lo] seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.”—Revelacion 21:1, 4.

Bo por imaginá con bida lo ta ora e sanacion milagroso di humanidad bira realidad? “Ningun residente lo bisa: ‘Mi ta malu.’ E pueblo cu ta biba den e tera lo ta esnan pordoná pa nan eror.” Sí, Dios lo cumpli cu loke sanadónan di fe lo no por haci nunca. “Lo e realmente traga morto pa semper.” En berdad, “e Señor Soberano Jehova siguramente lo seca e lágrimanan for di tur cara.”—Isaías 25:8; 33:24.

[Plachi na página 7]

Bou dje Reino di Dios humanidad lo ser saná milagrosamente