Kristu A Ser Traishoná i Arestá

Tabata despues di mei anochi. Un poko tempu promé, e saserdotenan a bai di akuerdo pa paga Hudas 30 moneda di plata pa el a traishoná Hesus. P’esei, Hudas tabata na kabes di un multitut di saserdote prinsipal i fariseo ku a sali pa bai buska Hesus. Un komandante militar ku un trupa di sòldá romano bon armá tabata huntu ku nan.

Probablemente, despues di e sena di Pasku Hudiu, ora Hesus a bisa Hudas pa bai kaba di hasi loke e tabata hasiendo, Hudas a bai mesora serka e saserdotenan prinsipal. (Huan 13:27) E saserdotenan a bini ku nan ofisialnan i un grupo di sòldá. Podisé Hudas a hiba nan promé na e kamber ariba, kaminda Hesus i su apòstelnan a selebrá Pasku Hudiu. Despues, nan lo a krusa Roi Kidron i bai Hòfi di Getsémani. Ademas di nan armanan, nan tabatin lampi i flambeu. Nan tabata determiná pa haña Hesus.

Hudas tabata dirigí e multitut di hende rumbo pa Seru di Oleifi ku pleno konfiansa ku lo el a haña Hesus einan. Un siman promé, vários biaha Hesus i su apòstelnan a bai Hòfi di Getsémani ora nan tabata biaha di Betania pa Herúsalèm, òf visevèrsa. Awor, tabata nochi. Kisas hende no por a mira Hesus mesora entre e palunan di oleifi den e hòfi. P’esei, kon e sòldánan, kendenan kisas nunka a yega di mira Hesus, por a rekonos’é? Wèl, Hudas lo a duna nan un señal. El a bisa: “Esun ku mi sunchi, esei t’e; arest’é i bai kuné bon tené pa e no hui.”—Marko 14:44.

Ora Hudas i e multitut ku tabata siguié a drenta e hòfi, Hudas a mira Hesus huntu ku e apòstelnan i a bai direktamente serka dje. El a bisa Hesus: “Saludo, Rabi!” i a dun’é un sunchi ku masha ternura. Hesus a puntr’é: “Kiko bo ta hasi akinan?” (Mateo 26:49, 50) Hesus mes a kontestá su pregunta, bisando: “Hudas, ta ku un sunchi bo ta traishoná e Yu di hende?” (Lukas 22:48) I Hesus no a bisa Hudas nada mas!

Hesus a bai para den lus di e flambeunan i e lampinan i a puntra: “Ken boso ta buska?” E multitut a kontest’é: “Hesus e nazareno.” Anto ku kurashi Hesus a bisa nan: “Ta ami.” (Huan 18:4, 5) Nan a kai abou na suela, pasobra nan no tabata sa kiko tabata spera nan.

Hesus por a probechá di e momento ei pa hui bai den skuridat. Pero e no a hasi esei; al kontrario, el a bolbe puntra nan ta ken nan tabata buska. Ora nan a bolbe bis’é, “Hesus e nazareno,” na un manera kalmu el a bisa nan: “Mi a bisa boso ku ta ami. P’esei, si ta ami boso ta buska, laga esakinan bai.” Asta na e momento krusial ei, Hesus a kòrda riba loke el a yega di bisa mas promé, esta, ku e no ke pèrdè ni ún di su disipelnan. (Huan 6:39; 17:12) Hesus a kuida su fiel apòstelnan pa ni ún di nan no bai pèrdí, ku eksepshon di Hudas, “e yu di destrukshon.” (Huan 18:7-9) P’esei el a bisa e multitut pa laga su fiel siguidónan bai.

Ora ku e sòldánan a lanta para i a kuminsá kana bini riba Hesus, e apòstelnan a realisá kiko tabata pasando. Nan a puntra Hesus: “Señor, dal nan ku spada?” (Lukas 22:49) Promé ku Hesus por a kontestá, Pedro a kue un di e dos spadanan ku e apòstelnan tabatin i a kap orea drechi di Malko, un esklabo di e sumo saserdote, kita afó.

Hesus a mishi ku e orea di Malko i kur’é. Anto el a siña su disipelnan un lès importante ora el a bisa Pedro: “Hinka bo spada bèk na su lugá, pasobra ken ku usa spada lo muri pa medio di spada.” Hesus tabata dispuesto pa laga nan arest’é, pasobra el a bisa: “Kon e Skritura ku ta mustra ku ta asin’akí mester sosodé lo por kumpli?” (Mateo 26:52, 54) El a sigui bisa: “Akaso mi no tin ku bebe e kopa ku mi Tata a duna mi?” (Huan 18:11) Sí, Hesus tabata kla pa hasi tur loke Dios a mand’é, asta pa muri.

Hesus a puntra e multitut: “Ta ku spada i ku klòp boso a bini pa arestá mi komo si fuera ta ladron mi ta? Dia aden dia afó mi tabata sinta den tèmpel ta siña hende, i boso no a arestá mi. Ma tur esaki a sosodé pa asina loke e profetanan a skirbi por a kumpli.”—Mateo 26:55, 56.

E sòldánan, e komandante militar i e ofisialnan di e hudiunan a gara Hesus i mar’é. Ora e apòstelnan a mira esaki, nan a hui bai. Pero “un sierto hóben,” kisas disipel Marko, a keda den e multitut pa sigui Hesus. (Marko 14:51) Ma nan a rekonosé e hóben akí i e multitut a purba di gar’é. Pero el a hui, lagando su paña di lenen atras.