Bo Sa Kuant’or Tin?

ORA bo ke sa kuant’or tin, kiko bo ta hasi? Probablemente bo ta wak oloshi. Si un amigu puntra bo kuant’or tin, kon lo bo kontest’é?

Wèl, ta dependé na unda bo ta biba. Por ehèmpel, si aworakí ta ún ora i 30 minüt despues di mèrdia, lo bo por bisa ku ta 1:30. Lo bo por bisa tambe 13:30. E sistema ei ta basá riba e sistema di oloshi di 24 ora. Na papiamentu, tin hende ta bisa mitar di dos i otronan ta bisa ún or i mei.

Kisas bo ta puntra bo mes kon hende den tempu di Beibel tabata indiká kuant’or tin? Nan tabatin vários manera. E Skritura Hebreo ta usa ekspreshonnan manera “mainta,” “mèrdia” i “atardi.” (Gén. 8:11; 19:27; 43:16; Deu. 28:29; 1 Rei. 18:26) Pero tin biaha Beibel ta usa indikashonnan mas presis.

Den e tempu ei, nan tabatin kustumber di pone hende pa vigilá òf traha warda, foral durante anochi. Siglonan promé ku Hesus a nase, e israelitanan a parti anochi den tres “warda.” (Sal. 119:148) Por ehèmpel, Huesnan 7:19 ta menshoná “e di dos warda.” Pero den e époka di Hesus, e hudiunan tabata usa e sistema griego i romano ku a parti anochi den kuater warda.

E Evangelionan ta referí hopi biaha na e wardanan akí. Por ehèmpel, tabata “durante e di kuater warda djanochi” ku Hesus a kana riba awa bai na e boto di su disipelnan. (Mat. 14:25) Den un ilustrashon, Hesus a bisa: “Si e yega den e di dos warda, òf asta den e di tres, i haña nan ta vigilá, nan lo ta felis!”—Luk. 12:38.

Hesus a referí na tur e kuater wardanan ora el a bisa su disipelnan: “P’esei, keda vigilá, pasobra boso no sa ki ora e Doño di kas ta bini, sea ta kasi anochi, meianochi, ora gai kanta òf mainta trempan.” (Mar. 13:35) E promé warda, “kasi anochi,” tabata for di ora solo baha te banda di 9 or djanochi. E di dos warda, esun di “meianochi,” tabata di 9 or te 12 or djanochi. E di tres warda, “ora gai kanta,” tabata di 12 or djanochi pa 3 or di mardugá. Kisas ta durante e warda ei un gai a kanta riba e anochi ku nan a arestá Hesus. (Mar. 14:72) E di kuater warda, “mainta trempan,” tabata di 3 or di mardugá te ora solo sali.

Pues, aunke hende den tempu di Beibel no tabatin oloshi manera nos tin awe, nan tabatin un sistema sí pa indiká kuant’or tin, sea ta den dia òf anochi.