Kiko Realmente Ta Hasi un Hende Impuru?

Tabata un poko promé ku e fiesta di Pasku Hudiu di aña 32 di promé siglo. Hesus tabata na Galilea, siñando e hendenan. Pero manera tabata di spera, el a bai Herúsalèm despues pa selebrá Pasku Hudiu, manera e Lei di Dios a stipulá. No opstante, Hesus tabata kouteloso pasobra e hudiunan tabata busk’é pa mata. (Huan 7:1) Despues di e fiesta, el a bai bèk Galilea.

Awor, probablemente Hesus tabata na Kapernaum ora algun fariseo i eskriba a bini for di Herúsalèm serka dje. Dikon nan a hasi e biahe ei? Nan tabata buska motibu pa akusá Hesus di violashon di e Lei di Dios. Nan a puntr’é: “Pakiko bo disipelnan ta kibra tradishon di hende di ántes? Por ehèmpel, nan no ta laba nan man promé ku nan kome.” (Mateo 15:2) Wèl, Dios nunka a stipulá e tradishon, òf rito, akí di ‘laba man te na èlebog’ ku e fariseonan i e eskribanan tabata referí na dje. (Marko 7:3) Pero, pa e fariseonan, un persona ku no a kumpli ku e tradishon akí a kometé un piká serio.

Hesus no a reakshoná direktamente riba nan akusashon; mas bien, el a mustra kon nan tabata kibra e Lei di Dios deliberadamente. El a puntra nan: ‘Pakiko boso ta kibra mandamentu di Dios pa motibu di boso tradishon?’ “Por ehèmpel, Dios a bisa: ‘Onra bo tata i bo mama,’ i: ‘Ken ku papia malu di su tata òf su mama mester muri.’ Ma boso ta bisa: ‘Ken ku bisa su tata òf su mama: “Tur loke mi tin ku lo mi por yuda bo kuné ta un ofrenda dediká na Dios,” no tin nodi mes di onra su tata òf su mama.’”—Mateo 15:3-6; Éksodo 20:12; 21:17.

E fariseonan tabata pretendé ku tur loke un hende dediká komo ofrenda na Dios—sea ta plaka, propiedat òf kualke otro kos—ta bira propiedat di tèmpel. Aunke e ofrenda, òf regalo, akí tabata den poder di e persona, e no por a us’é pa otro propósito pasobra el a dedik’é kaba na Dios. Por ehèmpel, si un yu bisa ku su plaka òf propiedatnan ta “korban”—esta, un ofrenda dediká na Dios òf na e tèmpel—tabata komo si fuera e ta duna di konosé ku tèmpel tin e derecho primario riba e pertenensianan akí. Maske e yu en kuestion por a hasi uso di e plaka i e propiedatnan ei, ku tabata den su poder, e tabata pretendé ku e no por a usa nan pa yuda su mayornan di edat kendenan tabata den nesesidat. Asina, e tabata libra su mes di e obligashon ku e tabatin di yuda su mayornan.—Marko 7:11.

Ta di komprondé ku Hesus a rabia mashá pasobra e fariseonan tabata trose e Lei di Dios. El a bisa nan: “Boso a pone e palabra di Dios pèrdè su balor pa motibu di boso tradishonnan. Hipókritanan, ku rason Isaías a profetisá tokante boso, ora el a bisa: ‘E pueblo akí ta onra mi ku nan lep, ma nan kurason ta masha leu for di mi. Ta pòrnada nan ta sigui adorá mi, pasobra nan ta siña mandamentu di hende komo doktrina.’” E fariseonan no por a bisa nada! Anto Hesus a yama e multitut pa bini mas serka i a bisa nan: “Skucha i kapta e sentido: No ta loke ta drenta hende su boka ta hasié impuru, sino loke ta sali for di hende su boka ta hasié impuru.”—Mateo 15:6-11; Isaías 29:13.

Mas despues, ora Hesus i su disipelnan tabata den un kas, su disipelnan a bis’é: “Bo sa ku e fariseonan a sinti nan mes ofendí ora nan a tende loke bo a bisa?” El a bisa nan: “Tur mata ku mi Tata selestial no a planta lo keda ranká ku rais ku tur. Laga nan. Ta guia siegu nan ta. I si un siegu guia un siegu, tur dos ta kai den buraku.”—Mateo 15:12-14.

Anto na nòmber di tur e disipelnan, Pedro a pidi Hesus pa splika nan kiko realmente ta hasi hende impuru. Hesus a keda strañá ku nan a pidi esaki. El a bisa nan: “Boso no sa ku tur loke drenta den boka ta baha den tripa i despues ta bai den berpùt? Ma e kosnan ku ta sali for di boka ta bini di kurason, i ta e kosnan ei ta hasi hende impuru. Por ehèmpel, for di kurason ta sali pensamentu malisioso, matamentu, adulterio, fornikashon, ladronisia, testimonio falsu i blasfemia. Ta e kosnan akí ta hasi hende impuru, ma kome un kuminda sin laba man no ta hasi hende impuru.”—Mateo 15:17-20.

Hesus no tabata kontra normanan usual di higiena. E no tabata ke men tampoko ku hende no mester a laba nan man promé ku prepará kuminda òf promé ku kome. Mas bien, Hesus a kondená e hipokresia di e lidernan religioso, kendenan tabata buska tur manera pa pasa por alto di Dios su leinan hustu pa sigui tradishon di hende. Pues, loke ta hasi un hende impuru ta su mal echonan, ku ta originá den su kurason.