No Biba Mas pa Nos Mes

“[Kristu] a muri pa tur, pa esnan ku ta biba no biba mas pa nan mes.”—2 Korintionan 5:15.

1, 2. Ki mandamentu bíbliko a motivá e siguidónan di Hesus di promé siglo pa vense egoismo?

TABATA Hesus su último anochi riba tera. Denter di apénas algun ora lo el a duna su bida na fabor di tur ku lo ehersé fe den dje. Durante e anochi ei, Hesus a konta su fiel apòstelnan hopi kos importante. Un di nan tabata un mandamentu relashoná ku un kualidat ku lo a resultá di ta un rasgo ku ta identifiká su siguidónan. El a bisa: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.”—Juan 13:34, 35.

² Kristiannan berdadero mester desplegá amor apnegá òf di sakrifisio propio pa otro i pone e bienestar di nan rumannan den fe promé ku nan mes bienestar. Nan no mester ni vasilá pa ‘duna nan bida pa nan amigunan.’ (Juan 15:13) Kon e kristiannan di promé a reakshoná riba e mandamentu nobo? E eskritor di siglo 2, Tertuliano, den su obra famoso Defensa a sita loke otro hende a bisa di e kristiannan: ‘Wak kon nan ta stima otro; kon nan ta kla pa asta muri pa otro.’

3, 4. (a) Dikon nos mester kontrarestá òf resistí egoismo? (b) Kiko nos lo konsiderá den e artíkulo aki?

³ Nos tambe tin ku sigui “karga peso di otro, i asina kumpli ku e lei di Kristu.” (Galationan 6:2) Sin embargo, egoismo ta un di e opstákulonan mas grandi pa obedesé e lei di Kristu i pa ‘stima Yehova nos Dios ku henter nos kurason, alma i mente i stima nos próhimo manera nos mes.’ (Mateo 22:37-39) Komo hende imperfekto, nos ta inkliná di ta preokupá solamente ku nos propio deseo- i nesesidatnan. Agregá na esaki, e strès di bida diario, e ambiente kompetitivo na skol òf na trabou, i e lucha pa haña e nesesidatnan di bida, anto komo konsekuensia e tendensia egoista ku nos ta nase kuné ta bira mas fuerte. E inklinashon aki pa egoismo no ta birando ménos. Apòstel Pablo a spièrta: “Den e último dianan . . . hende lo stima nan mes mas ku tur kos.”—2 Timoteo 3:1, 2, BPK.

⁴ Durante e último parti di su ministerio riba tera, Hesus a duna su disipelnan un proseso di tres paso ku lo por a yuda nan vense egoismo. Kiko esei tabata, i kon nos por benefisiá di su instrukshonnan?

Un Antídoto Efektivo!

 5. Miéntras ku Hesus tabata prediká den e parti nort di Galilea, kiko el a revelá na su disipelnan, i dikon esei a shòk nan?

⁵ Hesus tabata prediká serka di Cesarea di Filipo den e parti nort di Galilea. E área trankil i pintoresko aki kisas a parse un lugá mas apropiá pa dediká tempu na plaser ku pa siña tokante apnegashon òf nenga bo mes. Sin embargo, miéntras Hesus tabata einan el a kuminsá mustra su disipelnan ku “e mester bai Yerusalèm, i sufri hopi kos na man di e ansianonan i saserdotenan prinsipal i eskribanan, i wòrdu matá, i wòrdu lantá riba e di tres dia.” (Mateo 16:21) E informashon nobo aki lo mester a shòk e disipelnan di Hesus, pasobra te ku e momentu ei nan tabata ferwagt ku nan Lider lo a establesé su Reino riba tera!—Lukas 19:11; Echonan 1:6.

