Pakico Manifestá Sacrificio Propio?

Bill ta un tata di famia di 50 i picu aña cu ta maestro di bouwkunde. Durante henter aña, riba su propio gastu, e ta dedicá hopi siman pa yuda planea i construí Salonnan di Reino pa congregacionnan di Testigonan di Jehova. Emma ta un mucha muher soltero bon educá i cualificá di 22 aña. En bes di sigui tras di meta i placernan puramente personal, como un minister di tempu completo, tur luna e ta dedicá 70 ora yudando hende comprendé Bijbel. Maurice cu Betty a baha cu penshon. En bes di bai mas trankil awor, nan a muda bai un otro pais pa einan yuda hende siña tocante Dios su propósito p’e tera.

E INDIVIDUONAN aki no ta considerá nan mes special of extraordinario. Nan ta hende masha normal cu ta haci loke nan ta considerá corecto pa haci. Di con nan ta usa nan tempu, energia, abilidad i recursonan na interes di otronan? Loke ta motivá nan ta amor profundo pa Dios i pa nan próhimo. E amor aki a generá den cada un di nan un berdadero spiritu di sacrificio propio.

Kico nos kier men cu un spiritu di sacrificio propio? Wel, manifestá sacrificio propio no ta rekerí pa nos hiba un bida severo i asético. E no tin cu encerá nenga bo mes te na un grado cu ta kita goso i satisfaccion. Di acuerdo cu e descripcion di The Shorter Oxford English Dictionary, sacrificio propio ta nificá simplemente “entregá bo propio interes, felicidad i deseonan pa motibu di responsabilidad of pa bienestar di otronan.”

Jesucristo—E Mayor Ehempel

Dios su Yu unigénito, Jesucristo, ta e mayor ehempel di un persona cu un spiritu di sacrificio propio. Durante su existencia prehumano, lo e tabatin un bida interesante i satisfaciente n’e grado di mas haltu. E tabatin un asociacion cerá i íntimo cu su Tata i cu criaturanan spiritual. Fuera di esei, e Yu di Dios a usa su abilidadnan den actividadnan desafiante i excitante como “un obrero maestro.” (Proverbionan 8:30, 31) Siguramente el a biba meimei di condicionnan hopi superior cu esnan cu asta e persona di mas ricu di tera a yega di disfrutá di dje. Despues di Jehova Dios, e tabatin un posicion elevá i privilegiá den shelu.

Tog e Yu di Dios “a rebahá su mes i a tuma forma di un esclabo i a yega di ta den e semehansa di hende.” (Filipensenan 2:7) Boluntariamente el a bandoná tur su bentahanan personal dor di bira hende i ofrecé su bida como rescate pa kita e daño cu Satanas a causa. (Génesis 3:1-7; Marco 10:45) Esei a nificá cu e mester a bin biba entre hende pecaminoso den un mundu cu ta drumi den poder di Satanas e Diabel. (1 Juan 5:19) Tambe el a nificá wanta incomodidad i incumbiniencia personal. Sin embargo, sea cual sea e costo p’e, Jesus tabata determiná pa haci e boluntad di su Tata. (Mateo 26:39; Juan 5:30; 6:38) Esaki a pone Jesus su amor i lealtad na prueba te na extremo. Con leu e tabata dispuesto pa bai? Apostel Pablo a bisa: “El a humiyá su mes i a bira obediente te na morto, sí, morto na un staca di tormento.”—Filipensenan 2:8.

“Mantené den Boso e Actitud Mental Aki”

Nos ta ser animá pa sigui Jesus su ehempel. Pablo a urgi: “Mantené den boso e actitud mental aki cu tabatin den Cristo Jesus tambe.” (Filipensenan 2:5) Con nos por haci esaki? Un manera ta dor di ‘no vigilá cu interes personal boso mes asuntunan so, sino tambe cu interes personal den asuntu dje otronan.’ (Filipensenan 2:4) Berdadero amor “no ta busca su mes interes.”—1 Corintionan 13:5.

Hopi bes individuonan bondadoso a demostrá un dedicacion inegoista den sirbi otronan. Sin embargo, awe hopi hende tin tendencia di ta egocéntrico. Mundu tin e actitud di ami-promé. Nos mester protehá nos mes contra dje actitud di mundu, pasobra si e logra moldea nos punto di bista i nos actitud, probablemente nos lo haci nos propio deseonan e interes principal. E ora ei, tur loke nos haci—e manera cu nos ta usa nos tempu, nos energia i recurso—lo ta dominá pa interesnan egocéntrico. P’esei, nos tin cu hiba un lucha fuerte contra e influencia aki.

Tin biaha, asta conseho cu bon intencion por mengua nos spiritu di sacrificio propio. Realisando unda Jesus su bida di sacrificio propio tabata hibando, apostel Pedro a bisa: “Sea bondadoso cu bo mes, Señor.” (Mateo 16:22) Aparentemente tabata difícil p’e aceptá con Jesus tabata dispuesto di asta muri na interes dje soberania di su Tata i salbacion di humanidad. Pues el a purba persuadí Jesus pa no sigui cu e proceder ei.

‘Nenga Bo Mes’

Con Jesus a reaccioná? E relato ta bisa: “El a bira, a wak su disipelnan i a reprendé Pedro, i a bisa: ‘Bai mi tras, Satanas, pasobra bo ta pensa, no pensamentu di Dios, sino esnan di hende.’” Anto Jesus a yama e multitud cerca dje huntu cu su disipelnan i a bisa nan: “Si cualkier hende kier sigui tras di mi, lagu’e nenga su mes i coge su staca di tormento i sigui mi continuamente.”—Marco 8:33, 34.

