Fe den Profesia di Beibel A Preservá Bida

HESUS tabata saliendo for di e tèmpel na Yerusalèm pa di último biaha ora ku un di su disipelnan a bis’é: “Maestro, mira ki piedranan i ki edifisionan grandi!” E tèmpel tabata e orguyo i gloria di e nashon hudiu. Sin embargo, Hesus a kontestá: “Bo ta mira e edifisionan grandi aki? Ni un piedra lo no keda riba otro ku lo no wòrdu bashá abou.”—Marko 13:1, 2.

E idea ei so tabata inkreibel! Algun piedra di e tèmpel tabata inmenso. Ademas, loke Hesus a bisa tokante e tèmpel a indiká indirektamente ku Yerusalèm lo a ser destruí i podisé asta e nashon hudiu, di kua e tèmpel tabata e sentro di adorashon. P’esei e disipelnan di Hesus a puntr’é despues: “Bisa nos, ki tempu e kosnan aki lo sosodé, i kiko lo ta e señal ora tur e kosnan aki lo wòrdu kumplí [òf, “yega na un konklushon,” NW]?”—Marko 13:3, 4.

Hesus a spièrta nan: “Ainda no ta e fin.” Promé, e disipelnan lo a tende di guera, temblor, hamber i pestilensia den un lugá tras di otro. Despues, susesonan dramátiko lo a hinka e nashon hudiu den un kataklismo masha grandi mes, sí, un “gran tribulashon.” Sin embargo, Dios lo a intervení pa salba “e eligínan,” esta, kristiannan fiel. Kon?—Marko 13:7; Mateo 24:7, 21, 22; Lukas 21:10, 11.

Revolushon Kontra Roma

Bintiocho aña a pasa, i e kristiannan den Yerusalèm ainda tabata warda e fin. E Imperio Romano tabata ser asotá pa guera, temblor, hamber i pestilensia. (Wak e kuadro na página 9.) Tabatin masha hopi konflikto sivil i étniko den Hudea. Sin embargo, paden di e murayanan protektivo di Yerusalèm tabata relativamente trankil. E hendenan tabata kome, traha, kasa i haña yu, manera semper nan a hasi. E presensia di e tèmpel inmenso a duna nan e sintimentu ku e stat tabata stabil i duradero.

Rònt di aña 61 di promé siglo, e kristiannan na Yerusalèm a haña un karta di apòstel Pablo. El a elogiá nan pa nan perseveransia pero e tabata preokupá p’e echo ku algun kristian den e kongregashon aparentemente no tabatin un sentido di urgensia. Vários di nan tabata drif bai den sentido spiritual òf tabata falta madures kristian. (Hebreonan 2:1; 5:11, 12) Pablo a urgi nan: “No tira boso konfiansa afó . . . Pasobra denter di masha poko tempu, ‘esun ku ta pa bin, lo bin, i lo no tarda. Ma e hustu lo biba pa medio di fe; i si e hal’atras, mi alma no tin plaser den dje.’” (Hebreonan 10:35-38) Konseho masha oportuno mes! Pero e kristiannan lo a ehersé fe i keda alerta pa mira kumplimentu di e profesia di Hesus? Di bèrdat e fin di Yerusalèm tabata serka?

Durante e siguiente sinku añanan, e situashon den Yerusalèm gradualmente a sigui bai atras. Finalmente, na aña 66, e gobernadó romano korupto, Floro, a kue 17 talento for di e kaha di plaka sagrado di e tèmpel komo pago pa “belasting atrasá.” E hudiunan a bira furioso i a lanta kontra gobièrnu romano. E rebeldenan hudiu, e asina yamá zelotenan, a basha drenta Yerusalèm i a masakrá e forsanan romano stashoná einan. Anto despues nan a proklamá e independensia di Hudea for di Roma. Esei a pone Hudea i Roma e ora ei den guera kontra otro!

Denter di tres luna, e gobernadó romano di Siria, Sestio Galo, a marcha bin zùit ku 30.000 sòldá pa dominá e rebelion hudiu. Su ehérsito a yega Yerusalèm durante e Fiesta di Tabernakelnan i rápidamente a penetrá e partinan pafó di stat. E rebeldenan hudiu, ku tabata hopi ménos ku nan, a buska refugio paden di e fortalesa di e tèmpel. Poko despues e sòldánan romano a kuminsá debilitá muraya di e tèmpel. E hudiunan a keda di shòk. Figura bo, sòldánan pagano awor tabata kontaminá e lugá di mas santu di hudaismo! Sin embargo, e kristiannan den e stat a kòrda riba e palabranan di Hesus: ‘Ora boso mira e abominashon ta para den e lugá santu, e ora ei laga esnan ku ta na Hudea hui bai na e serunan.’ (Mateo 24:15, 16) Akaso nan lo a demostrá fe den e palabranan profétiko di Hesus i ser motivá pa aktua di akuerdo ku nan? Manera a resultá despues, nan bida a dependé di esei. Pero kon nan lo a hui?