 6. Dikon Hesus a skual Pedro formalmente?

⁶ Mesora Pedro “a hala [Hesus] un banda i a kuminsá reprend’é, bisando: ‘Dios libra [òf, “sea bondadoso ku bo mes,” NW], Señor! Esaki nunka lo no sosodé ku bo.’” Kon Hesus a reakshoná? “El a bira i a bisa Pedro: ‘Kita for di mi dilanti, Satanas! Bo ta un piedra di trompeká pa mi; pasobra bo no tin bo pensamentu riba e kosnan di Dios, sino riba esnan di hende.’” Ki un kontraste grandi tabatin entre nan dos su aktitut! Hesus boluntariamente a aseptá e bida di sakrifisio propio ku Dios a asigná na dje, un bida ku denter di un par di luna lo a hiba na su morto riba un staka di tormento. Pero Pedro a rekomend’é un proseder mas kómodo. “Sea bondadoso ku bo mes,” el a bisa. Pedro sin duda tabatin bon intenshon. Tòg Hesus a reprend’é pasobra Pedro na e okashon ei a laga Satanas influensi’é. Pedro ‘no a pensa manera Dios, ma manera hende.’—Mateo 16:22, 23; BPK.

 7. Manera ta pará skirbí na Mateo 16:24, ki proseder Hesus a deskribí pa su siguidónan?

⁷ Awendia nos por tende ideanan paresido na loke Pedro a bisa Hesus. Mundu hopi bes ta urgi un persona pa ‘trata bo mes bon’ òf ‘sigui e kaminda di ménos resistensia.’ Di otro banda, Hesus a rekomendá un aktitut mental kompletamente distinto. El a bisa su disipelnan: “Si un hende kier bin mi tras, lag’é nenga su mes, i hisa su [“staka di tormento,” NW], i sigui mi.” (Mateo 16:24) “E palabranan aki no ta un invitashon na hende djafó pa bira disipel,” segun The New Interpreter’s Bible, “sino un invitashon na esnan ku a reakshoná kaba riba e yamada di Kristu pa nan reflekshoná riba e nifikashon di ser disipel.” E tres pasonan ku Hesus a deskribí den e teksto bíbliko ei ta pasonan ku kreyentenan mester tuma. Laga nos konsiderá e pasonan un pa un.

 8. Splika kiko ta nifiká nenga bo mes.

⁸ Na promé lugá, nos tin ku nenga nos mes. E palabra griego pa “nenga bo mes” ta indiká ku un persona ta dispuesto pa rechasá òf bisa nò na deseonan egoista òf na kumbinensia personal. Nenga nos mes no ta djis un asuntu ku de bes en kuando nos ta legumai sierto plasernan; tampoko e no ta nifiká ku nos ta bira personanan ku ta hiba un bida di nenga nos mes tur kos, kisas te na e grado di perhudiká nos mes. Nos no ta ‘pertenesé mas na nos mes’ den e sentido ku boluntariamente nos ta entregá henter nos bida i tur kos den dje na Yehova. (1 Korintionan 6:19, 20) Nos bida lo bira un bida enfoká riba sirbi Dios en bes di ta enfoká riba nos mes. Nenga nos mes ta enserá un determinashon pa hasi e boluntat di Dios, apesar ku esaki kisas no ta loke nos normalmente lo kier a hasi. Nos ta demostrá ku nos ta eksklusivamente dediká na Dios ora ku nos hasi un dedikashon na dje i batisá. Anto despues di esei nos ta hasi esfuerso pa kumpli ku nos dedikashon pa e restu di nos bida.

 9. (a) Ora Hesus tabata riba tera, kiko un staka di tormento a representá? (b) Den ki manera nos ta hisa nos staka di tormento?

⁹ E di dos paso ta ku nos mester hisa nos staka di tormento. Den promé siglo, un staka di tormento a representá sufrimentu, bèrgwensa i morto. Normalmente, nan tabata ehekutá solamente hende kriminal riba un staka di tormento òf kologá nan kurpa morto na staka. Ku e ekspreshon aki Hesus a mustra ku un kristian mester ta prepará pa aseptá persekushon, despresio òf asta morto, ya ku e no ta parti di mundu. (Juan 15:18-20) Nos normanan kristian ta hasi nos distinto for di e hendenan di mundu, pues mundu lo por ‘kalumniá nos.’ (1 Pedro 4:4) Esaki lo por sosodé na skol, na trabou òf asta den nos famia. (Lukas 9:23) Apesar di esei, nos ta dispuesto pa soportá e despresio di mundu pasobra nos no ta biba mas pa nos mes. Hesus a bisa: “Bendishoná boso ta ora ku hende insultá boso i persiguí boso, i ta gaña tur klase di maldat riba boso pa mi kousa. Regosihá i sea kontentu, pasobra boso rekompensa den shelu ta grandi.” (Mateo 5:11, 12) Sí, loke ta konta ta ku nos tin Dios su aprobashon.