Un 30 aña despues cu el a duna Jesus e conseho ei, Pedro a mustra cu p’e tempu ei sí el a comprendé loke sacrificio propio ta nificá. E no a animá su compañeronan di creencia pa bai mas trankil of pa ta bondadoso cu nan mes. En bes di esei, Pedro a exhortá nan pa fortificá nan mente pa actividad i stop di conformá nan mes cu e deseonan mundano cu nan tabatin ántes. Apesar di prueba, nan mester a pone hacimentu dje boluntad di Dios na promé lugá den nan bida.—1 Pedro 1:6, 13, 14; 4:1, 2.

E curso di mas recompensador cu nos por sigui ta di duna nos mes na Jehova, siguiendo Jesucristo su fiel ehempel i laga Dios dirigí nos actividadnan. Den e aspecto aki, Pablo a pone un excelente ehempel. Su sentido di urgencia i gratitud na Jehova a motiv’é pa bandoná aspiracion i prospectonan mundano cu lo por a strob’é di haci Dios su boluntad. El a bisa: “Di mi parti cu muchu gustu lo mi gasta i keda completamente gastá” den sirbi e interes di otronan. (2 Corintionan 12:15) Pablo a usa su abilidadnan pa avansá interesnan divino, i no esnan di dje.—Echonan 20:24; Filipensenan 3:8.

Con nos lo por examiná nos mes pa wak si nos tin un actitud manera esun di apostel Pablo? Nos lo por haci nos mes preguntanan manera esakinan: Con mi ta usa mi tempu, mi energia, mi abilidad i mi recursonan? Mi ta usa e cosnan aki i otro donnan balioso djis pa mi progreso personal, of mi ta usa nan pa yuda otro hende? Mi a pensa riba participá mas plenamente den e trabou cu ta salba bida, esun di declará e bon nobo, kisas como un proclamadó di Reino di tempu completo? Mi por enbolbé mi mas plenamente den actividadnan manera traha of mantené Salonnan di Reino? Mi ta probechá di oportunidadnan pa yuda esnan den necesidad? Mi ta duna Jehova lo mihó?—Proverbionan 3:9.

“Mas Felicidad den Duna”

Sin embargo, ta realmente sabí pa manifestá sacrificio propio? Efectivamente! Di experencia Pablo tabata sa cu un spiritu asina ta trece recompensa abundante. Manifestá sacrificio propio a duna Pablo gran felicidad i un inmenso satisfaccion personal. El a splica esaki n’e ancianonan di Efeso ora el a topa nan na Mileto. Pablo a bisa: “Mi a demostrá na boso den tur cos cu dor di traha [cu sacrificio propio] boso mester yuda esnan cu ta swak, i mester tene presente e palabra di Señor Jesus, ora e mes a bisa: ‘Tin mas felicidad den duna cu tin den ricibí.’” (Echonan 20:35) Miyones di hende a ripará cu manifestá e clase di spiritu aki ta trece felicidad for di awor. Tambe lo e trece goso den futuro ora Jehova recompensá esnan cu pone su interesnan i esnan di otro hende promé cu di nan mes.—1 Timoteo 4:8-10.

Ora a puntra Bill di con e ta haci esfuerso pa yuda otronan construí Salonnan di Reino, el a contestá: “Yuda congregacionnan generalmente mas chikitu den e forma aki ta duna mi un gran satisfaccion personal. Mi ta gusta usa tur mi abilidad i conocimentu na beneficio di otronan.” Di con Emma a scoge pa usa su energia i abilidadnan pa yuda otro hende siña e berdad di Bijbel? “Mi no por imaginá mi ta haci nada otro. Miéntras mi ta yong ainda i mi circunstancia ta permití, mi deseo ta di haci mas tantu cu mi por pa agradá Jehova i yuda otro hende. Sacrificá algun bentaha material no ta nificá masha cos. Mi ta simplemente cumpliendo cu mi obligacion, mirando tur loke Jehova a haci pa mi.”

Maurice cu Betty no tin duele cu nan no a bai hiba un bida confortabel, despues dje añanan di trabou duru pa cria i percurá pa nan famia. Awor cu nan a baha cu penshon, nan kier sigui haci algu útil i significativo cu nan bida. Nan a bisa: “Awor akí, nos no kier djis cai sinta i relahá. Yuda otro hende siña di Jehova den un pais stranhero ta duna nos e oportunidad pa sigui haci algu significativo.”

Bo ta decididu pa manifestá sacrificio propio? Lo e no bai fácil. Tin un lucha constante entre nos deseonan humano imperfecto i nos deseo sincero pa agradá Dios. (Romanonan 7:21-23) Pero nos por gana e lucha aki si nos laga Jehova dirigí nos bida. (Galationan 5:16, 17) Sigur-sigur lo e corda riba nos obra di sacrificio propio den su sirbishi i lo e bendicioná nos ricamente. Sí, Jehova Dios lo ‘habri e portanan di shelu i realmente basha riba nos un bendicion te ora cu no tin mas mester.’—Malakías 3:10; Hebreonan 6:10.

[Plachi na página 23]

Jesus tabatin un spiritu di sacrificio propio. Abo tiné?

[Plachinan na página 24]

Pablo a enfocá su esfuersonan riba e trabou di predicá e Reino