“Bo Pikánan Ta Pordoná”

Hende di hopi lugá, asta di lugánan leu, a tende di Hesus. Algun hende a asta biaha bai lugánan isolá, kaminda Hesus tabata, pa nan siña di dje i mira su obranan poderoso. Sinembargo, despues di algun dia, Hesus a regresá Kapernaum, un stat ku tabata keda kantu di Laman di Galilea. Kapernaum tabata kaminda e tabata keda mayoria di biaha i tabatin hopi aktividat spiritual. Masha lihé notisia a plama ku Hesus tabata den e stat, p’esei hopi hende a bai na e kas kaminda e tabata. Algun di e hendenan presente tabata fariseo i maestro di Lei ku a bini for di Galilea, Hudea i Herúsalèm.

Tabatin “asina tantu hende na e kas ku no tabatin lugá ni sikiera pafó dilanti di porta.” I Hesus “a kuminsá papia e palabra di Dios ku nan.” (Marko 2:2) Anto algu realmente ekstraordinario a sosodé. Loke a tuma lugá ta laga nos mira bon kla ku Hesus tin poder pa kaba ku sufrimentu i duna tur hende salú perfekto.

Wèl, ora Hesus tabata siñando e bòshi di hendenan den e kas, kuater hòmber a bini ku nan amigu, kende tabata lam drumí riba kama, pa Hesus kur’é. Pero komo ku e kas tabata asina yen, nan no por “a hib’é te serka Hesus.” (Marko 2:4) Bo por imaginá bo kon desapuntá nan a keda? Pero nan no a entregá. Nan a subi riba dak di e kas, kita parti di e dak i laga e kama ku e hòmber lam tabata drumí riba dje baha den e kas.

Hesus a rabia pasobra nan a interumpié? Di ningun manera! Al kontrario, nan fe a impreshon’é. El a bisa e hòmber lam: “Bo pikánan ta pordoná.” (Mateo 9:2) Pero Hesus realmente por a pordoná piká? Algun eskriba i fariseo a pensa ku nò. Den nan mes nan tabata bisa: “Pakiko e hòmber akí ta papia asina? E ta blasfemá. Ken por pordoná piká si no ta Dios so?”—Marko 2:7.

Hesus, kende por a lesa nan pensamentunan, a puntra nan: “Pakiko boso ta pensa asina? Kiko ta mas fásil pa bisa e hòmber lam: ‘Bo pikánan ta pordoná,’ òf: ‘Lanta para, kue bo kama i kana’?” (Marko 2:8, 9) No tin duda ku for di e tempu ei Hesus tabatin outoridat pa pordoná piká a base di e sakrifisio ku lo el a hasi den futuro.

P’esei na e momento ei, Hesus a laga e multitut, inkluso esnan ku tabata kritik’é, mira ku di bèrdat e tin outoridat pa pordoná piká. El a bira wak e hòmber lam i a bis’é: “Mi ta bisa bo: Lanta para, kue bo kama i bai bo kas.” Mesora e hòmber a lanta para, kue su kama i kana sali dilanti di tur hende. E hendenan a keda babuká i a kuminsá glorifiká Dios i bisa: “Nunka nos a yega di mira un kos asina.”—Marko 2:11, 12.

Bo a tuma nota kon Hesus a relashoná piká ku malesa i pordon di piká ku salú físiko? Beibel ta siña nos ku nos promé mayor, Adam, a peka i ku nos tur a heredá e konsekuensianan di piká, esta, malesa i morto. Pero bou di gobernashon di e Reino di Dios, Hesus lo pordoná e pikánan di tur hende ku ta stima i sirbi Dios. E ora ei, Dios lo kaba ku tur malesa pa semper.—Romanonan 5:12, 18, 19.