10. Kiko sigui Hesus kontinuamente ta enserá?

¹⁰ Na di tres lugá, Hesukristu a bisa ku nos mester siguié kontinuamente. Segun An Expository Dictionary of New Testament Words, di W. E. Vine, e palabra griego tradusí komo “sigui” ta nifiká ser un kompañero, “un persona ku ta bai den mesun kaminda.” Promé Juan 2:6 ta deklará: “Esun ku bisa ku e ta permanesé den [union ku Dios] mester kana na mesun manera ku [Kristu] a kana.” Kon Hesus a kana? Hesus su amor pa su Tata selestial i pa su disipelnan no a laga lugá pa egoismo. Pablo a skirbi: “Kristu no a agradá su mes.” (Romanonan 15:3) Asta ora Hesus tabata kansá òf a sinti hamber, el a pone e bienestar di otro hende promé ku su propio bienestar. (Marko 6:31-34) Tambe Hesus a hasi esfuerso vigoroso den e trabou di prediká i di siña hende tokante e Reino. Akaso nos no mester imit’é segun ku selosamente nos ta kumpli ku nos tarea di ‘hasi disipel di hende di tur nashon, siñando nan pa kumpli ku tur loke Hesus a ordená’? (Mateo 28:19, 20) Den tur su kondukta, Kristu a laga un ehèmpel pa nos, i nos tin ku “sigui den su pasonan” ku sumo kuidou i atenshon.—1 Pedro 2:21.

11. Pakiko ta importante pa nos nenga nos mes, hisa nos staka di tormento i sigui Hesukristu kontinuamente?

¹¹ Ta masha importante pa nos nenga nos mes, hisa nos staka di tormento i sigui nos Gran Ehèmpel kontinuamente. Esaki ta un antídoto pa egoismo, es desir, e ta kontrarest’é, ya ku egoismo definitivamente ta un opstákulo pa desplegá amor di sakrifisio propio. Ademas, Hesus a bisa: “Ken ku kier salba su bida lo pèrd’é; ma ken ku pèrdè su bida pa mi kousa lo hañ’é. Pasobra ki probecho un hende lo tin si e gana henter mundu, ma pèrdè su alma? Òf kiko un hende lo duna en kambio di su alma?”—Mateo 16:25, 26.

Nos No Por Sirbi Dos Shon

12, 13. (a) Kiko tabata un preokupashon pa e gobernante hóben ku a pidi Hesus konseho? (b) Ki konseho Hesus a duna e hòmber hóben, i dikon?

¹² Algun luna despues ku Hesus a enfatisá ku ta nesesario pa su disipelnan nenga nan mes, un gobernante hóben i riku a aserk’é i a bisa: “Maestro, kiko ta e kos bon ku mi mester hasi pa mi por haña bida eterno?” Hesus a bis’é ku e mester “warda e mandamentunan” i a menshoná algun di nan. E hòmber hóben a bis’é: “Tur e kosnan aki mi a warda.” E hòmber aparentemente tabata sinsero i a hasi su bèst pa obedesé e mandamentunan di e Lei. P’esei el a puntra: “Kiko mas mi falta?” Komo kontesta Hesus a duna e hòmber hóben un invitashon úniko: “Si bo kier ta perfekto [“kompletu,” New American Standard Bible], bai i bende bo propiedatnan i duna na hende pober, i lo bo tin tesoro den shelu; i bin, sigui mi.”—Mateo 19:16-21.