Diripiente i sin ningun motibu bisto, Sestio Galo a retirá su sòldánan i a bai den direkshon di kosta ku e hudiunan rebelde biniendo djis nan tras. Asombrosamente, e tribulashon riba e stat a wòrdu hasí mas kòrtiku! Demostrando nan fe den e spièrtamentu profétiko di Hesus, e kristiannan a hui for di Yerusalèm i a bai Pela, un stat neutral ku tabata keda den e serunan na otro banda di Riu Hordan. Nan a skapa nèt na ora. Poko despues e hudiunan rebelde a regresá Yerusalèm i a obligá e habitantenan ku a resta pa djòin nan den nan rebelion.a Miéntras tantu, e kristiannan ku tabata sano i salvo na Pela tabata warda wak kon kosnan lo a sigui desaroyá.

Deterioro Ku A Hiba na Anarkia

Denter di algun luna tabatin un ehérsito romano nobo rumbo pa Yerusalèm. Durante aña 67, General Vespasiano ku su yu hòmber Tito a mobilisá un ehérsito inmenso di 60.000 sòldá. Durante e siguiente dos añanan, e aparato militar destruktivo aki a avansá den direkshon di Yerusalèm, aplastando tur resistensia ku el a topa den su kaminda. Miéntras tantu, den Yerusalèm, fakshonnan hudiu rival di otro tabata enbolbí den luchanan feros. Nan a destruí e reservanan di grano di e stat i tambe e área alrededor di e tèmpel, i mas ku 20.000 hudiu a ser matá. Vespasiano a baha e velosidat di su avanse den direkshon di Yerusalèm, deklarando: ‘Dios ta aktua mas mihó komo general romano ku mi mes; nos enemigunan ta kabando ku otro ku nan propio mannan.’

Ora ku e emperador romano Nero a muri, Vespasiano a bira bai Roma pa hasi sigur ku lo e haña e trono, i a laga Tito pa finalisá e kampaña militar na Hudea. Tito a yega Yerusalèm rònt di tempu di Pasku Hudiu di aña 70, i a atrapá e habitantenan i peregrinonan paden di e stat. Su ehérsito a kap tur e palunan den e área di kunuku di Hudea pa nan a traha un muraya di staka di shete kilometer largu alrededor di e kapital sitiá. Esaki ta presis manera Hesus a profetisá: “Bo enemigunan lo traha rònt di bo un fortifikashon di stakanan ku punta i lo rondoná bo i afligí bo di tur banda.”—Lukas 19:43, NW.

No a tarda muchu ku hamber a kohe e stat den su gara. Gruponan armá tabata plùnder kas di hende ku a muri òf ku tabata muriendo. Por lo ménos ún muhé desesperá a mata su beibi i a kom’é, kumpliendo ku e profesia: “Lo bo kome e fruta di bo mes barika, e karni di bo yu hòmbernan i di bo yu muhénan . . . durante di e tempu ku bo ta wòrdu rondoná i den e ansha ku bo enemigu lo oprimí bo kuné.”—Deuteronomio 28:53-57.

Finalmente Yerusalèm a kai, despues di tabata sitiá pa sinku luna. Nan a plùnder i kima e stat i su gran tèmpel i despues a bash’é abou piedra pa piedra. (Daniel 9:26) E mortonan tabata en total rònt di 1.100.000; un 97.000 hudiu nan a bende komo katibu.b (Deuteronomio 28:68) Hudea a keda kasi sin hudiu. Esei tabata en bèrdat un desaster nashonal sin igual, el a marka un kambio krusial den bida hudiu tantu riba tereno polítiko, religioso komo kultural.c

Miéntras tantu, e kristiannan na Pela a gradisí Dios sinseramente pa nan liberashon. Nan fe den profesia di Beibel a preservá nan bida!

Mirando bèk riba e susesonan ei, lo ta bon pa kada un di nos awe puntra nos mes: ‘Mi tin e fe ku lo preservá mi bida durante e binidero gran tribulashon? Mi ta di “esnan ku tin fe pa preservashon di e alma”?’—Hebreonan 10:39; Revelashon 7:14.

[Nota]

[Tabèl na página 9]

Aspektonan di e Señal Ku A Kumpli den Promé Siglo

GUERA:

Galia (39-40 E.K.)

Nort Afrika (41 E.K.)

Bretaña (43, 60 E.K.)

Armenia (58-62 E.K.)

Konfliktonan sivil i étniko na Hudea (50-66 E.K.)

TEMBLOR:

Roma (54 E.K.)

Pompei (62 E.K.)

Asia Menor (53, 62 E.K.)

Kreta (62 E.K.)

HAMBER:

Roma, Gresia, Egipto (±42 E.K.)

Hudea (±46 E.K.)

PESTILENSIA:

Babilonia (40 E.K.)

Roma (60, 65 E.K.)

PROFETANAN FALSU:

Hudea (±56 E.K.)

[Mapa/Plachi na página 10]

(Pa e teksto den su formato kompleto, wak e publikashon)

Kampaña Militar Romano na Palestina, aña 67-70 E.K.

Tolemaida

Laman di Galilea

Pela

PEREA

SAMARIA

Yerusalèm

Laman Salu

HUDEA

Cesarea

[Rekonosementu]

Mapa so: Based on maps copyrighted by Pictorial Archive (Near Eastern History) Est. and Survey of Israel

[Plachi na página 11]

‘Nos enemigunan ta kabando ku otro ku nan propio mannan.’—Vespasiano

[Plachinan na página 11]

Na aña 70, forsanan romano a destruí Yerusalèm

[Rekonosementu pa Potrèt na página 11]

Relieve: Soprintendenza Archeologica di Roma; Vespasiano: Bildarchiv Preussischer Kulturbesitz/Art Resource, NY