¹³ Hesus a mira ku pa e hòmber hóben sirbi Yehova di henter alma, e mester a deshasí di e distraishon di mas grandi den su bida: su rikesa material. Un berdadero disipel di Kristu no por sirbi dos shon. E “no por sirbi Dios i rikesa.” (Mateo 6:24) E mester tin un ‘wowo bon,’ es desir, un bista ku ta enfoká riba asuntunan spiritual. (Mateo 6:22) Deshasí di bo propiedatnan i duna nan na hende pober ta un akto di sakrifisio propio. A kambio di e sakrifisio material aki, Hesus a ofresé e gobernante hóben e privilegio sumamente presioso di akumulá tesoro den shelu; un tesoro ku lo a nifiká bida eterno p’e i ku lo a hiba na e prospekto di un dia goberná huntu ku Kristu den shelu. E hòmber hóben no tabata kla pa nenga su mes. “El a bai tur tristu, pasobra e tabata doño di hopi propiedat.” (Mateo 19:22) Sin embargo, otro siguidónan di Hesus a reakshoná na un manera distinto.

14. Kon kuater piskadó a reakshoná riba Hesus su invitashon pa siguié?

¹⁴ Un dos aña promé, Hesus a duna un invitashon similar na kuater piskadó ku tabata yama Pedro, Andres, Santiago i Juan. Dos di nan tabata piskando na e momentu ei, i e dos otronan tabata drùk ta drecha nan redanan. Hesus a bisa nan: “Sigui mi, i lo mi hasi boso piskadó di hende.” Nan tur kuater ku tempu a bandoná nan negoshi di piskamentu i a sigui Hesus pa restu di nan bida.—Mateo 4:18-22.

15. Kon un Testigu di Yehova di nos tempu a hasi sakrifisio pa sigui Hesus?

¹⁵ Hopi kristian djawe a imitá e ehèmpel di e kuater piskadónan en bes di e ehèmpel di e gobernante hóben i riku. Nan a sakrifiká rikesa i e oportunidat pa gana fama i éksito den e mundu aki afin di por sirbi Yehova. Deborah por ehèmpel a bisa: “Tempu ku mi tabatin 22 aña, mi mester a tuma un desishon grandi.” El a splika: “Mi tabatin rònt di seis luna ta studia Beibel, i mi kier a dediká mi bida na Yehova, pero mi famia tabata hopi kontra di esei. Nan tabata multimionario, i segun nan, si mi bira un Testigu esei lo a kousa bèrgwensa pa nan debí na nan status sosial. Nan a duna mi 24 ora pa disidí kiko mi a preferá: un bida di luho òf e bèrdat. Si mi no kibra tur kontakto ku e Testigunan, mi famia lo a desheredá mi. Yehova a yuda mi tuma e desishon korekto i a duna mi e fortalesa pa kumpli kuné. Mi a pasa e último 42 añanan den sirbishi di tempu kompletu, i no ta duel mi niun tiki. Dor di bira lomba pa un estilo di bida egoista, orientá riba plaser, mi a skapa di e infelisidat i falta di propósito den bida ku mi ta mira den e miembronan di mi famia. Huntu ku mi kasá, mi a yuda mas ku shen persona siña e bèrdat. E yunan spiritual aki ta hopi mas presioso pa mi ku kualke rikesa material.” Miónes di otro Testigu di Yehova ta sinti meskos ku Deborah. Kiko di abo?

16. Kon nos por demostrá ku nos no ta biba mas pa nos mes?

¹⁶ E deseo pa no biba mas pa nan mes a motivá míles di Testigu di Yehova pa sirbi komo pionero, esta, komo proklamadó di Reino di tempu kompletu. Otronan, kende nan sirkunstansia no ta permití nan partisipá den e sirbishi di tempu kompletu, ta kultivá e spiritu di pionero i ta apoyá e trabou di prediká e Reino lo mihó ku nan por. Mayornan ta demostrá un aktitut similar ora nan ta dediká gran parti di nan tempu i tambe ta sakrifiká interesnan personal afin di por duna edukashon spiritual na nan yunan. Den un manera òf otro, nos tur por mustra ku interesnan di Reino ta bin na promé lugá den nos bida.—Mateo 6:33.

Ken Su Amor Ta Obligá Nos?

17. Kiko ta motivá nos pa hasi sakrifisio?

¹⁷ Demostrá amor di sakrifisio propio no ta e kaminda di mas fásil pa sigui. Pero pensa un ratu riba kiko ta e kos ku ta obligá òf motivá nos. Pablo a skirbi: “E amor di Kristu ta obligá nos, yegando na e konklushon aki, ku ún a muri pa tur . . . I el a muri pa tur, pa esnan ku ta biba no biba mas pa nan mes, ma pa esun ku a muri i ku a resusitá pa nan motibu.” (2 Korintionan 5:14, 15) Ta e amor di Kristu ta obligá nos pa no biba mas pa nos mes. Ki un motivashon poderoso esei ta! Siendo ku Kristu a muri pa nos, nos ta sinti e obligashon moral pa biba p’e, no ta bèrdat? De echo, ta gratitut pa e amor tan profundo ku Dios i Kristu a mustra na nos a obligá nos dediká nos bida na Dios i bira disipel di Kristu.—Juan 3:16; 1 Juan 4:10, 11.

18. Dikon un bida di sakrifisio propio ta bale la pena?

¹⁸ Ta bale la pena pa nos no biba mas pa nos mes? Despues ku e gobernante hóben i riku a rechasá Kristu su invitashon i a bai, Pedro a bisa Hesus: “Ata nos a bandoná tur kos i a sigui bo; kiko anto nos lo haña?” (Mateo 19:27) Pedro i e otro apòstelnan realmente a nenga nan mes. Kiko lo tabata nan rekompensa? Hesus a papia promé di e privilegio ku nan lo tin di goberná huntu kuné den shelu. (Mateo 19:28) Na e mesun okashon ei Hesus a referí na bendishonnan ku delaster un sirbidó di dje lo por a risibí. El a bisa: “No tin ningun hende ku a bandoná kas òf ruman hòmbernan òf ruman muhénan òf mama òf tata òf yunan òf kunukunan pa mi motibu i pa motibu di evangelio, ku lo no risibí shen bes mas tantu den e tempu aki . . . i den e siglo ku ta bin, bida eterno.” (Marko 10:29, 30) Nos ta haña hopi mas di loke nos a sakrifiká. Akaso nos tatanan, mamanan, ruman hòmbernan, ruman muhénan i yunan spiritual no ta hopi mas balioso ku kualke kos ku nos a renunsiá pa motibu di e Reino? Ken tabatin e bida ku mas satisfakshon: Pedro òf e gobernante hóben i riku?

19. (a) Berdadero felisidat ta dependé di kiko? (b) Kiko nos lo konsiderá den e siguiente artíkulo?

¹⁹ Ku echo i palabra Hesus a mustra ku nos ta haña felisidat dor di duna i dor di sirbi, no dor di ta egoista. (Mateo 20:28; Echonan 20:35) Ora ku nos no ta biba mas pa nos mes ma ta sigui Kristu kontinuamente, nos ta haña gran satisfakshon den bida awor i nos tin e prospekto di bida eterno den futuro. Klaru ku ora nos nenga nos mes, Yehova ta bira nos Doño. Pues nos ta bira esklabo di Dios. Dikon e sklabitut aki ta duna satisfakshon i benefisio? Kon e ta influensiá e desishonnan ku nos ta tuma den bida? E siguiente artíkulo lo konsiderá e preguntanan aki.

Bo Ta Kòrda?

• Dikon nos mester kontrarestá nos tendensianan egoista?

• Kiko ta nifiká nenga nos mes, hisa nos staka di tormento i sigui Hesus kontinuamente?

• Kiko ta motivá nos pa no biba mas pa nos mes?

• Dikon ta bale la pena pa hiba un bida di sakrifisio propio?

[Plachi na página 11]

“Sea bondadoso ku bo mes, Señor”

[Plachi na página 13]

Kiko a stroba e gobernante hóben di sigui Hesus?

[Plachinan na página 15]

Amor ta obligá Testigunan di Yehova pa sirbi komo proklamadónan seloso di e Reino